Imbulula Yehova Zambi ya Utakamiso

1. Muze Alama ni Eva avulumwine, kuchi Yehova atakamishine atu ni kwaaha kutalatala?

YEHOVA kali Zambi ya utakamiso. Iye kakututakamisa chize haze atu alingile shili ni kupwa yihenge. Muze Alama ni Eva avulumwine, kawashi-washi Zambi yahana uprofeto uze wambile ngwenyi, mahana hamu ni kutalatala kuli atu waze masemuka kulutwe lia matangwa. Uprofeto wacho uli ha Uputukilo 3:15, nawa yalakenya ngwenyi Satana kanda Ndiapu ni yitanga yenyi yeswe kumakayinongesa.—1 Yoano 3:8; Usolwelo 12:9.

YEHOVA KATAKAMISHINE TUVUMBI TWENYI KU SHAKULU

2. Kuchi Yehova atakamishine Noa?

² Achinyonga ha chize Yehova atakamishine kavumbi kenyi Noa. Ha matangwa ja Noa atu kapwile yingulungulu nawa yitanji, alioze iye ni asoko jenyi te kakuwayila wika Yehova. Noa te mahasa kuhona utakamiso. (Uputukilo 6:4, 5, 11; Yundase 6) Alioze Yehova yamwaha utakamiso uze afupiwile hanga anunge ni kumuwayila ni kulinga yuma yalita. (Uputukilo 6:9) Yehova yalweza Noa ngwenyi manongesa yingulungulu, nawa yalumbununa yize Noa atambile kulinga hanga alamwine asoko jenyi. (Uputukilo 6:13-18) Yehova kapwile Zambi ya utakamiso kuli Noa.

3. Kuchi Yehova atakamishine Yoshua? (Tala chizulie ha uputukilo.)

³ Hakupalika cha mashimbu, Yehova yatakamisa kavumbi kenyi Yoshua yoze wapwile ni chiteli chinene kulutwe. Iye te masongwela atu ja Zambi ndo mu Chifuchi cha Chilakenyo ni kukumba tujita a ndundo waze te atwamamo. Yehova kanyingikine ngwenyi, Yoshua kali ni chitela cha kwivwa woma, kashika alwezele Mose ngwenyi: “Uhane shimbi kuli Yoshua umukolese umujikijise, mumu iye makazauka kumeso ja atu ano, iye makaatungisa mu chifuchi chino yena mumona.” (Shimbi Yamuchiali 3:28) Hachino, Yehova mwene yakolweza Yoshua, ha kwamba ngwenyi: “Te chakutumine nyi? Takama; hamuka; kanda wivwa woma hanji mwongo mumu Yehova Zambi ye hwali hamwe ni yena kweswako muoya.” (Yoshua 1:1, 9) Kuchi Yoshua evwile ha kwivwa maliji wano?

4, 5. (a) Kuchi Yehova atakamishine atu jenyi ku shakulu? (b) Kuchi Yehova atakamishine Mwanenyi?

⁴ Yehova nawa katakamishine atu jenyi ngwe chizavu. Chakutalilaho, Yehova kanyingikine ngwenyi A-Yunda te mafupiwa utakamiso muze aatwalile mu undungo ku Babilonia, chocho yaatakamisa ni uprofeto ha kwamba ngwenyi: “Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa, kumungukuzundula ni kwoko liami lia chindume lia ululi.” (Izaia 41:10) Kulutwe, Yehova yatakamisa akwa-Kristu atangu nawa kakututakamisa musono.—Tanga 2 A-Korindu 1:3, 4.

⁵ Yehova nawa katakamishine Mwanenyi. Muze Yesu amupapachishile, iye yevwa liji mu malilu ngwo: “Yono mwe Mwanami, ngunamuzange chikolo, muli iye ngunawahilila.” (Mateu 3:17) Shina muhasa kunyonga chize maliji wano atakamishine Yesu mu mulimo wenyi wa kwambujola?

YESU KATAKAMISHINE AKWO

6. Kuchi chilweza cha talentu chize Yesu azachishile chinatutakamisa?

⁶ Yesu kembulwile Tato ha kutakamisa akwo hanga ashishike. Kazachishile chilweza cha mbongo ja talentu, muze ambile ngwenyi mwata yalweza kuli hita ndungo washishika ngwenyi: “Hiwalinga kanawa, uli ndungo mupema, wamwenemwene. Mungukakusela helu lia yuma yinji; njila mu uwahililo wa mwata we.” (Mateu 25:21, 23) Maliji wano katakamishine tumbaji twenyi anunge ni kuwayila Yehova ni ushishiko weswe!

7. Kuchi Yesu akolwezele apostolo jenyi, chipi-chipi Petulu?

⁷ Chipwe muze apostolo apwile ni kulihamika hakutwala kuli iya yoze wahiana eswe, nihindu Yesu te kakulihumikiza. Yaakolweza hanga apwe akwa-kulikehesa ni kulingila akwo, chakuhona kushimbwila hanga akwo aalingile. (Luka 22:24-26) Ha yisuho yinji Petulu yahengesa ni kuvwisa Yesu yikola ku mbunge. (Mateu 16:21-23; 26:31-35, 75) Chipwe chocho Yesu kakalitunyine Petulu. Alioze, yamutakamisa ni kumwaha chiteli hanga akolweze akwo.—Yoano 21:16.

UTAKAMISO KU MASHIMBU AKUNYIMA

8. Kuchi Hezekia atakamishine tupatashi ni atu mu Yunda?

⁸ Chipwe muze tuvumbi twa Yehova te kanda achipwa ni chilweza cha Yesu hanga akaule, ayo kanyingikine ngwo katamba kutakamisa akwo. Achinyonga ha chilweza cha Hezekia. Muze A-Suria te anafupu kulukukila Yerusaleme, iye yakunga tupatashi ni atu hanga aatakamise, chocho ‘yaakolweza ni maliji jenyi.’—Tanga 2 Sango ja Mianangana 32:6-8.

9. Yika mutuhasa kulilongesa kuli Yombi ha kuhana utakamiso?

⁹ Mutuhasa kuwana utakamiso hali Yombi. Chipwe ngwe mwene kafupiwile utakamiso, nihindu kalongesele akwo chize atamba kuhana utakamiso. Yombi kalwezele malunga waze ayile ni kumukolweza ngwenyi nyi te iye mwe unaakolweza, kachi te mamba yize muyaatakamisa hi kwaalweza ko yize muyaevwisa yikola. (Yombi 16:1-5) Alioze Yombi yatambula utakamiso kuli Elihu ni kuli Yehova mwene.—Yombi 33:24, 25; 36:1, 11; 42:7, 10.

10, 11. (a) Mumu liaka mwana wa pwo wa Jefeta afupiwile utakamiso? (b) Aya mutuhasa kutakamisa musono?

¹⁰ Mwana wa pwo wa Jefeta neye kafupiwile utakamiso. Tato, mukwa-kuyula, kayile ni kwasa jita ni A-Amone. Yalakenya kuli Yehova ngwenyi, nyi mamukwasa kukumba jita, mutu mutangu yoze mamupatwiza muze mahiluka ku zuwo, makawayila Yehova ku tabernakulu. A-Izalele yakumba jita, chocho mutu mutangu wayile ni kupatwiza Jefeta kapwile mwanenyi wa wika. Jefeta kevwile yikola yinji ku mbunge. Alioze yafunga chilakenyo chenyi ha kutuma mwanenyi ku tabernakulu hanga awayile Yehova ku mwono wenyi weswe.—Akwa Kuyula 11:30-35.

¹¹ Chipwe ngwe chapwile chikalu kuli Jefeta, alioze te chikalu chinji kuli mwanenyi. Chipwe chocho, iye te kanazange kulinga yize tato alakenyene. (Akwa Kuyula 11:36, 37) Chino chinalumbunuka ngwo iye te keshi kuya ulo hanji kusema. Munyachi wo te muusula. Iye kafupiwile utakamiso unji. Mbimbiliya yinambe ngwo: ‘Chalumukine ndako mu Izalele, mapwo a Izalele ayile mwaka ha mwaka ni kutakamisa mwana wa Jefeta Ka-Ngiliate matangwa awana ha mwaka.’ (Akwa Kuyula 11:39, 40) Mwana wa Jefeta kakutwiwulula tunyonge hali akwa-Kristu anji musono waze anazange kutwama twamishi hanga alingile Yehova. Shina mutuhasa kwaachichimieka ni kwaatakamisa?—1 A-Korindu 7:32-35.

APOSTOLO KATAKAMISHINE MANDUMBU JO

12, 13. Kuchi Petulu ‘atakamishine mandumbu jenyi’?

¹² Ha umwe ufuku muze Yesu te kanda achifwa, iye yalweza postolo Petulu ngwenyi: ‘Semone, Semone, nyingika ngwe, Satana kananufupu hanga akanusale ngwe tiliku. Alioze hinakukalila, hanga ufulielo we kanda ukahwa; kashika, muze mukahiluka, ukatakamisa mandumbu je.’—Luka 22:31, 32.

¹³ Petulu kapwile umwe wa kuli waze asongwele chikungulwila chitangu cha akwa-Kristu. (A-Ngalashia 2:9) Kukatuka ha Pentekoste, iye yanunga ni kutakamisa mandumbu ha yitanga yenyi ya hamu. Muze te hakalakala ha miaka yinji, iye yasonekena mandumbu jenyi ngwenyi: “Hinasoneka kuli yenu ni maliji akehe, ni kushinjila nikushindakenya chikolo ngwami, Lino lie vumbi liamwenemwene lia Zambi. Manenumo ngu.” (1 Petulu 5:12) Mikanda ya Petulu yatakamishine akwa-Kristu ha matangwa jenyi. Nawa yinanungu ni kututakamisa musono, amu tunashimbwila kumanunuka cha uprofeto weswe wa Yehova.—2 Petulu 3:13.

14, 15. Kuchi mikanda asonekene postolo Yoano yakututakamisa?

¹⁴ Postolo Yoano nawa kapwile umwe wa kuli waze asongwele chikungulwila chitangu cha akwa-Kristu. Kasonekene Evangelu yipema hakutwala ku kwambujola cha Yesu. Mukanda uno wa Mbimbiliya watakamishine akwa-Kristu ha kulakaji ya miaka, nihindu muchinunga ni kututakamisa musono. Chakutalilaho, mu mukanda wa Yoano mwe wika twakutanga maliji a Yesu ngwo, zango liapwa chitanga chize chakusolola tumbaji twenyi amwenemwene.—Tanga Yoano 13:34, 35.

¹⁵ Mikanda yitatu ya Yoano muli nawa umwenemwene ulemu. Muze mutuhona utakamiso mumu lia uhenge wetu, twakuhuzuluka ha kutanga ukuule wa chitapo cha Yesu uze unatupemesa “ku shili yeswe.” (1 Yoano 1:7) Nawa nyi twalema ku mbunge, mutuwana utakamiso muze mututanga ngwetu, “Zambi iye munene wahiana mbunge jetu.” (1 Yoano 3:20) Yoano wika mwe wasonekene ngwenyi, “Zambi iye zango.” (1 Yoano 4:8, 16) Mikanda yenyi wamuchiali ni wamuchitatu yakuchichimieka akwa-Kristu waze ‘anende mu umwenemwene.’—2 Yoano 4; 3 Yoano 3, 4.

16, 17. Kuchi postolo Paulu atakamishine akwa-Kristu atangu?

¹⁶ Postolo Paulu kapwile chilweza chipema cha kutakamisa mandumbu jenyi. Ha amwe mashimbu muze Yesu te hafwa, apostolo anji yanunga mu Yerusaleme, muchihela muze mwapwile chizavu cha tusongo. (Yilinga 8:14; 15:2) Akwa-Kristu mu Yundeya te kakwambujola wika kuli atu waze te afuliela Zambi umuwika. Alioze spiritu yisandu yatumine Paulu kwambujola kuli A-Ngregu, A-Roma ni atu akwo waze te akuwayila tuzambi anji.—A-Ngalashia 2:7-9; 1 Timoteu 2:7.

¹⁷ Paulu kayile mu wenyi ku yihela yize musono anavuluka ngwo, Turkia, Ngresia ni Italia. Iye kambulwile sango lipema kuli atu waze te hi A-Yunda ko nawa yazulula yikungulwila. Mwono kuwakapwile washi kuli akwa-Kristu wano aha. Atu a mu mbonge yo te kakwaahungumiona, kashika afupiwile utakamiso. (1 A-Tesalonika 2:14) Ha miaka 50 kunyima, Paulu yasonekena mukanda ku chikungulwila chaha cha Tesalonika. Yamba ngwenyi: “Twakusakwila kuli Zambi matangwa eswe hali yenu, nikunuvulwoka mu yilemba yetu. Kutushi kulitwamina kwiwuluka milimo yenu ya ufulielo, ni kukilikita chenu cha zango, ni uhumikizo wa kutalatala.” (1 A-Tesalonika 1:2, 3) Nawa yaalweza hanga alitakamise umwe ni mukwo ha kusoneka ngwenyi: “Lishinjilenu umwe ni mukwo, likolesenu umwe ni mukwo.”—1 A-Tesalonika 5:11.

CHIZAVU CHA TUSONGO CHAKUHANA UTAKAMISO

18. Kuchi chizavu cha tusongo ku sekulu yitangu atakamishine Fwilipu?

¹⁸ Ku sekulu yitangu, Yehova kazachishile chizavu cha tusongo hanga atakamise akwa-Kristu, kuchingako ni waze te akusongwela yikungulwila. Muze Fwilipu ambulwile sango lipema kuli A-Samaria hakutwala kuli Kristu, chizavu cha tusongo chamukwashile. Ayo yatuma Petulu ni Yoano mandumbu aali a mu chizavu hanga alembele akwa-Kristu waze aha atambule spiritu yisandu. (Yilinga 8:5, 14-17) Fwilipu ni mandumbu waze aha kaatakamishine ha ukwaso uze atambwile kuli chizavu cha tusongo!

19. Kuchi akwa-Kristu atangu evwile muze atangile mukanda wa chizavu cha tusongo?

¹⁹ Kulutwe, chizavu cha tusongo kafupiwile kukwata chiyulo chilemu. Shina akwa-Kristu waze te hi A-Yunda ko kafupiwile lume kwatwala ku mukanda ngwe A-Yunda, kulita ni Shimbi ya Mose? (Yilinga 15:1, 2) Muze chizavu cha tusongo alembele ni kwita spiritu yisandu ni kuhengwola Yisoneko, ayo yakwata chiyulo ngwo te kuchishi nawa ni ulemu. Mba yasoneka mukanda ni kuutuma kuli mandumbu ni kwaalumbunwina chiyulo chize ayo akwachile. Muze akwa-Kristu atangile mukanda wacho, ‘yawana utakamiso.’—Yilinga 15:27-32.

20. (a) Kuchi Chizavu cha Tusongo akututakamisa tulieswe musono? (b) Chihula chika mutushimutwina ha mutwe uze muusulaho?

²⁰ Musono, Chizavu cha Tusongo cha Yela ja Yehova kakutakamisa Mbetelita, mandumbu waze akulinga mulimo walipwila wa shimbu lieswe ni yetu eswe. Ngwe mandumbu a ku sekulu yitangu, twakuwahilila ha kutambula utakamiso wacho! Nawa, mba atakamise mandumbu waze hanahichika umwenemwene hanga afune, ha mwaka 2015 Chizavu cha Tusongo yatuhwisa mukanda uli ni mutwe ngwo, Funa Kuli Yehova. Alioze, shina makulwana amu chikungulwila e wika atamba kukolweza akwo nyi tulieswe twatamba kuchilinga? Mutushimutwina chihula chino ha mutwe uze muusulaho.