Zambi Yeseka Ufulielo wa Apalahama

YENA muhasa kumona kama yika yize Apalahama analinga? Kali ni yimwe poko, kota ngwe kanambe kushaha mwanenyi. Mumu liaka iye anambe kulinga chuma chino? Chitangu, tutalenu chize Apalahama ni Sara anakasema mwana wacho.

Euluka ngwo, Zambi kanakaalakenya umwe mwana. Alioze chino chinakapwa chikalu chinji, mumu Apalahama ni Sara te hapwa kulu tushinakaji. Chochene, Apalahama, yafuliela ngwo Zambi mahasa kwalumuna chuma chikalu hanga chipwe chashi. Mba yika yinakapwako?

Muze Zambi alingile chilakenyo chenyi, yikupalika mwaka umuwika. Hohene, muze Apalahama te hapwa ni 100 wa miaka, ni Sara neye te hapwa ni 90 a miaka, mba yijipwa ni umwe mwana wa lunga, jina lienyi te Izake. Chenacho Zambi kanakamanununa chilakenyo chenyi!

Mba muze Izake te hakola, Yehova yeseka ufulielo wa Apalahama. Iye yamusanyika ngwenyi: ‘Apalahama!’ Hi Apalahama yakumbulula ngwenyi: ‘Ewa, yami uno!’ Mba Zambi yamba ngwenyi: ‘Anda mwane, wa wika Izake, nawa yako kumulundu uze mungukulweza. Hohene mushaha mwane ni kumuhana ngwe chitapo.’

Apalahama kanakevwa chinyengo hakwiva maliji wano, mumu te kakuzanga chinji mwanenyi. Nawa euluka ngwo, Zambi kanakalakenya ngwo ana ja Apalahama makatunga mu chifuchi cha Kanana. Kuchi chino te muchihasa kulingiwa ni Izake mafwa? Apalahama te kaso kunyingika nichimwe, mba chipwe chocho iye yononokena kuli Zambi.

Muze ahetele kumulundu, Apalahama yakasa Izake nawa yamusa ha chilumbilo chize anakatunga. Hohene iye yakwata poko hanga ashahe mwanenyi. Mba hohene mungelo wa Zambi yamusanyika ngwenyi: ‘Apalahama, Apalahama!’ Ni Apalahama yakumbulula ngwenyi: ‘Ewa, yami uno!’

Zambi yamba ngwenyi: ‘Kanda ulinga upi hali mwana. Haliapwila yami nanyingika ngwami yena uli ni ufulielo unji kuli yami, mumu wanguminyine mwane wa wika.’

Chochene Apalahama kapwile ni ufulielo unji kuli Zambi! Iye te kananyingika ngwo kushi nichimwe chuma chikalu kuli Yehova, nawa ngwo Yehova te mahasa kuhindwisa Izake mu ufwe. Alioze, pundu lume Zambi kakazangile ngwo Apalahama ashahe Izake. Kashika, Zambi yasolola umwe panga yoze te unasakaminya mu mitondo, nawa iye yamba kuli Apalahama hanga ahane panga wacho ngwe chitapo ha chihela cha mwanenyi.