Outubro

Shina chakukukalila kwononoka? Mwanangana Ndawichi che alivwile, mba yalemba kuli Yehova ngwenyi: ‘Ungukolese kama ni spiritu ya kwononoka.’ (Samu 51:12) Ndawichi te kakuzanga chinji Yehova. Chipwe chocho, ha mashimbu amwe te chakumupwila chikalu, kwononokena Zambi. Yino ye yakulingiwa nawa kuli yetu. Mumu liaka? Chitangu, mumu tuli yihenge; nawa twakusemuka ni spiritu ya uhulia. Chamuchiali, Satana kakusa tachi hanga atutwale tulimike ni Yehova ngwe chize iye alingile. (2 Kori. 11:3) Chamuchitatu, twatunga mukachi ka atu waze ali ni spiritu yipi ya hano hashi hanji ngwetu, ‘spiritu yize yinayulu atu waze keshi kwononoka.’ (Efwe. 2:2) Kashika, twatamba kusa tachi hanga twehuke ndako jetu jipi, ni kwehuka spiritu ya Satana yize muyihasa kututwala hanga tuhone kwononokena Zambi. Chino twakuchilinga ha kwononokena Yehova ni atu waze iye hanahane umwe wata. w23.10 6 ¶1

Yika mutuhasa kulilongesa ha chikomokeso cha Yesu cha kwalumuna meya hanga apwe vinyu? Twawanaho limwe longeso lia kulikehesa. Yesu kakalilambile ha pambo mumu lia chikomokeso chize alingile. Kwamba umwenemwene, ha yuma yeswe apwile ni kulinga iye te keshi kufupa kusoloka. Alioze, te kakulikehesa ni kuhalisa Tato mu yuma yeswe. (Yoa. 5:19, 30; 8:28) Nyi mutwimbulula chilweza cha Yesu ni kununga kulikehesa, kutuchi kulizata ha yeswe yize mutulinga. Kashika, kanda tulisamba hali yetwene, alioze tulisambenu mumu lia kulingila Yehova. (Jere. 9:23, 24) Mumu kutuchi kuhasa kulinga chuma nichimwe chakuhona ukwaso wa Yehova. (1 Kori. 1:26-31) Nyi tuli akwa-kulikehesa, kutuchi kufupiwa kuzuka uhenya ha yuma yipema yize mutulingila akwetu. Twakuwahilila chinji ha kunyingika ngwetu, Yehova kakumona ni kulemesa yuma yize twakulinga. (Tesa nawa ni Mateu 6:2-4; Hep 13:16) Chochene, twakuvwisa Yehova kuwaha muze twakwimbulula chilweza cha kulikehesa cha Yesu.—1 Petu. 5:6. w23.04 5 ¶11-12

Paulu kakolwezele Akwa-Kristu hanga ase ha chihela chitangu yize akwo anafupiwa. Kuchi mutuhasa kukaula chiyulo chino muze tuli ha kukunguluka? Mutuhasa kuchikaula ha kwiwuluka ngwetu, akwetu chizechene ngwe yetu, no kanazange kuhana makumbululo. Achinyonga ha chikuma chino. Nyi unahanjika ni umwe sepa, shina wakuhanjika mashimbu eswe chakuhona kumwecha hanga neye ahanjike? Ka, kuushi kuchilinga! Wakuzanga hanga neye ahanjike. Chizechene nawa, muze tuli ha kukunguluka, twakuzanga hanga mandumbu anji ahane makumbululo. Kwamba umwenemwene, mutapu upema wa kutakamishinamo mandumbu jetu, uli kwaha uhashi hanga no asolole ufulielo wo hakuhana makumbululo. (1 Kori. 10:24) Chuma chitangu chize mutuhasa kulinga chili kuhana makumbululo ehi. Nyi twachilinga, mutukwasa mandumbu akwo hanga no ahane makumbululo. Chipwe muze muzanga kuhana kumbululo lihi, kanda ulumbununa yikuma yeswe yize yili ha paragrafu ha chisuho chimuwika. Nyi wakumbulula paragrafu yeswe, mukusala yikuma yikehe yize akwenu makumbulula. w23.04 22-23 ¶11-13

Twatamba kunyingika ngwetu chili chilemu kununga ni kukwasa akwetu, chipi-chipi kupalikila mu mulimo wa kwambujola. Mu mulimo wa kwambujola, twatamba kwalumuna lusango kulita ni atu waze mutuhanjika no. Atu waze twakuwanamo, kali a ku yihela yeka ni yeka, nawa kakuya mu mayingeleja alisa. Paulu te kakuhasa kwalumuna lusango kulita ni atu waze anahanjika no, ni yetu mutuhasa kumwimbulula. Yesu katongwele Paulu ngwe ‘postolo wa akwa-mavungu.’ (Roma 11:13) Paulu kambulwile kuli A-Yunda, A-Ngresia, atu waze alongoloka, akwa-kulikehesa, miata ni atu akwo nawa. Mba ahase kukwata ku mambunge ja atu wano eswe, Paulu ‘kalipwishile yuma yeswe kuli atu eswe.’ (1 Kori. 9:19-22) Iye te kakufupa kunyingika kuze atu jacho anakatuka ni yize akufuliela, mba malumuna lusango kulita ni mwono wo. Ni yetu nawa mutuhasa kululieka mulimo wetu wa kwambujola nyi mutunyonga ha yize atu anafupiwa ni kwalumuna lusango. w23.07 23 ¶11-12

Kupwa mukwa-kushimbika kuchalumbunukine kuhona tachi. Kushimbika chili chitanga cha atu waze akwete tachi. Tunafupiwa kusolola tachi, mba tuhwime mbunge muze tunapalika mu umwe ukalu. Kushimbika chili chihanda cha “muhuko wa spiritu.” (Ngala. 5:22, 23) Liji lia Ngregu lize akulumbununa ngwo “kushimbika,” kapwile ni kulizachisa hali tuvwalu a muyambu waze te akukwata ni kwapita. Hanyima lia kwapita, tuvwalu jacho te keshi kuneha mbwanja, alioze te kakununga ni tachi jo. Mba yika mutwamba hali yetu? Kuchi mutuhasa kusolola chitanga chino, aku nawa tuli ni tachi? Kutwatambile kuchilinga ukawetu, twatamba kulemba ha kwita spiritu ya Zambi ni ukwaso wenyi mba tupwe ni chitanga chino chipema. Kuli yilweza yinji yize yinasolola ngwo, chili chashi kulilongesa kupwa akwa-kushimbika. Mandumbu jetu anji, kalihumikijile muze atu akwo apwile ni kwasosomba. Kahanyine uchela upema kuli waze apwile ni kwamona (2 Timo. 2:24, 25). w23.09 15 ¶3

Yoano kamwene usolwelo wa kukomwesa mu malilu, makulwana 24 kanawayila Yehova. Ayo kapwile ni kuhalisa Yehova ha kwamba ngwo, iye katela kutambula “uhenya ni ulemu ni tachi.” (Uso 4:10, 11) Angelo ashishika no kali ni yuma yinji yize yakwatwala hanga awayile Yehova ni kumuhalisa. Ayo kali hamuwika ni Yehova mu malilu, kashika kamunyingika kanawa. Angelo wano kakumona yitanga ya Yehova ha yuma yeswe yize iye akulinga. Chikwo nawa, muze ayo akumona yuma yeswe yize Yehova akulinga, chino chakwatwala hanga amuhalise. (Yombi 38:4-7) Ni yetu tunazange kuhalisa Yehova kupalikila mu yilemba yetu. Mutuhasa kuchilinga ha kumulweza yize yakututwala mba tumuzange ni kumuvumbika. Muze mutanga Mbimbiliya ni kulilongesayo, eseka kusa tachi hanga uwane yitanga ya Yehova yize wakuzanga. (Yombi 37:23; Roma 11:33) Hanyima, lweza Yehova mumu liaka wakuzanga chinji yitanga yacho. Mutapu ukwo wa kuhalishilamo Yehova uli ha kumuchichimieka ha yeswe yize akutulingila ni yize akulingila mandumbu jetu a mu ufulielo.—1Sa 2:1, 2. w23.05 3-4 ¶6-7

Ha mwaka 1919, Babilonia Yinene yatokesele ndundo jize apwile najo hali tuvumbi twa Yehova. Ha mwaka wacho, yatongola “ndungo washishika, wakanyama” yoze te makwasa atu a mbunge yipema hanga aputuke kwendela mu “Tapalo Lisandu.” (Mateu 24:45-47; Iza. 35:8) Mumu lia mulimo weswe uze alingile kunyima hanga alulieke “Tapalo Lisandu,” waze aputukile kwenda mu tapalo liacho, te mokesa chinyingi cho hali Yehova ni ha yilakenyo yenyi. (Yishi. 4:18) No kafupiwile kwalumuna yimwe ku mwono wo hanga atwame kulita ni shimbi ja Yehova. Alioze, Yehova kakechele hanga atu jenyi alumune yuma yeswe ha shimbu limuwika. Shimbu achilinge, iye yakwasa atu jenyi hakehe-hakehe. Mu paraisu, muchikapema chinji muze mutukapwa ni uhashi wa kuvwisa Yehova kuwaha mu yuma yeswe ku mwono wetu. Tapalo lieswe liakufupiwa kulilulieka mba linunge ni kupema. Chize ha mwaka 1919, “Tapalo Lisandu” kakulilulieka mashimbu eswe, chino chakukwasa atu anji kutuhuka mu Babilonia Yinene. w23.05 17 ¶15; 19 ¶16

Chizavu cha Tusongo kakusa mashimbu hanga afumbe yikwashi a mu Makomite alisa a Chizavu cha Tusongo. Yikwashi wano, kali ni chiteli chinene haliapwila, chikwo nawa, kali a kululieka kanawa hanga akanunge ni kusongwela mapanga a Kristu. Muze Mukwa-Kristu wakuwayisa wa kasula makaya mu malilu hakamwihi ni kusongo lia luyinda munene, tuvumbi twa Yehova nihindu makanunga ni kumuwayila ni ushishiko. Kupalikila mu usongwele wa Yesu, yetu kutuchi kecha kuwayila Yehova. Tunanyingika ngwetu, ha mashimbu jacho makatulukukila kuli akwa-mavungu waze avuluka ngwo, Ngoke wa Mangoke. (Eze. 38:18-20) Alioze muze makatulukukila ha mashimbu jacho akehe, ayo kechi kakumba; atu ja Yehova makanunga ni kumuwayila. Kwamba pundu, Yehova makatulamwina ku moko ja akwa-kole jacho. Mu umwe usolwelo, postolo Yoano yamona “mbunga yinene” ya mapanga akwo a Kristu. Mba Yoano yanyingika ngwenyi, ‘mbunga yino yinene’ te yinatuhuka mu “luyinda munene.” (Uso. 7:9, 14) Chochene, tuli ni shindakenyo ngwetu, Yehova makatulamwina! w24.02 5-6 ¶13-14

Yika twatamba kulinga hanga tutambule spiritu yisandu? Mutuhasa kulemba hanga twite spiritu yisandu, kulilongesa Liji lia Zambi ni kulinga chihanda mu ululikiso wenyi. Kulinga chino, muchitukwasa kwima ‘mihuko ya spiritu.’ (Ngala. 5:22, 23) Yehova kakuhana spiritu yenyi yisandu, kuli waze akulinanga mu manyonga ni ku yitanga. Iye kechi kutwaha spiritu yisandu nyi mutununga ni kunyonga ha yuma yipi, hanji kulinga chuma chize keshi kuzanga. (1 Tesa. 4:7, 8) Chikwo nawa, mba tununge ni kutambula spiritu yisandu, kutwatambile ‘kulelesa uprofeto.’ (1 Tesa. 5:20) “Uprofeto” uno, unachingi sango jize Yehova akutwaha kupalikila mu spiritu yenyi hakutwala ku upatwilo wenyi ni yize twatamba kulinga haliapwila. Yetu kutushi kunyonga ngwetu jita ya Armagedone kuyichi kwiza ni kawashi. Shimbu tunyonge chocho, twakuyishimbwila hanga yize kawashi. Twakuchilinga ha kupwa ni yitanga yipema ni kulihana mu milimo ya Zambi.—2 Petu. 3:11, 12. w23.06 12-13 ¶13-14

Yika Mukwa-Kristu atamba kulinga nyi yizulie ya sonyi muyisoloka ha telefone yenyi hanji ha computador? Hazehene lume, katamba kuchizako meso. Mba tuhase kuchilinga, twatamba kwiwuluka ngwetu, chuma chilemu ku mwono wetu chili usepa uze tuli nawo ni Yehova. Yizulie yimwe muyihasa kupwa hi ya pornografia ko, chipwe chocho muyihasa kututwala tupwe ni usolo upi. Mumu liaka twatamba kwehuka yizulie ya mutapu au? Mumu kutwazangile kulinga niyimwe yize muyitutwala hanga tupwe ni manyonga a upangala hanji a kulinga utanji. (Mateu 5:28, 29) David, umwe mukulwana mu chikungulwila ku Tailândia, yamba ngwenyi: “Nakulihula ngwami, ‘Yizulie ayi chipwe ngwe hi ya pornografia ko, shina Yehova mawahilila nyi nguyitala?’ Manyonga wano kakungukwasa kukwata yiyulo yalita.” Kwivwa woma wa kulinga yuma yize muyivwisa Yehova chinyengo, muchihasa kutukwasa kukwata yiyulo yipema. Mbimbiliya yinambe ngwo: “Woma wa Yehova we uputukilo wa mana.” w23.06 23 ¶12-13

“Yipatulo” yinalumbunuka yikungulwila. Ha mashimbu a luyinda munene, mutukawana ufunge uze Yehova anatulakenya a kulinunga ni mandumbu jetu. Kashika twatamba kusa tachi jinji haliapwila hi wika ko hanga tusolole uhumikizo kuli mandumbu ni mapangi jetu, alioze mumu twakwazanga. Ulamwino wetu muhasa kutala ha chino. Muze ‘tangwa lia Yehova’ mulikeza, mashimbu jacho makakaliwa kuli atu eswe. (Zefa. 1:14, 15) Tuvumbi twa Yehova no makamona lamba. Alioze nyi twalilulieka haliapwila, mutukahasa kuhwima mbunge ni kukwasa akwetu. Mutukanyongonona mu yuma yeswayo mutupalika ku mwono. Muze mandumbu jetu makapalika mu lamba, mutukaasolwela keke ha kwakwasa ha yize makafupiwa. Chikwo nawa, nyi mutuzanga mandumbu jetu musono, muchikapwa chashi kwasolwela zango liacho kulutwe. Yehova makatwaha mwono wa mutolo mu chifuchi chize kumuchikapwa luyinda wa chisemewa ni yipikalo yeswe. Yuma yino muyikapwa ya kunyima.—Iza. 65:17. w23.07 7 ¶16-17

Mbimbiliya kanji-kanji, yakuhanjika hali malunga ashishika a ku shakulu ngwe akwa-ndundo ni tachi. Alioze amwe waze apwile ni tachi jinji, ha mashimbu amwe te keshi kulimona chocho. Chakutalilaho, ha yisuho yimwe, Mwanangana Ndawichi te “kakulivwa ngwe kali ni tachi ngwe umwe mulundu,” alioze ha yisuho yikwo te “kakwivwa woma.” (Samu 30:7) Mba hali Samasone, spiritu yisandu ya Zambi yamuhele tachi jinji. Chipwe chocho, iye kanyingikine ngwenyi, nyi keshi ukwaso wa spiritu ya Zambi te “mahona tachi; mapwa ngwe malunga akwo.” (Kuyu. 14:5, 6; 16:17) Malunga wano kapwile ni tachi jacho, mumu Yehova mwe waehele jo. Postolo Paulu neye kanyingikine ngwenyi, kanafupiwa tachi jize jakwiza kuli Yehova. (2 Kori. 12:9, 10) Paulu te kakupinda ni misongo yinji. (Ngala. 4:13, 14) Ha mashimbu amwe, iye te kakupinda ha kusa tachi hanga alinge yize yalita. (Roma 7:18, 19) Ha mashimbu akwo, iye te kakwivwa woma ha yize muyihasa kulingiwa ku mwono wenyi. (2 Kori. 1:8, 9) Chipwe chocho, muze Paulu te akulivwa ngwe kanahongo, henaho te akuwanyina tachi. Yino yeswe yapwile ni kulingiwa, mumu Yehova mwe te wakumwaha tachi hanga ahase kukumba yipikalo yacho. w23.10 12 ¶1-2

Nyi ha mashimbu amwe mutulivwa ngwe kutushi ni ulemu niumwe, twiwulukenu ngwetu Yehova mwene mwe watusakwile hanga tumuwayile, hi mutu mukwo ko. (Yoa. 6:44) Yehova kananyingika yitanga yetu yipema, kananyingika mbunge yetu, chikwo nawa, chize iye akutumona chinalise ni chize yetu ene twakulimona. (2 Sango 6:30) Kashika, mutuhasa kufuliela ha maliji a Yehova akwamba ngwo yetu eswe tuli alemu. (1 Yoa. 3:19, 20) Muze te kanda tuchililongesa umwenemwene, amwe a kuli yetu twalingile yuma yimwe yize yakutupinjisa ndo musono. (1 Petu. 4:3) Chipwe mandumbu akwo waze akulingila Yehova ni ushishiko ha miaka yinji, ha mashimbu amwe no kakupinda ni ulelu wo. Mba yena, shina ha mashimbu amwe wakulivwa ngwe Yehova kakukonekenene ha yize walingile? Nyi che wakulivwa, chili chilemu kwiuluka ngwe chipwe tuvumbi a Yehova ashishika ku shakulu, no kapinjile ni manyonga ngwe wano. Ngwe chilweza, postolo Paulu muze apwile ni kunyonga ha uhenge wenyi te keshi kulivwa kanawa. (Roma 7:24) Tunanyingika ngwetu, Paulu kalikonyekene ku shili yenyi mba yamupapachisa. Chipwe chocho, mwene te kakuliamba ngwenyi, kapwile ‘mukehe kuhiana hakachi ka apostolo,’ nawa ngwenyi, chivulumunyi “mutangu.”—1 Kori. 15:9; 1 Timo. 1:15. w24.03 27 ¶5-6

Longeso twawana ha yiyulo yipi yize Mwanangana Njoashe akwachile lili ngwo, twatamba kusakula masepa apema chekwamba, masepa waze akuzanga Yehova; nawa akuzanga kumuvwisa kuwaha. Masepa jetu mahasa kupwa a miaka yalisa. Iwuluka ngwe, Njoashe kapwile kanuke chinji kuli sepa lienyi Jehoiada. Hakutwala kuli masepa je, lihule ngwe: ‘Shina ayo kakungukwasa kukolesa ufulielo wami muli Yehova? Ayo kakungukolweza hanga ngutwame kulita ni shimbi ja Yehova? Kakuhanjika hakutwala kuli Yehova ni ku umwenemwene wa mu Mbimbiliya? Kakulemesa shimbi ja Zambi? Ayo kakwamba yuma hanga anguvwise wika kuwaha nyi kakwete hamu lia kungukwasa muze mungufupiwa ukwaso wacho?’ (Yishi. 27:5, 6, 17) Umwenemwene uli ngwo, nyi masepa je keshi kuzanga Yehova, watamba kwecha kulikata no. Alioze, nyi uli ni masepa waze akuzanga Yehova, likate no; pwako no hamuwika; ayo e makukwasa ku mwono we!—Yishi. 13:20. w23.09 9-10 ¶6-7

Liji Alfa, lili liji litangu ha sona ja Ngregu; alioze liji Omega, lili liji lia kasula. Ha kwamba ngwenyi: “Yami nguli Alfa ni Omega,” Yehova te kanasolola ngwenyi, muze akuputuka chuma, iye kakuchihetesa kusongo, ni kusa shindakenyo hanga chilingiwe kanawa. Hanyima lia kulinga Alama ni Eva, Yehova yamba uli ayo ngwenyi: “Semenu nukaliokese, nukazalise hashi.” (Uputu. 1:28) Muze Yehova asolwele upale wenyi, chapwile ngwe kanambe ngwenyi, “Alfa.” Upale wa Yehova muukamanunuka muze ana ja Alama ni Eva, waze akwononoka makapwa angunu ni kuzalisa hashi ni kupwisaho paraisu. Muze yino muyikalingiwa, muchikapwa ngwe Yehova kanambe ngwenyi, “Omega.” Muze Yehova ahwishile kutanga malilu, hashi ni yuma yeswe yize yatwamamo, iye yamba chimwe chuma chilemu. Iye katuhele shindakenyo ngwenyi, upale wenyi hali atu ni hano hashi, muukamanunuka kusongo lia tangwa liamuchishimbiali.—Uputu. 2:1-3. w23.11 5-6 ¶13-14

Wenyi wakukatuka ku Babilonia ndo ku Izalele kuwakapwile washi, mumu wenyi wacho te muhasa kulinga tukweji awana. Alioze Yehova yalakenya kuchiza chuma cheswacho te muchihasa kukwika tuvumbi twenyi kufuna ku chifuchi cho. Kuli A-Izalele waze ashishika, kufuna mu chifuchi cho chahianyine yuma yeswe yize te mahasa kuhichika. Ha yuma yacho, chinene chapwile uwayilo wo kuli Yehova. Mu Babilonia mwakapwile tembele ya Yehova. Mwakapwile chipwe ni chilumbilo cha kuhanyina yitapo ngwe chize shimbi ya Mose yambile. Ayo kakapwile ni asasendote akululieka waze te mahana yitapo yacho. Chikwo nawa, atu ja Yehova kapwile hamwe ni atu waze te keshi kuvumbika shimbi jenyi. Kashika, tununu twa A-Izalele ashishika azangile kufuna mu chifuchi cho hanga afunyise uwayilo wamwenemwene. w23.05 14-15 ¶3-4

Nyi tunazange kununga ni kwenda “ngwe ana a pangu,” tunafupiwa nawa ukwaso wa spiritu yisandu. Mumu liaka? Mumu hano hashi, chili chikalu kununga ni kwehuka yitanga ya luchisa. (1 Tesa. 4:3-5, 7, 8) Kashika, spiritu yisandu muyitukwasa hanga tulimike ni manyonga api a hano hashi, waze anachingi malongeso a akwa-mana a hano hashi, ni manyonga waze kalitele ni a Yehova. Spiritu yisandu muyitukwasa nawa ‘kusolola utu mu yuma yeswe ni kupwa akwa-ululi.’ (Efwe. 5:9) Jila yimwe yize muyitukwasa kutambula spiritu yisandu yili yilemba. Yesu kambile ngwenyi: Yehova mahana ‘spiritu yisandu kuli waze mamwita yo.’ (Luka 11:13) Chikwo nawa, muze twakuhalisa Yehova ha kukunguluka, twakutambula spiritu yisandu. (Efwe. 5:19, 20) Yuma yize spiritu yisandu muyilinga muli yetu, ye muyitukwasa hanga tutwame mu mutapu uze muuvwisa Yehova kuwaha. w24.03 23-24 ¶13-15

Shina unafupiwa kulihumikiza chinji. Nyi chenacho, eta kuli Yehova hanga akukwase kulihumikiza. Uhumikizo unalingi chihanda ku muhuko wa spiritu. (Ngala. 5:22, 23) Kashika, tunafupiwa kulemba kuli Yehova hanga atwehe spiritu yenyi yisandu. Ni kumwita hanga atukwase tupwe ni yitanga yize yinalingi chihanda ku muhuko uno wa ku spiritu. Nyi mutupalika mu chuma chize mucheseka uhumikizo wetu, “mutununga ni kwita” spiritu yisandu hanga yitukwase kusolola uhumikizo. (Luka 11:13) Chikwo nawa, mutuhasa kwita kuli Yehova hanga atukwase kumona yuma ngwe chize iye akuyimona. Kuchizako kulemba, tunafupiwa kusa tachi hanga tupwe ni kulihumikiza hita tangwa. Nyi mutulemba hanga twite uhumikizo, ni kusa tachi tulinge yize mutuhasa, chitanga chino muchitanda miji mu mbunge yetu, ni kulinga chihanda cha utu wetu. Kupukuna ha yilweza ya mu Mbimbiliya, necho muchihasa kukukwasa. Mu Mbimbiliya muli yilweza ya atu anji waze asolwele uhumikizo. Nyi twapukuna ha yilweza yino, mutuhasa kulilongesa mutapu unji wa kusolwelamo uhumikizo. w23.08 22-23 ¶10-11

Yesu kalwezele postolo Petulu ngwenyi, Yehova te mamufunga. Hanyima lia kumuhindwisa, Yesu yakwasa nawa Petulu ni apostolo akwo, hanga woze yishi anji kupalikila mu chikomokeso. (Yoa. 21:4-6) Pundu chikomokeso chino, chakwashile Petulu kunyingika ngwenyi, Yehova te mamwaha yuma yeswe ya ku musunya yize mafupiwa. Petulu kota kewulukile maliji a Yesu muze ambile ngwenyi, Yehova manunga ni kukwasa waze ‘mafupa chitangu Wanangana wenyi.’ (Mateu 6:33) Yino yeswe, yakwashile Petulu kusa mulimo wa kwambujola ha chihela chitangu ku mwono wenyi hi mingoso ya yishi ko yize apwile ni kulinga. Iye kasolwele hamu, chocho yambujola sango jipema ha Pentekoste ya mwaka 33 M.J., ha kukwasa atu anji kutayiza umwenemwene. (Yili. 2:14, 37-41) Ha kupalika cha amwe mashimbu, iye yakwasa A-Samaria ni akwa-mavungu hanga apwe tumbaji twa Kristu. (Yili. 8:14-17; 10:44-48) Chochene, Yehova kazachishile Petulu mu jila yalipwila hanga anehe atu a mutapu weswe mu chikungulwila cha Akwa-Kristu. w23.09 23 ¶11

Ha kupalika cha miaka yaali chize haze A-Babilonia anongesele Yerusaleme, Mwanangana Nabukanezore, kalotele yuma ya kuvwisa woma hakutwala ku umwe kaponya munene. Iye yafupa kushiha akwa-mana eswe, kuchingako Daniele, nyi ayo te mahona kumulweza yize alotele ni ulumbunwiso wa chilota chacho. (Danie. 2:3-5) Daniele te katamba kukwasa kawashi-washi mumu nyi ka, kachi atu anji kafwile. Iye ‘yanjila; yeta kuli mwanangana amusele ola akalweze kuli mwanangana ulumbunwiso.’ (Danie. 2:16) Ha chikuma chino, iye kafupiwile hamu linji ni ufulielo. Mbimbiliya kuyishi kwamba ngwo, kunyima Daniele te hanalumbununa kama yilota yimwe. Iye yeta kuli masepa jenyi hanga “akalembele keke kuli mwe Zambi ya mwilu hakutwala ku chijimbikilo chino.” (Danie. 2:18) Yehova yakumbulula yilemba yo. Ni ukwaso wa Yehova, Daniele yalumbununa chilota cha Nabukanezore. Hachino, Daniele, masepa jenyi ni akwa-mana eswe yaalamwina. w23.08 3 ¶4

Nyonga ha yiwape yize yakwiza ku kulihumikiza. Mutu yoze wakulihumikiza kakuwahilila ni kuhwima mbunge. Chikwo nawa, uhumikizo muhasa kutukwika ku misongo yinji. Kulihumikiza chakutukwasa kupwa ni usepa upema ni akwetu ni kutwama no kanawa. Kulihumikiza chakukwasa nawa chikungulwila chetu chilinunge. Nyi umwe matusosomba; twakulengulula yuma yacho hanga twehuke mbwanja. (Samu 37:8; Yishi. 14:29) Chahiana ulemu, twakwimbulula Yehova ni kukolesa usepa wetu ni iye. Chochene, uhumikizo uli chitanga chipema chize chakutuyukisa yetu eswe! Chipwe ngwe hi chashi ko kusolola uhumikizo, alioze ni ukwaso wa Yehova mutuhasa kununga ni kusa tachi hanga tusolole chitanga chino. Chikwo nawa, nyi mutushimbwila chifuchi chaha ni uhumikizo, mutuhasa kupwa ni shindakenyo ngwetu, “liso lia Yehova kuliakutala, kuli waze akumuvwila woma ni waze akutwaminyina utu wa zango lienyi.” (Samu 33:18) Kashika, muchilita kununga ni kusolola uhumikizo. w23.08 25 ¶16-17

Tiangu yasolola ngwenyi, lunga wacho kapwile ni kwamba ngwenyi, kali ni ufulielo, alioze yize alingile yasolwele ngwo, kali chilembekese mumu yuma yacho te kuyishi kulita ni yize akwamba. (Tia. 2:1-5, 9) Tiangu yahanjika nawa hali umwe ndumbu wa lunga hanji wa pwo yoze keshi ni mazalo hanji kulia chinakumbana ha tangwa. Alioze, mutu yoze unamumono kechi kulinga nichimwe hanga amukwase. Chipwe ngwe mutu wacho kali ni ufulielo, alioze yitanga yenyi muyisolola ngwo keshi nawo. (Tia. 2:14-16) Tiangu yahanjika hali Rahape ngwe chilweza chipema cha mutu yoze ukwete ufulielo ni kuusolola mu yitanga. (Tia. 2:25, 26) Rahape kevwile hakutwala kuli Yehova ni kunyingika ngwo, iye te kanakwase A-Izalele. (Yoshu. 2:9-11) Hachino, iye yasolola ufulielo kupalikila mu yitanga ha kufunga ngendeshi aali A-Izalele waze te ali mu ponde. Kashika, pwo yono chihenge yoze te hi Ka-Izalele ko, yamutongola ngwe mukwa-ululi ngwe chizechene Zambi atongwele Apalahama ngwenyi mukwa-ululi. Chilweza cha Rahape chinatulongesa ngwo, ufulielo wetu watamba kusoloka mu yitanga hi mu kanwa wika ko. w23.12 5-6 ¶12-13

Yetu Akwa-Kristu kutwatambile wika kulilongesa yikuma yitangu ya maliji a mu Mbimbiliya. Nyi ukwaso wa spiritu yisandu ya Yehova, tunazange kunyingika kanawa “chipwe yuma yikalu ya mana ja Zambi.” (1 Kori. 2:9, 10) Nyi muchilita, putuka limwe longeso lia wika lize mulikukwasa kukundama chinji kuli Yehova. Chakutalilaho, muhasa kuputuka kuhengwola chize Yehova asolwelele tuvumbi twenyi a ku shakulu zango, ni chize chino chakusolola ngwo ni yena kakukuzanga. Muhasa nawa kulilongesa chize uwayilo wa Yehova apwile ni kuululieka ha mashimbu ja A-Izalele, ni chize Yehova anazange hanga tumuwayile musono. Hanji muhasa kulilongesa chinji uprofeto uze Yesu amanunwine muze apwile hano hashi. Muhasa kuwaha yuma yimwe yize ayo ambile ha mushete unambe ngwo: “Yikuma Yize Muhasa Kulilongesa ha Longeso lia Wika.” Muhasa kuzachisa Indice ya mikanda yetu hanga ulilongese, hanji Chikwata cha Yela ja Yehova cha Kuhengwola Nacho. Nyi wachilinga, mumona ngwe kuzachisa yikwata yino chakupemesa chinji longeso. Kulilongesa Mbimbiliya mu mutapu au, muchihasa kukukwasa kukolesa ufulielo we ni “kuwana chinyingi cha Zambi.”—Yishi. 2:4, 5. w23.10 19 ¶3-5

Liji lize Postolo Petulu azachishile hano “chinji,” linalumbunuka “kutachika.” Chihanda chamuchiali mu versu chinasolola yize mutulinga nyi mutuzanga chinji akwetu. Mutufuka hanji kulengulula uhenge wa akwetu. Tunyongenu ha chikuma chino: chili ngwe mutwanda zango lietu, ngwe chize chapwa hina lize liakulitachika, mututachika hanga tufuke nalio hi shili yimuwika ko hanji yaali ka, alioze “shili yinji.” Ha chikuma chino, “kufuka” muchihasa kulumbunuka kukonekena. Ngwe chizechene hina liakufuka chipeka hanji chimbandu chize chili ku majimba wa mutu, zango lize tuli nalio hali akwetu mulihasa kufuka ulelu, ni uhenge wa mandumbu jetu. Zango lietu liatamba kupwa linji lize mulitukwasa hanga tukonekene uhenge wa mandumbu jetu, chipwe ngwe ha mashimbu amwe muchipwa chikalu kuchilinga. (Kolo. 3:13) Muze twakukonekena akwetu twakusolola ngwetu, zango lietu lili likolo ni kuvwisa Yehova kuwaha. w23.11 11-12 ¶14, 15

Mwanangana Josia muze apwile ni miaka 26, yaputuka kululieka yimwe mu tembele. Mwenamo awanyine mukanda wa “shimbi ja Yehova jize ahanyine kuli Mose.” Muze mwanangana evwile yize mukanda wacho unambe, hazehene yaputuka kwalumuna yimwe hanga ononokene shimbi jacho. (2 Sango 34:14, 19-21) Shina wakutanga kama Mbimbiliya hita tangwa? Nyi che wakulinga, shina katalilo wacho kanende kanawa? Wakusoneka jimwe versu jize mujihasa kukukwasa? Muze Josia apwile ni miaka 39, yalinga umwe uhenge uze wafwikile mwono wenyi. Shimbu afupe usongwelo wa Yehova, iye yajikijila hali mwene. (2 Sango 35:20-25) Hano tunawaneho longeso linene. Chipwe ngwe tuli nyi miaka yeswayo hanji twakulingila Yehova ha miaka yeswayo, yetu eswe tunafupiwa kununga ni kukundama kuli Yehova. Mba tuhase kuchilinga, tunafupiwa kulemba kuli Yehova ha kwita usongwelo wenyi, kulilongesa Mbimbiliya ni kupanjika yiyulo ya Akwa-Kristu waze ajama. Chino muchitukwasa twehuke kulinga shili ha kulinga yuma yize muyitunehena uwahililo.—Tia. 1:25. w23.09 12-13 ¶15-16

Mbimbiliya yakutongola mapwo anji waze azangile Yehova ni kumulingila. Ayo kapwile mapwo “akwa-yitanga yipema,” “ashishika mu yuma yeswe.” (1 Timo. 3:11) Ni mu yikungulwila yetu musono, muli yilweza yinji ya mandumbu a mapwo “ajama ku ufulielo” waze akweze mahasa kwimbulula. Akweze a mapwo, nyi muchilita, fupenu chilweza cha umwe ndumbu wa pwo yoze wajama ku ufulielo ni kumwimbulula. Talenu kanawa yitanga yipema yize iye ali nayo, hanyima, nyongenu chize munuhasa kwimbulula yitanga yacho. Kulikehesa chili chitanga chilemu kuli Mukwa-Kristu. Nyi ndumbu wa pwo malikehesa, iye mapwa ni usepa ukolo ni Yehova ni kutwama kanawa ni akwo. Chakutalilaho, pwo yoze wakuzanga Yehova ni kulikehesa kakwononokena shimbi ya wata yize Yehova asele. (1 Kori. 11:3) Shimbi yino yakusolola zwalala atu waze Yehova asakwile hanga apwe ni yiteli mu chikungulwila ni mu usoko. w23.12 18-19 ¶3-5

Yehova kanazange hanga lunga azange mukwo-pwo ni kumufunga ku mujimba, ku manyonga ni ku spiritu. Kupwa ni malinjekela, kuvumbika mapwo, kupwa mutu yoze akwenu majikijila, yino yeswe muyikukwasa kupwa lunga mupema. Hanyima lia kumbata, muhasa kupwa chisemi. Yika muhasa kulilongesa kuli Yehova ha kupwa chisemi mupema? (Efwe. 6:4) Yehova kakapwile ni kwivwa sonyi ja kulweza Mwanenyi Yesu ngwenyi, kakumuzanga nawa kanamutayiza. (Mateu 3:17) Nyi wapwa chisemi, kanda uvulama kulweza ana je ngwe wakwazanga. Chichimieka ana je muze malinga yuma yipema. Yisemi waze akwimbulula Yehova, kakukwasa nawa ana jo hanga ajama ku ufulielo. Muhasa kupwa chisemi mupema ha kufunga usoko we ni zango, mandumbu mu chikungulwila ni kwalweza chize wakwazanga ni kuwaha chize wakwivwa ha kupwa mukachi ko.—Yoa. 15:9. w23.12 28-29 ¶17-18

Chipwe ngwe twakulingila Yehova, yetu eswe twakupalika mu yipikalo ni mu misongo ngwe yize yakusoloka kuli atu eswe hano hashi. Alioze, yetu mutuhasa kupalika nawa mu ukanjiso ni mu yihungumiona yize yakukatuka kuli atu waze keshi kuzanga Yela ja Yehova. Yehova keshi kutufunga ku yipikalo yino yeswe, alioze kanalakenya ngwenyi, mapwa hamwe ni yetu hanga atukwase. (Iza. 41:10) Ni ukwaso wenyi, mutuhasa kufunga uwahililo ni kukwata yiyulo yipema ha kununga ni kushishika kuli iye muze tunapalika ha mashimbu akalu. Yehova kanalakenya kutwaha yize Mbimbiliya yakuvuluka ngwo, “sambukila ya Zambi.” (Fwili. 4:6, 7) Sambukila yino, yakukwasa ni kuhwimisa mbunge ya atu waze apwa masepa ja Yehova. Sambukila yino, yahiana kunyonga cheswe nawa yikwete ndundo jinji. Shina hiunahwimi kama mbunge hanyima lia kulemba kuli Yehova? Nyi chenacho, yize wevwile ye “sambukila ya Zambi.” w24.01 20 ¶2; 21 ¶4

Kuzanga Yehova chakutwala atu waze ashishika ahalise jina lienyi. Mwanangana Ndawichi kanyingikine ngwenyi, kuhalisa jina lia Yehova chapwile kuhalisa Yehova mwene. Jina lia Yehova linachingi lufuma wenyi, kashika, yino yinatwiwulula yitanga yenyi yipema ni yuma ya kukomwesa yize hanalingi. Ndawichi kazangile chinji kuhalisa jina lia Tato wa mu malilu, mumu iye kali musandu. Iye kazangile kumuhalisa ni yuma yeswe yize apwile nayo, chekwamba, ni mbunge yeswe. Chizechene nawa, A-Levi te kakulemesa chinji chiteli cho cha kuhalisa Yehova. Ayo katayijile ni kulikehesa cheswe ngwo, maliji jo te kechi kuhasa kuhalisa jina lisandu lia Yehova mu mutapu uze liatela. (Nehe. 9:5) Kwamba pundu, kulikehesa chino chinakevwisa Yehova kuwaha. w24.02 9-10 ¶6

Nyi mumona ngwe kuwahashile kumanununa yize hiunatese ku ufulielo, kanda unyonga ngwe Yehova makumona ngwe kuwatelele. (2 Kori. 8:12) Wana malongeso ha yipikalo yize muopwa nayo. Nyonga ha yuma yize hiunalingi kulu. Mbimbiliya yakusolola ngwo: ‘Zambi hi chihenge ko mba avulame mulimo uze nwakumulingila.’ (Hepre. 6:10) Kashika, kanda uvulama yuma yeswe yize hiunalingi. Chakutalilaho, achinyonga ha yuma yize hiunalingi ngwe kupwa sepa lia Yehova, kwambujola kuli akwenu ni kukupapachisa. Ngwe chizechene wamanunwine yuma yino watesele ku ufulielo, muhasa kumanununa yuma yize hiwatesa haliapwila. Ni ukwaso wa Yehova, muhasa kumanununa yize hiunatese ku ufulielo. Kashika, muze unase tachi hanga umanunune yize hiunatese ku ufulielo, fupa kunyingika chize Yehova anakukwase, ni chize manunga ni kukukwasa hanga uyimanunune. (2 Kori. 4:7) Nyi kuwahongele, mukatambula yiwape yinji.—Ngala. 6:9. w23.05 31 ¶16-18

Yehova kakufupa uhashi wa kusolola kuli tuvumbi twenyi ngwenyi, kakwazanga ni kuwahilila ha yize akulinga. Mbimbiliya yakuhanjika ha yisuho yaali haze Yehova alwezele Yesu ngwenyi, kali Mwanenyi yoze azanga, nawa uli ni utayizo wenyi. (Mateu 3:17; 17:5) Shina muzanga kwivwa Yehova mamba yuma ya mutapu au hali yena? Musono, Yehova keshi kuhanjika ni yetu kukatuka mu malilu, alioze kakuchilinga kupalikila mu Mbimbiliya. Mutuhasa ‘kwivwa’ Yehova matulweza ngwenyi, tuli ni utayizo wenyi muze mututanga maliji a Yesu mu Evanjelu. Yesu kembulwile utu wa Tato ni ungunu weswe. Kashika, muze mututanga maliji a zango a Yesu waze ahanjikile kuli atu yihenge, mutuhasa kunyonga ngwetu, Yehova mwe unahanjika maliji jacho kuli yetu. (Yoa. 15:9, 15) Nyi ngwe nunapalika mu yipikalo, kuchalumbunukine ngwo kunushi ni utayizo wa Yehova. Shimbu tunyonge chocho, yipikalo yakutukwasa kusolola zango ni ujikijilo wetu muli Yehova.—Tia. 1:12. w24.03 28 ¶10-11