Tayiza Ngwe Yehova Hanakukonekena

1-2. Kuchi twakulivwa muze twakupwa ni shindakenyo ngwetu, Yehova kakonekena shili yetu? (Tala nawa chizulie ha chifukilo.)

MWANANGANA Ndawichi kanyingikine ngwenyi, mutuhasa kulivwa chipi mumu lia shili yize twalingile kunyima. (Samu 40:12; 51:3) Iye kalingile shili yinene ku mwono wenyi. Alioze, kalikonyekene ni mbunge yeswe chocho Yehova yamukonekena. (2 Samue. 12:13) Mumu lia chino, Ndawichi yanyingika ngwenyi, ukonekeno wa Yehova wakuneha sambukila.—Samu 32:1.

² Ni yetu, mutuhasa kuwahilila muze mutunyingika ngwetu, Yehova katusolwela keke ni kukonekena shili yetu. Chili utakamiso kunyingika ngwetu, nyi twalikonyeka ni mbunge yeswe, Yehova mahasa kukonekena chipwe shili yetu yinene. Mutuhasa kuchilinga ha kulemba kuli iye ni kumwita ukwaso, ha kuhanjika ni makulwana a mu chikungulwila ni kulinga yize mutuhasa hanga tuhone kufunyina shili yacho. (Yishi. 28:13; Yili. 26:20; 1 Yoa. 1:9) Twakuwahilila nawa ha kunyingika ngwetu, muze Yehova akukonekena shili yetu, iye keshi kuyiwuluka nawa chipwe kutumwesa lamba mumu lia shili yacho—Eze. 33:16.

3-4. Kuchi ndumbu Jennifer alivwile hanyima lia kumupapachisa, yika mutulilongesa ha mutwe uno?

³ Ha mashimbu amwe, mutuhasa kulivwa ngwetu Yehova kakatukonekenene. Tutalenu chilweza cha Jennifer, yoze alelele mu umwenemwene. Ku ukweze wenyi, yaputuka kulinga yuma yipi ni kumbata mwono wa nongwena. Alioze ha kupalika cha yimwe miaka, iye yafuna kuli Yehova, yalumuna mwono wenyi chocho yalihana ni kumupapachisa. Iye yamba ngwenyi: “Kunyima napwile ni kulinga chinji upangala, kunwa walwa unji, napwile mutu musasu, nawa kufupa mbongo chapwile chuma chilemu chinji ku mwono wami. Alioze nanyingikine ngwami, kupalikila mu chitapo cha ukuule cha Yesu, nyi mutu malikonyeka Yehova mahasa kumukonekena. Chipwe chocho, kuli yami chapwile chikalu kutayiza ngwami, Yehova hanangukonekena.”

⁴ Ha mashimbu amwe yena hanji wakulivwa ngwe, Yehova machinunga ni kupihilila mumu lia shili yize walingile kunyima. Yehova kanazange hanga tupwe ni shindakenyo ngwo iye kakutukonekena ngwe chizechene Ndawichi alivwile. Ha mutwe uno, mutumonaho mumu liaka chili chilemu kutayiza ngwetu, Yehova hanatukonekena ni yize muyihasa kutukwasa kuchilinga.

MUMU LIAKA TWATAMBA KUTAYIZA NGWETU YEHOVA HANATUKONEKENA?

5. Yika Satana anazange hanga tutayize? Hana chilweza.

⁵ Nyi mututayiza ngwetu Yehova chamwenemwene kakutuzanga nawa hanatukonekena, kutuchi kutayiza mahuza a Satana. Twiulukenu ngwetu, Satana kanazange kulinga yeswayo mahasa hanga atukwike kulingila Yehova. Ngwe chilweza, Satana kakweseka kututwala tunyonge ngwetu, Yehova kechi keza kakonekena shili yetu. Tutalenu chilweza cha umwe lunga ku sekulu yitangu yoze achijile mu chikungulwila cha Korindu mumu lia kulinga upangala. (1 Kori. 5:1, 5, 13) Ha kupalika cha mashimbu, iye yalikonyeka. Alioze, Satana kazangile hanga mandumbu mu chikungulwila ahone kumukonekena hanji kumutambula cheka mu chikungulwila. Nyi te mandumbu mu chikungulwila kakamukonekenene, lunga wacho te manyonga ngwenyi Yehova kechi keza kamukonekena. Iye te mahasa “kwivwa chinyengo chinji” ni kwecha kulingila Yehova. Satana machinunga ni kuta miheto yenyi. Alioze, yetu ‘tunanyingika miheto yacho.’—2 Kori. 2:5-11.

6. Kuchi kutayiza ngwetu Yehova hanatukonekena chakutukwasa?

⁶ Muze twakutayiza ngwetu Yehova hanatukonekena, twakuwahilila. Muze twakuvulumuna, twakupihilila mumu lia yize twalinga. (Samu 51:17) Chino chili chuma chipema. Mumu muze twakupihilila ha shili yize twalinga, chino chakutukwasa kwalumuna yitanga yetu ni kulinga yuma yalita. (2 Kori. 7:10, 11) Alioze, nyi mutununga ni kulihisa mumu lia shili yize twalingile kunyima, chino muchihasa kutuhongesa ni kututwala tweche kulingila Yehova. Muze twakutayiza ngwetu Yehova hanatukonekena, chino chakutukwasa kumbila shili yetu kusuku, kunyima lietu. Kulinga chino, muchitukwasa kuwayila Yehova ni mbunge yitoma hamwe ni uwahililo ngwe chize iye anazange. (Kolo. 1:10, 11; 2 Timo. 1:3) Mba kuchi mutuhasa kupwa ni shindakenyo ngwetu, Yehova hanatukonekena?

YIKA MUYIHASA KUTUKWASA KUTAYIZA NGWETU YEHOVA HANATUKONEKENA?

7-8. Yika Yehova ambile hakutwala kuli iye mwene, shindakenyo yika mutuhasa kupwa nayo? (Kutuhuka 34:6, 7)

⁷ Nyonga ha yize Yehova ambile hali iye mwene. Ngwe chilweza, tutalenu yize Yehova alwezele Mose ku Mulundu wa Sinai.a (Tanga Kutuhuka 34:6, 7.) Chipwe ngwe Yehova kakwete yitanga yinji yipema, nihindu yalweza Mose ngwenyi, kali Zambi “mukwa-keke yoze wakulisa mu chihela cha akwo.” Shina Zambi yoze wapwa chocho malituna kukonekena kavumbi kenyi yoze walikonyeka ku shili yenyi? Ka. Nyi te Yehova mahona kukonekena mutu wacho, te mapwa Zambi mupi nawa keshi keke. Yehova kechi keza kapwa ni yitanga yino.

⁸ Mutuhasa kupwa ni shindakenyo ngwetu, muze Yehova akwamba ngwenyi kali mukwa-keke, kanahanjika umwenemwene. Mumu iye keshi kulionga. (Samu 31:5) Kashika, mutuhasa kujikijila ha yize iye akwamba. Nyi chakukukaliwila kuvulama shili yize walingile kunyima, lihule ngwe: ‘Shina nakufuliela ngwami Yehova chamwenemwene kali mukwa-keke, nawa kakukonekena waze akulikonyeka ni mbunge yeswe?’ Nyi che wakufuliela, muhasa kupwa ni shindakenyo ngwe ni yena Yehova kakukonekena.

9. Yika Samu 32:5 wakutulongesa ha chize Yehova akutukonekena?

⁹ Tupukunenu ha yize Mbimbiliya yakwamba hakutwala ku ukonekeno wa Yehova. Ngwe chilweza, tutalenu yize Ndawichi ambile hakutwala ku ukonekeno wa Yehova. (Tanga Samu 32:5.) Ndawichi yamba ngwenyi: “Yena wakonekenene uhenge wa shili yami.” Mu limi lia Hepreu, liji kukonekena mulihasa kulumbunuka kuzundula, kuchiza hanji kumbata. Muze Yehova akonekenene Ndawichi, iye yalivwa ngwe kamuzundula yilemu yize apwile ni kumbata. Ndawichi kevwile kuwaha chinji ha kunyingika ngwenyi, Yehova kamukonekenene liakulu. (Samu 32:2-4) Ni yetu mutuhasa kulivwa ngwe chize Ndawichi alivwile. Muze twakulikonyeka ni mbunge yetu yeswe ku shili yize twalingile, kutwatambile kununga ni kumbata yilemu ya shili yize Yehova hanazundula ni kuyimbata kusuku ni yetu.

10-11. Yika maliji “mukwa-kukonekena” anatulongesa hali Yehova? (Samu 86:5)

¹⁰ Tanga Samu 86:5. Ha Samu yino, Ndawichi yamba ngwenyi, Yehova kali “mukwa-kukonekena.” Kulita ni maliji wano, Mbimbiliya yimwe yakuhanjika hakutwala kuli Yehova ngwo: “Iye ‘kakukonekena,’ che apwa lume.’” Mumu liaka Yehova apwa mukwa-kukonekena? Maliji anakaulaho ha versu yino kanambe ngwo: “Utu we wa zango kuwakulumbama kuli waze eswe masanyika kuli yena.” Ha mutwe uze wapalika, twalilongesanga ngwetu, Yehova kanalakenya kusolola utu wenyi wa zango kuli waze eswe akumuzanga, nawa iye kechi keza kaahichika nilimwe tangwa. Mumu lia utu wenyi wa zango, Yehova makonekena liakulu yivulumunyi eswe waze malikonyeka. (Izaia 55:7) Nyi chili chikalu kuli yena kutayiza ngwo Zambi hanakukonekena, lihule ngwe: ‘Shina nakutayiza ngwami, Yehova kali mukwa-kukonekena eswe waze akulemba kuli iye ni kumwita ukonekeno? Shina ni yami chatambile kutayiza ngwami hanangukonekena muze namwichile ukonekeno?’

¹¹ Mutuhasa kuwana utakamiso ha kunyingika ngwetu, Yehova kananyingika kanawa ngwenyi tuli yihenge. (Samu 139:1, 2) Tutalenu yize Ndawichi ambile ha Samu yikwo, ni chize muyihasa kutukwasa kutayiza ngwetu, Yehova kanazange kutukonekena.

KANDA TUVULAMA YIZE YEHOVA AKWIULUKA

12-13. Kulita ni Samu 103:14, yika Yehova akwiuluka hali yetu, nawa yino yakumutwala hanga alinge yika?

¹² Tanga Samu 103:14. Ndawichi kambile ngwenyi: ‘Yehova kakwiuluka ngwo, yetu tuli fufuta.’ Ni maliji wano, Ndawichi kanasolola mumu liaka Yehova anazange kukonekena tuvumbi twenyi waze akulikonyeka. Iye kakwiuluka mashimbu eswe ngwenyi, tuli yivulumunyi. Tutalenu yize maliji wano analumbunuka.

¹³ Yehova katangile Alama “ku fufuta ya mavu.” Kashika, iye kananyingika kanawa chize atu apwa ni yize akufupa. Ngwe chilweza, atu kakufupa kulia, kupomba ni kuhwima. Chipwe muze apwile angunu, Alama ni Eva te kakufupa yuma yacho. (Uputu. 2:7) Alioze muze Alama ni Eva avulumwine, liji fufuta yilipwa ni ulumbunwiso ukwo. Amu tuli ana jo, twahingile shili yize yakututwala hanga tulinge yuma yipi. Yehova keshi kunyingika wika uhenge wetu. Ndawichi kambile ngwenyi, iye ‘kakwiuluka.’ Liji lia Hepru avulukile hano, mulihasa kulumbunuka kulinga chuma chipema. Maliji a Ndawichi mahasa nawa kulumbunuka ngwo, Yehova kananyingika ngwenyi, mashimbu amwe mutuhasa kuhengesa. Alioze muze akumona ngwenyi twalikonyeka, iye kakusolola keke yenyi ni kutukonekena.—Samu 78:38, 39.

14. (a) Yika nawa Ndawichi ambile hakutwala ku chize Yehova akutukonekena? (Samu 103:12) (b) Yika twalilongesa ha chize Yehova akonekenene Ndawichi? (Tala mushete “Chize Yehova Akukonekena ni Kuvulama.”)

¹⁴ Yika nawa mutuhasa kulilongesa ha Samu 103 hakutwala ku chize Yehova akutukonekena? (Tanga Samu 103:12.) Ndawichi kambile ngwenyi, muze Yehova akukonekena, Iye kakutwala shili yetu kusuku ngwe ‘chize wapwa usuhwe wa ku chivumbuko ndo ku chitokelo.’ Ngwe chize tunanyingika, chivumbuko chatwama kusuku ni chitokelo, kuyichi keza kalitakana nilimwe tangwa. Yika chino chinatulongesa hakutwala ku shili yize Yehova akutukonekena? Umwe mukanda uze wakulumbununa versu yino, wakwamba ngwo: “Zambi kakumbata shili yetu kusuku ni yetu. Chino mutuhasa kuchitesa ni limwe vumba lize liakuhwa. Kashika, mutuhasa kupwa ni shindakenyo ngwetu, iye keshi kwiuluka nawa uhenge wacho.” Tuchinyongenu ha chino. Vumba lipema mulihasa kwiulula mutu chimwe chuma. Alioze muze Yehova akukonekena, chakupwa ngwe kukushi kusala vumba chipwe lume likehe lize liakumwiwulula shili hanga akatumwese lamba mumu lia shili yacho.—Eze. 18:21, 22; Yili. 3:19.

15. Yika mutuhasa kulinga nyi mutuchinunga ni kulilamikiza ha shili yize twalingile kunyima?

¹⁵ Kuchi maliji a Ndawichi ali ha Samu 103, anatukwase kutayiza ukonekeno wa Yehova? Nyi wakununga ni kulilamikiza mumu lia shili yize walingile kunyima, iwuluka ngwe, Yehova kakwiuluka ngwo uli chivulumunyi. Yehova kakukonekena waze eswe akulikonyeka ku shili yize alingile ni kwalumuna yitanga yo. Iwuluka ngwe, Yehova hanasakula kuvulama shili yize hanakonekena. Kashika, kechi kakusopesa hanji kukuhisa ha shili yacho, mumu iye keshi kulihulikila ha shili yize twalingile kunyima. Chipwe yetu kutwatambile kuchilinga. (Samu 130:3) Muze twakutayiza ngwetu Yehova hanatukonekena, chino chakutukwasa tweche kulilamikiza ni kununga kumuwayila ni chiseke.

16. Hana chilweza chize chinasolola ngwo, chili ponde kunyonga ha shili yize Yehova hanakonekena? (Tala nawa chizulie.)

¹⁶ Tuchinyongenu ha chilweza chino. Nyi mutu umwe kanendesa mashinyi, ha mashimbu amwe kakutala ha katalilo hanga amone yize yili kunyima lienyi. Alioze nyi manunga ni kutala wika ha katalilo, mahasa kusa mwono wenyi mu ponde. Mba anunge ni kwendesa kanawa, iye katamba kutala kulutwe kuze anayi. Chizechene nawa, ha mashimbu amwe mutuhasa kunyonga ha shili yize twalingile kunyima. Chino muchihasa kutukwasa twehuke kufunyina shili yacho. Alioze, nyi mutununga ni kunyonga ha shili yize Yehova hanakonekena, mutuhasa kutokesa uwahililo ni kuhona kumuwayila mu jila yalita. Kashika, twatamba kulihulikila ha kuwayila Yehova, ni kunyonga ha mwono uze mutukapwa nawo mu chifuchi chaha muze ‘kutuchi keuluka nawa yuma yipi.’—Iza. 65:17; Yishi. 4:25.

NUNGA NI KUTAYIZA NGWE YEHOVA KAKUKUZANGA

17. Mumu liaka twatamba kutayiza ngwetu Yehova kakutuzanga nawa kakutukonekena?

¹⁷ Twatamba kupwa ni shindakenyo ngwetu, Yehova kakutuzanga, nawa kanazange kutukonekena. (1 Yoa. 3:19) Mumu liaka? Mumu Satana kanazange tutayize ngwetu, tuli yihenge chinji, Yehova keshi kutuzanga nawa keshi kutukonekena. Chuma Satana anazange, chili kututwala hanga tweche kuwayila Yehova. Mutuhasa kushimbwila ngwetu, Satana manunga ni kusa tachi jinji mumu kananyingika ngwenyi, mashimbu akehe wika asala no. (Uso. 12:12) Kutwatambile kumwecha hanga atukumbe.

18. Yika muhasa kulinga hanga upwe ni shindakenyo ngwe Yehova kakukuzanga nawa kanazange kukukonekena?

¹⁸ Mba ukolese ujikijilo we ha zango lia Yehova, kaula yikuma yize twalilongesanga ha mitwe yize yapalika. Ha mutwe uno, twalilongesaho chize mutuhasa kupwa ni shindakenyo ngwetu, Yehova hanatukonekena. Twamona nawa yize Yehova ambile hali iye mwene. Kashika, sako mashimbu hanga unyonge ha yize Mbimbiliya yakwamba hakutwala ku ukonekeno wa Yehova. Iye mashimbu eswe kakwiuluka ngwenyi uli chihenge, kashika akukusolwela keke. Chikwo nawa, muze iye akukonekena, kakuchilinga liakulu. Kashika, nyi wapwa ni shindakenyo ngwe Yehova kali Zambi mukwa-keke, ni yena muwamba ngwe chize Ndawichi ambile ngwenyi, ‘ngunasakwilila Yehova ha kukonekena uhenge wa shili yami.’—Samu 32:5.