‘ Fungenu Kulinunga cha Spiritu’
POSTOLO Paulu katowezele Akwa-Kristu mu Efwesu ngwenyi, nungenu ni ‘kulihumikiza umwe ni mukwo mu zango, ha kulikolweza chinji hanga nupwe ni sambukila umwe ni mukwo, ni kufunga kulinunga chenu chize nwazukile kupalikila mu spiritu yisandu.’—Efwe. 4:2, 3.
“Kulinunga” chize tukwete, chakwiza ku “spiritu.” Chino chinalumbunuka ngwo, kulinunga chacho chakwiza mumu lia ndundo ja Zambi. Alioze ngwe chize Paulu asonekene, twatamba kununga ni kulinunga. Mumu liaka? Mumu Mukwa-Kristu mweswe kali ni chiteli chinene cha kukwasa ‘kulinunga cha spiritu.’
Mba tunyingike kanawa yize tunambe kwamba, tuchinyongenu ngwetu umwe matwaha mashinyi aha. Mba mashinyi jacho anunge ni kwenda kanawa, iya watamba kwalulieka muze mapihia? Yetu tunanyingika kanawa kumbululo. Nyi ngwe yuma yimwe muyipihia ku mashinyi jacho, yena kuuchi kusuma mulonga mutu yoze wakuhele mashinyi mumu yena mwe kuwafungile kanawa mashinyi jacho.
Chizechene nawa, kulinunga chetu chili chawana chize atuhele kuli Zambi. Kashika mutu ni mutu, kali ni chiteli cha kufunga kulinunga chino. Nyi ngwe kutushi ni usepa upema ni mandumbu jetu, mutuhasa kulihula ngwetu, ‘Shina ngunalingi chihanda chami hanga ngufunge kulinunga cha spiritu ha kuhwisa kapinda ni ndumbwami?’
NUNGENU NI KUFUNGA KULINUNGA CHENU
Ngwe chize Paulu asonekene, kuchichi kupwa chashi mashimbu eswe kufunga sambukila ni mandumbu jetu, chipi-chipi muze umwe matulemeka ku mbunge. Shina mashimbu eswe twatamba kuhanjika ni mutu yoze watulemeka ku mbunge hanga tuhwise kapinda wetu mba tufunge kulinunga chetu? Ka, hi chocho ko. Lihule ngwe, ‘Shina nyi munguchilinga munguhasa lume kuhwisa kapinda wacho, nyi maliwezela nawa?’ Ha mashimbu amwe, jila yipema ya kuhwishilamo kapinda wacho, yili kukonekena mutu wacho ni kuvulama yize yalingiwa.—Yishi. 19:11; Marku 11:25.
Lihule ngwe, ‘Shina nyi munguchilinga munguhasa lume kuhwisa kapinda wacho, nyi maliwezela nawa?
Ngwe chize postolo Paulu asonekene, tunungenu ni ‘kulihumikiza umwe ni mukwo mu zango.’ (Efwe. 4:2) Umwe mukanda wakulumbununa maliji wano ngwo, “atambulenu ngwe chize ayo apwa.” Chino chinalumbunuka ngwo, twatamba kumona mandumbu jetu ngwo no kali yihenge ngwe yetu. Yetu eswe tunazange kusa tachi hanga tuzale “utu waha.” (Efwe. 4:23, 24) Alioze niumwe wa kuli yetu mahasa kulinga yuma ni ungunu weswe wakuhi. (Roma 3:23) Nyi twatayiza nyonga lino, muchipwa chashi kulihumikiza ni kulikonekena umwe ni mukwo ni ‘kufunga kulinunga cha spiritu.’
Mutupwa ni sambukila ni “kufunga kulinunga” mu chikungulwila, nyi mutukonekena akwetu ni kuvulama yuma yize atulinga. Liji lia Ngregu analumbununa ngwo, “kufunga kulinunga” ha A-Efwesu 4:3, kanalilumbununa nawa ngwo, “kukakaminya” ha A-Kolosu 2:19. Ngwe chizechene yicheu-cheu yakukwasa yifwaha hanga yilinunge chimwe ni chikwo, sambukila ni zango hali mandumbu jetu neyo, yakutukwasa kukundama kuli ayo chipwe ngwe ha mashimbu amwe malinga yuma yize kutushi kuzanga.
Kashika muze umwe ndumbu makulemeka ku mbunge, makuvwisa chinyengo hanji kukuvwisa uli, eseka kumusolwela keke shimbu umukekune mumu lia yize akulinga. (Kolo. 3:12) Kwamba pundu, yetu eswe tuli yihenge, nawa ha mashimbu amwe hitunevwisa akwetu yikola ku mbunge. Kupwa ni nyonga lino, muchikukwasa kulinga chihanda chetu hanga tufunge kulinunga cha spiritu.’