Kalakalisa “Chawana cha Uspiritu”

Twakutakama chinji muze twakupalikisa mashimbu hamwe ni mandumbu jetu a malunga ni a mapwo. Alioze mba mashimbu jacho apwe a utakamiso, twatamba kulinga yuma yinji hi wika ko kupwa hamuwika. Mbimbiliya yakuvuluka uhashi uze tukwete wa kulitakamisa umwe ni mukwo ku ufulielo ngwe “chawana cha uspiritu.” (Roma 1:11, 12) Kuchi mutuhasa kukalakalisa chawana chacho?

Kolweza akwenu kupalikila mu yize mwamba. Ngwe chilweza, muze mukumbulula ha kukunguluka, sako tachi hanga uhone kuhanjika chinji hakutwala ku mwono we, hanji ha manyonga je. Alioze, hanjika hakutwala ku yize walilongesa hali Yehova, ha Liji lienyi Mbimbiliya ni hali tuvumbi twenyi ashishika. Chikwo nawa, muze muupwa hamwe ni mandumbu, hanjika yuma yize muyihasa kutakamisa ufulielo wo.

Kolweza akwenu kupalikila mu yiyulo yize mukwata ni yuma yize mulinga. Ngwe chilweza, muze akwenu mamona ngwe wakusa tachi hanga ununge mu mulimo wa shimbu lieswe chipwe ngwe kuchishi kupwa chashi kuli yena, chino muchihasa kwatakamisa. Hanji nawa mamona ngwo, wakusa tachi hanga upwe ha kukunguluka cha hakachi ka poso chipwe ngwe wakupinda ni umwe musongo, hanji kuhonga mumu lia kulinga milimo yinji ha tangwa.

Shina muhasa kutakamisa mandumbu je kupalikila mu yize wakwamba hanji wakulinga? Chikwo nawa, shina wakumona yize mandumbu je akwamba ni yize akulinga hanga no akutakamise?