Mukweze Yesu

Yosefwe ni Maria kapwile mu Nazare ni Yesu ni ana jo akwo a malunga ni a mapwo. Yosefwe te kakukwasa asoko jenyi hakulinga mulimo wa karpinteru, nawa te kakwaalongesa hakutwala kuli Yehova ni Shimbi jenyi. Ayo eswe te kakuyaya mu sunangonga ni kuwayila, nawa hita mwaka te kakuya ku Chizomboka mu Yerusaleme.

Muze Yesu te ali ni miaka 12, ngwe chako, asoko jenyi yalinga wenyi usuku wa kuya ku Yerusaleme. Mbonge te yinazale too ni atu waze ayile ha chiwanyino cha Chizomboka. Muze chiwanyino hi chahwa, Yosefwe ni Maria yaputuka kufuna ku zuwo ni kunyonga ngwo Yesu kali hamwe ni akwa-wenyi ni akwo. Alioze muze amufupile hakachi ka asoko jo, kakamuwanyine.

Ayo yafuna ku Yerusaleme, yamufupa ha matangwa atatu. Hi kusongo, yaya mu tembele. Momo, Yesu yatwama mukachi ka alongeshi, yaputuka kwaapanjika kanawa ni kwaahula yihula yipema. Alongeshi yakomoka Yesu, chocho yaputuka kumuhula. Nawa yaputuka kukomoka ha makumbululo jenyi. Ayo kahashile kumona ngwo iye te kanyingika kanawa Shimbi ja Yehova.

Yosefwe ni Maria yalipikala chinji. Maria yamba ngwenyi: ‘Mwanami, tunakufupu kwekweswe! Kulihi te uli?’ Yesu yamba ngwenyi: ‘Enu te kunwanyingikine ngwo natamba kupwa mu zuwo lia Tata?’

Yesu yaya ku Nazare hamwe ni yisemi jenyi. Yosefwe yalongesa Yesu mulimo wa karpinteru. Unanyongo ngwe Yesu kapwile mutu wamutapu uka? Muze te Yesu anakola, iye yakola ni mana ni vumbi lia Zambi ni lia atu.