Chize Muhasa Kuhwisa Kuyambashana Che

1-2. (a) Kuyambashana chika chize tuvumbi a Yehova amwe mahasa kupwa nacho? (b) Yika mutulilongesa ha mutwe uno?

HA MASHIMBU amwe, yetu eswe twakuyambashana.a Ngwe chilweza, tuchinyongenu umwe mukweze yoze hapwa mukwa-kwambujola, mba malihula nyi chamwenemwene Yehova kakulihulumba hali iye. Mumu lia kuyambashana chino, iye hanji mamona ngwenyi, kukushi ulemu wa kumupapachisa. Chilweza chikwo, chili cha umwe ndumbu yoze ku ukweze wasele tachi hanga ase mulimo wa Yehova ha chihela chitangu ku mwono wenyi, shimbu alihane ku mulimo uze te muumupichisa. Haliapwila iye kakuwana wika jimwe mbongo jize akukwasa najo asoko jenyi. Hachino, Iye hanji mahasa kuyambashana nyi ku ukweze kakwachile chiyulo chipema. Tuchinyongenu umwe ndumbu wa pwo kashinakaji, yoze keshi nawa tachi ngwe jize apwile najo ku ukweze. Iye hanji mahasa kunenganyana mumu keshi kuhasa kulinga yuma yize apwile kulinga kunyima. Shina hiunayambashana kama ni kulihula ngwe: Shina chamwenemwene Yehova kakulihulumba hali yami? Shina nalingile lume kanawa ha yiyulo yize nakwachile hanga ngumulingile chinji? Shina nguchili ni ulemu kuli Yehova?

² Nyi kutwahwishile kuyambashana chetu mutuhasa kutepulula ufulielo wetu ni kututwala lume tweche kuwayila Yehova. Ha mutwe uno, mutumonaho chize shimbi ja mu Mbimbiliya mujihasa kutukwasa muze mutuputuka kuyambashana ha yikuma ngwe yino: (1) Shina Yehova kakulihulumba lume hali yetu? (2) Shina yiyulo yize twakwachile kunyima? ni (3) Shina tuchili ni ulemu kumeso ja Yehova?

CHIZE MUHASA KUHWISA KUYAMBASHANA CHE

3. Jila yika yize muyitukwasa kuhwisa kuyambashana chetu?

³ Jila yimwe yakuhwishilamo kuyambashana chetu, yili kuwana makumbululo waze anakatuka mu Liji lia Zambi. Nyi twachilinga, mutupwa ni tachi, nawa mutukolesa usepa wetu ni Yehova ni kulilulieka hanga tununge ni ‘kumana nguu ku ufulielo.’—1 Kori. 16:13.

4. Kuchi mutuhasa ‘kusa shindakenyo ha yuma yeswe’? (1 A-Tesalonika 5:21)

⁴ Tanga 1 A-Tesalonika 5:21. Ngwe chize twamona, Mbimbiliya yakutukolweza hanga ‘tuse shindakenyo ha yuma yeswe.’ Yika maliji wano analumbunuka? Kanalumbunuka ngwo, twatamba kupwa ni shindakenyo ngwetu, yuma yize twafuliela yili yamwenemwene ha kuyitesa ni yize Mbimbiliya yakwamba. Ngwe chilweza, achinyonga hali mukweze yoze keshi ni shindakenyo nyi chamwenemwene Yehova kakulihulumba hali iye. Shina iye katamba kutayiza manyonga jacho ni kwafuliela? Ka, katamba ‘kusa shindakenyo ha yuma yeswe.’ Mahasa kuchilinga ha kufupa kunyingika yize chamwenemwene Yehova akunyonga.

5. Kuchi mutuhasa kwivwa makumbululo a Yehova hakutwala ku kuyambashana chetu?

⁵ Muze twakutanga Mbimbiliya, chakupwa ngwe tunevu Yehova kanahanjika ni yetu. Alioze, mba tunyingike chize Yehova akunyonga, kutwatambile wika kutanga Mbimbiliya, twatamba nawa kuwana makumbululo waze mahwisa kuyambashana chetu. Chitangu, twatamba kutanga versu ja mu Mbimbiliya jize jinatale ha kuyambashana chetu. Mutuhasa kukalakalisa yikwata yeka ni yeka yakuhengwola nayo yize tuli nayo, hanga tulilongese hakutwala ku chimwe chikuma. (Yishi. 2:3-6) Chamuchiali, mutuhasa kulemba hanga Yehova atukwase kuwana yize chamwenemwene iye akunyonga ha kuyambashana chetu. Hanyima, mutufupa yiyulo ya mu Mbimbiliya ni yilweza yize yinatale ha kuyambashana chetu. Chikwo nawa, muchilita kuhengwola sango ja atu anatongola mu Mbimbiliya, waze apalikile mu yuma ngwe yize yetu tunapalika.

6. Kuchi kukunguluka chakutukwasa kwehuka kuyambashana chetu?

⁶ Kukunguluka chili jila yikwo yize yakutukwasa kupanjika Yehova. Muze twakuya ku kukunguluka cheswe, twakupwa ni uhashi wakwivwa pande hanji kumbululo lia umwe ha mbunga, lize yetu te tunafupu hanga twehuke kuyambashana chetu. (Yishi. 27:17) Haliapwila tutalenu chize mutuhasa kwehuka chimwe kuyambashana.

SHINA YEHOVA KAKULIHULUMBA LUME HALI YENA?

7. Chihula chika mutuhasa kulihula?

⁷ Shina yiunalihula kama nyi ‘Yehova kakulihulumba hali yena?’ Nyi mutu malivwa ngwe keshi ulemu, iye mahasa kuputuka kunyonga ngwe chili chikalu kupwa sepa lia Yehova. Chakusoloka ngwe Mwanangana Ndawichi che alivwile. Iye kakomokene chinji ha kunyingika ngwenyi, Yehova kakulihulumba chinji hali atu. Mba yahula ngwenyi: “Yehova mutu kuchi apwa wakumunyonga? Mwana mutu kuchi apwa wakumupala?” (Samu 144:3) Kulihi muhasa kuwana kumbululo lia chihula chino, ‘Shina Yehova kakulihulumba hali atu?’

8. Kulita ni 1 Samuele 16:6, 7, 10-12, yika Yehova akumona muli atu?

⁸ Mbimbiliya yakutulongesa ngwo, Yehova kakulihulumba hali atu waze akusoloka ngwe keshi ulemu. Ngwe chilweza, Yehova katumine Samuele ku zuwo lia Yese, hanga awayise umwe wa kuli ana jenyi apwe mwanangana mu Izalele. Hachino, Yese yasanyika ana jenyi shimbiali, alioze kasanyikine Ndawichi, mwanenyi wa kasula-songo.b Chipwe chocho, Yehova yasakula Ndawichi. (Tanga 1 Samuele 16:6, 7, 10-12.) Yehova kanyingikine kanawa utu wa Ndawichi. Iye kanyingikine nawa ngwenyi, Ndawichi kakumuzanga chinji.

9. Kuchi muhasa kupwa ni shindakenyo ngwe, Yehova kakulihulumba hali yena? (Tala nawa chizulie.)

⁹ Achinyonga ha yize Yehova hanakulingila yize yakusolola ngwo, kakulihulumba hali yena. Ngwe chilweza, iye kakukwaha yiyulo yize yakukwata ha yize unafupu. (Samu 32:8) Yino yinasolola ngwo, iye kakunyingika kanawa. (Samu 139:1) Nyi muosa tachi hanga ukaule yiyulo yize Yehova anakwehe, ni kumona chize yiyulo yacho yinakuyukisa, muopwa ni shindakenyo ngwe, Yehova kakulihulumba chinji hali yena. (1 Sango 28:9; Yili. 17:26, 27) Yehova kakumona tachi jize wakusa hanga umulingile. Iye kananyingika kanawa yitanga yize ukwete. Kashika, kanazange hanga upwe sepa lienyi. (Jere. 17:10) Iye kanazange nawa hanga utayize kupwa sepa lienyi.—1 Yoa. 4:19.

MUZE MUYAMBASHANA HA YIYULO YIZE WAKWACHILE KUNYIMA

10. Yihula yika mutuhasa kulihula nyi twanyonga ha yiyulo yize twakwachile kunyima?

¹⁰ Ha mashimbu amwe, mutu mahasa kuyambashana, nyi yiyulo yize akwachile kunyima yapwile lume ya mana. Ngwe chilweza, umwe hanji kechele mulimo hanji mingoso ya mbongo jinji hanga alihane chinji mu mulimo wa Yehova. Alioze haliapwila hikwapalika miaka yinji. Mutu wacho hanji matala kuli akwo waze akwachile yiyulo yalisa, anasoloka ngwe haliapwila kali ni mbongo jinji ni mwono upema. Kashika, iye mahasa kuputuka kuyambashana ni kulihula ngwo: ‘Shina yiyulo yize nakwachile yapwile lume ya mana? Kutala kachi nalihanyine chinji ku milimo yami hanga te ngupwe ni mwono upema haliapwila?’

11. Yika yatwalile mukwa-kusoneka Samu 73 kunenganyana?

¹¹ Nyi unayambashana ha yuma ngwe yino, nyonga hali mukwa-kusoneka Samu 73. Iye kamwene ngwenyi, atu amwe waze keshi kulingila Yehova, kapwile ni mbongo jinji, mijimba yipema ni mwono uze te kuushi yipikalo. (Samu 73:3-5, 12) Chapwile ni kusoloka ngwe, yuma yeswe ku mwono wa atu jacho yapwile ni kwenda kanawa. Yino yiyimutwala kulivwa ngwe katambile kusa tachi hanga alingile Yehova. Manyonga wano, katwalile mukwa-kusoneka samu kunenganyana, chocho yaputuka kupinda matangwa eswe. (Samu 73:13, 14) Yika alingile mba ehuke manyonga wano api?

12. Kuchi mukwa-kusoneka Samu 73:16-18 ahashile kuhwisa kapinda wenyi?

¹² Tanga Samu 73:16-18. Mukwa-kwimba samu yino, kayile ndo ku zuwo lia Yehova. Muze apwile mu chihela chacho, yahasa kulihumikiza ni kupwa ni manyonga alita. Iye yanyingika ngwenyi, chipwe ngwe atu jacho kapwile ni kusoloka ngwe kali ni mwono upema, ayo kakapwile ni kutalatala nichimwe cha kulutwe lia matangwa. Muze anyingikine kanawa chikuma chacho, yapwa ni sambukila ya ku mbunge ni kunyingika ngwenyi, kusa Yehova ha chihela chitangu, chili chiyulo chipema chize mutu atamba kukwata. Chino yichimukwasa kusa tachi hanga anunge ni kulingila Yehova.—Samu 73:23-28.

13. Kuchi mutuhasa kupwa ni sambukila ya ku mbunge nyi tunalipikala ha yiyulo yize twakwachile kunyima? (Tala nawa chizulie.)

¹³ Ni ukwaso wa Mbimbiliya, ni yena muhasa kupwa ni sambukila ya ku mbunge. Mu mutapu uka? Nyonga ha yuma yipema yize uli nayo, kuchingako usepa we ni Yehova. Chikwo nawa, yiuluka ngwe, atu waze keshi kuwayila Yehova keshi ni ukwaso wenyi. Atu jacho hanji kakulemesa chinji milimo ni mbongo jize akwete. Ayo hanji kakuchilinga mumu keshi ni kutalatala nichimwe cha kulutwe lia matangwa. Yena kuushi kutambula wika yiwape ya Yehova musono, alioze iye kanalakenya nawa kukwaha yuma yinji yipema kulutwe lia matangwa. (Samu 145:16) Chikwo nawa, kuwatambile kupwa ni shindakenyo ngwe, mwono we kachi te unapeme chinji nyi ngwe wakwachile yiyulo yeka. Alioze, chuma watamba kwiuluka chili chino: Mutu yoze wa kukwata yiyulo yinakatuka ha zango lize akwete hali Yehova ni hali akwo, kakupwa ni yuma yize mafupiwa ku mwono wenyi hanga awahilile.

MUZE UNAYAMBASHANA HA MULIMO UZE UNALINGILA YEHOVA

14. Mumu liaka amwe akuyambashana, nawa chihula chika mahasa kulihula?

¹⁴ Mumu lia ushinakaji, misongo hanji yipikalo yikwo, tuvumbi amwe a Yehova, keshi kuhasa kulinga yuma ngwe yize apwile ni kulinga kunyima. Akwo kakuyambashana nyi Yehova kakulemesa lume yuma yize akumulingila. Ayo hanji malihula ngwo: ‘Shina nguchili ni ulemu kuli Yehova?’

15. Shindakenyo yika apwile nayo mukwa-kusoneka Samu 71?

¹⁵ Mukwa-kusoneka Samu 71, neye kapwile ni kulihulumba ha chikuma cha kuhona tachi. Yalemba kuli Yehova ngwenyi: “Kanda ungwehuka muze tachi jami hijahwa.” (Samu 71:9, 18) Chipwe ngwe kapwile ni manyonga jacho, nihindu mukwa-kusoneka samu yino kapwile ni shindakenyo ngwenyi, Yehova mamukwasa nyi manunga ni kushishika kuli iye. Kalilongesele ngwenyi, Yehova kakuzanga chinji muze tuvumbi twenyi akusa tachi hanga amulingile, chipwe ngwe keshi ni uhashi wakulinga yuma yeswe yize anazange.—Samu 37:23-25.

16. Mu mutapu uka tushinakaji ali alemu kumeso ja Yehova? (Samu 92:12-15)

¹⁶ Nyi hiwapwa kashinakaji, nyonga ha chize Yehova akukumona. Chipwe ngwe kuushi nawa ni tachi ja kulinga yuma yinji, iye mahasa kukukwasa hanga ununge ni kukola ku ufulielo. (Tanga Samu 92:12-15.) Kashika, kanda ulihulikila chinji ha yize kuuchi kuhasa kulinga, alioze lihulikile ha yize muhasa kulinga. Ngwe chilweza, muhasa kukwasa akwenu kupalikila mu chilweza che, ni kusolola zango lize ukwete hali atu waze watunga no. Yena muhasa kuhanjika ha chize Yehova akukwasa ha miaka yino yeswe, ni kuhanjika ha yilakenyo ya Yehova ya kulutwe lia matangwa yize unashimbwila. Chikwo nawa, kanda wiza kavulama ngwe, yilemba ye muyihasa kukwasa chinji akwenu. (1 Petu. 3:12) Umwenemwene uli ngwo, chipwe ngwe tunapalika mu yuma yeswayo, yetu eswe mutuhasa kuhana chimwe kuli Yehova ni kuli akwetu.

17. Mumu liaka kutwatambile kulitesa ni akwetu ha yize twakulinga?

¹⁷ Shina wakulipikala mumu lia kuhona kulinga yuma yinji mu mulimo wa Yehova? Nyi chenacho, muhasa kupwa ni shindakenyo ngwe, Yehova kakulemesa yuma yeswe yize wakumulingila. Nyi uli ni chako cha kulitesa ni akwenu ha yize wakulinga, sako tachi hanga wehuke chako chacho. Mumu liaka? Mumu Yehova keshi kutesa atu mu jila yacho. (Ngala. 6:4) Ngwe chilweza, Maria kahanyine kuli Yesu, maji a vumba lipema a ndando yinji. (Yoa. 12:3-5) Alioze tuliwa yoze chiswale, kahanyine mulambu wa tumbongo twali twa ndando yikepe chinji mu tembele. (Luka 21:1-4) Chipwe chocho, Yesu kakatesele yuma yize mapwo wano aali alingile. Shimbu achilinge, iye yamona yize mapwo wano alingile, ngwe yimwe jila yakusolwelamo ufulielo wo. Chizechene nawa, Yehova kakulemesa yuma yize wakumulingila mumu lia ufulielo ni zango lize ukwete hali iye, chipwe ngwe yuma yacho muyisoloka ngwe kuyishi ni ulemu kuli yena.

18. Yika muyitukwasa kuhwisa kuyambashana chize tukwete? (Tala nawa mushete, “Liji Lia Yehova Mulihasa Kutukwasa Kukumba Kuyambashana.”)

¹⁸ Yetu eswe twakuyambashana ha mashimbu amwe. Alioze ngwe chize twamona, Mbimbiliya muyihasa kutukwasa hanga twehuke kuyambashana chize tuli nacho. Kashika, twatamba kulinga yize mutuhasa hanga twehuke manyonga api ni kupwa ni manyonga apema. Chochene, Yehova kakutumona, nawa kakulihulumba hali yetu. Iye kakulemesa yuma yeswe yize twakulinga hanga tuse Wanangana wenyi ha chihela chitangu, nawa kanazange kutuwahisa ha tachi jize twakusa. Kashika, mutuhasa kupwa ni shindakenyo ngwetu, Yehova kakuzanga ni kulihulumba hali tuvumbi twenyi eswe ashishika.