Atu Waze Keshi Kulia Yifwo—Yika Mbimbiliya Yakulongesa?

Atu hanji hano hashi kazangile nawa kulia yifwo.

• “Atu jacho keshi kulia yifwo mumu keshi kuzanga kumwesa tushitu lamba, kulinga mazalo, hanji yuma yikwo nawa.”—The Vegan Society.

Atu amwe kakwecha kulia yifwo hi mumu ko wika lia kufunga tushitu, alioze, mumu lia kuzanga kululieka haze atwama, kulifunga ku mwono ni mumu lia uwayilo wo.

• “Kwecha kulia yifwo, chalisa ni yuma yikwo yize atu akulitwamina kulia, mumu kanji-kanji chino atu kakuchimona ngwe mwanda, hanji chiyulo chinatale ha kulinanga, nawa hanji jila ya kupemesenamo hashi.”—Britannica Academic.

Shina kulitwamina kulia yifwo che muchipemesa hashi? Yika Mbimbiliya Yakulongesa?

Chize Sakatanga wetu akumona atu ni tushitu

Mbimbiliya yakulumbununa ngwo Sakatanga wetu Yehova Zambi,a kananyingika ngwenyi atu kahiana tushitu nawa kahanyine chiyulo kuli atu hanga afunge tushitu. (Uputukilo 1:27, 28) Yehova mwe wahanyine shimbi hanga atu alie yifwo ya tushitu. (Uputukilo 9:3) Chipwe chocho, iye keshi kuzanga atu waze akumwesa tushitu lamba.—Yishima 12:10.

Kulita ni Mbimbiliya, kulia yifwo chinatale hali mutu ni mutu.b Yize twakusakula kulia kuyishi kutupwisa alemu kumeso ja Zambi. (1 A-Korindu 8:8) Kashika, kutwatambile kupatwila akwetu mumu lia yize akulia.—A-Roma 14:3.

Jila yize muyikalulieka yuma kulutwe

Mbimbiliya yakusolola ngwo yuma yize twakusakula kulinga ku mwono wetu kuyichi kupemesa yuma hano hashi. Milonga yinji yize akuneha kuli akwa-mafwefwe, kuli atu akwo, ni ku kuhona cha mbongo niumwe mutu kechi kuhasa kuyihwisa. Mbimbiliya yinambe ngwo:

• “Chize chahenga kechi kuhasa kuchilulamisa.”—Chilumbununyi 1:15.

Sakatanga wetu makahwisa yuma yeswe yipi yize tunapalika ku mwono. Mbimbiliya yakuzachisa amwe maliji a yijimbikilo hanga yisolole yize Yehova makalinga.

• “Namwene lilu liaha ni hashi haha; mumu lilu litangu ni hashi hatangu te hiyapalika, ni kalunga-lwiji keshiko nawa.”—Usolwelo 21:1.

Zambi makasalakanyisa manguvulu a hashi, hanji ngwetu “lilu litangu” ni kusaho “lilu liaha,” we Wanangana wenyi wa mu malilu. Wanangana wacho muukanongesa “hashi hatangu,” hanji ngwetu atu waze akulinga yuma yipi, mba muuyula “hashi haha,” che kwamba atu waze akulinga yuma kulita ni shimbi ja Zambi.

Mu Wanangana wa Zambi mwe wika atu makahasa kutwama ni sambukila ni tushitu ni kululieka kanawa hashi.—Izaia 11:6-9.