Kupwa Mukwa-Kristu Yika Chinalumbunuka?—Yika Mbimbiliya Yakulongesa?

Musono, atu anji kakuliamba ngwo, kali Akwa-Kristu. Alioze ayo kakulinga yuma yize yakuneha lamba kuli akwo. Ngwe chilweza, amwe kali akwa-kuzo, keshi kuhanjika umwenemwene nawa kali atu api. Akwo keshi kushishika kuli atu waze alimbata no, nawa kakulinga utanji. Kashika, yino yakutwala atu anji kulihula ngwo: ‘Yika chamwenemwene kupwa Mukwa-Kristu chinalumbunuka?’

Yize kupwa Mukwa-Kristu chinalumbunuka

Chakupwa chashi mutu umwe kwamba ngwenyi kali Mukwa-Kristu. Alioze, kupwa Mukwa-Kristu chinachingi yuma yinji. Kulita ni Mbimbiliya, Mukwa-Kristu kali kambaji ka Yesu Kristu. (Yilinga 11:26) Yesu mwene kambile ngwenyi: “Nyi munununga ni kwononokena maliji jami, nuli lume tumbaji twami.” (Yoano 8:31) Kwamba umenemwene, kukushi mutu yoze mahasa kwononokena maliji a Yesu ni ungunu weswe. Alioze Mukwa-Kristu kakusa tachi hanga embulule Yesu ha kukaula malongeso jenyi tangwa ha tangwa. Tutalenu yimwe yilweza.

Akwa-Kristu kakusolola zango liamwenemwene

Yize Yesu ambile: “Ngunanwehe shimbi yaha ngwami, lizangenu umwe ni mukwo; ngwe chizechene yami hingunanuzange, ni yenu nawa lizangenu umwe ni mukwo. Nyi munulizanga umwe ni mukwo, atu eswe makanyingika ngwo yenu nuli tumbaji twami.”—Yoano 13:34, 35.

Yize Yesu alingile: Yesu te kakuzanga atu eswe, iye te keshi kutala ha chize atu apwa, ku munyachi kuze akatuka, nawa nyi kali pichi nyi ka. Iye kaukile mieji, kahanyine kulia kuli waze te anafwu zala ni kuhana mwono wenyi hali yetu.—Mateu 14:14-21; 20:28.

Yize Akwa-Kristu akulinga: Akwa-Kristu kakusolola zango ha kuhanjika umwenemwene, ha kuhona kusolola katonde, ni kupwa akwa-kukonekena. Ayo kakukwasa waze anafupu ukwaso, nawa kakwecha kulinga yuma yize yili yilemu kuli ayo hanga akwase akwo.—1 Yoano 3:16.

Akwa-Kristu kakuhanjika umwenemwene

Yize Yesu ambile: “Yami nguli . . . umwenemwene.”—Yoano 14:6.

Yize Yesu alingile: Yesu te kakuhanjika umwenemwene mu yuma yeswe yize apwile ni kwamba ni yize apwile ni kulinga. Iye te keshi kushinjla akwo hanga alinge yuma yize iye anazange hanji kwalweza afuliela yuma ya mahuza. Atu kanyingikine ngwo, iye kakuhanjika umwenemwene chipwe ngwe yino yapwile ni kutwala atu anji hanga alimike nenyi.—Mateu 22:16; 26:63-67.

Yize Akwa-Kristu akulinga: Akwa-Kristu keshi kuhanjika mahuza. Ayo kakufweta lijimu, keshi kwiya, kakuhanjika umwenemwene ku milimo yo nawa kali yikilikita. (A-Roma 13:5-7; A-Efwesu 4:28) Ayo nawa keshi kwonga akwo hanga aliyukise ene, keshi kulionga ha cheseko cha ku shikola, chipwe kulinga yuma ya kalimba-limba ha mikanda yo yize yakusolola utotombo uze akwete hanji mikanda yikwo nawa.—A-Hepreu 13:18.

Akwa-Kristu kakusolola umbovu

Yize Yesu ambile: “Tweyenu kuli yami, yenu eswe nwakukilikita chikolo ni yenu eswe nunambata yilemu, yami mungunuhwimisa. Zundulenu kanga yami, lilongesenu kuli yami, mumu nguli chihomboloji, mukwa-kulikehesa ni mbunge yeswe, mba kumunuwana uhwimino ku mbunge jenu. Mumu kanga yami yashi ni yiteli yami yilelu.”—Mateu 11:28-30.

Yize Yesu alingile: Yesu kapwile chimbvu, nawa atu te kakulivwa kanawa ha kupwa ku sali lienyi. Iye te kakutambula kanawa twanuke, te kakukolweza waze ananenganyana nawa te kakulemesa atu.—Marku 10:13-15; Luka 9:11.

Yize Akwa-Kristu akulinga: Akwa-Kristu kakuhanjika ni akwo ni umbovu, ayo keshi kuhanjika ni matuka hanji ni luchoko. (A-Efwesu 4:29, 31, 32) Ayo kakulihulumba ni akwo, ni kufupa majila a kwakwashilamo.—A-Ngalashia 6:10.

Akwa-Kristu kakusolola ushishiko mu ulo wo

Yize Yesu ambile: “Kashika, chize Zambi hananungu, mutu katambile kuchihandununa.”—Marku 10:9.

Yize Yesu alingile: Chipwe ngwe Yesu kakambachile, nihindu iye te kakukolweza atu waze alimbata ashishike umwe kuli mukwo. (Mateu 19:9) Iye kahanyine chipwe lume utowezo ha yuma yize muyihasa kupihisa ulo.—Mateu 5:28.

Yize Akwa-Kristu akulinga: Akwa-Kristu keshi kulinga yuma yize yakulelesa ulo wo. (A-Hepreu 13:4) Alioze, ayo kakulisolwela zango ni vumbi.—A-Efwesu 5:28, 33.