MUTWE WA KULILONGESA 7
MWASO 15 Halisenu Mwana Mutangu wa Yehova
Kuchi Ukonekeno wa Yehova Wakukuyukisa?
‘Kuli yena kwatwama ukonekeno wamwenemwene.’—SAMU 130:4.
YIZE MUTULILONGESA
Mutumona chize Mbimbiliya yakutesa yuma yimwe, ni chize yuma yacho muyitukwasa kwokesa usakwililo wetu ha ukonekeno wa Yehova.
1. Mumu liaka chakupwa chikalu kunyingika nyonga lia mutu muze matulweza ngwenyi katukonekena?
“NGUNAKUKONEKENA.” Chili chipema kwivwa maliji wano, chipi-chipi nyi twamba hanji twalinga yimwe yize yevwisa umwe chinyengo ku mbunge. Mba maliji “ngunakukonekena,” yika analumbunuka? Shina mutu kanazange kwamba ngwenyi, usepa wenu muununga chizechene wapwile? Nyi hanji kanazange wika kuhwisa kapinda wacho ni kuvulama yize yalingiwa? Kwamba umwenemwene, kuli atu, liji “ukonekeno” linalumbunuka yuma yinji.
2. Yika Mbimbiliya yakwamba hakutwala ku ukonekeno wa Yehova? (Tala nawa maliji mushi lia lifwo.)
2 Mutapu uze Yehova akutukonekena walisa ni chize yetu twakukonekena akwetu. Niumwe mahasa kukonekena mutu ngwe chize Yehova akukonekena wakuhi. Hakutwala kuli Yehova, mukwa-kwimba masamu yamba ngwenyi: ‘Kuli yena kwatwama ukonekeno wamwenemwene, hanga akuvwile woma.’a (Samu 130:4) Ewa, ‘ukonekeno wa Yehova uli wamwenemwene.’ Iye wika unanyingika yize ukonekeno unalumbunuka. Ha yisuho yimwe, akwa-kusoneka Mbimbiliya kasonekene liji lia Hepreu linatale ha ukonekeno, lize kulishi kutala ha chize atu akukonekena akwo.
3. Mumu liaka ukonekeno wa Yehova walisa ni wa atu? (Izaia 55:6, 7)
3 Muze Yehova akukonekena umwe mutu, iye kakujimuna shili yenyi yeswe. Hachino, mutu wacho mahasa kupwa cheka ni usepa upema ni iye. Twakusakwilila chinji Yehova ha kutukonekena mu mutapu uno upema.—Tanga Izaia 55:6, 7.
4. Kuchi Yehova akutukwasa kunyingika yize ukonekeno wamwenemwene unalumbunuka?
4 Nyi mutapu uze Yehova akukonekena walisa ni wa yetu, mba kuchi mutuhasa kunyingika yize ukonekeno wamwenemwene unalumbunuka? Yehova kakutesa yimwe yuma hanga atukwase kunyingika chize iye akukonekena. Ha mutwe uno, mutumona yimwe ya ku yuma yacho. Yuma yacho muyisolola chize Yehova akukonekena shili yetu, ni chize akufunyisa usepa wetu ni iye uze wapihile mumu lia shili. Kuhengwola yuma yino, muchitukwasa kwokesa zango ni usakwililo wetu hali Tata yetu wa keke, Yehova.
YEHOVA KAKUMBILA SHILI YETU
5. Yika yakulingiwa muze Yehova akutukonekena?
5 Mu Mbimbiliya, shili kanji-kanji kakuyitesa ni yimwe yilemu. Mwanangana Ndawichi kahanjikile ha shili yenyi ha kwamba ngwenyi: “Uhenge wami hiwanguhiana helu lia mutwe wami. Hiwangulemena naye ngwe chiteli chilemu.” (Samu 38:4) Alioze Yehova kakukonekena shili ya mutu yoze wakulikonyeka. (Samu 25:18; 32:5) Liji lia Hepreu akulumbununa ngwo “kukonekena,” linalumbunuka kuzundula hanji kumbata. Mutuhasa kunyonga Yehova ngwe umwe chitakame yoze wakuchiza yilemu ya shili ha yipaya yetu ni kuyitwala kusuku.
“Wakonekenene” (Samu 32:5)
6. Kulihi Yehova akutwala shili yetu?
6 Mbimbiliya yakutesa chuma chikwo hanga yisolole chize Yehova akumbata shili yetu ni kuyitwala kusuku. Samu 103:12 yinambe ngwo: “Chize wapwa usuku wa chivumbuko ndo ku chitokelo, chocho akuhandununa kuli yetu utanguko wetu.” Chivumbuko ni chitokelo, kuyishi kulitakana. Tangwa liakuvumbuka ku chihela chimwe ni kunjila ku chihela chikwo. Mu maliji akwo, Samu yino yinazange kutulweza ngwo, Yehova kakutwala shili yetu kusuku, kuze kutuchi kuhasa kuyiwana nawa. Che kwamba, Yehova kakutukonekena liakulu. Chino chakutuhwimisa mbunge.
“Chize wapwa usuku wa chivumbuko ndo ku chitokelo” (Samu 103:12)
7. Kuchi Mbimbiliya yinasolola yize Yehova akulinga ni shili yetu? (Mika 7:18, 19)
7 Tunanyingika ngwetu, Yehova kakutwala shili yetu kusuku ni yetu, shina iye kakununga ni kuyifunga? Ka. Mwanangana Hezekia kambile ngwenyi: “Hiwambila milonga yami kunyima ye.” Mbimbiliya yikwo yinambe ngwo: “Hiwachiza shili yami yeswe ku meso je.” (Iza. 38:9, 17) Yino yinasolola ngwo, Yehova kakukonekena shili ya mutu yoze walikonyeka ni kuhona kuyiuluka nawa. Yize Hezekia ambile muyihasa nawa kulumbunuka ngwo: “Yena wajimuna shili yami, ngwe kuyakalingiwile.” Mbimbiliya yinalumbununa kanawa chikuma chino ha kutesa chikwo chize chili ha Mika 7:18, 19. (Tanga.) Versu jino jinasolola ngwo, Yehova kakumbila shili yetu mushi lia kalunga-lwiji. Ku mashimbu akunyima, nyi chimwe chuma chaholokela ha jinga lia kalunga-lwiji te chakupwa chikalu kuchiwana.
“Hiwambila milonga yami kunyima ye” (Iza. 38:17)
‘Mukambila milonga yetu mushi lia kalunga-lwiji’ (Mika 7:19)
8. Yika twalilongesa ndo hano?
8 Yilweza yino yatulongesa ngwo, muze Yehova akutukonekena, iye kakuchiza yilemu ya shili ha yipaya yetu. Ngwe chize Ndawichi ambile: “Kawaha waze ungulungulu wo hanaakonekenawo, waze milonga yo hiyinafukiwa; kawaha mutu yoze Yehova kechi kamwalwila milonga yenyi.” (Roma 4:7, 8) Ewa, uno we ukonekeno wamwenemwene!
YEHOVA KAKUJIMUNA SHILI YETU
9. Kuchi Mbimbiliya yakutukwasa kumona chize Yehova akukonekena shili yetu liakulu?
9 Yehova kakutesa nawa chuma chikwo hanga atukwase kulemesa chitapo cha ukuule. Iye kakukusumuna hanji kujimuna shili ya waze akulikonyeka. Mbimbiliya yakwamba ngwo, Yehova kakukosa ni kukusumuna shili. Chino chakutwala chingulungulu apeme cheka ku meso ja Yehova. (Samu 51:7; Iza. 4:4; Jere. 33:8) Yehova mwene kanalumbununa chize yino yakulingiwa ha Izaia 1:18, ha kwamba ngwenyi: “Chipwe milonga yenu yinachili nge, munguyipwisa yitoma ngwe neve. Chipwe yahiana kuchila, muyalumuka ngwe wanda utoma.” Chakupwa chikalu kuchiza chipeka chichila ha chikuto chitoma. Kashika Yehova ahanyine chilweza chino hanga asolole ngwenyi, shili yetu mahasa kuyitomesa hanji kuyijimuna ngwe kuyakapwileko.
“Chipwe milonga yenu yinachili nge, muyipwa yitoma ngwe neve” (Iza. 1:18)
10. Kutesa chikwo chika chinasolola chize ukonekeno wa Yehova wapwa?
10 Ngwe chize twamonanga ha mutwe wapalika, shili yetu kakuyitesa ni kongo. (Mateu 6:12; Luka 11:4) Kashika, hita shimbu mutuvulumuna kuli Yehova, chili ngwe kongo lietu linaliwezela. Kongo lietu linene chinji! Alioze muze Yehova akutukonekena, chakupwa ngwe kanakonekena kongo lietu lieswe. Iye keshi kutufwetesa ha milonga yize hanatukonekena kulu. Ngwe chize akuwahilila mutu yoze akonekena kongo lienyi, ni yetu twakuwahilila chinji muze Yehova akutukonekena.
‘Nutukonekene kama makongo jetu’ (Mateu 6:12)
11. Yika Mbimbiliya yakusolola muze yakwamba ngwo, shili yetu ‘kayijimuna’? (Yilinga 3:19)
11 Yehova kakulinga yuma yinji hi wika ko kukonekena kongo hanji shili yetu; iye kakuyijimuna liakulu. (Tanga Yilinga 3:19.) Tunyongenu ngwe, mutu yoze watuhele kongo ni kusoneka jina lietu ha papilo, matukonekenalio ni kusa mufunda ha yize asonekene. Chipwe chocho, sona jacho nihindu mujihasa kusoloka mushi lia mufunda. Alioze chino chinalise ni kujimuna chimwe chuma. Mba tunyingike kanawa yize tunambe kwamba, twiulukenu ngwetu ulombo uze apwile ni kukalakala nawo ku mashimbu a kunyima, te wapwa washi kujimuna. Kashika, mutu te mahasa kwanda chipuzu chinaula ni kukusumuna yize afunjeka ni ulombo wacho. Hachino, muze apwile ni ‘kujimuna’ limwe kongo, te kulishi kusoloka nawa. Chapwile chikalu kumona yize yapwileho. Chapwile ngwe kongo liacho kuliakapwileko. Kunyingika ngwo Yehova keshi kukonekena wika shili yetu, alioze kakuyijimuna liakulu, chakukwata chinji ku mbunge yetu.—Samu 51:9.
“Shili yenu akayijimune” (Yili. 3:19)
12. Yika chilweza cha lelwa chinatulongesa?
12 Ha Izaia 44:22, Yehova kanatesa nawa chuma chikwo hanga alumbunune chize akujimuna shili yetu. Kanambe ngwenyi: “Hinajimuna utanguko we ngwe lelwa. Hinajimuna milonga ye ngwe mbundu.” Kashika, muze Yehova akukonekena shili yetu, chakupwa ngwe kayifuka ha limwe lelwa linene lize niumwe kechi kuhasa kuyimona, chipwe lume yetu ene.
“Hinajimuna utanguko we ngwe [wakufuka ni] lelwa” (Iza. 44:22)
13. Kuchi wakulivwa muze Yehova akukonekena shili ye?
13 Yika yino yatulongesa? Muze Yehova makonekena shili yetu, kutwatambile nawa kulivwa ngwe tunambate yilemu yacho ku mwono wetu weswe. Chitapo cha ukuule wa Yesu chakujimuna shili yetu yeswe, chakupwa ngwe shili yacho kuyakapwileko. Muze twakulikonyeka ni mbunge yeswe, Yehova kakutukonekena liakulu.
YEHOVA KAKUTUTAYIZA CHEKA NGWE MASEPA JENYI
Ukonekeno wa Tata yetu wa mu malilu, wakutwaha uhashi wa kupwa ni usepa upema ni iye (Tala paragrafu 14)
14. Mumu liaka twatamba kufuliela ha ukonekeno wa Yehova? (Tala nawa chizulie.)
14 Muze Yehova matukonekena, mutuhasa kupwa ni shindakenyo ngwetu, mutupwa cheka nawa masepa jenyi ngwe chize twapwile. Chino chakutukwasa hanga tuhone kulema ku mbunge ni kulilamikiza. Chikwo nawa, kutwafupiwile kwivwa woma ngwetu, Yehova kanatutulikila toto ha yize twalingile ni kushimbwila uhashi wa kutumwesa lamba. Yino kuyichi keza kalingiwa nilimwe tangwa. Mba mumu liaka twatamba kufuliela ha ukonekeno wa Yehova? Mumu Yehova kalwezele profeta Jeremia ngwenyi: “Mungukonekena uhenge wo; chichi kwiwuluka nawa shili yo.” (Jere. 31:34) Hakutwala ku maliji wano, postolo Paulu kahanjikile amwe maliji alifwa ha kwamba ngwenyi: “Chichi kewuluka nawa shili yo.” (Hepre. 8:12) Yika maliji wano analumbunuka?
“Chichi kwiwuluka nawa shili yo” (Jere. 31:34)
15. Mu mutapu uka Yehova keshi kwiuluka nawa shili yetu?
15 Mu Mbimbiliya, liji ‘kwiuluka’ kulishi kutala wika ha kwiuluka yuma yize yalingiwile kunyima. Alioze, liakutala nawa hali umwe yoze unalingi chimwe. Chingulungulu yoze ahachile ha mutondo ku sali lia Yesu, kechile ngwenyi: “Yesu, ungwiwuluke kama muze munjila mu Wanangana we.” (Luka 23:42, 43) Lunga yono, kakechile wika kuli Yesu hanga amwiuluke ha shimbu liacho. Kumbululo lize Yesu ahanyine liasolwele ngwo, iye kazangile kuhindwisa lunga wacho. Kashika, muze Yehova akwamba ngwenyi, kechi kwiuluka shili yetu, kakuzanga kwamba ngwenyi, iye kechi kutulinga chuma nichimwe ha shili yize twalingile. Yehova kechi katumwesa lamba kulutwe lia matangwa mumu lia shili yize hanatukonekena.
16. Mbimbiliya yakututesa ni yika?
16 Mbimbiliya yakutesa chuma chikwo hanga yitukwase kunyingika utuswilo uze twakupwa nawo muze Yehova akutukonekena. Yakwamba ngwo, mumu lia kupwa yihenge, yetu eswe tuli “ndungo ja shili.” Alioze ‘hanatutusula ku shili’ mumu lia ukonekeno wa Yehova. (Roma 6:17, 18; Uso. 1:5) Muze twakunyingika ngwetu Yehova katukonekena, twakuwahilila chinji ni kulivwa ngwe mutu yoze atusula mu undungo.
“Hananutusula ku shili” (Roma 6:18)
17. Mu mutapu uka ukonekeno wapwa ngwe uukiso? (Izaia 53:5)
17 Tanga Izaia 53:5. Chilweza chakasula chinatutese ni mutu yoze uli ni musongo ukalu kuwuka. Mumu lia ukuule uze Yehova atuhele kupalikila muli Mwanenyi, yetu tuli ngwe hanatuuku. (1 Petu. 2:24) Ngwe chizechene mutu yoze uli ni musongo upi akuwahilila muze akumuwukawo, ni yetu nawa twakuwahilila muze akutukonekena shili yetu ni kupwa cheka masepa ja Yehova. Yeswayi yakulingiwa mumu lia ukuule. Kupalikila mu ukuule, Yehova kakutukonekena ni kutwaha uhashi wa kupwa cheka ni usepa upema ni iye.
“Ku mijiji yenyi hanatuwuku” (Iza. 53:5)
YIZE UKONEKENO WA YEHOVA UNALUMBUNUKA KULI YETU
18. Yika twalilongesa ha yuma yize Mbimbiliya yakutesa ni ukonekeno wa Yehova? (Tala nawa mushete, “Chize Yehova Akutukonekena.”)
18 Yika twalilongesa ha yuma yize Mbimbiliya yakutesa ni ukonekeno wa Yehova? Twalilongesa ngwetu, muze Yehova akutukonekena, chakupwa ngwe shili yetu kayijimuna liakulu, kechi katufwetesa nawa ha yuma yacho. Hachino, mutuhasa kupwa ni usepa upema ni Tata yetu wa mu malilu. Chochene, ukonekeno wa Yehova uli chawana chize atuhele. Chikwo nawa, uli jila yize iye akusolwelamo zango ni keke yenyi kuli yihenge eswe. Ngwe chize tunanyingika, chino chili chuma chize te kutuchi kuhasa kupwa nacho ku tachi ja yetu ene.—Roma 3:24.
19. (a) Mumu liaka twatamba kusakwilila chinji Yehova ? (A-Roma 4:8) (b) Yika mutukalilongesa ha mutwe uze muuhataho?
19 Tanga A-Roma 4:8. Twakusakwilila chinji Yehova ha kutukonekena shili yetu. (Samu 130:4) Alioze ukonekeno uno wa Yehova, unatale ha chimwe chuma chilemu. Yesu kambile ngwenyi: “Nyi kunwakonekenene akwenu tupalia two, Tatenu wa mu malilu kechi kakonekena milonga yenu.” (Mateu 6:14, 15) Chinasoloka pundu ngwo, chili chilemu kwimbulula Yehova ha kukonekena akwetu. Mba kuchi mutuhasa kuchilinga? Yino ye mutukalilongesa ha mutwe uze muuhataho.
MWASO 46 Yehova, Tunakusakwila
a Mu limi lia Hepreu, mutapu uze asonekene liji “ukonekeno” liakusolola ngwo, uno we ukonekeno wamwenemwene, chipwe ngwe kuli mutapu weka ni weka wa ukonekeno. Akwa-kulumbununa Mbimbiliya anji keshi kusolola chikuma chino chilemu, alioze Mbimbiliya ya Yisoneko ya Chifuchi Chaha, yinasolola nyonga lino ha Samu 130:4.