Kwambujola Chalipwila Hanga Tuputuke Malongeso a Mbimbiliya ha Setembro

Ha Setembro, yetweswe mutukasa tachi hanga tukasongwele malongeso a Mbimbiliya kuli hita usoko ha kuzachisa kamukanda, Wahilila Ku Mwono Ku Miaka Yeswe! Akwa-kwambujola mahasa kukalakala ngwe mapionelu a shimbu likehe ha kuhana maola 30. Kuchi kwambujola chino chalipwila mutukachilinga?

• Kusanyika ha Chisuho Chitangu: Zachisa lifwo lia kunyima lia kamukanda hanga ukwase mutu azange lusango, nawa solola chize akusongwela longeso lia Mbimbiliya. Nyonga hali waze anakazanga lusango, ni waze hiunameneka. Chipwe ngwe amwe ku mashimbu akunyima kalitunyine kutayiza longeso lia Mbimbiliya, ayo mahasa kuzanga mulali waha wa kusongwelamo malongeso a Mbimbiliya ni kamukanda kaha. Kutwatambile kuhichika kamukanda ku mazuwo kuze kushi atu hanji kuutuma mu envelope kuli atu waze keshi kuzanga kutayiza umwenemwene. Komite ya Mulimo ya Chikungulwila mahasa kuwezelako matangwa akwo a kutuhuka mu munda ha kakweji wacho.

• Uhashi Ukwo: Nyi mu chikungulwila chenu nwakuzachisa temba lia mikanda, senuho kamukanda, Wahilila Ku Mwono Ku Miaka Yeswe! hanga atu aumone. Lweza waze atayiza sango jipema ngwo kamukanda kano twakulongesa nako atu Mbimbiliya chawana. Ha shimbu lizeliene, solola hakehe chize longeso lia Mbimbiliya akulilinga, hanji kulitesa nenyi hanga ukachilinge ha shimbu lieka. Kalayi wa mulimo mahasa kusakula akwa-kwambujola waze ajama hanga aye ni kwambujola mu ngiza ya akwa-mingoso ni kusongwela malongeso a Mbimbiliya. Yena muhasa nawa kusongwela longeso lia Mbimbiliya kuli waze wakalakala no, hanji kuli atu waze mulitakana no muze unambujola cha susumuku.

Yesu katuhele shimbi ya ‘kutayisa tumbaji’ “nikwalongesa.” (Mat 28:19, 20) Kashika, kwambujola chino chalipwila, muchitukwasa kukaula shimbi yino ha kuzachisa kamukanda, Wahilila Ku Mwono Ku Miaka Yeswe!