Matemba a Mikanda a Kwambujola Nayo kuli “Atu a ku Mavungu Eswe”

Ha miaka kumi yapalika, matemba a mikanda kakukwasa chinji mulimo wetu wa kwambujola. Hashi heswe, atu muze akumona matemba a mikanda kakunyingika ngwo kali a Yela ja Yehova. Matemba jacho keshi wika apema nawa kali ashi kwazachisa. Yena kota unatayiza yize pangi Asenata wa ku Polônia ambile ngwenyi: “Matemba kapwa akehe-akehe alelu, alioze apema. Ashi kulongeza mikanda, kwamanyisa, ni kwambata.”

Shina unanyingika chize alingile matemba?

Umwe Mutapu Walita

Ha 2001, ni utayizo wa Chizavu cha Tusongo, mandumbu jetu a malunga ni a mapwo ku França yaputuka kweseka milali yalisa ya kwambujola ha mbunga, kuchingako wa kuzachisa matemba a mikanda. Ayo kesekele majila anji. Chakutalilaho, kesekele matemba a kumbachila yuma ni kulia cha mu maloja. Mutango wa ku França yiusakula umwe mutapu wa matemba waze te akwa-kwambujola mazachisa ha miaka yinji.

Mandumbu ku França kanakawahilila chinji mumu lia kweseka chize alingile cha kwambujola ha mbunga. Ha 2011, Chizavu cha Tusongo yatayiza kwambujola ha mbunga mu mbonge ya Nova York, EUA., ha kuzachisa meza ni matemba a mikanda. Mapionelu waze apwile mu katalilo wa kulinga mulimo wacho yamona ngwo matemba kali apema chinji, nawa ashi kuzachisa. Mapionelu no yahana yiyulo yo ya chize mazachisa mutapu wa matemba. Matemba atangu kapwile a mapaya te alemu chinji ha kwambata ha ndalo. Hachino, yatunga waze apwile alelu ni kusako maroda anene-anene hanga achine kwahungumuna ku fuji ni kuhasa kupalika kanawa ha yihela yize hi yipema ko. Yasako nawa kachihela ka kumbachila mikanda yikwo yize te mafupiwa.

Katalilo yoze alingile wa kwambujola chino kendele kanawa! Hachino, ha 2012, Chizavu cha Tusongo yichitayiza kwambujola ni matemba a mikanda hashi heswe. Mandumbu yawana mukwa-kutunga matemba yoze te mahasa kwatunga anji alelu, nawa waze te mashimbula miaka yinji.

Ha kupalika cha miaka, yanunga ni kupemesa matemba jacho. Chakutalilaho, ha 2015, yasako chimwe chifukilo kulutwe lia matemba hanga mikanda yichine kuwula ni vula. Dina yoze watwama mu Geórgia, kakuzanga chinji chize anakalulweka matemba, yamba ngwenyi: “Amu matemba ali ni chifukilo chize chakufunga mikanda, yino yakukwasa mikanda yihone kuwula ni vula.” Ha 2017, kaluliekele turtaze a tuposhi mu malimi amwe. Tomasz wa ku Polônia, yamba ngwenyi: “Kwafupiwile kulinga umwe mulimo unene hanga twalumune turtaze akulu. Tuposhi kapwa apema chinji.” Ha 2019, yalinga nawa kwalumuka chikwo ku matemba hanga apwise akolo chinji hanji ngwetu, ashimbule ha miaka yinji.

Kutunga Temba lia Mikanda

Umwe mukwa-kutunga matemba a mikanda yatunga matemba eswe mba yaatuma mu yikungulwila ya mu yifuchi yeswe. Ha mashimbu wano, temba limuwika linafwika 43 dolare, kuchizako ndando ya yuma yikwo. Ndo ha shimbu lino, unji wa dolare kuhiana 16 milhões japwa kuzachisa hanga alande matemba, nawa matemba kuhiana 420.000 kapwa kutuma mu yikungulwila ya mu yifuchi yeswe.

Mba ahase kufunga kanawa milambu yize wakuhana, matemba a mikanda kakutuma kwalinga nyi ngwe mafupiwa. Chikwo nawa, yikungulwila ha mashimbu ano mahasa kutuma hanga aehe yikungo yize yapihia hanga alulieke matemba shimbu aehe matemba aha.

Kuzachisa Matemba Hanga Twambujole

Akwa-kwambujola ha hashi heswe kakuwahilila ha kuzachisa matemba a mikanda. Martina wa ku Gana, yamba ngwenyi: “Ha yisuho yinji muze twakwambujola, yetu e twakuya kuli atu. Alioze chuma chize nakuzangila kwambujola chinji ni temba, mumu atu ene e akwiza kuli yetu. Chipwe lume waze anapalika kakutambula uchela.”

Mu chimwe chifuchi cha mu Africa, umwe lunga yakundama ku temba yanda mikanda ya mu limi lienyi. Ha kupalika cha poso yimuwika, iye yahiluka ni kwamba ngwenyi: “Natanga mikanda yeswe, mba sango nawanamo jili jilemu chinji. Ngunayi ngukalianyine sango jacho ni asoko jami mu chihunda chetu” chize chatwama ha kilometro 500 mba atu aheteko. Ha kupalika cha tukweji aali, yahiluka nawa, yamba ngwenyi: “Atu a mu chihunda chami kawahilila ni yuma yize atanganga ha mikanda yacho, ayo kanazange kupwa Yela ja Yehova. Alioze, kanalajala. Chakutalilaho, ayo kanyingika ngwo, mba aapapachise katamba kwanjisa mujimba weswe mu meya, alioze kutushi ni lwiji niumwe hakamwihi ni chihunda chetu. Shina ndo twize kuno mba atupapachise nyi?” Mandumbu yatondekeza lunga wacho kuli umwe pionelu yoze te wakuhanjika limi lio. Kukatuka haze, ayo kananungu ni kulilongesa.

Chakuwaha chinji kumona mandumbu mazachisa matemba a mikanda hanga ambujole sango jipema “hashi heswe ni ku mavungu eswe.” (Mateu 24:14) Mba kuliko kwakukatuka mbongo jize akulanda najo matemba jacho? Jakukatuka ku milambu yize twakuhana hanga akwase milimo yize analingi hashi heswe, milambu jacho yimwe kakuyihana kupalikila ha site donate.jw.org. Tunanusakwila chinji ha ukwaso uze nwakuhana.