Mukwa-Ndundo-Jeswe, Alioze Kakulihulumba Hali Atu
“[Yehova] kananyingika mijimba yetu; kanewuluka ngwenyi, o kapwa fufuta.”—SAMU 103:14.
1, 2. (a) Kuchi chize Yehova akufunga atu chalisa ni chize akulinga atu waze akwete ndundo? (b) Yika mutushimutwina ha mutwe uno?
KANJI-KANJI atu waze akwete ndundo kakuyula chipi akwo hanji kwamwesa lamba. (Mateu 20:25; Chilumbununyi 8:9) Alioze Yehova keshi kuchilinga! Chipwe ngwe kali Mukwa-Ndundo-Jeswe, mu malilu ni hashi, nihindu kakulihulumba hali atu yihenge. Iye kapwa chimbovu nawa kakutukwasa ha chize tunevu ni yize tunafupiwa. Kakwiwuluka ngwenyi tuli yihenge nawa kanyingika ngwenyi kutushi kuhasa kulinga yeswe, kashika keshi kutwita hanga tulinge yuma yize kutuchi kuhasa.—Samu 103:13, 14.
2 Mu Mbimbiliya, twakulilongesamo chize Yehova akulihulumba hali atu jenyi. Tushimutwinenu yilweza yitatu: Chitangu, chize Yehova akwashile mukweze Samuele hanga ambujole sango ja upatwilo kuli Sasendote wa Lutwe Eli. Chamuchiali, chize Yehova akolwezele Mose muze evwile ngwe kechi kuhasa kutuhwisa vungu lia Izalele mu Engitu. Chamuchitatu, chize Yehova akwashile A-Izalele muze te hatuhuka mu Engitu. Mba yika mutulilongesa hakutwala kuli Yehova ha yilweza yino, nawa kuchi mutuhasa kumwimbulula?
YALIHULUMBA HALI UMWE KANUKE
3. Chuma chika chalipwila chize chalingiwile kuli kanuke Samuele ha umwe ufuku, nawa chihula chika mutuhasa kulihula? (Tala chizulie ha uputukilo.)
3 Samuele kaputukile kulingila Yehova ku tabernakulu muze te uchili kanuke. (1 Samuele 3:1) Ha umwe ufuku, muze te anapombo, yikulingiwa chimwe chuma chalipwila.a (Tala maliji mushi lia lifwo.) (Tanga 1 Samuele 3:2-10.) Iye yevwa umwe unasanyika jina lienyi. Samuele yanyonga ngwenyi te kanamusanyika kuli Eli, Sasendote wa Lutwe. Hachino, ni vumbi lieswe yakatuka yaya kuli Eli, nikwamba ngwenyi: “Yami uno; mumu wangusanyika.” Alioze Eli yamulweza ngwenyi: “Chakusanyikine.” Muze chuma chacho hichalingiwa ha yisuho yaali, Eli yanyingika ngwenyi, Zambi mwe te unasanyika Samuele. Hachino, Eli yalweza Samuele chize te makumbulula ha chisuho chikwo, Samuele yalinga chocho. Mba mumu liaka Yehova kakalwezele Samuele ngwo iye mwe te unamusanyika? Mbimbiliya kuyishi kulumbununa chikuma chacho. Alioze, kota Yehova kalingile chino mumu te kakulihulumba ha chize Samuele apwile ni kwivwa.
4, 5. (a) Yika Samuele alingile muze Yehova amuhele sango hanga alweze Eli? (b) Yika sango jino jinatulongesa hakutwala kuli Yehova?
4 Tanga 1 Samuele 3:11-18. Shimbi ya Yehova yambile ngwo ana katamba kuvumbika makulwana, chipi-chipi waze te akwete yiteli. (Kutuhuka 22:28; Ulevi 19:32) Kashika, te kuchalitele mukweze ngwe Samuele kuya kuli Eli chimene, hanga amulweze sango ja upatwilo wa Zambi. Mbimbiliya yinambe ngwo Samuele “te woma anevu wa kulweza usolwelo kuli Eli.” Alioze Zambi yatoweza Eli ngwenyi iye mwe te unasanyika Samuele. Mba Eli yeta Samwele ahone kumuswekela yize amulwezele kuli Zambi. Samuele yononoka kuli Eli, chocho “yamulweza ye yeswe.”
Yehova kakwashile Samuele hanga anunge ni kwononoka ni kupwa ni vumbi
5 Sango jacho kujakapwile lume jaha, mumu chitangu “kwejile umwe mutu wa Zambi” ni kulweza Eli sango jalifwa. (1 Samuele 2:27-36) Sango jino jinatulongesa mana ja Yehova ni chize akulihulumba hali atu jenyi.
6. Yika mutuhasa kulilongesa ha chize Zambi akwashile mukweze Samuele?
6 Shina uchili mukweze? Nyi uli mukweze, lusango wa mukweze Samuele kanasolola ngwo Yehova kananyingika yipikalo ye ni chize wakwivwa. Hanji wakwivwa sonyi nawa chakukukalila kwambujola kuli makulwana hanji kufupa kulisa ni akwenu. Muhasa kupwa ni shindakenyo ngwe Yehova makukwasa. Kashika lemba kuli iye umulweze chize wakwivwa. (Samu 62:8) Pukuna kanawa ha yilweza ya akweze yize yili mu Mbimbiliya ngwe cha Samuele. Nawa hanjika ni mandumbu waze uli no miaka yimuwika hanji makulwana waze akumbile kapalia wacho. Ayo mahasa kukulweza chize Yehova aakwashile, hanji iye kachilingile mu mutapu uze te keshi ni kushimbwila.
YALIHULUMBA HALI MOSE
7, 8. Kuchi Yehova asolwele ngwenyi te kakulihulumba chinji hali Mose?
7 Muze Mose te ali ni miaka 80, Yehova yamwaha chimwe chiteli chikalu chakuya ni kutusula vungu lia A-Izalele mu undungo ku Engitu. (Kutuhuka 3:10) Mulimo wacho kota wapinjishile chinji Mose, mumu te kakufunga mapanga ku Mindiane ha miaka 40. Chocho Mose yamba ngwenyi: “Yami iya mba nguhase kuya kuli Falau nikuchiza A-Izalele ku Engitu?” Yehova yalweza Mose ngwenyi: “Kumungukapwa hamwe ni yena.” (Kutuhuka 3:11, 12) Yehova yamulakenya nawa ngwenyi, makulwana A-Izalele te ‘mamupanjika.’ Nihindu Mose yamba ngwenyi: “O kechi kangufuliela chipwe kupanjika ku liji liami, ka.” (Kutuhuka 3:18; 4:1) Chinasoloka ngwe Mose te kanambe ngwenyi yuma anambe Yehova kuyishi kulita! Alioze Yehova yalihumikiza hali Mose. Mba yamwaha nawa ndundo hanga alinge yikomokeso. Kwamba pundu, Mose kali mutu mutangu mu Mbimbiliya yoze wapwile ni ndundo jacho.—Kutuhuka 4:2-9, 21.
8 Chipwe hanyima lia yino yeswe, nihindu Mose yafupa jila yikwo yakulitunyinamo chiteli chacho. Yamba ngwenyi, te kanyingikine kuhanjika kanawa. Chocho Zambi yamwamba ngwenyi: “Mungukapwa ni kanwa lie; mungukakulongesa chize muhanjika.” Shina Mose yatayiza? Ka, yalweza Zambi hanga amwehe chikwashi. Mba Yehova yatenuka. Alioze, yanunga ni kulihulumba hali Mose, chocho yamwaha Arone hanga amukwase.—Kutuhuka 4:10-16.
9. Kuchi kulihumikiza ni umbovu wa Yehova yakwashile Mose kupwa kasongo mupema?
9 Yika sango jino jinatulongesa hakutwala kuli Yehova? Amu Yehova ali Mukwa-Ndundo-Jeswe, iye kachi kazachishile ndundo jenyi hanga ashinjile Mose kulinga yize amutumine. Alioze Yehova yapwa chimbovu ni kulihumikiza, ni kukolweza kavumbi kenyi wahomboka nawa walikehesa ngwenyi mamukwasa. Shina yino yakwashile lume? Mba, yakwashile! Mose yapwa kasongo munene wa atu ja Zambi. Yasolola umbovu ni kulihulumba hali akwo, ngwe chize Yehova alingile hali iye.—Kwalula 12:3.
Shina wakumona akwenu ngwe chize Yehova akwamona nyi? (Tala paragrafu 10)
10. Yika mutuyuka nyi mutulihulumba hali akwetu ngwe chize akulinga Yehova?
10 Malongeso aka mutulilongesaho musono? Nyi hi unambate, uli chisemi hanji mukulwana mu chikungulwila, ukwete umwe wata hali akwenu. Hachino, chili chilemu kwimbulula Yehova ha kulihulumba, kupwa chimbovu ni kulihumikiza hali mukwenu-pwo, ana je, ni hali mandumbu je mu chikungulwila. (A-Kolosu 3:19-21; 1 Petulu 5:1-3) Nyi muwimbulula Yehova Zambi ni Yesu Kristu, kanda Mose Munene, akwenu mevwa kuwaha kuhanjika ni yena, nawa yena mwakolweza. (Mateu 11:28, 29) Mba mupwa nawa chilweza chipema kuli ayo.—A-Hepreu 13:7.
MUKWA-NDUNDO-JESWE ALIOZE KAKULAMWINA
11, 12. Yika Yehova alingile mba atu jenyi evwe ngwo kali akufungiwa nawa kali ni ukulungunga muze te haatuhwisa mu Engitu?
11 A-Izalele waze atuhukile mu Engitu ha mwaka 1513 muze Kristu te kanda eza, kota kahianyine ha tununu atatu a tununu. Mukachi ko mwapwile twanuke, tushinakaji, ni amwe nawa waze te anayiza hanji yitonji. Atu jacho kapwile ni kufupiwa umwe Kasongo yoze maasa mbunge. Che Yehova apwile, kupalikila muli Mose. Hachino, A-Izalele yalivwa ngwo kumaafunga kanawa muze apwile ni kuhichika chifuchi cho chize asemukinyine.—Samu 78:52, 53.
12 Kuchi Yehova alingile mba atu jenyi evwe ngwo kali akufungiwa kanawa, nawa kali ni ukulungunga? Iye kaluliekele vungu lia Izalele mu “mikana” muze te anatuhuka mu Engitu. (Kutuhuka 13:18) Amu apwile akululieka kanawa, ayo kamwene pundu ngwo Zambi yo kanamono yize anapalika. Yehova nawa yaaha ‘lelwa ha mwalwa’ alioze “ha ufuku pangu lia kahia,” hanga ewuluke ngwo iye kali hamwe no ni kwasongwela ni kwafunga. (Samu 78:14) Vungu lia Izalele liafupiwile yuma yino mumu lia yize te muyilingiwa kulutwe lia matangwa.
Kuchi Yehova afungile A-Izalele ha Kalunga-Lwiji-Muchila? (Tala paragrafu 13)
13, 14. (a) Kuchi Yehova akwashile A-Izalele ha Kalunga-Lwiji Muchila? (b) Kuchi Yehova asolwele ngwo kapwile ni ndundo jinji kuhiana A-Engitu?
13 Tanga Kutuhuka 14:19-22. Achinyonga ngwe uli hamwe ni A-Izalele. Hi nwafwa mu muheto. Tujita twa A-Engitu kaneza kunyima lienu, kulutwe nawa kuli Kalunga-Lwiji-Muchila. Mba Zambi malinga chimwe. Nguji lia lelwa lize te lia kupwa kulutwe mulifuna hanyima lia chilombo, hi mulipwa mukachi ka yenu ni A-Engitu. Haliapwila A-Engitu kali mu milima, alioze mu chilombo chenu muli zwalala ni pangu lia chikomokeso! Chocho hi mumona Mose kanolola kwoko lienyi ha kalunga-lwiji, mba ku chivumbuko himukwiza fuji yinji, yize muyazulula jila mu meya ndo ha sali likwo. Mba ena, asoko je ni yimuna yenu munupalika kanawa mu jila yacho hamwe ni atu akwo. Yena mukomoka mumu haze nunapalika heshi malowa nawa heshi kusenena. Mavu kanomu nawa kanakale mba chili chashi kwendaho. Hachino, chipwe waze akwenda makoke, kanahase kutambuka hanga ahete kawashi kuchana.
14 Tanga Kutuhuka 14:23, 26-30. Muze yino yeswe te yinalingiwa, Falau yoze te mukwa-kulizata nawa chihepuke, maputuka kunukaula munyima. Chocho, Mose molola nawa kwoko lienyi ha kalunga-lwiji, mba meya eswe malitakana. Falau ni tujita twenyi eswe yanjila mu meya. Chocho niumwe wa kuli ayo kechi kulilamwina!—Kutuhuka 15:8-10.
15. Yika lusango yono anatulongesa hali Yehova?
15 Lusango yono kanatulongesa nawa chimwe hali Yehova. Iye kali Zambi yoze wakulinga yuma kanawa, nawa chitanga chino chakutukwasa tulivwe ngwetu tuli akufungiwa kanawa. (1 A-Korindu 14:33) Yehova kakufunga tuvumbi twenyi kanawa ngwe chize akulinga kafunga yoze wakuzanga mapanga jenyi ni kwafunga kanawa. Iye kakwafunga kuli akwa-kole jo. Chino chinatukwasa ni kututakamisa chinji amu tunayi ni kukundama ku songo lia yuma ya mwakono.—Yishima 1:33.
16. Kuchi mutuhasa kuyuka ha kuhengwola mutapu uze Yehova alamwinyinemo A-Izalele?
16 Musono, Yehova nihindu kakufunga atu ngwe chizavu. Kakwakwasa hanga afunge usepa wo ni iye ni kwafunga kuli akwa-kole jo. Mba manunga ni kuchilinga ndo ha luyinda munene yoze kwasala hakehe aputuke. (Usolwelo 7:9, 10) Kashika, tuvumbi twa Zambi kechi kazakalala hanji kwivwa woma wa luyinda munene chipwe ngwe kali ni mijimba yipema hanji kayiza, kali akweze hanji makulwana.b (Tala maliji mushi lia lifwo.) Alioze, makalinga yuma yalisa! Ayo makewuluka maliji a Yesu akwamba ngwo: “Muze yino yuma muyiputuka kupwa, hetukenu, nutale kwilu; mumu ukuule wenu unakundama.” (Luka 21:28) Chipwe muze maakalukuka kuli Ngoke, chipwe ngwetu, akwa-mavungu waze ali ni ndundo kuhiana Falau, tuvumbi twa Zambi maakajikijila ha ulamwino wa Yehova. (Ezekiele 38:2, 14-16) Mumu liaka? Mumu kananyingika ngwo Yehova keshi kwalumuka. Iye makasolola nawa ngwenyi kali Chilamwina yoze wakuzanga ni kufunga kanawa tuvumbi twenyi.—Izaia 26:3, 20.
17. (a) Kuchi mutuhasa kuyuka nyi twalilongesa sango ja Mbimbiliya hakutwala ku chize Yehova akulihulumba hali atu jenyi? (b) Yika mutulilongesa ha mutwe muusulaho?
17 Ha mutwe uno, twamonaho yilweza ya chize Yehova alihulumbile hali atu jenyi ha kwafunga, kwasongwela ni kwalamwina. Muze mutupukuna ha sango jino, mutulilongesa yimwe hakutwala kuli Yehova yize kanda te tuchinyingika kama. Muze mutulilongesa chinji hakutwala ku yitanga yipema ya Yehova, zango ni ufulielo wetu hali iye muyikola chinji. Ha mutwe uze muusulaho, mutulilongesa majila waze mutuhasa kwimbulwilamo Yehova ha kulihulumba hali asoko jetu, mandumbu mu chikungulwila ni hali atu waze twakuwana mu munda.
a Ka-Yunda, Josefo, mukwa-kuhengwola sango ja shakulu kambile ngwenyi ha mashimbu jacho Samuele kapwile ni miaka 12.
b Chinalite kwamba ngwetu, atu amwe waze makalamwina ha Armagedone makapwa yitonji. Muze Yesu apwile hano hashi, iye kawukile “misongo yeswe ni weji weswe” ni utonji weswe. Yize alingile yinasolola yize makalinga kuli waze makalamwina ha Armagedone. (Mateu 9:35) Waze makahindwisa ku ufwe, kumakahinduka ni mijimba yipema.