Nungenu ni Kuyuka ha Ukwaso wa Yehova

1. Yuma yika atu akufupa? (Mateu 5:3)

YEHOVA kananyingika yize atu anafupu. Ngwe chilweza, mba tununge ni mwono, tunafupu kulia, mazalo ni chihela cha kutwama. Nyi te kutushi ni yuma yino, kachi mwono wetu wakukala chinji, nawa hanji te hitunafu. Yehova kananyingika ngwenyi, kuli chuma chikwo chize atu akufupa. Kashika atutangile ni uhashi wa kumunyingika ni kujikijila usongwelo wenyi. (Tanga Mateu 5:3.) Nyi tunazange kupwa ni uwahililo wamwenemwene, twatamba kupwa ni usepa upema ni Yehova ni kununga ni kumujikijila.

2. Mumu liaka twatamba kupwa ngwe mutu yoze wakwitata yuma mu matapalo?

² Liji “kufupa” mu limi lia Ngregu, liakuhana nyonga lia mutu yoze wakwitata. Tuchinyongenu hali mutu yoze wakwitata mu matapalo, yoze uli ni mazalo a majilo nawa keshi ni kulia chinji. Ha chimene matwama ha mwalwa, ha ufuku mevwa chishika chinji. Atu mamwehuka mumu lia chize akusoloka. Iye mahonga ni kuhona kuwahilila. Mutu yono kananyingika ngwenyi katamba kwita ukwaso mba anunge ni mwono. Chizechene nawa, atu waze ananyingika ngwo kanafupu Zambi, katamba kwita ukwaso wenyi ni kukaula usongwelo wenyi.

3. Yika mutumona ha mutwe uno?

³ Ha mutwe uno, mutumona yize mutuhasa kulilongesa kuli pwo Ka-Fwinisha yoze wazangile chinji hanga amukwase kuli Yesu. Mutumona nawa chize mutuhasa kwimbulula pwo yono, nyi tunazange hanga Yehova anunge ni kutusongwela. Mba hanyima mutumona yize mutuhasa kulilongesa ha chilweza cha Petulu, Paulu ni Ndawichi waze ajikijilile ha ukwaso wa Yehova.

YIZE MUTUHASA KULILONGESA KULI PWO KA-FWINISHA YOZE WECHILE UKWASO

4. Yika pwo Ka-Fwinisha azangile hanga Yesu amulingile?

⁴ Tangwa limwe umwe pwo Ka-Fwinisha, yakundama kuli Yesu. Mwanenyi wa pwo kapwile ni ‘ndemoniu yoze te wakumupinjisa chinji.’ (Mateu 15:21-28) Chocho pwo wacho yaliumba kuli Yesu hanga amukwase. Tutalenu majila atatu a chize mutuhasa kwimbulwilamo pwo wacho.

5. Yika Yesu alingilile pwo Ka-Fwinisha, nawa mumu liaka? (Tala nawa chizulie.)

⁵ Pwo Ka-Fwinisha kapwile mukwa-kulikehesa. Mumu liaka tunambe chocho? Mumu iye kakevwile uli ha chize Yesu amukumbulwile. Yesu katesele mwanenyi ni mwana-kawa yoze atu waze te hi A-Yunda ko apwile ni kufunga ku mazuwo jo. Nyi yena mwe akumbulwile chocho kuli Yesu, kachi yika walingile? Shina kachi wevwile uli ni kulitwamina kwita ukwaso wa Yesu? Pwo Ka-Fwinisha kakalingile chocho. Iye kakasolwele wika ngwo kali mukwa-kulikehesa, alioze kasolwele nawa ngwo kali mukwa kunyongonona. Tunachinyingika mumu lia chize iye anungine ni kwita ukwaso kuli Yesu. Yika yamutwalile kulinga chino? Ufulielo wenyi muli Yesu. Kashika muze Yesu amwene ufulielo wa pwo yono, iye yazanga kumukwasa. Chipwe ngwe Yesu kamulweze ngwenyi kejile wika ni kukwasa “mapanga waze hanatoko a mu zuwo lia Izalele,” nihindu yakwasa pwo yono ha kuchiza ndemoniu yoze mwanenyi apwile nenyi.

6. Kuchi mutuhasa kwimbulula chilweza cha pwo Kawinisha?

⁶ Nyi tunazange kuyuka ha usongwelo wa Yehova, twatamba kwimbulula pwo yono. Twatamba kupwa akwa-kulikehesa, akwakunyongonona ni kupwa ni ufulielo ukolo. Mutu mukwa-kulikehesa, mwe wika wakununga ni kwita ukwaso wa Zambi. Twatamba nawa kufuliela muli Yesu ni kujikijila waze iye akusakula hanga asongwele tumbaji twenyi. (Mateu 24:45-47) Yehova ni Yesu kakuwahilila muze twakupwa akwa-kulikehesa, muze twakununga ni kwita ukwaso wo ni muze twakupwa ni ufulielo ukolo. Nyi twachilinga, ayo manunga ni kutukwasa ni kutusongwela. (Tesa ni Tiangu 1:5-7.) Haliapwila, tutalenu chize Yehova akutwaha kulia cha ku ufulielo, mazalo ni chihela cha kutwama, ni chize mutuhasa kwimbulula chilweza cha apostolo Petulu, Paulu ni Mwanangana Ndawichi.

IMBULULA PETULU HA KUNUNGA NI KULILONGESA LIJI LIA ZAMBI

7. Yika Yesu alwezele Petulu, nawa yika Petulu te atamba kulinga? (A-Hepreu 5:14–6:1)

⁷ Tutalenu chilweza cha Petulu. Iye kapwile umwe wa kuli A-Yunda atangu waze atayijile ngwo Yesu kali Mesaya, yoze Yehova atongwele hanga alise atu jenyi ni “maliji a mwono wa mutolo.” (Yoa. 6:66-68) Muze Yesu te kanda achifuna mu malilu, yalweza Petulu ngwenyi: “Lisa ana-mapanga jami.” (Yoa. 21:17) Petulu yamanununa kanawa mulimo uze amuhele, nawa Yehova yamukwasa hanga asoneke mikanda yaali ya Mbimbiliya. Alioze, Petulu te katamba nawa kulilongesa Liji lia Zambi. Ngwe chilweza, iye yalilongesa mikanda yize Paulu asonekene yize yapwile kulu mu Mbimbiliya. Petulu kanyingikine ngwenyi yuma yimwe yize Paulu asonekene, yapwile “yikalu kuyinyingika.” (2 Petu. 3:15, 16) Alioze Petulu yanunga ni kulilongesa yuma yacho. Iye kapwile ni kufuliela ngwo, Yehova mamukwasa kunyingika yuma yize yapwile ngwe “kulia cha tachi” ni kwononokena yize te analilongesa.—Tanga A-Hepreu 5:14–6:1.

8. Yika Petulu alingile muze Yehova amuhele usongwelo waha?

⁸ Amu Petulu apwile ni ufulielo ukolo muli Yehova, iye kapwile ni kwononokena usongwelo wenyi. Ngwe chilweza, Petulu yamona umwe usolwelo muze mungelo amulwezele ngwenyi katamba kulia yimuna waze kulita ni Shimbi ja Mose, A-Yunda te katambile kwalia mumu kaapwile a luchisa. Amu Petulu apwile Ka-Yunda ku mwono wenyi weswe, yamona ngwenyi yize mungelo amutumine kulinga te kuyalitele. Chocho Petulu yakumbulula ngwenyi: “Ka Mwene, mumu kanda nguchilia kama nichimwe chuma chipi hanji cha luchisa.” Mungelo yamulweza ngwenyi: “Kanda uvuluka chuma chize Zambi hanapemesa ngwe cha luchisa.” (Yili. 10:9-15) Chocho Petulu yononoka ni kwalumuna manyonga jenyi. Kuchi tunachinyingika? Hanyima lia kumona usolwelo uno, malunga atatu yaya ku zuwo lia Petulu ni kumulweza ngwo mwata wo Koneliu kanamusanyika. Nyi Petulu kakamwene usolwele uno, kachi kakayile ku zuwo lia Koneliu, mumu Koneliu te hi Ka-Yunda ko. Miata ja A-Yunda kapwile ni kulongesa atu ngwo, chili shili kunjila mu zuwo lia mutu yoze hi Ka-Yunda ko. (Yili. 10:28, 29) Alioze Muze Yehova asolwelele Petulu ngwo kukatuka ha shimbu liacho, iye kanazange hanga atu eswe evwe sango jipema, Petulu hazehene yalumuna manyonga jenyi ni kuputuka kwononokena Yehova. (Yishi. 4:18) Iye yaya ni kwambulwila Koneliu hamwe ni akwa-zuwo lienyi eswe, yawahilila ha kumona chize ayo apwile ni kutayiza umwenemwene, muze atambwile spiritu yisandu ni kulihana hanga aapapachise.—Yili. 10:44-48.

9. Mu majila aka aali mutuhasa kuyukilamo nyi twalilongesa yuma yize yakupwa yikalu kuyinyingika?

⁹ Chizechene ngwe Petulu, ni yetu twatamba kutanga Liji lia Zambi mashimbu eswe. Chipwe ngwe ha yisuho yinji twakutanga yuma yashi yize muyitulumbunuka, nihindu twatamba kusa tachi hanga tutange yuma yikalu. Twatamba kusa shindakenyo ngwetu, twakusa mashimbu hanga tutange Mbimbiliya. Chili chilemu nawa kusa tachi hanga tunyingike yuma yize te kutwanyingikine. Mumu liaka? Mumu mutuhasa kuyuka mu majila wano aali: Chitangu, mutulilongesa yuma yize muyitutwala kuzanga Yehova ni kumuvumbika chinji. Chamuchiali, muze mutulilongesa chimwe chuma chipema chize te kanda tuchililongesa kama hakutwala kuli Yehova, mutupwa ni zango lia kulweza akwetu hakutwala kuli iye. (Roma 11:33; Uso. 4:11) Mutuhasa kuwana nawa longeso likwo ha chilweza cha Petulu. Muze mututambula umwe ulumbunwiso waha kukatuka mu Liji lia Zambi, kawashi-washi twatamba kwalumuna mutapu wetu wa kunyonga ni chize twakulinga yuma. Nyi twachilinga, Yehova manunga ni kutusongwela nawa mutuhasa kumuwayila ni ushishiko.

IMBULULA PAULU HA KULINGA YIZE YEHOVA AKUZANGA

10. Kulita ni A-Kolosu 3:8-10, yika twatamba kulinga mba tuvwise Yehova kuwaha?

¹⁰ Mba tuvwise Yehova kuwaha, kuli chuma chikwo chize twatamba kupwa nacho. Chuma chika chenacho? Mazalo a ku spiritu. Postolo Paulu kasonekene ngwenyi, “Zulenu utu ukulu” ni “kuzala utu waha.” (Tanga A-Kolosu 3:8-10.) Chakufupiwa mashimbu ni tachi mba mutu apwe ni utu uze wakuvwisa Zambi kuwaha. Tutalenu chilweza cha Paulu. Chize ku wanuke wenyi, iye te kakusa tachi jinji hanga evwise Zambi kuwaha. (Ngala. 1:14; Fwili. 3:4, 5) Alioze iye te keshi kunyingika chize mahasa kuwayila Zambi mu jila yalita. Amu Paulu kakanyingikine umwenemwene hakutwala kuli Kristu, nawa kapwile mukwa-kuzo, iye yalipwisa mutu yoze keshi “kuvumbika atu.”—1 Timo. 1:13.

11. Kapinda muka Paulu apwile nenyi? Lumbununa.

¹¹ Muze te kanda achipwa Mukwa-Kristu, Paulu kapwile mutu mukalu. Mukanda wa Yilinga wakusolola ngwo, Paulu te kakuvwila uli unji tumbaji twa Yesu, kakwamwesa lamba, kwahungumiona ni ‘kuhalila kwashiha.’ (Yili. 9:1) Hanyima lia kupwa Mukwa-Kristu, Paulu kasele tachi hanga eche kupwa chitenu nawa yasa tachi hanga apwe chimbovu nawa mukwa-kulihumikiza. (Efwe. 4:22, 31) Chipwe chocho, muze kwalingiwile umwe kapinda hakachi ka iye ni Mbarnabe, Paulu “yalihamika kuhiana.” (Yili. 15:37-39) Yono mwe kapinda Paulu apwile nenyi, alioze kakahongele. Iye yanunga ni kusa tachi hanga apwe chimbovu ni kuvwisa Yehova kuwaha.—1 Kori. 9:27.

12. Yika yakwashile Paulu kwalumuna mwono wenyi ni kuzala utu waha?

¹² Paulu kahashile kwalumuna utu wenyi mumu kapwile mukwa-kulikehesa. (Fwili. 4:13) Petulu ni Paulu katambile “kujikijila ha tachi” ja Zambi mba alumuke. (1 Petu. 4:11) Ha yisuho yimwe, Paulu kalingile amwe tupalia ni kuhonga chinji. Alioze muze apwile ni kunenganyana, iye te kakwiuluka yuma yeswe yize Yehova amulingilile. Hachino, amu azangile kusolola usakwililo wenyi, yaputuka kusa tachi alumune mwono wenyi hanga evwise Yehova kuwaha.—Roma 7:21-25.

13. Kuchi mutuhasa kwimbulula Paulu?

¹³ Chizechene ngwe Paulu, twatamba kunyingika ngwetu chipwe ngwe twakuwayila Yehova ha mashimbu anji hanji ka, nihindu twatamba kusa tachi hanga tuzule utu ukulu ni kuzala utu waha. Hanji ngwetu, kuzala mazalo a ku spiritu waze Yehova akutwaha. Kwamba umwenemwene, ha mashimbu amwe mutuhasa kulinga amwe tupalia. Mutuhasa kwivwa uli hanji kuhanjika yuma yize kuyichi kusolola umbovu. Nyi yino muyilingiwa, kutwatambile kunyonga ngwetu, kutuchi kevwisa Yehova kuwaha nilimwe tangwa. Shimbu tunyonge chocho, twatamba kusa tachi hanga tununge ni kwalumuna yitanga yetu. (Roma 12:1, 2; Efwe. 4:24) Kashika twatamba kwiuluka chimwe chuma chilemu chinji. Nyi tunazange kununga ni kwalumuna utu wetu, twatamba kwecha hanga Yehova atulongese mba tumunyingike kanawa.

IMBULULA NDAWICHI NI KUTAYIZA UFUNGE WA YEHOVA

14-15. Mu majila aka Yehova akufungilamo atu jenyi? (Samu 27:5) (Tala nawa chizulie ha chifukilo.)

¹⁴ Mba tupwe ni uwahililo wamwenemwene, kutwatambile wika kupwa ni kulia chinji cha ku ufulielo ni mazalo a ku spiritu. Alioze, twatamba nawa kupwa ni ufunge wa Yehova. Yika mutuhasa kulinga mba Yehova atufunge?

¹⁵ Mwanangana Ndawichi kapwile ni shindakenyo ngwenyi, Yehova te mamufunga ha mashimbu akalu. (Tanga Samu 27:5.) Yehova kakufunga atu jenyi kuli mutu hanji ku chuma cheswacho chize muchihasa kwatwala hanga eche kufuliela muli iye. Kuchi Yehova akufunga tuvumbi twenyi musono? Iye kanalakenya ngwo, nichimwe chikungo kuchichi kawaha nyi machifula chikalimike ni atu jenyi. (Samu 34:7; Iza. 54:17) Satana ni andemoniu hamwe ni atu waze akutuhungumiona, kakwete ndundo. Alioze Yehova kakwete ndundo kuhiana ayo. Chipwe ngwe ayo matushiha, nihindu Yehova makafunyisa mwono wetu ha tangwa lia uhindukilo. (1 Kori. 15:55-57; Uso. 21:3, 4) Chikwo nawa, chipwe muze twakusakalala Yehova kakutukwasa hanga tuhone kwecha kumuwayila. (Yishi. 12:25; Mateu 6:27-29) Tata yetu wa zango kakutwaha mandumbu jetu a malunga ni a mapwo waze akututakamisa ni kutukwasa ha mashimbu akalu. Iye kakutwaha nawa makulwana a mu chikungulwila waze akutulongesa ni kutukwasa kukolesa ufulielo wetu. (Iza. 32:1, 2) Chikwo nawa, muze twakupwa ha kukunguluka twakulilongesa majila akwo a chize mutuhasa kwecha hanga Yehova atukwase ni kutufunga.—Hepre. 10:24, 25.

16. Mu jila yika Yehova apwile ni kufungilamo Ndawichi?

¹⁶ Muze Ndawichi te akwononokena Yehova, iye te kakumukwasa kukwata yiyulo ya mana yize te yakumunehena uwahililo. Yino yapwile jila yize Yehova te akufungilamo Ndawichi. (Tesa nawa ni Yishima 5:1, 2.) Alioze muze Ndawichi te keshi kwononokena Yehova, iye te kakumona lamba mumu lia yiyulo yenyi yipi. Mumu Yehova te keshi kumufunga ku upi wacho. (2 Samue. 12:9, 10) Alioze ha yisuho yimwe, Ndawichi te kakumona lamba mumu lia yuma yipi yize akwo apwile ni kumulinga. Muze yino yapwile ni kulingiwa, Ndawichi te kakulemba kuli Yehova ni kumulweza chize analivwu. Yehova kapwile ni kumufunga. Kuchi Yehova apwile ni kuchilinga? Kapwile ni kuchilinga ha kumutakamisa, kumulakenya ngwo mamufunga ni kumukwasa alivwe ngwo kakumuzanga.—Samu 23:1-6.

17. Kuchi mutuhasa kwimbulula Ndawichi?

¹⁷ Mutuhasa kwimbulula Ndawichi ha kufupa ukwaso wa Yehova muze tunambe kukwata yiyulo. Twatamba kunyingika nawa ngwetu, ha mashimbu amwe mutuhasa kumona lamba hi ko ngwo mumu Yehova kahona kutufunga, alioze mumu lia kukwata yiyulo yipi. (Ngala. 6:7, 8) Ha mashimbu amwe chipwe ngwe mutwononokena Yehova, nihindu mutuhasa kumona lamba mumu lia yuma yikwo. Nyi chino muchilingiwa, mutuhasa kulemba kuli Yehova, kumulweza chize tunalivwu ni kwita ukwaso wenyi. Nyi twachilinga, Yehova matutakamisa ni kutukwasa hanga tulivwe ngwetu kakutuzanga.—Fwili. 4:6, 7.

NUNGA NI KUJIKIJILA HA USONGWELO WA YEHOVA

18. Kapinda muka atu akupwa nenyi musono, nawa kuchi mutuhasa kununga ni kusolola ngwo tunafupu Zambi? (Tala nawa yizulie.)

¹⁸ Chisoneko Cha Mwaka 2026 chinambe ngwo: “Kawaha waze ananyingika ngwo, kanafupu Zambi.” Chipi-chipi musono, chili chilemu kulinga yize Yesu ambile ni kujikijila usongwelo wa Yehova. Mumu liaka? Mumu atu anji musono keshi kutayiza ngwo kanafupu Zambi ni kukaula usongwelo wenyi. Akwo chipwe ngwe kakufuliela muli Zambi, nihindu kakufupa kumuwayila ngwe chize ene anazange. Eka kakujikijila wika ha usongwelo wa atu, yino yakwatwala ahone kuwahilila. Alioze Yetu kutwatambile kwimbulula atu jacho. Kuchi mutuhasa kuchilinga? Mutuhasa kuchilinga ha kununga ni kulilongesa Liji lienyi, ha kusolola yitanga yize yakumuvwisa kuwaha, ha kumwononokena, ni ha kutayiza ufunge wenyi.