Yehova kakufupa uhashi wa kusolola kuli tuvumbi twenyi ngwenyi, kakwazanga ni kuwahilila ha yize akulinga. Mbimbiliya yakuhanjika ha yisuho yaali haze Yehova alwezele Yesu ngwenyi, kali Mwanenyi yoze azanga, nawa uli ni utayizo wenyi. (Mateu 3:17; 17:5) Shina muzanga kwivwa Yehova mamba yuma ya mutapu au hali yena? Musono, Yehova keshi kuhanjika ni yetu kukatuka mu malilu, alioze kakuchilinga kupalikila mu Mbimbiliya. Mutuhasa ‘kwivwa’ Yehova matulweza ngwenyi, tuli ni utayizo wenyi muze mututanga maliji a Yesu mu Evanjelu. Yesu kembulwile utu wa Tato ni ungunu weswe. Kashika, muze mututanga maliji a zango a Yesu waze ahanjikile kuli atu yihenge, mutuhasa kunyonga ngwetu, Yehova mwe unahanjika maliji jacho kuli yetu. (Yoa. 15:9, 15) Nyi ngwe nunapalika mu yipikalo, kuchalumbunukine ngwo kunushi ni utayizo wa Yehova. Shimbu tunyonge chocho, yipikalo yakutukwasa kusolola zango ni ujikijilo wetu muli Yehova.—Tia. 1:12. w24.03 28 ¶10-11

Nyi uli ni ana, akwase hanga alulieke makumbululo kulita ni miaka yize ali nayo. Ha mashimbu amwe, ha kukunguluka mahasa kushimutwinaho yikuma yikalu ngwe kupwa ni kapinda mu usoko ni kupwa ni yitanga yalita. Chipwe chocho, mukuhasa kupwa paragrafu yimuwika hanji jaali jize ana je mahasa kukumbulula. Chikwo nawa, kwasa ana je hanga anyingike ngwo, hi ha shimbu lieswe ko lize mazundula moko maatongola. Nyi wakwasa, muze matongola akwo hanga akumbulule mu chihela cho o kechi kwivwa uli (1 Timo. 6:18) Yetu eswe mutuhasa kululieka makumbululo autakamiso, waze mahalisa Yehova ni kukolweza mandumbu jetu. (Yishi. 25:11) Ha mashimbu amwe, mutuhasa kuhana kumbululo lize linakatuka ha chilweza chetu, alioze twatamba kukeya hanga tuhone kuhanjika yuma yinji hali yetwene. (Yishi. 27:2; 2 Kori. 10:18) Shimbu tuchilinge, makumbululo jetu katamba kutala chinji hali Yehova, Liji lienyi ni hali tuvumbi twenyi eswe.—Uso. 4:11. w23.04 24-25 ¶17-18

Mba tununge ni kulawola, tunafupiwa kupwa ni zango. (Mateu 22:37-39) Kuzanga Zambi, chakutukwasa kunyongonona mu mulimo wa kwambujola chipwe ngwe chino muchitunehena lamba lieswalio. (2 Timo. 1:7, 8) Yetu nawa twakusolola zango kuli atu waze keshi kulingila Yehova ha kwambujola ha kuzachisa telefone, kusoneka mikanda ni majila akwo. Twakufuliela ngwetu, tangwa limwe atu jacho mahasa kwalumuna yitanga yo ni kulinga yize yalita. (Eze. 18:27, 28) Kuzanga mwenyembo chinachingi nawa kuzanga mandumbu jetu. Mutuhasa kuchilinga, ha ‘kulikolweza ni kulitakamisa umwe ni mukwo.’ (1 Tesa. 5:11) Ngwe chizechene maswalale akukalakala hamuwika hanga ase jita, ni yetu twakukalakala hamuwika ha kulikolweza umwe ni mukwo. Kutwazangile kulemeka mandumbu jetu ku mbunge ku tachi hanji kwafunyishina upi ha upi. (1 Tesa. 5:13, 15) Twakusolola nawa zango ha kuvumbika mandumbu waze akusongwela chikungulwila.—1 Tesa. 5:12. w23.06 10 ¶6; 11-12 ¶10-11