Yika Muyikukwasa Kupwa ni Mwono Upema Kulutwe lia Matangwa?

Ngwe chize twamona ha mitwe yapalika, atu anji kakunyonga ngwo mba apwe ni mwono upema kulutwe lia matangwa, katamba kufuliela ngwo yuma yize yakulingiwa ku mwono yapwile kutesa, kulilongesa chinji, kupwa ni mbongo jinji ni kupwa mutu mupema. Alioze, kuzachisa yuma yino hanga mutu apwe ni kutalatala chipema, chili ngwe kuzachisa mapa yize muyitwala mutu kweka. Shina chino chinalumbunuka ngwo, kukushi niumwe usongwelo uze muutukwasa kupwa ni mwono upema kulutwe lia matangwa? Ka, hi chocho ko!

USONGWELO UZE UNAHIANE WA ATU

Muze twakuzanga kukwata chimwe chiyulo, kanji-kanji twakufupa ukwaso wa mutu yoze uli mukulwana wetu hanji uli ni mana anji kuhiana yetu. Chizechene nawa mutuhasa kuwana usongwelo upema wa chize mutuhasa kupwa ni mwono upema kulutwe lia matangwa, kuli mutu yoze uli mukulwana nawa ni mana anji kuhiana yetu. Usongwelo wacho mutuhasa kuuwana mu yisoneko yisandu yize asonekene ha miaka 3,500 kunyima. Yisoneko yacho yisandu yili Mbimbiliya.

Mumu liaka twatamba kufuliela mu Mbimbiliya? Mumu kukushi mutu mukwo yoze uli mukulwana nawa uli ni mana anji kuhiana Mwenyayo. Iye kakumuvuluka ngwo, “Mukulwana-wa-Matangwa” yoze watwama “ku miaka ya mutolo ndo ku miaka ya mutolo.” (Daniele 7:9; Samu 90:2) Iye kali “tangi ya malilu; iye Zambi yoze wawumbile hashi nikulingaho.” (Izaia 45:18) Iye kanatulweze ngwenyi jina lienyi, Yehova.—Samu 83:18.

Amu mwenya Mbimbiliya ali Sakatanga, iye keshi kulemesa munyachi umwe ni kulelesa ukwo. Yiyulo ya mu Mbimbiliya yakukwasa chinji, chikwo nawa, hiyinakwase atu anji hashi heswe. Kukushi mukanda ukwo uze hiunapu kulumbununa ni kutuhwisa kuhiana Mbimbiliya.a Kashika yiyulo yamo muyihasa kukwasa ni kusongwela atu eswe. Yino yinasolola ngwo, yize Mbimbiliya yakwamba yili yamwenemwene.

“Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.”—YILINGA 10:34, 35.

Chizechene ngwe umwe chisemi akuzanga ni kufunga mwanenyi, Yehova Zambi kali Tata wa zango yoze wakutukwasa kupalikila mu Liji lienyi, Mbimbiliya. (2 Timoteu 3:16) Muhasa kufuliela mu Mbimbiliya, mumu Yehova mwe watutangile, kashika iye kananyingika kanawa yize tunafupiwa hanga tupwe ni uwahililo.

MUTUHASA KUFULIELA MU MBIMBILIYA

Mutuhasa kufuliela ha yize Mbimbiliya yakwamba hakutwala ku kulutwe lia matangwa, mumu ha miaka 2,000 kunyima yahanjikile ha yuma yize te muyilingiwa musono ni chize atu te mapwa.

YUMA YIZE TE MUYILINGIWA HA MATANGWA JETU

“Akwa vungu limwe kumakakatukila akwa vungu likwo, ni akwa wanangana umwe kumakakatukila akwa wanangana ukwo. Kumukukapwa minyiko yinene kweka ni kweka, ni tupunga ni yilungo.”—LUKA 21:10, 11.

CHIZE ATU TE MAPWA

“Ha matangwa a kusula kumukukapwa miaka yikalu. Mumu atu kumakapwa akwa kulifwila ene, akwa kufwila mbongo, akwa kulizata, akwa kulizelula, akwa kushililika, keshi kwononoka kuli yisemi jo, akwa kaleleso, akwa luchisa, keshi zango lia atu, keshi kuhutuka, yilamikiji, keshi kusuula, asasu, keshi kufwila yipema, akwa kuhandukulula, akwa kulipupula, akwa kulifuza, kakuzanga kuheha, kazangile Zambi.”—2 TIMOTEU 3:1-4.

Yika wanyonga hakumona yuma yeswe yize Mbimbiliya yambile ha miaka yinji kunyima yinalingiwa musono? Kota mutayiza nyonga lia Leung wa mu Hong Kong yoze wambile ngwenyi: “Uprofeto wa mu Mbimbiliya kausonekene ha miaka yinji kunyima. Nyi uprofeto wacho te kauprofetezele kuli mutu muchikaliwa chinji yuma yeswe kumanunuka. Kashika Mbimbiliya yinakatuka kuli mutu yoze uli ni mana anji kuhiana yetu.”

Uprofeto unji wa mu Mbimbiliya hi unamanunuka.b Chino chinasolola pundu ngwo, Mbimbiliya yili Liji lia Zambi. Yehova kanambe ngwenyi: “Yami Zambi, kukushi umwe wa kulifwa,” yamba nawa ngwenyi, “nakulumbununa songo chize ku uputukilo.” (Izaia 46:9, 10) Kashika, yuma yeswayi muyikukwasa kufuliela ha yize Mbimbiliya yakwamba hakutwala ku kulutwe lia matangwa.

YIYULO YIZE MUYIKUKWASA HALIAPWILA NI KU MIAKA YESWE

Nyi wakaula yiyulo yize yili mu Mbimbiliya muyuka chinji. Tala yilweza yimwe.

NYONGA LIALITA HAKUTWALA KU MBONGO NI MULIMO

“Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima.”—CHILUMBUNUNYI 4:6.

CHIZE MUHASA KUWAHILILA MU USOKO

“Eswe, mutu ni mutu, akazange chocho mukwo-pwo, chizechene ngwe analizange iye mwene. Ha kutwala kuli pwo akavwile woma mukwo lunga.”—A-EFWESU 5:33.

CHIZE MUHASA KULIVWASHANA NI AKWENU

“Litwamine utenu; china ufwatulo; kanda ulifwita, mumu chatwala ku yitanga yipi wika.”—SAMU 37:8.

Nyi wakaula yuma yize Mbimbiliya yakwamba muhasa kuwahilila chinji haliapwila ni kupwa ni mwono upema kulutwe lia matangwa. Mu Mbimbiliya muli yilakenyo yipema hakutwala ku kulutwe lia matangwa ngwe

SAMBUKILA NI KUTWAMA KAWAPE

“Kumakawahilila mu kulumbama cha sambukila.”—SAMU 37:11.

ATU ESWE MAKAPWA NI MAZUWO JO NI KULIA

“Kumakatunga mazuwo ni kutwamamo; kumakatumba minda ya uva ni kulia ye mihuko yamo.”—IZAIA 65:21.

KUFWA NI MISONGO MUYIKAHWA

“Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.”—USOLWELO 21:4.

Yika watamba kulinga mba upwe ni mwono wa mutapwau kulutwe lia matangwa? Kumbululo lili ha mutwe uze muuhataho.

a Nyi unazange kunyingika nawa yuma yikwo hakutwala ku kulumbununa cha Mbimbiliya ni kuyituhwisa, njila ha site www.pr418.com ha chikuma ENSINOS BÍBLICOS > A HISTÓRIA E A BÍBLIA.

b Nyi unazange kunyingika yuma yikwo, tala kapitulu 9 wa mukanda A Bíblia— Palavra de Deus ou de Homem? wakufwambwisa kuli Yela ja Yehova. Uli nawa ha internet ha site www.pr418.com. Yako ha UTULIKILO WA MIKANDA > MIKANDA.