Nunga ni Kukolesa Kutalatala Che

1. Kutalatala chika Yehova hanatwehe?

YEHOVA hanatwehe kutalatala chipema cha mwono wa mutolo. Amwe makapwa ni mwono uze kuushi kufwa ngwe yitangiwa ya spiritu mu malilu. (1 Kori. 15:50, 53) Alioze, atu anji kali ni kutalatala cha kutwama hano hashi ku miaka yeswe ni mijimba yingunu hamwe ni sambukila. (Uso. 21:3, 4) Kutalatala chetu chili kuyuka chinene chipwe ngwe mutukaya mu malilu hanji kutwama hano hashi.

2. Kutalatala halihi chinakatuka, nawa mumu liaka mutuhasa kwamba chocho?

² Mu Mbimbiliya liji “kutalatala” mulihasa kulumbunuka kushimbwila yuma yipema yize muyikalingiwako. Kashika mutuhasa kupwa ni shindakenyo ngwetu, yuma yize tunashimbwila kulutwe muyikalingiwa lume, mumu yinakatuka kuli Yehova. (Roma 15:13) Tunanyingika yuma yize alakenyene nawa tunanyingika ngwetu, kakumanununa yuma yeswe yize akulakenya. (Kwa. 23:19) Tuli ni shindakenyo ngwetu, Yehova kali ni usona hamwe ni ndundo ja kumanununa yuma yeswe yize hanatulakenya. Kutalatala chetu hi yilota ko hanji yuma yakunyonga wika; chinakatuka ha yuma yamwenemwene yize tunanyingika.

3. Yika mutuhengwola ha mutwe uno? (Samu 27:14)

³ Tata yetu wa mu malilu kakutuzanga, nawa kanazange hanga tumufuliele. (Tanga Samu 27:14.) Muze kutalatala chetu kuli Yehova chakukola, twakuhasa kukumba yipikalo ni hamu hamwe ni uwahililo. Mutuhengwola chize kutalatala chakutufunga. Alioze, chitangu tutalenu chize kutalatala chapwa ngwe ankora ni tepa. Hanyima, mba mutumona chize mutuhasa kukolesa kutalatala chetu.

KUTALATALA CHETU CHILI NGWE ANKORA

4. Mu mutapu uka kutalatala chetu chili ngwe ankora? (A-Hepreu 6:19)

⁴ Ha mukanda uze asonekenene A-Hepreu, postolo Paulu yatesa kutalatala chetu ni ankora. (Tanga A-Hepreu 6:19.) Iye kapwile ni kulinga wenyi mu ulungu, kashika te kanyingika ngwenyi ankora kakuyizachisa hanga ulungu uhone kuhungumuka ni meya. Ha chisuho chimwe, iye te kali mu ulungu muze kwalingiwile umwe kangonga. Ha shimbu liacho, yamona akwa-kwendesa ulungu kanakonga ankora mu meya hanga ulungu uhone kulipupa ku mawe. (Yili. 27:29, 39-41) Ngwe chizechene ankora yakumanyisa ulungu, kutalatala chetu chakutukwasa kumana ngu, ni kukundama kuli Yehova muze tunapalika mu yipikalo. Kutalatala chetu chikolo, chakutukwasa mu yipikalo ya ku mwono ni kutwaha shindakenyo ngwetu, kulutwe lia matangwa yuma muyikapema. Twatamba kwiwuluka ngwetu, Yesu katutowezele ngwenyi te matuhungumiona. (Yoa. 15:20) Kupukuna ha yiwape yize mutukapwa nayo kulutwe lia matangwa, muchitukwasa tununge ni kulingila Yehova ni ushishiko.

5. Kuchi kutalatala chakwashile Yesu chipwe muze anyingikine ngwenyi mamushiha?

⁵ Tala chize kutalatala chakwashile Yesu kushishika chipwe ngwe kanyingikine ngwenyi, te mamushiha. Ha tangwa lia Pentekoste 33 M.J., postolo Petulu yatongola uprofeto wa ha Samu uze wasolwele chize Yesu te malihumikiza ni kufuliela, ha kwamba ngwo: “Musunya wami nawa kumuukahwima ni kutuula: mumu yena kuchi kwecha alma yami kuma kwa afu, chipwe kuchi kutayiza musandu we kumona kupola. . . . Mukanguzalisa ni chiseke kumeso je.” (Yili. 2:25-28; Samu 16:8-11) Chipwe ngwe kanyingikine ngwenyi kumafwa, nihindu Yesu kapwile ni kutalatala muli Yehova ngwenyi, mamuhindwisa. Chikwo nawa, te kanawahilila ha kupwa cheka ni Tato mu malilu.—Hepre. 12:2, 3.

6. Yika umwe ndumbu ambile hakutwala ku kutalatala?

⁶ Kutalatala chetu chakukwasa mandumbu anji hanga anyongonone. Tutalenu chilweza cha Leonard Chinn, umwe ndumbu washishika yoze te watwama ku Inglaterra. Ha Jita Yitangu ya Hashi Heswe, kamusele mu zuwo lia ususu mumu lia kulituna kupwa swalale. Mu zuwo lia ususu, kalingile tukweji aali mu chipatulo cha ukawenyi, mba kulutwe yamutwala ku chihela kuze akulingila milimo ya tachi. Mwene yamba ngwenyi: “Yuma yize napalikile yasolwele zwalala ngwo, mba tunyongonone tunafupiwa kupwa ni kutalatala. Tuli ni chilweza cha Yesu, cha apostolo, cha aprofeta hamwe ni yilakenyo yipema yize tunawane mu Mbimbiliiya. Yino yeswe yakutwaha kutalatala cha kulutwe lia matangwa ni tachi hanga tunyongonone.” Kutalatala chapwile ngwe ankora kuli Leonard, nawa muchihasa kupwa ngwe ankora kuli yetu.

7. Kuchi yipikalo muyihasa kukolesa kutalatala chetu? (A-Roma 5:3-5; Tiangu 1:12)

⁷ Muze twakupalika mu yipikalo ni kumona chize Yehova akutukwasa, chino chakusolola zwalala ngwo tuli ni utayizo wenyi. Chikwo nawa, chakukolesa kutalatala chetu. (Tanga A-Roma 5:3-5; Tiangu 1:12.) Hachino, kutalatala chetu chakukola kuhiana muze twaputukile kulilongesa umwenemwene. Satana kanazange hanga tuhonge mumu lia yipikalo yize tuli nayo, alioze ni ukwaso wa Yehova mutuhasa kuyikumba.

KUTALATALA CHETU CHILI NGWE TEPA

8. Kuchi kutalatala chetu chili ngwe tepa? (1 A-Tesalonika 5:8)

⁸ Mbimbiliya yakutesa nawa kutalatala chetu ni tepa. (Tanga 1 A-Tesalonika 5:8.) Tepa liakufunga mutwe wa swalale hanga akwa-kole jenyi ahone kumulemekako. Mu jita ya ku spiritu yize twakwasa, tunafupiwa kufunga manyonga jetu ku miheto ya Satana. Iye kakuzachisa yuma yeka ni yeka hanga atweseke ni kufupa kwalumuna mulali wetu wa kunyonga. Chizechene ngwe tepa liakufunga mutwe wa swalale, kutalatala chetu necho cha kufunga mulali wetu wa kunyonga hanga tuhase kushishika kuli Yehova.

9. Yika yakulingiwa kuli atu waze keshi ni kutalatala?

⁹ Kutalatala chetu cha kupwa ni mwono wa mutolo chakutukwasa kukwata yiyulo ya mana. Chikwo nawa, nyi kutalatala chetu muchikeketele ni kuputuka kunyonga wika ha usolo wetu wa ku musunya, mutuhasa kuvulama chilakenyo chetu cha mwono wa mutolo. Tutalenu yize yalingiwile kuli Akwa-Kristu waze te atwama mu mbonge ya Korindu. Ayo katokesele ufulielo wo ha chilakenyo chilemu cha Zambi—kutalatala cha uhindukilo. (1 Kori. 15:12) Postolo Paulu kasonekene ngwenyi, waze keshi kufuliela ha kutalatala cha uhindukilo, kakunyonga wika mashimbu wano. (1 Kori. 15:32) Musono, atu anji waze keshi kufuliela ha yilakenyo ya Zambi, ayo kakumbata mwono wo chakuhona kunyonga ha tangwa lia hamene ni kufupa wika yuma ya ku musunya. Alioze, yetu twalisa mumu twakufuliela ha yilakenyo ya Zambi. Kutalatala chetu chili ngwe tepa lize liakufunga manyonga jetu, ni kutukwasa kwehuka kulihulikila wika hali yetu-ene, chuma chize muchihasa kupihisa usepa wetu ni Yehova.—1 Kori. 15:33, 34.

10. Kuchi kutalatala chakutukwasa kwehuka manyonga api?

¹⁰ Kutalatala chetu muchihasa nawa kutufunga ku nyonga lia kwamba ngwo, kutuchi kuhasa kulinga yuma yize muyivwisa Zambi kuwaha. Chakutalilaho, atu amwe mahasa kunyonga ngwo: ‘Yami kuchishi ni ulemu niumwe. Kuchichi keza kapwa hakachi ka atu waze makatwama ku miaka yeswe. Chikwo nawa, kuchishi kuhasa kutwama kulita ni shimbi ja Zambi.’ Shina unewuluka yoze walwezele yuma yacho kuli Yombi? Kapwile Elifaze, sepa lienyi wa mahuza. Iye kambile ngwenyi: “Mutu kuchi apwa mba ahase kupema?” Elifaze yamba nawa hakutwala kuli Zambi ngwenyi: “Chipwe asandu jenyi kaafulielele ni malilu kapemene kumeso jenyi.” (Yombi 15:14, 15) Yuma yize ambile yapwile ya mahuza! Manyonga jacho kejile kuli Satana. Iye kananyingika ngwenyi, nyi wapwa ni manyonga jacho, mutokesa kutalatala che. Kashika, ehuka mahuza jacho nawa lihulikile ha yilakenyo ya Yehova. Kanda unyonga ngwo iye kazangile utwame ku miaka yeswe ni kukukwasa kuzuka chiwape chacho.—1 Timo. 2:3, 4.

KOLESA KUTALATALA CHE

11. Mumu liaka twatamba kupwa yihomboloji muze tunashimbwila mashimbu waze Zambi makamanununa yilakenyo yenyi?

¹¹ Hi chashi ko kukolesa kutalatala chetu. Chino chakulingiwa mumu mutuhasa kuhonga muze tunashimbwila hanga Zambi amanunune yilakenyo yenyi. Alioze twatamba kwiwuluka ngwetu, Yehova kali wa mutolo nawa chize iye akwalula mashimbu chalisa ni yetu. (2 Petu. 3:8, 9) Zambi mamanununa yilakenyo yenyi ha shimbu lialita, chino muchihasa kulingiwa mu mulali uze kutushi ni kushimbwila. Mba yika muyitukwasa kukolesa kutalatala chetu muze tunashimbwila ni uhomboloji mashimbu waze Zambi makamanununa yilakenyo yenyi?—Tia. 5:7, 8.

12. Kulita ni A-Hepreu 11:1, 6, kuchi kutalatala chinalite ni ufulielo?

¹² Mbimbiliya yakutesa kutalatala ni ufulielo ngwo Yehova kwatwama, nawa “iye mukwa kwononona waze akumufupa.” (Tanga A-Hepreu 11:1, 6.) Nyi twapwa ni kufuliela ngwetu, Yehova kwatwama muchipwa chashi kufuliela ngwo, iye makamanununa yilakenyo yenyi yeswe. Haliapwila tutalenu amwe majila alita waze mutukoleselamo usepa wetu ni Yehova, ni kufunga kutalatala chetu.

13. Kuchi mutuhasa kukundama kuli Zambi?

¹³ Lemba kuli Yehova ni kutanga Mbimbiliya. Kwamba umwenemwene, kutuchi kuhasa kumona Yehova, alioze mutuhasa kukundama kuli iye. Mutuhasa kuhanjika nenyi mu yilemba ni kupwa ni shindakenyo ngwetu, kumatwivwa. (Jere. 29:11, 12) Mutuhasa kupanjika Zambi ha kutanga Mbimbiliya ni kuyipukuna. Muze mututanga ha chize Yehova afungile tuvumbi twenyi ashishika ku kunyima, kutalatala chetu muchikola. Yuma yeswe yize yili mu Mbimbiliya kayisonekene, “mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.”—Roma 15:4.

14. Mumu liaka chili chipema kupukuna ha yilakenyo yize Yehova hanamanununa?

¹⁴ Pukuna ha chize Yehova amanunwine yilakenyo yenyi. Nyonga ha yize Zambi alingilile Apalahama ni Sara. Ayo te keshi nawa ni miaka ya kupwa ni ana. Chipwe chocho, Yehova yaalakenya ngwenyi masema mwana. (Uputu. 18:10) Alioze, Zambi yalakenya nawa chuma chikwo kuli Apalahama. Mbimbiliya yinambe ngwo: ‘Apalahama te mapwa tato ya mavungu anji.’ (Roma 4:18) Chipwe ngwe ku nyonga lia atu chilakenyo chacho te kuchishi kuhasa kumanunuka, nihindu Apalahama kapwile ni shindakenyo ngwenyi, Yehova machimanununa. Shindakenyo yize lunga yono wa shishika apwile nayo, kuyakapwile yamokomoko. (Roma 4:19-21) Sango ngwe jino jakutulongesa ngwetu, Yehova kakumanununa yilakenyo yenyi yeswe, chipwe kuli yetu muyisoloka ngwe chikalu kulingiwa.

15. Mumu liaka twatamba kunyonga ha yize Yehova hanatulingila?

¹⁵ Nyonga ha yize Yehova hanakulingila. Nyonga ha yilakenyo ya mu Mbimbiliya yize hiyinamanunuka hali yena. Chakutalilaho, Yesu kalakenyene ngwenyi, Tato kumakwaha yize unafupiwa ku mwono we. (Mateu 6:32, 33) Yesu yalakenya nawa ngwenyi, Yehova kumakwaha spiritu yisandu nyi mumwitayo. (Luka 11:13) Yehova kakumanununa yilakenyo yacho. Kota unewuluka yilakenyo yikwo yize Yehova hanamanununa hali yena. Chakutalilaho, iye kanalakenya kukukonekena shili ye, kukutakamisa ni kukwaha kulia cha ku spiritu. (Mateu 6:14; 24:45; 2 Kori. 1:3) Kupukuna ha yuma yize Yehova hanakulingila, muchikolesa kutalatala che ha yize makakulingila kulutwe lia matangwa.

WAHILILA MU KUTALATALA CHE

16. Mumu liaka kutalatala chetu chili chawana chilemu?

¹⁶ Kutalatala cha mwono wa mutolo chili chawana chilemu cha kuli Zambi. Tunashimbwila yuma yipema ya kulutwe lia matangwa yize tuli ni shindakenyo ngwetu, muyilingiwa pundu. Kutalatala chetu chapwa ngwe ankora, yize yakutukwasa kumana ngu, muze tunapalika mu yipikalo, yihungumiona ni muze akufupa kutushiha. Kutalatala chetu chapwa nawa ngwe tepa lize liakutukwasa kufunga manyonga jetu ku yuma yipi ni kulikwachilila ku yuma yalita. Kutalatala cha mu Mbimbiliya, chakutukwasa kunyingika kanawa Zambi ni kumona zango lize iye akwete hali yetu. Mutuzuka yiwape yinji ku mwono wetu nyi twakolesa kutalatala chetu.

17. Mumu liaka twatamba kuwahilila mu kutalatala chetu?

¹⁷ Postolo Paulu kambile mu mukanda uze asonekenene A-Roma ngwenyi: “Wahililenu mu kutalatala chenu.” (Roma 12:12) Paulu te mahasa kuwahilila mumu kapwile ni shindakenyo ngwenyi, nyi manunga ni kushishika te mapwa ni mwono wa mutolo mu malilu. Ni yetu mutuhasa kuwahilila mu kutalatala chetu, mumu kutushi ni kuyambashana ha umamanunuko wa yilakenyo ya Yehova. Mukwa-kwimba masamu kambile ngwenyi: “Kawaha yoze . . . kutalatala chenyi chili muli Yehova Zambi yenyi, . . . yoze wakufunga umwenemwene ku miaka ya mutolo.”—Samu 146:5, 6.