Sakula Kanawa Maliji Muze Unalongesa Umwenemwene

1. Yika twatamba kulinga mba tupwe mu usoko wa Yehova?

MUZE twakuliwana ni mandumbu jetu, kanji-kanji twakwahula ngwetu, “kuchi wanyingikine umwenemwene?” Amwe kakukumbulula chihula chino ha kwamba ngwo, “kasemukinyine mu umwenemwene.” Eka kakwamba ngwo, “achili aha mu umwenemwene.” Twakukumbulula mu mutapu uno, mumu umwenemwene wa mu Liji lia Zambi wakusongwela mwono wetu. Mumu liaka? Mumu tunanyingika ngwetu, mutuhasa wika kulinga chihanda mu usoko wa Yehova, nyi twazanga umwenemwene ni kutwama kulita ni umwenemwene wacho. Chino, chinachingi kusolola umwenemwene ha yize twakwamba ni ha yize twakulinga.—Samu 15:1-3.

2. (a) Yika atu te anyingika hakutwala kuli Yesu? (b) Yika atu alingile hakutwala ku umwenemwene uze Yesu ambulwile?

² Yesu kapwile ni kuhanjika umwenemwene mashimbu eswe, chipwe ngwe yize apwile ni kuhanjika te kuyishi kuvwisa kuwaha atu eswe. Chipwe lume atu waze apwile ni kumuvwila kole, te kachinyingika ngwo iye kakuhanjika umwenemwene. (Mateu 22:16) Hakutwala ku umwenemwene uze Yesu alongesele, yamba ngwenyi: “Neza ni kuhandununa, mwana wa lunga ni tato, mwana wa pwo ni naye, tembwa-mwana ni naye-weno.” (Mateu 10:35) Yesu kakazangile hanga atu achine sango jize iye ni tumbaji twenyi apwile ni kwambujola, alioze kanyingikine ngwenyi chino te muchilingiwa. (Mateu 23:37) Iye kanyingikine nawa ngwenyi, sango jize iye ni tumbaji twenyi mambujola te mujihandununa atu mu yizavu yaali. Waze akuzanga umwenemwene wa mu Mbimbiliya ni waze keshi kuuzanga.—2 Tesa. 2:9-11.

3. Yihula yika mutukumbulula ha mutwe uno?

³ Chizechene ngwe Yesu, ni yetu twakusa tachi hanga tuhanjike umwenemwene mashimbu eswe, chipwe ngwe chino kuchishi kuvwisa kuwaha atu eswe. Chikwo nawa, twakulongesa umwenemwene wa mu Mbimbiliya, chipwe ngwe amwe kakutuvwila uli mumu lia yize twakwamba. Shina chino chinalumbunuka ngwo twatamba kuhanjika umwenemwene, chakuhona kunyonga ha yize mutwamba ni shimbu lize mutuyamba? Ka, hi chocho ko. Ha mutwe uno, mutukumbululaho yihula yino: Kuliko mutuhasa kuwana umwenemwene? Mumu liaka, kuchi, nawa ha shimbu lika twatamba kuhanjika umwenemwene? Makumbululo a yihula yino, matukwasa kuhanjika umwenemwene mu jila yalita, nawa ha shimbu lialita.

KULIKO MUTUHASA KUWANA UMWENEMWENE?

4. Mumu liaka mutuhasa kwamba ngwetu Yehova kali chishina cha umwenemwene?

⁴ Yehova kali chishina cha umwenemwene. Yeswe yize akwamba yili yamwenemwene. Ngwe chilweza, muze akuhanjika hakutwala ku yuma yize yalita ni yuma yize kuyalitele, iye kakuhanjika umwenemwene. (Samu 19:9; 119:142, 151) Yeswe yize akwamba hakutwala ku yize muyikalingiwa kulutwe lia matangwa, yakumanunuka. (Iza. 55:10, 11) Muze akutulakenya yimwe, kakuyimanununa. (Kwa. 23:19) Kwamba umwenemwene, Yehova keshi kulionga. (Hepre. 6:18) Kashika, chakupwa chashi kunyingika mumu liaka Mbimbiliya yakusanyika Yehova ngwo, “Zambi ya umwenemwene.”—Samu 31:5.

5. Mumu liaka hi chikaluko kuwana “Zambi ya umwenemwene”? Lumbununa. (Yili. 17:27)

⁵ Kulisa ni yize atu anji akunyonga, kuli yetu hi chikalu ko kunyingika “Zambi ya umwenemwene.” Yuma yeswe yize twakumona yakusolola ngwo, Zambi kwatwama lume. (Roma 1:20) Muze postolo Paulu te anahanjika ni chimwe chizavu cha atu mu Atene waze alilongesele chinji, iye yaalweza ngwenyi, Zambi kanazange hanga ‘numuwane’ mumu iye “katwamine kusuku ni mweswe wa kuli yetu.” (Tanga Yilinga 17:27.) Kwamba umwenemwene, Yehova kakukoka akwa-kulikehesa waze akufupa umwenemwene.—Yoa. 6:44.

6. Umwenemwene uka twakuwana mu Mbimbiliya, nawa mumu liaka twatamba kusakwilila ha umwenemwene wacho?

⁶ Jila yimwe yize mutuhasa kunyingikinamo Yehova, yili kulilongesa Mbimbiliya. Malunga waze asonekene Mbimbiliya kapwile ni kwasongwela ku spiritu ya Zambi. (2 Petu. 1:20, 21) Kashika yeswe yize yili mu Mbimbiliya yili yamwenemwene nawa mutuhasa kuyijikijila. Ngwe chilweza, mutuhasa kujikijila Mbimbiliya muze yakuhanjika hakutwala ku chize mwono hano hashi waputukile ni yuma yeswe yize yatwamako. (Uputu. 1:1, 26) Mutuhasa nawa kufuliela Mbimbiliya muze yakuhanjika hakutwala ku chize shili, lamba ni kufwa yaputukile. (Roma 5:12; 6:23) Mutuhasa kuyijikijila ni mbunge yeswe muze yakwamba ngwo, Mwanenyi Yesu Kristu makapemesa yuma yeswe yize Satana “tato ya mahuza,” anapihisa. (Yoa. 8:44; Roma 16:20) Mutuhasa kujikijila nawa ha yilakenyo ya mu Mbimbiliya yinambe ngwo, Yesu makanongesa atu api, makahindwisa afu, makapwisa hashi paraisu ni kutupwisa angunu. (Yoa. 11:25, 26; 1 Yoa. 3:8) Yehova hanatwehe chiwape chinene chinji, ha kutulongesa umwenemwene ni kutwaha uhashi wa kulongesa umwenemwene wacho kuli akwetu.—Mateu 28:19, 20.

MUMU LIAKA TWAKUHANJIKA UMWENEMWENE?

7-8. Ni nyonga lika twatamba kuhanjika umwenemwene? Hana chilweza. (Marku 3:11, 12) (Tala nawa yizulie.)

⁷ Ngwe chize twamona, mba tulinge chihanda mu usoko wa Yehova, twatamba kuhanjika umwenemwene. Alioze mba tuvwise Yehova kuwaha kutwatambile wika kuhanjika umwenemwene. Twatamba kuchilinga nawa mumu chili chilemu chinji kuli Yehova. Tala yize yalingiwile ha mashimbu waze Yesu apwile hano hashi, mu mulimo wa kwambujola. (Tanga Marku 3:11, 12.) Muze Yesu apwile ni kwambujola hakamwihi ni Kalungalwiji wa Ngalileya, mbunga yinene yimujingilika hanga amupanjike. Hakachi ko hapwile atu waze apwile ni andemoniu waze apwile ni kufukama kuli iye ni kwamba ngwo: “Yena uli Mwana wa Zambi.” Mumu liaka andemoniu ahanjikile umwenemwene hakutwala kuli Yesu? Kota kachilingile hanga atu aajikijile mba hanyima aapiangule. Andemoniu kahanjikile umwenemwene, alioze kakachilingile ni nyonga lialita. Yesu kanyingikine kanawa manyonga jo, kashika kakawahililile ni yize ayo alingile. Chocho yaakanjisa kwambujola hakutwala kuli iye.

⁸ Yika twalilongesa ha lusango yono? Twalilongesa ngwetu, nyonga lietu muze tunahanjika umwenemwene, lili lilemu chinji kuli Yehova. Kashika chili chilemu kulongesa umwenemwene hakutwala kuli Yehova, mumu twakumuzanga. Chikwo nawa, muze matuchichimieka mumu lia sango jize mutwambujola, twatamba kutalikisa uchichimieko wacho hali Yehova.—Mateu 5:16; tesa ni Yili. 14:12-15.

9. Yika kutwatambile kulinga, nawa mumu liaka?

⁹ Tutalenu chilweza chikwo cha mumu liaka twatamba kwehuka kutalikisa uchichimieko hali yetu ene. Uchinyonga ngwe, umwe ndumbu mu chikungulwila matujikijila ha kutulweza sango jakusweka, alioze yetu mutujilweza atu akwo. Nyi mandumbu waze twalwezele sango jacho manyingika ngwo, yize twalwezele yili yamwenemwene, ayo manyonga ngwo tunanyingika sango jinji jakusweka. Chino muchatwala aputuke kutulemesa shimbu alemese Zambi. (Yishi. 11:13) Mumu liaka? Mumu kutwakalwezele wika sango jakusweka, alioze twalwezele nawa umwenemwene ni nyonga lize kulialitele.

KUCHI MUTUHASA KUHANJIKA UMWENEMWENE?

10. Maliji apema yika analumbunuka? (A-Kolosu 4:6)

¹⁰ Tanga A-Kolosu 4:6. Postolo Paulu keulwile Akwa-Kristu mu Kolosu ngwenyi, ‘maliji jo katamba kupwa apema mashimbu eswe.’ Yika maliji wano analumbunuka? Mu limi lia Ngregu maliji wano kanalumbunuka ngwo, yize mutuhanjika yatamba kupwa yipema, ya umbovu, yatamba nawa kukwasa akwetu.

11-12. Mumu liaka twatamba kulongesa umwenemwene ni zango? Hana chilweza. (Tala nawa yizulie.)

¹¹ Twatamba kukaula chiyulo cha Paulu ha kuhanjika malji apema muze mutulongesa umwenemwene. Mbimbiliya yakutesa umwenemwene ni mukwale wambuka uze wakuhandununa mwono ni spiritu. Mu maliji akwo, Mbimbiliya yakutukwasa kunyingika chize twapwa muchima. (Hepre. 4:12) Alioze, nyi kutwakalakalishile Mbimbiliya kanawa, mutuhasa kulemeka atu ku mbunge ni kuneha mbwaja. Kuchi yino muyihasa kulingiwa?

¹² Uchinyonga ngwe, mu mulimo wa kwambujola mutuwana umwe mutu yoze wakuwayila tuponya mashimbu eswe, wakulinga chiwanyino cha natale ni chiwanyino cha chizomboka hamwe ni usoko wenyi. Shina mutuhasa kumwazulwila Mbimbiliya hazehene hanga tumulweze ngwo, chili uhepuke kuwayila tuponya, kulinga chiwanyino cha natale, hanji cha chizomboka, yuma yize kuyalitele ni shimbi ja mu Mbimbiliya? (Iza. 44:14-20; 2 Kori. 6:14-17) Ka. Nyi twalinga chino ha chisuho chitangu, mutuhanjika umwenemwene alioze kutuchi kukalakalisa kanawa liji lia Zambi.

13. Kuchi mutuhasa kulungiwa maliji jetu ni mungwa?

¹³ Postolo Paulu kambile ngwenyi, maliji jetu katamba kupwa akulungiwa ni mungwa. Alioze iye kakambile ngwenyi twatamba kusweka hanji kwalumuna umwenemwene. Kwamba umwenemwene, iye kazangile kwamba ngwenyi, maliji jetu katamba kupwa a ‘kulungiwa’ muze mutuhanjika umwenemwene uze muupemena atu waze mutwambulwila. (Yombi 12:11) Kulinga chino, muchihasa kupwa chikalu. Tuchinyongenu muze twakutelekela akwetu chimwe kulia. Kanji-kanji twakunyonga ngwetu, yilungo yize mutusa ku kulia chacho, akwetu no mayizanga mumu ni yetu twakuyizanga. Chimuwika nawa, mutuhasa kunyonga ngwetu, chize twakuhanjika muchihasa kupemena akwetu. Alioze nyonga lino kulialitele. Ngwe chilweza, ku minyachi yimwe, atu kakuhanjika yize ananyongo chakuhona kwivwa sonyi, hanji woma chipwe muze anahanjika ni makulwana. Alioze ku minyachi yikwo, kulinga chino kuchalitele nawa muchihasa kusoloka ngwe kuhona vumbi. Kashika Paulu ambile ngwenyi, twatamba kunyingika “chize mutukumbulula mutu ni mutu.” Chino chinalumbunuka ngwo, yize mutuhanjika kuyatambile kulikwachilila ha yuma yize twakuzanga hanji ha miaka yetu, alioze yatamba kulita ni yize atu anazange kwivwa.

HA SHIMBU LIKA TWATAMBA KUHANJIKA UMWENEMWENE?

14. Shina Yesu kapwile ni kulongesa tumbaji twenyi yuma yeswe yize te anyingika? Lumbununa.

¹⁴ Yesu te kakulongesa tumbaji twenyi yuma yinji nawa mashimbu eswe muze te akwalongesa kapwile ni kuhanjika no ni umbovu. (Marku 6:34) Kwapwile yuma yinji yize te tumbaji atamba kulilongesa. Nihindu Yesu te keshi kwalongesa yuma yeswe ha shimbu limuwika. Amu anyingikine kanawa tumbaji twenyi, iye te kakwalongesa yuma mu yimako-yimako. Mumu kanyingikine ngwenyi, ayo te kechi kuhasa kukwata yuma yeswe ha shimbu limuwika, nawa ngwo waze kakapwile mashimbu alita akwalweza umwe umwenemwene. Yesu kambile ngwenyi, umwenemwene wacho te kuuchi kuhasa kwalumbunuka. (Yoa. 16:12) Yika twalilongesa?

15. Shina twatamba kulongesa alongi jetu yuma yeswe ha chisuho chimuwika? Lumbununa. (Yishima 25:11) (Tala nawa chizulie.)

¹⁵ Chilweza cha Yesu chinasolola ngwo, chipwe ngwe tunanyingika umwenemwene, nihindu kutwatambile kuulongesa weswe ha chisuho chimuwika. Kuchi mutuhasa kwimbulula chilweza cha Yesu? Twatamba kuchilinga ha kulongesa akwetu kulita ni uhashi wa mutu ni mutu. Tuchinyongenu cheka ha chilweza cha mutu yoze twatongolanga ku uputukilo, wakuzanga kulinga chiwanyino cha natale ni cha chizomboka hamwe ni usoko wenyi. Yetu tunanyingika ngwetu mianda yacho, kuyishi kulita ni shimbi ja Zambi. Mba mutulilongesa ni mutu wacho kamuwika hanji kaali shimbu kanda achilinga chiwanyino cha natale. Nyi mutumulumbunwina hazehene lume ngwo, chiwanyino chize iye akulinga katambile kuchilinga mumu kuchalitele ni shimbi ja Yehova, shina mutuhanjika nenyi mu jila yalita? Ka. Kwamba umwenemwene, alongi amwe a Mbimbiliya kakukwata yuma ni kawashi ni kuputuka kwecha mianda yimwe yize apwile ni kulinga. Alioze kuli akwo kwakupalika amwe mashimbu mba yuma yaalumbunuke. Kashika, mba tukwase alongi jetu asenye kulutwe, twatamba kwalongesa yuma yize atamba kunyingika, nawa twatamba kuchilinga ha shimbu lialita, hanji ngwetu, ha shimbu lize yuma yacho muyalumbunuka.—Tanga Yishima 25:11.

16. Kuchi mutuhasa kukwasa alongi jetu anunge ni kwenda mu umwenemwene?

¹⁶ Chuma chize chakutwaha uwahililo unji, chili kukwasa akwetu anyingike umwenemwene hakutwala kuli Yehova. Mba twakwase anunge ni kwenda mu umwenemwene, twatamba kukaula yikuma yino: Kupwa chilweza chipema kuli ayo. (3 Yoa. 3, 4) Kwasolwela ngwetu twakufuliela yilakenyo ya mu Mbimbiliya kupalikila mu chize twakumbata mwono wetu. Kuhanjika umwenemwene ni nyonga lia lita. Kuhanjika maliji apema, kupwa yimbovu muze tunalongesa umwenemwene ngwe chize chatela. Chikwo nawa, twatamba kutalikisa uchichimieko weswe kuli Yehova muze matuchichimieka. Nyi mutukaula yikuma yino, mutusolola ngwetu twakuwayila Yehova Zambi ya umwenemwene.