Mwanangana Mupema wa Kasula mu Izalele

JOSIA te kali ni miaka nake wika muze apwile mwanangana wa ku uto, wa minyachi yaali ya Izalele. Te uchili mukweze chinji kupwa mwanangana. Kashika hauputukilo, amwe makulwana yamukwasa kuyula.

Muze te Josia halinga miaka shimbiali ngwe mwanangana iye yaputuka kufupa Yehova. Iye yakaula yilweza ya mianangana apema ngwe Ndawichi, Yehosefate ni Hezekia. Hohene, muze te iye uchili mukweze, Josia yalinga chimwe chuma cha hamu.

Ha kupalika cha miaka, A-Izalele anji te hanapu yingulungulu. Ayo te kakuwayila tuzambi a mahuza. Ayo nawa te kakufulamana kulutwe lia tuponya. Mba, Josia yatuhuka hamuwika ni malunga jenyi nawa yijiya ni kuchiza uwayilo weswe wa mahuza mu chifuchi. Mulimo uno te unji, mumu atu anji te akuwayila tuzambi a mahuza. Yena muhasa kumona hano Josia ni malunga jenyi chize anapalula tuponya.

Hi kulutwe, Josia yasa malunga atatu hanga alulieke tembele ya Yehova. Atu yakunga mbongo yajihana kuli malunga jacho hanga ajilingile mulimo. Muze ayo te analulieka tembele, sasendote wa lutwe Hilekia yawanamo chimwe chuma chilemu chinji. Te mukanda upema wa shimbi uze Yehova atumine Mose hanga asoneke ha mashimbu anji a kunyima. Mukanda wacho te watokele kulu ha miaka yinji.

Mukanda wacho yautwala kuli Josia, nawa iye yamba hanga autange kulutwe lienyi. Muze haupanjika, Josia yahasa kumona ngwo kumana atu kaso kwononokena shimbi ja Yehova. Iye yanyenganyana chinji ha yuma yacho, yasuwa chikuto chenyi, ngwe chize yena muhasa kumona ha chizulie. Iye yamba ngwenyi: ‘Yehova kali ni uli hali yetwe, mumu yisemi jetu kakatulikile shimbi jize jili mu mukanda uno.’

Josia yatuma sasendote wa lutwe Hilekia hanga afupe kunyingika yika yize Yehova malinga kuli ayo. Hilekia yaya kuli Huleda umwe profeta wa pwo, nawa iye yamuhula. Iye yamwaha sango jino ja Yehova hanga ajilweze kuli Josia ngwenyi: ‘Yerusaleme ni atu eswe mamona lamba, mumu ayo kakuwayila tuzambi a mahuza nawa chifuchi hi chazala to ni upi. Alioze amu yena, Josia, unalinga yuma yipema, lamba lino mulikeza muze yena hiwafwa.’