Kuputuka cha Mwono Ukalu

HAZE lia munda wa Endene, Alama ni Eva yapwa ni kapinda munji. Ayo kanakakalakala chinji hanga apwe ni kulia. Shimbu te amone mitondo ya mihuko yipema, alioze ayo yamona wika mbimbo ni mikalale yize yinasoko mu chihela cho. Yino ye yapwileko muze Alama ni Eva ehukile kuli Zambi, hohene ayo yecha kupwa masepa Jenyi.

Kuhianyisa ngwe yino, Alama ni Eva yafwa. Euluka chino, Zambi te hanaatoweza ngwo munufwa ni nualia ku muhuko wa umwe mutondo. Mba, tangwa lize ayo alile ku muhuko yaputuka kupwa tushinakaji nawa yafwa. Ayo kanakapwa yihepuke hakuhona kwononokena kuli Zambi!

Ana eswe ja Alama ni Eva kanakasemuka muze te atato haahuma kulu mu munda wa Endene. Chino chinalumbunuka ngwo ni ana ni noo te mapwa tushinakaji nawa mafwa.

Nyi te Alama ni Eva kanakononokena kuli Yehova, kachi mwono wo ni wa ana jo unakapwa ni uwahililo unji. Ayo eswe kachi kanakatwama ku miaka yeswe ni uwahililo weswe hano hashi. Niumwe te mapwa kashinakaji hanji kuyiza, chipwe kufwa wakwihi.

Zambi kanazange hanga atu atwame ku miaka yeswe ni uwahililo, nawa Iye hanalakenya ngwo limwe tangwa chino muchikalingiwa. Hi hashi ko wika muhakapema, alioze atu eswe makapwa ni mwono upema. Atu eswe hano hashi makapwa masepa apema umwe ni mukwo nawa ni kuli Zambi.

Alioze Eva te hi nawa sepa lia Zambi ko. Kashika muze iye apwile ni kushita ana, te kakupinda chinji. Te misongo yinji akwivwa. Kwehuka chenyi kuli Yehova chinakamunehena yinyengo yinji, nyi ngwami?

Alama ni Eva kanakapwa ni ana anji a malunga ni a mapwo. Muze asemene mwana mutangu yamuluka ngwo Kene. Mwana wamuchiali yamuluka ngwo Abele. Yika yinakapwa kuli ayo? Yena unayinyingika?