Josia Kapwile ni Masepa Apema

Shina yena unanyongo ngwo chili chikalu kulinga yuma yipema?— Atu anji che akunyonga. Mbimbiliya yinatulweza ngwo chapwile chikalu chinji kuli umwe mukweze yoze te akuvuluka ngwo Josia kulinga yuma yipema. Alioze iye kapwile ni masepa apema waze te akumukwasa. Tulilongesenu hakutwala kuli Josia ni masepa jenyi.

Josia tato te Amone, umwe mwanangana wa A-Yunda. Amone te mupi chinji nawa te kakuwayila tuponya. Muze tato ya Josia afwile, Josia yapwa mwanangana wa A-Yunda. Alioze iye te uchili ni miaka nake! Shina iye kapwile ni yitanga yipi ngwe tato?— Ka, iye kapwile ni yitanga yipema!

Chipwe muze te uchili kanuke, Josia te kakuzanga kwononokena Yehova. Kashika iye anakasakula masepa waze te akuzanga Yehova. Ayo te kakukwasa Josia hanga alinge yuma yipema. Aya te masepa ja Josia?

Umwe wa kuli masepa jenyi te Zefania. Zefania te umwe profeta, yoze watowezele atu a mu Yunda ngwo mukupwa yuma yipi nyi ayo te manunga ni kuwayila tuponya. Josia yapanjika Zefania nawa yanunga ni kuwayila Yehova, hi tuponya ko.

Sepa mukwo wa Josia te Jeremia. Iye ni Josia miaka yimwika te akwete nawa ayo kakolele hamuwika. Ayo te usepa upema akwete kashika muze Josia afwile, Jeremia yasoneka umwe mwaso upema hakutwala ku chize iye evwile ha kufwa cha Josia. Josia ni Jeremia te kakulikwasa umwe ni mukwo hanga alinge yuma yipema nawa ni kwononokena Yehova.

Yika muhasa kulilongesa ha chilweza cha Josia?— Chipwe ngwe Josia te uchili kanuke chinji, nihindu iye kazangile kulinga yuma yipema. Iye te kananyingika ngwo chatamba kupwa sepa lia atu waze akuzanga Yehova. Ni yena chakutamba kusakula masepa waze akuzanga Yehova nawa waze maahasa kukukwasa hanga ulinge yuma yize yalita!