Kuchi Yena Wakunyonga Mbimbiliya?
Wakunyonga ngwo yili . . .
umwe mukanda wa yindele?
umwe mukanda wa yikuma ni Sango jakutomba?
umwe mukanda wa Zambi?
YIKA MBIMBILIYA YINAMBE
“Yisoneko yeswe yili yakuhwima kuli Zambi.”—2 Timoteu 3:16, Tradução do Novo Mundo.
KUCHI MALIJI WANO MAHASA KUKUKWASA
Mbimbiliya muyihasa kukwaha kumbululo lipema lia yihula yilemu ya ku mwono.—Yishima 2:1-5.
Muyihasa kukwaha usongwelo ungunu ku mwono wa tangwa ha tangwa.—Masamu 119:105.
Nawa muyihasa kukwaha kutalatala chingunu cha kulutwe lia matangwa.—A-Roma 15:4.
CHAMWENEMWENE YETWE MUTUHASA KUTAYIZA YIZE MBIMBILIYA YINAMBE?
Ewa, mutuhasa kuyitayiza, ha mukunda wa yitela yitatu:
Kulita chaukomokeso. Mbimbiliya kanakayisoneka kuli amwe 40 a malunga waze te alisa, yinakalinga unji wa 1,600 ja miaka. Anji a kuli malunga jacho kakapwile hamuwika. Chipwe chocho, mukanda weswe walita, nawa uli ni chikuma chimuwika!
Sango jingunu. Akwa sango ja atu ha mashimbu akwo kakusweka uhenge wa atu jo. Alioze, akwa kusoneka Mbimbiliya te atu angunu mumu kanakasolola uhenge wo, ni wa vungu lio.—2 Sango ja Mianangana 36:15, 16; Masamu 51:1-4.
Uprofeto wa ushindakenyo. Muze Mbimbiliya yaprofetizalile unongeso wa mbonge yikulu ya Babilonia, kwapalikile unji wa 200 ja miaka mba yayinongesa. (Izaia 13:17-22) Yakasolwele wika chize te Babilonia mahasa kuyinongesa, alioze yiyisolola nawa jina lia yoze te mayinongesa!—Izaia 45:1-3.
Unji wa uprofeto ukwo wa mu Mbimbiliya hiunamanunuka kanawa mu yimako. Alioze hi yenayi ko te chatutamba kushimbwila mu Liji lia Zambi?—2 Petulu 1:21.
ACHINYONGA KAMA
Kuchi Liji lia Zambi mulihasa kupemesa mwono we?
Mbimbiliya yinakumbulula chihula chino mu IZAIA 48:17,18 ni 2 TIMOTEU 3:16, 17.