Kunjikenu Yipikalo Yenu Yeswe Kuli Yehova

1, 2. (a) Mumu liaka twakumona yipikalo? (Tala chizulie ha uputukilo.) (b) Yika mutulilongesa mu mutwe uno?

MUSONO, Satana, “ngwe ndumba wa kuhanjika ni lundunjila kakwendangana nikufupa yoze mahasa kuumbula.” (1 Petulu 5:8; Usolwelo 12:17) Hachino, mwono kuushi kanawa. Ni tuvumbi twa Zambi no kakumona yipikalo yinji. Tuvumbi twa Zambi a kushakulu no kapalikile mu yipikalo yinji. Chakutalilaho, Mbimbiliya yakwamba ngwo Mwanangana Ndawichi kevwile chinyengo ha mashimbu amwe. (Samu 13:2) Postolo Paulu neye yalipikala ha “kukwasa yikungulwila yeswe.” (2 A-Korindu 11:28) Yika mba twatamba kulinga muze mutupwa ni yipikalo yize muyitunehena chinyengo?

² Tata yetu wa mu malilu kakwashile tuvumbi twenyi a kushakulu ahwime ku yipikalo yize apwile nayo, mba kanazange atukwase ni yetu nawa musono. Mbimbiliya yakutukolweza ngwo: “Kunjikenu yipikalo yenu yeswe kuli iye, mumu iye kakunufunga.” (1 Petulu 5:7) Kuchi mutuhasa kulinga chocho? Tutalenu ha jila jiwana. Mutuhasa (1) kulemba, (2) kutanga ni kupukuna Liji lia Zambi, (3) kwita spiritu yisandu ya Yehova hanga yitukwase, ni (4) kuhanjika kuli yoze twafuliela hachize tunevu ku mbunge yetu. Muze mututala ha yikuma yacho, tunyongenu ha yuma yize mutululieka mu mwono wetu.

“MBILA CHITELI CHE HALI YEHOVA”

3. Kuchi mutu mahasa ‘kumbila chiteli chenyi hali Yehova’?

³ Jila yitangu mutuhasa kumbililamo yipikalo yetu hali Yehova yili kulemba kuli iye ni mbunge yeswe. Muze mutupwa ni yipikalo, Tata yetu wa zango kanazange hanga tumulweze chize tunevu ku mbunge. Mukwa-kwimba masamu Ndawichi yalemba kuli Yehova ngwenyi: “Zambi, panjika kama ku kulemba chami.” Mu samu yiyene, Ndawichi yamba nawa ngwenyi: “Mbila chiteli che hali Yehova, iye makakukolesa.” (Samu 55:1, 22) Nyi hitwalinga kulu yize mutuhasa hanga tuhwise yimwe yipikalo, kulemba kuli Yehova ni mbunge yeswe muchitukwasa chinji. Kuchi mba kulemba chakutukwasa? Kuchi muchitukwasa muze tunalipikala ni chinyengo?—Samu 94:18, 19.

4. Mumu liaka kulemba chili chilemu chinji muze mutulipikala?

⁴ Tanga A-Fwilipu 4:6, 7. Kuchi Yehova akutukumbulula muze mutununga ni kulemba kuli iye ni mbunge yeswe? Mahasa kuunjisa mbunge jetu twehuke kunyonga yuma yipi. Sapu tulipikale chinji ni kwivwa woma, Zambi matukwasa tupwe ni sambukila yinji ku mbunge. Mandumbu jetu anji hanevu sambukila yacho. Ni yetu mutuhasa kupwa nayo. “Sambukila ya Zambi” muyihasa kutukwasa mu hita yipikalo mutupwa nayo! Twatamba kufuliela chilakenyo cha Yehova, chakwamba ngwo: “Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa.”​—Izaia 41:10.

SAMBUKILA YA KU MBUNGE, KUKATUKA MU LIJI LIA ZAMBI

5. Kuchi Liji lia Zambi mulihasa kutukwasa tupwe ni sambukila mu mbunge?

⁵ Jila yamuchiali yize muyihasa kutukwasa tupwe ni sambukila mu mbunge yili kutanga ni kupukuna yisoneko ya Mbimbiliya. Mumu liaka chino chili chilemu? Mbimbiliya yili Liji lia Zambi. Yikwete maliji a mana akukatuka kuli Sakatanga, waze mahasa kutukwasa. Heswaho mutuvwila chinyengo hanji yipikalo, mutuhasa kunyonga chinji ha yishinginyeka ya Zambi ni kupukuna ha chize chiyulo chenyi muchihasa kututakamisa. Achi muchitukwasa kuhwisa, kukehesa hanji kwehuka yipikalo. Yehova ngwenyi, kutanga Liji lienyi chakukwasa mutu ‘atakame,’ ni ‘kuhamuka’ hi ‘kwivwa woma hanji mwongo’ ko.​—Yoshua 1:7-9.

6. Kuchi mutuhasa kuyuka ku maliji ja Yesu?

⁶ Twakutanga mu Mbimbiliya chize Yesu apwile ni kuhanjika ni atu. Atu kazangile chinji kumupanjika mumu maliji jenyi te kakulembejeka ni kuneha uhwimino, chipi-chipi kuli waze te anahongo ni kulemewa mu mbunge. (Tanga Mateu 11:28-30.) Yesu kapwile ni kulihulumba chinji hali akwo. (Marku 6:30-32) Yesu mahasa kutukwasa musono ngwe chize alakenyene apostolo waze apwile ni kwenda nenyi. Kutwatambile kupwa hamwe ni Yesu mba tuyuke. Yesu kali Mwanangana mu malilu, alioze kananungu ni kusolola zango hali yetu. Kashika, muze mutupwa ni yipikalo, tufulielenu ngwetu, matukwasa ha shimbu lialita. Yesu kakutwaha kutalatala ni hamu lize mulitukwasa tukumbe kanawa yipikalo yetu.​—A-Hepreu 2:17, 18; 4:16.

YITANGA YIZE YAKUKATUKA KU SPIRITU YA ZAMBI

7. Kuchi twakuyuka ha kwita spiritu yisandu ya Zambi?

⁷ Yesu kalakenyene ngwenyi, Tata yetu mahasa kutwaha spiritu yenyi muze mutumwita yo. (Luka 11:10-13) Kuchi jila yino yamuchitatu muyihasa kutukwasa kukehesa yipikalo yetu? Spiritu yisandu ya Zambi, chipwe ngwetu, tachi jenyi jingunu, yakutukwasa tupwe ni yitanga yipema yize atwama nayo Zambi yetu mukwa-ndundo-jeswe. (A-Kolosu 3:10) Mu Mbimbiliya, yitanga yacho kayivuluka ngwo “mihuko ya spiritu.” (Tanga A-Ngalashia 5:22, 23.) Muze mutupwa ni yitanga yipema, mutupwa ni usepa upema ni akwetu, nawa mutwehuka yuma yize muyihasa kutunehena yipikalo. Tutalenu chize mihuko ya spiritu muyihasa kutukwasa.

8-12. Kuchi mihuko ya spiritu yisandu ya Zambi muyihasa kutukwasa?

⁸ “Zango, ni uwahililo, ni sambukila.” Nyi mutusa akwetu vumbi, kutuchi kupwa chinji ni yipikalo. Mumu liaka? Nyi mutusolola zango kuli mandumbu jetu ni kwaasa vumbi, mutwehuka kulinga yuma yize muyitunehena manyonga api, uli, kupihilila ni kuhonga ku mbunge. Chino muchitukwasa hanga tununge kupwa ni sambukila ni akwetu.​—A-Roma 12:10.

⁹ “Kulihumikiza, utu ni upeme.” Mbimbiliya yinambe ngwo: ‘Pwenu ni utu umwe kuli mukwo, akwa mbunge ja kwivwa keke, nikulikonekena umwe ni mukwo.’ (A-Efwesu 4:32) Nyi twakaula maliji wano, mutupwa ni sambukila ni akwetu, ni kwehuka yuma yize muyitunehena yipikalo. Chino muchitukwasa nawa tutale ha hita ukalu uze muusoloka mumu lia uhenge wetu.

¹⁰ “Kushishika” hanji ufulielo. Musono, twakulipikala chinji hakutwala ku mbongo ni yikumba. (Yishima 18:11) Yika muyihasa kutukwasa hanga twehuke yipikalo yacho? Twatamba kukaula fumbo lia Paulu liakwamba ngwo, ‘wahililenu ni yuma yize nuli nayo.’ Kufuliela chinji Yehova muchitukwasa tumujikijile ngwetu mapwa ni kutwaha yize yinafupiwa mu mwono wetu. Mwene kanalakenya ngwenyi: “Chichi kukuhichika nichimwe, chipwe kukwehuka, ka.” Hachino ni kuhamuka cheswe mutuhasa kwamba ngwe Paulu ngwetu, ‘Yehova iye chikwashi chami; chichi kevwa woma. Atu yika mangulinga?’​—A-Hepreu 13:5, 6.

¹¹ “Kushimbika, ni kusuula.” Uchinyongenu hachize yitanga yacho muyihasa kutukwasa mu mwono wetu. Yitanga yino muyitukinda tuhone kulinga hanji kwamba yize muyitunehena yipikalo, nawa muyuka chinji ha kwehuka “ufwatulo, utenu, zungo, ni kutukana.”​—A-Efwesu 4:31.

¹² Mutu katamba kulikehesa mba afuliele ku “kwoko lia ndundo lia Zambi” ni ‘kukunjika yipikalo yenyi yeswe kuli iye.’ (1 Petulu 5:6, 7) Nyi twakulipalumwisa, Yehova matukwasa ni kutufunga. Nyi mutunyingika yize mutuhasa kulinga ni yize kutuchi kuhasa kulinga, kutuchi kufuliela muli yetwene. Hachino kutuchi kupwa ni yipikalo yinji, mumu twakufuliela pundu muli Zambi.​—Mika 6:8.

“KANDA NULIPIKALA”

13. Muli atalikishile Yesu hakwamba ngwenyi: “Kanda nulipikala”?

¹³ Mu Mateu 6:34 (tanga), twakuwanamo utowezo wa Yesu wakwamba ngwenyi: “Kanda nulipikala.” Utowezo wenyi wakusoloka ngwe ukalu chinji kuukaula ku mwono wetu. Mba mulihi Yesu te anatalikisa ha kwamba maliji wano? Hitwalilongesa ngwetu ha mashimbu amwe, Ndawichi ni Paulu te kakulipikala ku mbunge. Kashika, Yesu te keshi kwamba ngwenyi, mutu yoze mawayila Zambi keshi keza kalipikala ku mbunge. Alioze, iye kapwile ni kukwasa tumbaji twenyi hanga anyingike ngwo kulipikala chinji chipwe ha yuma yize kuyalitele kuchishi kuhwisa kapinda yoze tuli nenyi. Mutupwa ni kumona yimwe yipikalo hita tangwa, kashika akwa-Kristu katambile kuwezela kulipikala cho ha kunyonga ha yuma yize hiyinapalika hanji ukalu uze mutunyonga ngwetu mutukamona kulutwe. Kuchi mba utowezo wa Yesu muuhasa kutukwasa tuhone kulipikala chinji?

14. Ngwe Ndawichi, yika muyihasa kutukwasa hanga tuhone kulipikala chinji?

¹⁴ Atu amwe kakulipikala chinji ha tupalia waze alingile ku matangwa akunyima. Kakwivwa kupiha ha yize alingile chipwe ngwe himwapalika miaka yinji. Ha mashimbu amwe Mwanangana Ndawichi yevwa kupiha hamukunda wa tupalia twenyi. Mba yamba ngwenyi: “Hinateta mumu ha kupinda cha mbunge yami.” (Samu 38:3, 4, 8, 18) Ha shimbu liacho, Ndawichi yalinga chimwe chuma cha mana. Yafuliela ngwenyi Yehova mamuvwila keke ni kumukonekena. Mba yawahilila chinji hakunyingika ngwenyi Zambi kamukonekenene.​—Tanga Samu 32:1-3, 5.

15. (a) Yikwo yika twalilongesa hali Ndawichi? (b) Yika twatamba kulinga hanga tuhone kulipikala chinji? (Tala kasha “Yuma Yize Muyitukwasa Tuhone Kulipikala Chinji.”)

¹⁵ Ha mashimbu amwe mutuhasa kulipikala ha yize yinalingiwa haliapwila. Chakutalilaho, hakusoneka Samu 55, Ndawichi te woma anevu ngwenyi mamushiha. (Samu 55:2-5) Nihindu, yipikalo yacho kuyakamulingishile ahone kufuliela muli Yehova. Ndawichi yeta Yehova amukwase ha kapinda yoze apwile nenyi, chipwe ngwe kanyingikine ngwenyi neye te katamba kulinga yimwe ha kapinda wacho. (2 Samuele 15:30-34) Mutuhasa kulilongesa yimwe hali Ndawichi. Sapu tulipikale chinji, tusenu tachi ni kweseka kutala ha ukalu tuli nawo, ni kufuliela ngwetu Yehova matukwasa.

16. Kuchi ulumbunwiso wa jina lia Zambi muuhasa kutakamisa ufulielo wetu?

¹⁶ Ha mashimbu amwe, mukwa-Kristu mahasa kulipikala chinji ha yuma yize muyihasa kusoloka kulutwe lia matangwa. Alioze kutwatambile kulipikala chinji ha yuma yize kanda yichilingiwa. Mumu liaka? Mumu kanji-kanji yuma kuyishi kupwa ngwe chize twapwile ni kuyinyonga. Chikwo nawa, tunyingikenu ngwetu kukushi chuma nichimwe chize Zambi mahona kukumba. Jina lienyi linalumbunuka ngwo “Nguli chize Nguli,” chekwamba kakulingisa yuma yipweko. (Kutuhuka 3:14) Kashika, kutwatambile kulipikala chinji ha yuma ya kulutwe, mumu jina lia Zambi linasolola ngwo upale wenyi hali atu muukamanunuka. Tufulielenu pundu ngwetu Zambi mapala atu waze ashishika ni kwaakwasa ahone kulipikala chinji ha yuma yize hiyinapalika, yize yinalingiwa musono ni ya kulutwe lia matangwa.

KUHANJIKA NI MUTU YOZE TWAKUJIKIJILA CHINJI

17, 18. Kuchi kuhanjika kanawa ni akwetu muchihasa kutukwasa muze mutulipikala ku mbunge?

¹⁷ Jila yamuchiwana yize muyitukwasa muze mutulipikala ku mbunge yili kuhanjika ndusu ni mutu yoze twakujikijila. Mutu twalimbata nenyi, sepa lietu hanji mukulwana wamu chikungulwila mahasa kutukwasa hanga tutale kanawa ha ukalu wetu. Mbimbiliya yakutulweza ngwo: “Kulema mu mbunge ya mutu kuchakumuhongesa, alioze liji lipema kuliakumuwahisa.” (Yishima 12:25) Yakwamba nawa ngwo: “Nyi kukushi chiyulo kuhala kuchichi kulumbunuka, alioze ku wunji wa akwa chiyulo kakuchikolesa.”​—Yishima 15:22.

¹⁸ Kukunguluka chetu cha mu chikungulwila necho chakutukwasa tuhone kulipikala chinji ku mbunge. Muze twakulikungulula hita poso, twakupwa hamwe ni mandumbu jetu waze atuzanga nawa akufupa kutukolweza. (A-Hepreu 10:24, 25) ‘Kulikolweza umwe ni mukwo’ chakututakamisa ni kutukwasa hanga tuhone kulipikala chinji.​—A-Roma 1:12.

USEPA WETU NI ZAMBI WE WATAMBA KUTUTAKAMISA CHINJI

19. Mumu liaka twatamba kupwa ni shindakenyo ngwetu usepa wetu ni Zambi muuhasa kututakamisa?

¹⁹ Umwe mukulwana wamu chikungulwila ku Canadá yalilongesa mwakumbilila yipikalo yenyi hali Yehova. Kapwile ni mulimo ukalu wakulongesa akwa-shikola ni kwaaha fumbo, aku te kanapinda ni umwe musongo. Yika ya kumwaha tachi? Chinene, aye kakusa tachi hanga apwe ni usepa ukolo ni Yehova. Masepa apema no kamukwasa chinji ha mashimbu alamba, nawa kakulweza pundu mukwo-pwo chize akwivwa ku mbunge. Makulwana ni akwo ni kalayi wa mbonge kamukwashile chinji hanga amone ukalu wenyi ngwe chize Yehova akuumona. Ni ndotolo nawa kakwashile ndumbu yono hanga anyingike kanawa musongo wenyi. Chino chamukwashile kwalumuna mwono wenyi ni kupwa ni mashimbu akuhwima ni kuheha. Kutwala muze, yamona chize atamba kulifunga mwene ni kufunga manyonga jenyi. Hachino, muze mukusoloka kapinda yoze keshi kuhasa kulihumikiza nenyi, iye kakujikijila hali Yehova hanga amukwase.

20. (a) Kuchi mutuhasa kumbila kapinda ketu hali Zambi? (b) Yika mutulilongesa mu mutwe uze muusulaho?

²⁰ Mu mutwe uno, twalilongesa ulemu wa kumbila kapinda wetu hali Zambi ha kulemba ni ha kutanga Liji lienyi ni kulipukuna. Twalilongesa nawa ulemu wakwita spiritu yisandu ya Yehova hanga yitukwase, ni kuhanjika ni atu waze twakujikijila ni kuya kukunguluka chetu. Mu mutwe muusulaho, mutulilongesa chize Yehova akutukwasa hakutwaha kutalatala cha yiwape yize mutukatambula kulutwe lia matangwa.​—A-Hepreu 11:6.