Tulitakamisenu Umwe ni Mukwo “Kuhiana Chikolo”
‘Tulitalenu umwe ni mukwo . . . , ni kulitakamisa umwe ni mukwo, ni kuhiana chikolo shimbu munumona lie tangwa linakundama.’—A-HEPREU 10:24, 25.
1. Mumu liaka postolo Paulu alwezele akwa-Kristu mu Hepreu hanga alitakamise umwe ni mukwo “kuhiana chikolo”?
KU SEKULU yitangu, Paulu kahanyine chiyulo kuli akwa-Kristu A-Hepreu ngwenyi: ‘Tulitalenu umwe ni mukwo ni kulikasumuna ku zango ni yitanga yipema. Kanda twehuka kulikungulula hamuwika, ngwe ndako ya amwe, alioze nukalitakamise, ni kuhiana chikolo shimbu munumona lie tangwa linakundama.’ (A-Hepreu 10:24, 25) Mandumbu kota kalihulile ngwo mumu liaka Paulu aalwezele hanga alitakamise chikolo umwe ni mukwo. Muze te miaka yitano kanda yikumbana, chimwe chuma yichisoloka zwalala. Ha mashimbu jacho, ayo yamona ngwo tangwa lia upatwilo wa Yehova wa kunongesa Yerusaleme te hi liakundama. Chocho yanyingika ngwo katamba kutuhuka mu mbonge ngwe chize Yesu ambile. (Luka 21:20-22; Yilinga 2:19, 20) Tangwa lia Yehova liejile ha mwaka 70 muze A-Roma anongesele Yerusaleme.
2. Mumu liaka musono twatamba kulitakamisa chinji umwe ni mukwo?
2 Ni musono nawa, che chimuwika. Mbimbiliya yinambe ngwo: “Tangwa lia Yehova linene kole ni mwongo” linakundama. (Joele 2:11) Maliji a profeta Zefania no kanatale ha mashimbu jetu, akwamba ngwo: “Tangwa linene lia Yehova linakundama; linakundama fuji-fuji.” (Zefania 1:14) Hachino, twatamba ‘kulitala umwe ni mukwo ni kulikasumuna ku zango ni ku yitanga yipema.’ (A-Hepreu 10:24) Mba tuhase kutakamisa chinji mandumbu jetu, twatamba kwaazanga ni mbunge yeswe.
AYA WAZE ANAFUPIWA UTAKAMISO?
3. Yika postolo Paulu ambile hakutwala ku utakamiso? (Tala chizulie ha uputukilo.)
3 Mbimbiliya yinambe ngwo: “Kulema mu mbunge ya mutu kuchakumuhongesa, alioze liji lipema kuliakumuwahisa.” (Yishima 12:25) Yetweswe ha mashimbu amwe twakufupiwa utakamiso. Paulu kasolwele zwalala ngwenyi, chipwe waze ali ni chiteli cha kutakamisa akwo no kanafupiwa utakamiso. Yasonekena mandumbu jenyi mu Roma ngwenyi: “Usona ngunevu kunumona, hanga ngukalianyine ni yenu chawana chimwe cha vumbi, cha uspiritu, hanga nukajikize; Ngwami, tukaliwahise hamuwika, mweswe ku ufulielo wa mukwo; ufulielo wa yenu ni wa yami.” (A-Roma 1:11, 12) Maliji wano kanasolola ngwo Paulu neye kafupiwile utakamiso ha mashimbu amwe.—Tanga A-Roma 15:30-32.
4, 5. Aya mutuhasa kutakamisa musono, nawa mumu liaka?
4 Musono, mutuhasa kutakamisa mandumbu waze analingila Yehova mashimbu eswe, ngwe mapionelu ashishika. Anji akuli ayo kechele yuma yize te akuzanga chinji hanga ahase kulinga upionelu. Chino nawa chinatale hali mishionaliu, Mbetelita, tulayi a mambonge ni mapwo jo ni waze akukalakala ku yipatulo ya kulumbunwina mikanda. Ayo eswe kakuhichika yuma yize akuzanga hanga alingile Yehova shimbu lieswe. Kashika twatamba kwaatakamisa. Kuli nawa mandumbu anji waze anazange kulingila Yehova mashimbu eswe, alioze keshi ni uhashi wa kuchilinga. Ayo no kakusakwilila muze mutwaatakamisa.
5 Aya nawa anafupiwa utakamiso? Mutuhasa kutakamisa mandumbu anji waze anasakula kupwa twamishi mumu kanazange kwononokena Yehova ni kumbata wika “muli Mwene.” (1 A-Korindu 7:39) Mapwo kakuwana utakamiso muze malunga jo maalweza ngwo kakwaazanga nawa ngwo kakuwahilila ha yize yeswe ayo akulinga. (Yishima 31:28, 31) Akwa-Kristu waze akupalika mu yihungumiona hanji waze ayiza no kanafupiwa utakamiso. (2 A-Tesalonika 1:3-5) Yehova ni Yesu kakutakamisa akwa-Kristu wano eswe ashishika.—Tanga 2 A-Tesalonika 2:16, 17.
MAKULWANA AMU CHIKUNGULWILA MAHASA KUTUTAKAMISA
6. Yika twalilongesa hakutwala ku mulimo wa makulwana amu chikungulwila ha Izaia 32:1, 2?
6 Tanga Izaia 32:1, 2. Tuli ha mashimbu a lamba kashika muchihasa kupwa chashi kulema ku mbunge ni kuhona utakamiso. Yesu Kristu kakuzachisa mandumbu akuwayisa ni “alemu” chekwamba makulwana amu chikungulwila waze ashishika aku mapanga akwo hanga atutakamise. Makulwana wano amu chikungulwila hi ‘akwa-kuyula’ ha ufulielo wetu ko, alioze kali ‘akwa-milimo-ni-akwetu’ ha uwahililo wetu. Ayo kakuzanga kutukwasa hanga tuwahilile ni kununga ni kushishika.—2 A-Korindu 1:24.
7, 8. Kuchi makulwana amu chikungulwila mahasa kutakamisa akwo ha yize mahanjika ni ha yize malinga?
7 Makulwana amu chikungulwila mahasa kwimbulula postolo Paulu, yoze watakamishine chinji mandumbu jenyi. Yasonekena akwa-Kristu mu Tesalonika waze te anapalika mu yihungumiona ngwenyi: ‘Mumu ha zango lietu kuli yenu, chatuwahilile kulianyina ni yenu, hi sango lipema wika ko, alioze kunutumbikila nawa mwono wetu, mumu nwalumukine akwetu a zango.’—1 A-Tesalonika 2:8.
8 Makulwana amu chikungulwila mahasa kututakamisa chinji ha yize akwamba. Alioze shina yino wika yinakumbana? Paulu yalweza makulwana mu Efwesu ngwenyi: “Chanutamba kukwasa waze keshi tachi, nikwiwuluka maliji a Mwene Yesu, iye mwene wambile ngwenyi, Chinawaha kutambula alioze shinaho kuhana.” (Yilinga 20:35) Paulu kapwile ni ‘kulihana mwene’ hanga akwase mandumbu jenyi. Iye kasolwele ku yitanga yenyi ngwo kazangile chinji kwaakwasa. (2 A-Korindu 12:15) Chizechene nawa, makulwana amu chikungulwila katamba kutakamisa ni kukolweza akwo hi wika ko ha yize mahanjika alioze ni ha yize malinga. Chino muchisolola ngwo ayo kakutuzanga chikolo.—1 A-Korindu 14:3.
9. Kuchi makulwana amu chikungulwila mahasa kuhana chiyulo mu mutapu walita?
9 Mba akolweze mandumbu, ha mashimbu amwe makulwana amu chikungulwila katamba kuhana chiyulo. Ayo mahasa kulilongesa mu Mbimbiliya chize mahana chiyulo chacho mu mutapu walita. Yesu kali chilweza chipema ha kuhana chiyulo muze atumine sango ku yikungulwila mu Azia muze te hafwa kulu nawa hamuhindwisa. Kahanyine chiyulo chikolo ku chikungulwila cha Efwesu, Perekamu ni Tayatera. Alioze shimbu te kanda achaaha chiyulo, iye yaachichimieka ha yuma yipema yize te akulinga. (Usolwelo 2:1-5, 12, 13, 18, 19) Yesu kalwezele chikungulwila mu Laotisea ngwenyi: “Waze eswe ngunaazange nakuambila, nakualamba ha kufumba. Kashika sako mbunge yeswe ulikonyeke.” (Usolwelo 3:19) Makulwana jetu amu chikungulwila kakusa tachi hanga embulule Kristu muze mahana chiyulo.
HI MAKULWANA WIKA KO ALI NI CHITELI CHA KUTAKAMISA AKWO
Yisemi, china nunafumba ana jenu hanga apwe ni kutakamisa akwo? (Tala paragrafu 10)
10. Kuchi yetweswe mutuhasa kulikolesa umwe ni mukwo?
10 Hi makulwana amu chikungulwila wika ko ali ni chiteli cha kutakamisa akwo. Paulu kakolwezele akwa-Kristu eswe hanga ahanjike ‘yuma yipema ha kukolesa akwo, kulita ni chize chinatela.’ (A-Efwesu 4:29) Yetweswe twatamba kunyingika yize akwetu anafupu hanga twaakwase. Paulu yasonekena akwa-Kristu mu Hepreu ngwenyi: ‘Kolesenu moko aze a upekepeke, ni makungunwa a kukokoloka. Lingilenu molu jenu majila alulama, hanga chilema achine kusengunuka, alioze shinaho akahinduke.’ (A-Hepreu 12:12, 13) Yetweswe mutuhasa kukolesa ni kulitakamisa umwe ni mukwo ha yize twakuhanjika, chipwe ngwe tuli twanuke.
11. Yika yakwashile Marta muze te analema ku mbunge?
11 Umwe pangi avuluka ngwo Marta, kalemene ku mbunge ha amwe mashimbu.a (Tala maliji mushi lia lifwo.) Yamba ngwenyi: “Limwe tangwa muze te hinalemba ha kwita utakamiso, chocho yinguliwana ni pangi wa mukulwana yoze wangusolwele zango ni keke, yuma yize te ngunafupiwa ha mashimbu jacho. Yangulweza nawa yuma apalikile ku mwono wenyi yize te yinalifu ni ya yami, chocho yinguhona kulivwa nawa ngwe nguli ukawami.” Pangi yono kota kakanyingikine chize maliji jenyi te makwasa Marta!
12, 13. Kuchi mutuhasa kukaula chiyulo chili ha A-Fwilipu 2:1-4?
12 Paulu yasonekena akwa-Kristu mu Fwilipu ngwenyi: “Nyi kuchili kulembejeka chimwe muli Kristu, kachi kusangulwisa chimwe cha zango, kachi kulikunda chimwe cha spiritu, kachi mbunge yimwe ya keke, zalisenu uwahililo wami, hanga nukapwe ni manyonga amuwika, ni zango limuwika, ni kulikunda chimuwika, ni kunyonga chimuwika. Kanda nulinga nichimwe mu spiritu ya kulitachika, hanji ya ulemu wamokomoko, alioze ni mbunge ya kulikehesa, mweswe anyonge ngwenyi, mukwetu wanguhiana. Kanda nutala mweswe wa kuli yenu ku yuma yenyi mwene, alioze mweswe wa kuli yenu akatale ku yuma ya akwo nawa.”—A-Fwilipu 2:1-4.
13 Yetweswe twatamba kufupa majila waze mutukwashilamo mandumbu jetu. Kashika mutuhasa kutakamisa mandumbu jetu ha ‘kwaasangulwisa ni zango,’ “kulikunda chimwe cha spiritu” ni kwaasolwela “mbunge ya keke.”
MITAPU YIMWE YAKUTAKAMISHINAMO AKWETU
14. Mutapu uka mutuhasa kutakamishinamo akwetu?
14 Twakuwahilila chinji ha kwivwa ngwetu atu waze twakwashile kunyima kananungu ni kushishika. Postolo Yoano yasoneka ngwenyi: “Uwahililo wahiana uno kuchishi nawo shina kwivwa hali ana jami ngwo, kanende mu umwenemwene.” (3 Yoano 4) Pionelu anji kakuwahilila muze manyingika ngwo mutu yoze akwashile kunyingika umwenemwene nihindu kananungu ni kuwayila Yehova ni ushishiko, hanji hapwa pionelu. Kashika mapionelu nyi mahona utakamiso, mutuhasa kwaewulula yuma yipema yize te akulinga hanga akwase akwo.
15. Chuma chika mutuhasa kulinga mba tutakamise waze akulingila Yehova ni ushishiko?
15 Tulayi anji a mambonge ni mapwo jo kawanyine utakamiso muze atambwile mukanda wa kwaachichimieka ha kuhwa cha kumeneka chikungulwila. Chino nawa chinatale hali makulwana amu chikungulwila, mishionaliu, pionelu ni Mbetelita, waze eswe analingila Yehova ni ushishiko weswe. Nyi mutwaachichimieka, chino muchihasa kwaakwasa kuhiana chize mutunyonga.
CHIZE YETWESWE MUTUHASAKUTAKAMISA AKWETU
16. Yika mutulinga mba tuhase kutakamisa akwetu?
16 Yika mulinga nyi kuushi kuhasa kutakamisa akwenu? Kwamba pundu, kutakamisa akwetu hi chikalu ko. Nyi mumona mutu kanaholo chinji eseka kumusehesa. Nyi kasehele, chino muchisolola ngwo kota kali ni yimwe yinamupikala nawa kanafupu mutu yoze mahanjika nenyi. Yena muhasa kumutakamisa ha kumupanjika wika.—Tiangu 1:19.
17. Yika yatakamishine umwe ndumbu?
17 Umwe ndumbu mukweze avuluka ngwo Henri kevwile yinyengo muze asoko jenyi anji echele kuwayila Yehova. Umwe wa kuli ayo te tato, yoze wapwile mukulwana wa mu chikungulwila. Umwe kalayi wa mbonge yamona ngwenyi Henri te kanalema ku mbunge, chocho yamusanyika hanga aye ni kunwa kafe. Koko iye yapanjika kanawa Henri muze te analumbununa manyonga jenyi. Henri yanyingika ngwenyi mba akwase asoko jenyi afune mu umwenemwene iye mwene katamba kununga ni kushishika kuli Yehova. Nawa kawanyine utakamiso ha kutanga Samu 46, Zefania 3:17, ni Marku 10:29, 30.
Yetweswe mutuhasa kulikolweza ni kulitakamisa umwe ni mukwo (Tala paragrafu 18)
18. (a) Yika Mwanangana Solomone asonekene hakutwala ku utakamiso? (b) Nyonga lika postolo Paulu ahanyine?
18 Yika twalilongesa ha chilweza cha Marta ni Henri? Twalilongesa ngwetu yetweswe mutuhasa kulembejeka ni kutakamisa mandumbu jetu ha yize anafupu. Mwanangana Solomone yasoneka ngwenyi: ‘Liji lia ha ola yalita, kuwahalio. Pangu lia meso liakuwahisa mbunge; lusango mupema kakuwahisa yifwaha.’ (Yishima 15:23, 30) Shina unanyingika umwe yoze unafupiwa utakamiso hanji unanenganyana? Muhasa kutanga nenyi Kaposhi wa Kutalila hanji yimwe mu site yetu. Nawa, Paulu yalongesa ngwenyi kwimba miaso ya Wanangana hamuwika chakutuvwisa kuwaha. Yasoneka ngwenyi: “Nulilongese, nikulishinjila umwe ni mukwo mu masamu, ni miaso, ni mimbo ya uspiritu. Imbenu ni vumbi mu mbunge jenu kuli Zambi.”—A-Kolosu 3:16; Yilinga 16:25.
19. Mumu liaka kwasala hakehe utakamiso upwe ni ulemu unji, nawa yika twatamba kulinga?
19 Amu tunakundama ku tangwa lia Yehova, muchikapwa chilemu chinji kulitakamisa umwe ni mukwo. (A-Hepreu 10:25) Mutukawahilila nyi twalinga yize Paulu ambile ngwenyi: “Lishinjilenu umwe ni mukwo, likolesenu umwe ni mukwo, chizechene ngwe nwakulinga.”—1 A-Tesalonika 5:11.
a Majina twaalumuna