Kuchi Muhasa Kusolola Usakwililo we ha Ukuule?

1-2. Yika twatamba kulinga mumu lia chitapo cha ukuule chize Yesu ahanyine hali yetu, nawa mumu liaka? (2 A-Korindu 5:14, 15) (Tala nawa chizulie.)

UCHINYONGA ngwe musakaminya mu zuwo lize liapuzuka, mba makuchizamo kuli umwe mutu. Shina kuuchi kulivwa ngwe uli ni mukuli kuli mutu wacho? Chipwe ngwe mutu wacho kalamwina atu akwo nawa, nihindu yena muzanga kumusakwilila chinji ni kusolola ngwo, unalemesa yize iye akulingila.

² Ngwe chize twamona ha mutwe uze wapalika, yetu kutuchi kuhasa kulilamwina yetu ene ku shili yize twahingile. Alioze chitapo cha ukuule wa Yesu muchihasa kutulamwina ha yikuma yino: (1) Ha kutukonekena shili yetu, (2) ha kutwaha kutalatala cha kutupwisa atu angunu, ni (3) ha kutukwasa kulivwashana ni Zambi. Chikwo nawa, mumu lia ukuule tuli ni kutalatala cha kutwama ni mwono wa mutolo mu paraisu. Pundu lume, ukuule wakusolola zango lize Yesu apwile nalio hali atu, shimbu te kanda achiza hano hashi. (Yishi. 8:30, 31) Postolo Paulu kasonekene ngwenyi, “zango lia Kristu liakutuyula.” (Tanga 2 A-Korindu 5:14, 15.) Chino chinalumbunuka ngwo, zango lia Kristu hali yetu, liatamba kututwala kulinga yimwe, hanga tusolole usakwililo wetu chakuhona kuvulama chitapo chize ahanyine hali yetu.

3. Mumu liaka mutu ni mutu akusolola usakwililo ha chitapo cha Yesu mu jila yalisa?

³ Yika muhasa kulinga hanga usolole usakwililo we ha ukuule? Kumbululo muhana ha chihula chino, mulihasa kulisa ni lize akwenu mahana. Ngwe chilweza, tuchinyongenu ngwetu atu atatu maya wenyi ku chihela chimuwika, alioze mutu ni mutu makatuka mu mbonge yalisa. Majila waze mendela malisa. Chimuwika nawa, majila waze mutuhasa kusolwelamo ngwetu twakusakwilila ha ukuule wa Yesu, malisa kulita ni usepa uze tukwete ni Yehova. Kashika ha mutwe uno, mutushimutwina ha yizavu yitatu ya atu: (1) Alongi a Mbimbiliya, (2) Akwa-Kristu akupapachisa ni (3) mapanga waze apiangukile.

KUCHI ALONGI A MBIMBILIYA MAHASA KUSOLOLA USAKWILILO?

4. Kuchi Yehova akulivwa muze akumona alongi a Mbimbiliya masenya kulutwe?

⁴ Nyi ngwe unalilongesa hakutwala kuli Yehova, ni kuzanga kunyingika malongeso a mu Mbimbiliya, nyingika ngwe Yehova mwe unakukoko kuli iye. (Yoa. 6:44; Yili. 13:48) Chikwo nawa, Yehova mwe wakuhengwola mbunge. Chino chinalumbunuka ngwo, iye kakumona tachi jize wakusa hanga ulilongese hakutwala kuli iye, nawa kakuwahilila ha kukumona unasenye kulutwe ni kwalumuna mwono we hanga upwe sepa lienyi. (Yishi. 17:3; 27:11) Ukuule we wakupwisa chashi hanga yena upwe ni usepa upema ni Yehova. (Roma 5:10, 11) Kanda wiza kavulama chikuma chino.

5. Kuchi alongi a Mbimbiliya mahasa kukaula chiyulo chize chili ha A-Fwilipu 3:16?

⁵ Ngwe alongi a Mbimbiliya, kuchi munuhasa kusolola usakwililo wenu ha ukuule? Jila yimwe yili kukaula chiyulo cha postolo Paulu chize ahanyine kuli A-Fwilipu, muze ambile ngwenyi: “Chipwe ngwe hitwasenya kulutwe, nihindu tunungenu ni kwenda mu jila yacho.” (Fwili. 3:16) Mu Mbimbiliya yikwo, kanalumbununa maliji wano ngwo: “Tuyenu kulutwe mu jila yino yene tunendela haliapwila.” Kashika kulita ni chiyulo chino, kanda twecha chuma nichimwe chitukwike kununga ni kwendela mu jila yize yakutwala ku mwono.—Mateu 7:14; Luka 9:62.

6. Yika alongi a Mbimbiliya mahasa kulinga nyi ngwe chinapu chikalu kuli ayo kukumba umwe kapinda? (Shimbi Yamuchiali 30:11-14) (Tala nawa chizulie.)

⁶ Nyi chinapu chikalu kuli yena kutayiza limwe longeso liaha lia mu Mbimbiliya, yika muhasa kulinga? Hengwola mu mikanda yetu ni kulemba kuli Yehova hanga akukwase kunyingika kanawa longeso liacho. (Samu 86:11) Nyi ngwe hanyima lia kulinga chino nihindu mununga ni kupinda, kanda ulitwamina. Chuma watamba kulinga wika chili kununga ni kulilongesa Mbimbiliya. Nyi wachilinga, ha kupalika cha mashimbu muhasa kunyingika kanawa chikuma chacho. Alioze, nyi kapinda we kali kukumba yimwe ndako yipi yize Mbimbiliya yakukanjisa, yika muhasa kulinga? Iwuluka ngwe, Yehova keshi kutwita hanga tulinge yuma yize kutuchi kuhasa kulinga. Yena muhasa kukaula shimbi jenyi. (Tanga Shimbi Yamuchiali 30:11-14.) Yehova nawa kanalakenya kukukwasa. (Iza. 41:10, 13; 1 Kori. 10:13) Nunga ni kusa tachi hanga wononokene Yehova. Shimbu ulihulikile ha kapinda yoze unapalika, lihulikile ha kusolola usakwililo we ha yeswe yize Yehova akukwaha, kuchingako ni ukuule. Muze zango lie hali Yehova mulioka, mumona ngwe “shimbi jenyi hi jikalu ko.”—1 Yoa. 5:3.a

7. Yika akweze waze akolelele mu umwenemwene atamba kunyingika?

⁷ Mba yika mutuhasa kwamba hali yenu akweze waze nwakolela mu umwenemwene? Shina ni yenu nuli alongi a Mbimbiliya? Kwamba pundu, yenu nuli alongi alemu chinji kuli yisemi jenu. Mbimbiliya yakwamba ngwo: “Kundamenu kuli Zambi mba iye makundama kuli yenu.” (Tia. 4:8; 1 Sango 28:9) Muze nwakusa tachi hanga nuliange kukundama kuli Zambi, Zambi neye kakukundama kuli yenu. Kuli Yehova, yenu kunushi wika chihanda cha chimwe chizavu. Yehova kakanukokele kuli iye mumu lia yisemi jenu. Alioze kanukokele mutu ni mutu, chipwe ngwe nwakolelele mu umwenemwene. Mba yika Yehova alingile hanga nupwe ni usepa upema ni iye? Iye katuhele mwanenyi Yesu. Kanda nuvulama ngwenu, ukuule wa Yesu uli chawana chilemu chize ahanyine hali yenu. (Roma 5:1, 2) Kahika, shimbu kanda uchiya ha chiwanyino cha kwiuluka kufwa cha Yesu cha mwaka uno, shina muchilita kusa amwe mashimbu hanga upukune ha yize Yehova ni Yesu alingile hali yena? Hanyima, nyonga ha yize unazange kulinga ku mwono we, ni yize unazange kulingila Yehova hanga usolole usakwililo we ha ukuule.b

KUCHI AKWA-KRISTU AKUPAPACHISA MAHASA KUSOLOLA USAKWILILO WO HA UKUULE?

8. Mu majila aka Akwa-Kristu a kupapachisa hanasolola usakwililo wo ha ukuule?

⁸ Nyi uli Mukwa-Kristu wa kupapachisa, hiunasolola usakwililo we mu majila eka ni eka. Ngwe chilweza, yena wasele tachi hanga ukundame kuli Yehova ni kulinga yize muhasa hanga umuvwise kuwaha. Wononokenene shimbi ya Yesu ya kwambujola ni kutayisa tumbaji. Walihanyine kuli Yehova ni kukupapachisa. Chikwo nawa, hanji wapalikile mu yeseko mumu lia kukwata chiyulo cha kuwayila Yehova. (2 Timo. 3:12) Alioze wanyongonwene ni kununga ni kuwayila Yehova ni ushishiko. Majila wano eswe, kanasolola chize wakuzanga Yehova ni chize wakuzanga kumusakwilila ha ukuule.—Hepre. 12:2, 3.

9. Mumu liaka Mukwa-Kristu wa kupapachisa neye atamba kukeya?

⁹ Nyi ngwe uli Mukwa-Kristu wa kupapachisa, nihindu watamba kukeya ni jimwe ponde. Mumu liaka? Mumu nyi ka, ha kupalika cha mashimbu muhasa kulelesa chitapo cha ukuule. Kuchi chino muchihasa kulingiwa? Nyonga hali Akwa-Kristu a ku sekulu yitangu mu Efwesu. Muze Yesu amuhindwishile, iye yaachichimieka mumu lia kunyongonona cho. Alioze iye yamba nawa ngwenyi, “upi ngunamono muli yena uli uno: Hiunehuka zango lize wapwile nalio ku uputukilo.” (Uso. 2:3, 4) Maliji a Yesu kanasolola ngwo, Mukwa-Kristu wa kupapachisa hakehe-hakehe mahasa kuwayila Yehova chakuhona zango. Iye mahasa kulemba, kuya ku kukunguluka hanji kwambujola lume. Alioze malinga wika yuma yacho mumu hichinapu chako kuli iye, keshi kulinga yuma mumu lia zango. Kashika, yika muhasa kulinga nyi mumona ngwe zango lize wapwile nalio kuli Yehova ku uputukilo, liakeketela?

10. Kuchi muhasa kukaula yize Paulu alwezele Timoteu hanga alinge? (1 Timoteu 4:13, 15)

¹⁰ Postolo Paulu kakolwezele Timoteu hanga anunge ni kupukuna ni kulihulikila ha kulinga yuma ya ku ufulielo. (Tanga 1 Timoteu 4:13, 15.) Kulita ni chiyulo chino, nyonga ha yize muhasa kulinga hanga uwayile Yehova ni kwecha hanga ‘spiritu yisandu yikwehe tachi.’ (Tala nawa nota mu Mbimbiliya ya estudo “spiritu yisandu yinwehe tachi” ha Roma 12:11.) Ngwe chilweza, hanji muhasa kusa mashimbu hanga ululieke kukunguluka ni kulihulikila ha kukunguluka chacho. Chikwo nawa, muze unambe kulinga longeso lie lia wika, watamba kufupa chihela chize kuchishi zungo, kuze muhasa kupwa ukawe, hanga upukune ha yize mulilongesa. Chizechene ngwe kusa tete ha jiko chakuwezela kahia, ni yena watamba kulinga yuma yize muyokesa usakwililo we ha yeswe yize Yehova akukulingila, kuchingako ni ukuule. Chikwo nawa, shina muchilita kulianga kupukuna ha yiwape yize tuli nayo mumu lia kupwa Yela ja Yehova, shimbu chiwanyino kanda chichilingiwa? Nyi wachilinga, muchikukwasa kwokesa usakwililo we ha ukuule uze wakukukwasa kupwa ni usepa upema ni Yehova.

11-12. Nyi ngwe zango lie lia kwambujola liatepuluka, shina chino chinalumbunuka ngwo kuushi nawa ni spiritu yisandu? Lumbununa. (Tala nawa chizulie.)

¹¹ Nyi ngwe mutokesa zango lize uli nalio lia kulingila Yehova ha shimbu limwe, kanda unenganyana hanji kumona ngwe kuushi nawa ni spiritu ya Zambi. Iwuluka ngwe, postolo Paulu kasonekenene A-Korindu hanga ahanjike hakutwala ku mulimo wenyi wa kwambujola. Yamba ngwenyi: ‘Chipwe ngwe nakuulinga, hi ku zango lia yami mwene ko, chipwe chocho hanangwehe chiteli chacho.’ (1 Kori. 9:17) Yika iye azangile kwamba?

¹² Chizechene ngwe postolo Paulu apwile ni kuhona zango lia kulinga mulimo wa kwambujola, ni yetu ha mashimbu amwe che twakulivwa. Alioze, iye katesele kununga ni kwambujola chipwe ngwe ha mashimbu jacho, zango lienyi lia kwambujola liatepulukile. Ni yena hanji muhasa kupwa ni nyonga linoliene. Kashika tesa kulinga yuma yalita chipwe ngwe ha mashimbu amwe, zango lie mulitepuluka. Lemba hanga Yehova akwehe tachi ja kulinga yuma yeswe yize iye akuzanga. (Fwili. 2:13) Nunga ni kulihulikila ha kulinga yuma ya ku ufulielo. Chikwo nawa, pwako ni shindakenyo ngwe, ha kupalika cha mashimbu, nyi wanunga ni kulinga yuma yino, muyikukwasa kwokesa cheka zango lia kulinga yuma ya ku ufulielo.

13. Kuchi mutuhasa kununga ni kulihengwola hanga tumone nyi tunanungu mu ufulielo?

¹³ Ha shimbu ni shimbu, muchilita kulihengwola hanga umone nyi unende kulita ni usongwelo uli ha 2 A-Korindu 13:5, unambe ngwo: “Nungenu ni kulihengwola yenwene hanga numone nyi nuli mu ufulielo; nungenu ni kusolola chize nwapwa.” Ngwe chilweza, mutuhasa kulihula ngwetu, ‘Shina ngunase Wanangana wa Zambi ha chihela chitangu ku mwono wami?’ (Mateu 6:33) Kutala, yiheho yami yakusolola ngwo, nakuvwila lwaji yuma yipi? (Samu 97:10) Shina maliji jami ni yitanga yami yinakwasa chikungulwila chipwe chalinunga? (Efwe. 4:2, 3) Ha mashimbu a Chiwanyino cha Kwiwuluka Kufwa cha Yesu, he twatamba kupukuna chinji ha chawana cha ukuule chize Yehova atuhele. Mumu mashimbu jacho kakutwaha uhashi wa kulihengwola yetu ene hanga tumone nyi mwono uze tuli nawo haliapwila unavwisa kuwaha Kristu, nyi yetu ene.c

KUCHI MAPANGA WAZE AHICHIKILE CHIKUNGULWILA MAHASA KUSOLOLA USAKWILILO WO HA UKUULE?

14. Mumu liaka amwe mandumbu jetu ahichikile chikungulwila?

¹⁴ Mandumbu jetu amwe hanahichika chikungulwila. Amwe kakuchilinga chipwe ngwe kapwile ni kuwayila Yehova ni ushishiko. Mumu liaka? Mumu amwe kakulemewa ni “yipikalo ya ku mwono.” (Luka 21:34) Akwo, kakutalinga mumu lia yize umwe ndumbu ambile hanji alingile. (Tia. 3:2) Eka, kalingile shili yinene mba mumu lia sonyi hanji chuma chikwo nawa, yahona kwita ukwaso. Nyi yino ye yalingiwile kuli yena, mba yiuhichika chikungulwila, yika muhasa kulinga? Yika chawana cha ukuule muchikukwasa kulinga?

15. Kuchi Yehova akusolola ngwo kakulihulumba hali mandumbu jetu waze ahichikile chikungulwila? (Ezekiele 34:11, 12, 16)

¹⁵ Tuchinyongenu ha chize Yehova akulivwa mumu lia mandumbu jetu waze ahichikile chikungulwila. Iye keshi kwaevwila uli chipwe kwavulama. Shimbu achilinge, iye kakufupa mapanga jenyi waze hanatoko. Kakwafunga, kwalisa ni kwakwasa hanga afune kuli iye. (Tanga Ezekiele 34:11, 12, 16.) Shina Yehova ye analingi nawa ni hali yena? Ewa. Nyi ngwe unatange mutwe uno, chino chinasolola ngwo, nihindu muchinunga ni kuzanga Yehova. Nyi Yehova kamwene mbunge ye ni kukukoka kuli iye mu umwenemwene, shina kechi kuhasa kukufunyisa cheka kuli iye?

16. Yika muyihasa kukwasa mapanga waze ahichikile Yehova afune mu chikungulwila? (Tala nawa chizulie.)

¹⁶ Mu mukunda Volte para Jeová, muli maliji amwe a zango anambe ngwo: Muhasa kupwa ni shindakenyo ngwe, muupwa ni ukwaso wa Yehova muze mufuna kuli iye. Iye makukwasa kukumba kusakalala, kwehuka toto ni kuwana sambukila ya ku manyonga ni kupwa ni mbunge yitoma. Hachino, muhasa kupwa cheka ni tachi ja kulingila Yehova ni kumuwayila hamuwika ni mandumbu je a ku ufulielo. Iwuluka nawa ngwe, makulwana a mu chikungulwila, newo kanazange chinji kukukwasa. Ayo kanazange kupwa “chiswamo ha fuji, ngwe uchinyino ha kangonga.” (Iza. 32:2) Nyi unazange kusolola usakwililo we ha chitapo cha ukuule, lihule ngwe, yika munguhasa kulinga hanga ngulivwashane ni Yehova? (Iza. 1:18; 1 Petu. 2:25) Ngwe chilweza, shina muhasa kuya ha chimwe kukunguluka mu zuwo lia Wanangana? Shina muhasa kuhanjika ni umwe mukulwana hanga umwite ukwaso wa ku ufulielo? Hanji ayo mahasa kululieka yuma hanga ulilongese Mbimbiliya ha amwe mashimbu. Muhasa nawa kupwa ni shindakenyo ngwe, nyi walemba hakutwala ku chikuma chacho ni kusa tachi hanga usolole usakwililo we, ha chitapo cha ukuule wa Yesu, Yehova makuwahisa.

YIKA MUHASA KULINGA?

17-18. Kuchi mutuhasa kukalakalisa mashimbu jetu ni mana, shimbu chiwanyino cha mwaka uno kanda chichilingiwa?

¹⁷ Yesu kambile ngwenyi, Yehova kamutumine ahane mwono wenyi “hanga mweswawo mafuliela muli iye kechi kamunongesa alioze akapwe ni mwono wa mutolo.” (Yoa. 3:16) Ukuule yili jila yize Yehova akutupulwilamo ku shili ni ku kufwa. Kashika, kutwatambile kulelesa ulemu uze ukuule ukwete. (Roma 3:23, 24; 2 Kori. 6:1) Shimbu Chiwanyino cha Kwiwuluka Kufwa cha Yesu kanda chichilingiwa, chakupwa chipema kupukuna ha zango lize Yehova ni Yesu atusolwelele. Zango liacho, mulitukwasa kulinga yimwe hanga ni yetu tusolole usakwililo wetu ha yize ayo alingile.

¹⁸ Kuchi muhasa kusolola usakwililo we ha ukuule? Kumbululo lie ha chihula chino, mulihasa kulisa ni lia atu akwo. Alioze muhasa kupwa ni shindakenyo ngwe, Yehova mawahisa tachi jize wakusa ni tachi ja tununu a tununu twa tuvumbi jenyi waze keshi kutwama hanga ‘alivwise kuwaha ene, alioze evwise kuwaha Kristu yoze wafwile hali ayo.’—2 Kori. 5:15.