Setembro

Yehova hanahane ndundo kuli Yesu hanga ahwise lamba lieswe lia atu. Yikomokeso yize Yesu alingile yinasolola ngwo, kali ni ndundo ja kuhwisa lamba lize yetu ukawetu kutuchi kuhasa kulihwisa. Ngwe chilweza, iye kali ni ndundo ja kutukuula ku shili ni ku lamba lize liakwizako ngwe, misongo ni kufwa. (Mateu 9:1-6; Roma 5:12, 18, 19) Yikomokeso yize Yesu alingile yinasolola ngwo, iye mahasa kuuka misongo yeka ni yeka ni kuhindwisa afu. (Mateu 4:23; Yoa. 11:43, 44) Iye nawa kali ni ndundo ja kukwika luyinda wa chisemewa ni kukuula atu ku yitanga ya andemoniu. (Marku 4:37-39; Luka 8:2) Twakuwahilila chinji ha kunyingika ngwetu, Yehova hanahane ndundo jino kuli Mwanenyi! Mutuhasa kupwa ni shindakenyo ngwetu, Wanangana wa Zambi muukaneha yiwape yinji hano hashi. Yikomokeso yize Yesu alingile muze apwile hano hashi, yakusolola yuma yize makalinga ngwe Mwanangana mu Wanangana wa Zambi. w23.04 3, 4 ¶6, 7

Nyi uli mu chikungulwila muze muli mandumbu anji ndumbu yoze unasongwela keshi kukutongola ha yisuho yinji, kota wazangile kwecha. Alioze, kanda ulitwamina kuhana makumbululo. Lulieka makumbululo anji ha hita kukunguluka. Nyi kakutongwele kuuputukilo wa longeso, mahasa kukutongola ha mashimbu akwo. Muze unalulieka Longeso lia Kaposhi wa Kutalila, nyonga ha chize hita paragrafu yinakwate ha mutwe wa longeso. Nyi wachilinga, muhasa kukumbulula ha longeso lia kaposhi. Chikwo nawa, muhasa kulilulieka kanawa hanga ukumbulule ha maparagrafu waze anahanjika yuma yize kanji-kanji yapwa yikalu kulumbununa. Mumu liaka? Mumu hanji atu akehe wika e mazundula moko ha maparagrafu jacho. Mba nyi mukaula yikuma yino yeswe, chipwe chocho, kuuchi kuhasa kuhana kumbululo ha kukunguluka cheka ni cheka chize wazundula kwoko? Ha chikuma chino, muhasa kuhanjika ni ndumbu yoze masongwela muze kukunguluka kanda chiputuka ni kumulweza paragrafu yize unazange kukumbulula. w23.04 21-22 ¶9-10

Yosefwe te keshi kushimbula ha kukaula usongwelo wa Yehova, chino chamukwashile kupwa lunga mupema. Ha yisuho yitatu, iye yatambula usongwelo wa Zambi hakutwala kuli usoko wenyi. Ha yisuho yino yeswe, iye yakaula usongwelo wa Zambi, kafuji-fuji chipwe ngwe yino te muyimutwala alumune yuma yinji ku mwono wenyi. (Mateu 1:20; 2:13-15, 19-21) Mumu lia kwononokena usongwelo wa Zambi, Yosefwe yafunga Maria ni kumukwasa mu yuma yeswe. Chochene, yino yatwalile Maria kwokesa zango ni vumbi lize apwile nalio hali Yosefwe! Malunga, yenu munuhasa kwimbulula Yosefwe ha kufupa usongwelo wa Yehova mashimbu eswe muze nunafungu asoko jenu. Chipwe ngwe muchifupiwa kwalumuna yimwe ku mwono wenu, nyi nwasa tachi nukaule usongwelo wa mu Mbimbiliya munusolola ngwenu nwakuzanga mapwo jenu ni kukolesa ulo wenu. Umwe pangi ku Vanuatu yoze uli ku ulo ha miaka kuhiana 20, yamba ngwenyi: “Muze mukwetu-lunga akufupa usongwelo wa Yehova ni kuukaula, vumbi liami hali iye liakwoka chinji kuhiana. Chikwo nawa, nakulivwa kanawa ni kujikijila ha yiyulo yenyi.” w23.05 21 ¶5

A-Yunda waze akatukile ku Babilonia te mapwa atu asandu a Yehova. (Shimbi 7:6) Chochene, mba ayo te evwise Yehova kuwaha katambile kwalumuna yimwe ku mwono wo. Kota A-Yunda anji waze asemukinyine mu Babilonia te hanejilila kunyonga ngwe A-Babilonia. Muze te hikwapalika miaka 70 chize haze A-Yunda atangu afunyine mu Izalele, nguvulu Nehemia yevwa ngwo, ana amwe waze asemukinyine mu Izalele te kanyingikine kuhanjika limi lia A-Yunda. (Shimbi 6:6, 7; Nehe. 13:23, 24) Chihanda chinene cha Liji lia Zambi chapwile chakusoneka mu limi lia Hepreu. Kuchi twanuke jacho te mahasa kulilongesa kuzanga Yehova ni kumuwayila nyi te kanyingikine kuhanjika limi lia Hepreu? (Ezera 10:3, 44) Twahasa kumona ngwetu, A-Yunda jacho te katamba kwalumuna yuma yinji ku mwono wo. Alioze chapwile chashi kwalumwina yitanga yacho mu chifuchi cha Izalele muze te anafunyisa uwayilo wamwenemwene hakehe-hakehe.—Nehe. 8:8, 9. w23.05 15 ¶6-7

Chaluyinda, chipwe ngwe mutupwa ni zango lia kulinga yimwe ni kusa tachi hanga tuyilinge, hanji mutupwa ni kapinda wa kumanununa yize twatesele. Chakutalilaho, yuma yize yakulingiwa susumuku muyihasa kutuwana ni kutuhonesa kupwa ni mashimbu a kulinga yize twatesele. (Chilu. 9:11) Hanji muchihasa kupwa ngwe yipikalo yimwe muyituhongesa ni kuhona tachi. (Yishi. 24:10) Chikwo nawa, mumu lia kupwa yihenge mutuhasa kulinga yuma yize muyitukwika kumanununa yize twatesele ku ufulielo. (Roma 7:23) Hanji kuhonga lume ku mujimba. (Mateu 26:43) Yika muyihasa kutukwasa kukumba yipikalo hanji mashimbu api? Mbimbiliya yinasolola pundu ngwo, chipwe ngwe mutupalika mu yipikalo ha mashimbu anji, ni ukwaso wa Yehova mutuhasa kukatuka ni kuya kulutwe. Muze twakununga ni kulinga yize yalita chipwe ngwe tunapalika mu yipikalo, twakusolola kuli Yehova ngwetu, tunazange kumuvwisa kuwaha. Chikwo nawa, Yehova kakuwahilila muze akumona tunase tachi tulinge yize hitunatese ku ufulielo! w23.05 30 ¶14-15

Kupwa pionelu wa shimbu lieswe, muchihasa kukwasa mukweze kulilongesa kutwama kanawa ni atu a mutapu weka ni weka ni kunyingika chize mazachisa mbongo chakuhona kujikisa. (Fwili. 4:11-13) Mutapu upema wa kuputuka mulimo wa shimbu lieswe, uli kupwa pionelu wa shimbu likehe, yize yakukwasa kunjila mu upionelu wa shimbi lieswe. Upionelu muuhasa kwazulula mapito akwo a kunjila mu mulimo wa shimbu lieswe, ngwe kunjila mu mulimo wa kutunga Mazuwo a Wanangana hanji kupwa Mbetelita. Mandumbu eswe a malunga, katamba kusa tachi hanga ajame ha kukalakalila akwo mu chikungulwila ngwe makulwana. Mbimbiliya yakwamba ngwo, malunga waze anase tachi hanga apwe ni yiteli kanazange kulinga “milimo yipema.” (1 Timo. 3:1) Chitangu, katamba kusa tachi hanga akalakale ngwe kavumbi. Tuvumbi kakukwasa makulwana a mu chikungulwila ha kulinga milimo yeka ni yeka hanga afunge mandumbu. Makulwana a mu chikungulwila ni tuvumbi, kapwa mandumbu alikehesa waze akukalakala chinji hanga akwase mandumbu ni mapangi jo mu chikungulwila. Chikwo nawa, kakwambujola chinji sango jipema. w23.12 28 ¶14-16

Muze Mwanangana Josia aputukile kufupa Yehova, iye kapwile ni miaka 16. Kazangile chinji kulilongesa hali Yehova ni kulinga upale wenyi, alioze mwono kuwapwile washi kuli mukweze yono. Ha mashimbu jacho, atu anji kapwile ni kuwayila tuzambi a mahuza. Kashika, Josia kafupiwile hamu mba anunge ni kukalila uwayilo wamwenemwene. Yino ye alingile lume! Muze aputukile kuchiza uwayilo wa mahamba mu chifuchi, iye kakapwile ni miaka chipwe 20. (2 Sango 34:1, 2) Chipwe ngwe uchili kanuke, nihindu muhasa kwimbulula Josia ha kulilongesa hali Yehova ni ha yitanga yenyi yipema. Yino ye muyikukwasa mba ulihane kuli Yehova. Kuchi chiyulo chino muchikwata ku mwono we? Luke, yoze apapachishile muze te ali ni miaka 14, yamba ngwenyi: “Kukatuka haliapwila, mungusa mulimo wa Yehova kulutwe ku mwono wami ni kusa tachi hanga ngumuvwise kuwaha.” (Marku 12:30) Ni yena nyi wachilinga, muhasa kupwa ni shindakenyo ngwe muyuka chinji! w23.09 11 ¶12-13

Muze postolo Paulu asonekenene Akwa-Tesalonika mukanda, chikungulwila chacho te hichalinga mwaka umuwika chize haze achiputukile. Mandumbu waze akusongwela kota te kanda achipwa ni yinyingi yinji, chikwo nawa kota te kakuhengesa-hengesa yuma. Chipwe chocho, mandumbu te katamba kwavumbika. Muze tunayi ni kukundama ku luyinda munene, muchifupiwa kujikijila chinji muli makulwana ni kukaula usongwelo wo. Muchihasa kupwa ngwe ha mashimbu amwe, mutuhona kutambula usongwelo kukatuka ku chishina chinene ni ku mutango. Kashika, chili chilemu kulilongesa kuzanga ni kuvumbika makulwana a mu chikungulwila chetu kukatuka haliapwila. Chipwe ngwe mukulingiwa yuma yeswayo, tunafupiwa kununga ni kulawola chakuhona kulihulikila ha uhenge wa mandumbu jetu, alioze kulihulikila ha ulemu wa kunyingika ngwo, Yehova ni Kristu kanasongwela malunga wano ashishika. Ngwe chizechene tepa te liakufunga mutwe wa swalale, kutalatala chetu cha ulamwino chakufunga manyonga jetu. Tunanyingika ngwetu, yuma yize yili hano hashi kuyishi ni ulemu niumwe. (Fwili. 3:8) Kutalatala chetu chakutukwasa kununga ni kuhwima mbunge ni kumana ngu. w23.06 11-12 ¶11-12

Waze akupanjika ‘pwo yoze chihepuke,’ katamba kukwata chiyulo chize muchisolola nyi matayiza kuya ku zuwo lienyi nyi ka. Kuli yuma yinji yize muyitutwala kwehuka yitanga ya upangala. Pwo chihepuke yamba ngwenyi: “Meya akwiya kuyema-o.” (Yishi. 9:17) Meya akwiya yika analumbunuka? Mbimbiliya yakutesa kulisumbakenya cha pwo ni lunga ngwe meya waze akuhwimisa mbunge. (Yishi. 5:15-18) Lunga ni pwo waze alimbata kulita ni shimbi, mahasa kulivwisa kuwaha mu ulo wo ha kulisumbakenya. Alioze meya akwiya kalisa chinji, mumu o mahasa kulumbunuka upangala, hanji kulisumbakenya chize kuchalitele. Atu waze akulinga upangala hanji utanji, kanji-kanji kakufupa kuswekela akwo ngwe chizechene eji akulinga muze anayi ni kwiya. Chikwo nawa, muze atu akunyonga ngwo kukushi niumwe yoze manyingika yize akulinga, meya jacho akwiya mahasa kusoloka ngwe kanayeme chinji; alioze yili ponde yinene kunyonga chocho. Yehova kakumona yuma yeswe; yino hi yiyema ko, yapwa yisasu mumu yakutwala mutu kuhona utayizo wa Yehova.—1 Kori. 6:9, 10. w23.06 22 ¶7-9

Yika mulinga nyi ha kupalika cha mashimbu munyingika ngwe, yilemba hanji mulimo we wa kwambujola kuyishi nawa kanawa? Nyi chino muchilingiwa, kanda unyonga ngwe kuushi nawa ni spiritu yisandu ya Yehova. Mumu lia kupwa yihenge, kutushi kuhasa kupwa ni manyonga waze-ene mashimbu eswe. Nyi zango lie mu mulimo wa kwambujola mulitepuluka, sako mashimbu hanga unyonge ha chilweza cha postolo Paulu. Iye kapwile ni kusa tachi hanga embulule Yesu, alioze Paulu kanyingikine ngwenyi, ha mashimbu amwe te keshi kuhasa kulinga yize anazange. Paulu kazangile kulinga mulimo wenyi wa kwambujola chipwe ngwe te malivwa cheswacho. Chizechene nawa, kanda ukwata yiyulo yize yinakatuka wika ha chize unevu. Sako tachi hanga ulinge yize yalita chipwe ngwe mu mbunge ye kuwazangile kuyilinga. Nyi walinga yuma yize yalita, ha kupalika cha mashimbu manyonga je malumuka ni kupwa apema.—1 Kori. 9:16. w24.03 11-12 ¶12-13

Mutuhasa kusolola zango kuli mandumbu jetu ha kulikata no ni kupalikisa no mashimbu. (2 Kori. 6:11-13) Yetu eswe tuli mu yikungulwila muze muli mandumbu a ku minyachi yeka ni yeka, nawa akwete utu walisa. Mutuhasa kuzanga chinji mandumbu wano eswe, ha kulihulikila ha yitanga yo yipema. Muze twakulilongesa kumona akwetu ngwe chize Yehova akwamona, acho twakusolola ngwetu twakwazanga. Ha luyinda munene, mutukafupiwa chinji kuzanga mandumbu jetu eswe. Kuchi Yehova makatufunga muze luyinda munene maputuka? Tutalenu yize Yehova atumine tuvumbi twenyi kulinga muze aalukukilile kuli A-Babilonia. “Tweyenu atu jami, njilenu mu yipatulo yenu, nukaliajile ni mapito jenu. Swamenu kashimbu ndo ufwatulo hiwapalika.” (Iza. 26:20) Ha mashimbu a luyinda munene, usongwelo uno muuhasa kutala ni hali yetu. w23.07 6-7 ¶14-16

Ehuka kulikwachilila wika ha manyonga je. Lihule ngwe: ‘Shina akwetu kanangunyingika ngwo, ngushi kulikwachilila wika ha manyonga jami, nawa napwa mutu mwashi ha kutwama ni akwetu? Nyi ayo kakungumona ngwo napwa mutu mukalu nawa mukwa-pami? Kutala nakupanjika yiyulo ya akwetu ni kwalumuna manyonga jami?’ Nyi twapwa atu waze keshi kulikwachilila wika ha manyonga jo, chino muchisolola ngwo tunembulula Yehova ni Yesu. Tunafupiwa kupwa atu waze akwijilila ni yuma ni kawashi muze yimwe muyalumuka ku mwono wetu. Kwalumuka chacho muchihasa kutunehena kapinda yoze te kutushi ni kushimbwila. Chakutalilaho, susumuku mutuhasa kupwa ni musongo upi, kapinda wa mbongo chipwe mbwanja mu yuma ya mafwefwe muyihasa kupinjisa mwono wetu. (Chilu. 9:11) Chipwe kutwalumuna chiteli chize tukwete muchihasa kutunehena kapinda. Mutuhasa kwijilila ni yuma yize yalumuka ku mwono wetu ha kulinga yuma yiwana: (1) kutayiza yize yinalingiwa ku mwono wetu, (2) kulihulikila ku yuma ya kulutwe, (3) kulihulikila ha yuma yalita, ni (4) kulingila akwetu yuma. w23.07 22 ¶7-8

Profeta Daniele kapwile mukweze muze A-Babilonia amukwachile ni kumutwala kusuku ni mbonge yo ya Yerusaleme. Chipwe ngwe Daniele kapwile mukweze, nihindu yilolo A-Babilonia kakomokene chinji ha yize amwene kuli iye hakutwala ku mujimba wenyi ngwo, kapwile ‘mupema ku meso,’ chikwo nawa, ‘kakatukile ku umwe usoko ulemu.’ (1 Samue. 16:7) Kashika, A-Babilonia amufumbile hanga akalakale ku zuwo lia mwanangana. (Danie. 1:3, 4, 6) Yehova kazangile Daniele mumu lia utu uze apwile nawo. Daniele kota kapwile ni miaka 20 muze Yehova amwambile ngwenyi, kali ngwe Noa ni Yombi. Yehova te kakumona Daniele ngwo kali mungunu ngwe Noa ni Yombi waze amulingilile ha miaka yinji kunyima. (Uputu. 5:32; 6:9, 10; Yombi 42:16, 17; Eze. 14:14) Daniele kapwile ni mwono upema ha kulingila Yehova ha miaka yinji, chocho Yehova yamuzanga ha miaka yino yeswe.—Danie. 10:11, 19. w23.08 2-3 ¶1-2

Muze tunazange kulanda zuwo. Twakuzanga kuya ku zuwo liacho ni kutala chize lili. Yino mutuhasa kuyilinga nawa muze tunatange ni kulilongesa Liji lia Zambi. Nyi wakutanga Mbimbiliya helu-helu, muhasa kunyingika yimwe yuma hi yikalu ko, yize Mbimbiliya yakuvuluka ngwo, “yikuma yitangu ya maliji asandu.” (Hepre. 5:12) Ngwe chizechene muoya hanga unyingike kanawa zuwo lize unambe kulanda, unafupiwa nawa kulilongesa Mbimbiliya mu yimako-yimako mba uyinyingike kanawa. Mutapu upema wa kulilongeselamo Mbimbiliya, uli kumona chize sango jamo jinji jinalite ni jikwo. Kashika, sako tachi hanga unyingike hi wika ko umwenemwene uze wakutayiza, alioze nawa mumu liaka wakuutayiza. Mba tunyingike kanawa Liji lia Zambi, twatamba kulilongesa umwenemwene ukalu uze ulimo. Postolo Paulu kalwezele Akwa-Kristu hanga alilongesa kanawa Liji lia Zambi, mba ahase “kunyingika kanawa utohwe, usuhwe, usuhwe kwilu ni usuhwe kushi” wa umwenemwene. (Efwe. 3:14-19) Ni yetu che twatamba kulinga. w23.10 18-19 ¶1-3

Mu Mbimbiliya muli yilweza ya atu anji waze alihumikijile. Nyi muchilita, linga longeso ha kuhengwola yilweza ya atu jacho. Chakutalilaho, Ndawichi kapwile mukweze chinji muze amusakwile hanga apwe mwanangana mu Izalele, alioze kanakashimbwila miaka yinji mba ahinge wata wacho. Chilweza chikwo chili cha Semone ni Ana, ayo te kakuwayila Yehova ni ushishiko muze te akushimbwila kwiza cha Mesaya. (Luka 2:25, 36-38) Muze muputuka kulilongesa sango jacho, fupa kukumbulula yihula yino: Yika yakwashile mutu wacho kusolola uhumikizo? Mumu liaka kusolola uhumikizo chamukwashile? Mba kuchi munguhasa kumwimbulula? Muhasa nawa kulilongesa ha yilweza ya atu waze kakasolwele uhumikizo. (1 Samue. 13:8-14) Muze unalilongesa yilweza yino, lihule ngwe: ‘Mumu liaka mutu yono kakasolwele uhumikizo? Yuma yika yipi yize yalingiwile ku mwono wenyi mumu lia kuhona kusolola uhumikizo?’ w23.08 25 ¶15

Postolo Petulu te kashishika; kashika kakechele chuma nichimwe hanji mutu niumwe amukwike kukaula Yesu. Chakutalilaho, tangwa limwe, iye kasolwele ushishiko wenyi muze tumbaji ahonene kunyingika yimwe yize Yesu ambile. (Yoa. 6:68) Anji waze apwile ni kukaula Yesu, yalitwamina; kakazangile chipwe kwivwa ulumbunwiso wa chikuma chacho. Alioze, Petulu kakalingile chocho. Iye kapwile ni kushishika; kashika ambile ngwenyi Yesu wika mwe uli ni “maliji a mwono wa mutolo.” Yesu kanyingikine ngwenyi, Petulu ni apostolo akwo te mamuhichika ukawenyi. Chipwe chocho, Yesu yalweza Petulu ngwenyi te kananyingika ngwo, iye manunga ni kushishika. (Luka 22:31, 32) Yesu kanyingikine ngwenyi, ‘spiritu yikwete tachi . . . alioze mujimba ulelu.’ (Marku 14:38) Kashika, iye kakehukile sepa lienyi Petulu chipwe hanyima lia kulikalaye. Hanyima lia kumuhindwisa, chinasoloka ngwe Yesu kaliwanyine ni Petulu muze te ali ukawenyi. (Marku 16:7; Luka 24:34; 1 Kori. 15:5) Yino kota yinakatakamisa chinji Petulu yoze wapwile ni kunenganyana mumu lia yize alingile! w23.09 22-23 ¶9-10

Yehova kakukonekena shili ya waze akufuliela muli iye. Iye kakukonekena shili yo liakulu, keshi kwiwuluka nawa upi uze o alingile. (Samu 32:1, 2) Kuli iye, atu jacho kali akwa-ululi keshi chipeka mumu lia ufulielo wo. Chipwe ngwe Apalahama, Ndawichi ni tuvumbi akwo ashishika a Yehova kaatongwele ngwe akwa-ululi, nihindu o kanungine ni kupwa yihenge. Alioze mumu lia ufulielo wo muli Yehova, iye yaamona ngwe keshi tupalia, chipi-chipi muze te akwatesa ni atu waze keshi kumuwayila. (Efwe. 2:12) Ha mukanda uze asonekenene A-Roma, postolo Paulu yamba ngwenyi, nyi tunazange kupwa masepa ja Zambi twatamba kupwa ni ufulielo. Kashika, chizechene ngwe Apalahama ni Ndawichi, nyi mutufuliela muli Yehova ni yetu mutupwa masepa jenyi. w23.12 3 ¶6-7

Musono, Akwa-Kristu eswe kali ni uhashi wa kuhana yitapo kuli Yehova ha kuzachisa mashimbu, tachi ni yikumba yo hanga akwase mulimo uze Wanangana wa Zambi unalingi musono. Twakusolola ngwetu tunalemesa chiwape chino, muze twakuwayila Yehova ha kumwaha yuma yipema yize tukwete. Postolo Paulu yahanjika ha yuma yeka ni yeka yize twatamba kulinga hanga tuwayile Yehova. (Hepre. 10:22-25) Yuma yacho yinachingi, kulemba kuli Yehova mashimbu eswe, kwambujola kutalatala chetu, kukunguluka mashimbu eswe ni kulitakamisa umwe ni mukwo, “kuhiana chikolo muze tunamono lie tangwa lia Zambi linakundama.” Mu mukanda wa Usolwelo twakutangamo ngwetu, mungelo wa Yehova kanambe ngwenyi: “Wayila Zambi!” Iye kambile maliji wano ha yisuho yaali hanga asolole ngwenyi, chikuma chino chili chilemu. (Uso. 19:10; 22:9) Kashika, kanda tuvulama yuma yeswe yize twalilongesa hakutwala ku tembele yinene ya ku spiritu ni chiwape chize tuli nacho cha kuwayila Zambi yetu Munene, Yehova! w23.10 29 ¶17-18

Yetu eswe tunazange ‘kununga ni kulizanga umwe ni mukwo.’ Alioze twatamba kwiwuluka ngwetu, Yesu katowezele ngwenyi, “zango lia atu anji mulikakekema.” (Mateu 24:12) Hano Yesu te keshi kwamba ngwenyi, tumbaji twenyi anji makecha kulisolwela zango umwe kuli mukwo. Kashika, twatamba kukeya hanga kuhona cha zango chize chinasoloka hano hashi, chichine kutukwika kusolwela mandumbu jetu zango. Hachino, tutalenu ha chihula chikwo chilemu: Yika muyihasa kutukwasa kunyingika ngwetu, zango lietu hali mandumbu jetu linakolo? Chuma chize muchitukwasa kunyingika nyi zango lize tukwete hali mandumbu jetu linanungu ni kukola, chili kuhengwola yuma yize twakulinga muze mukusoloka yimwe. (2 Kori. 8:8) Yino yinasoloka zwalala ha yize postolo Petulu ambile ngwenyi: “Kuhiana yuma yeswe, lizangenu chinji umwe ni mukwo, mumu zango liakufuka shili yinji.” (1 Petu. 4:8) Mu maliji akwo, ulelu ni uhenge wa akwetu, muyihasa kweseka zango lize tukwete hali ayo. w23.11 10-11 ¶12-13

Nyi mutuzanga mandumbu amwe mu chikungulwila, akwo ka, acho kutushi kwononokena shimbi ya Yesu. Mutuhasa kulikata chinji ni mandumbu amwe kuhiana akwo ngwe chize Yesu alingile hali apostolo jenyi. (Yoa. 13:23; 20:2) Alioze, postolo Petulu kanatwiwulula ngwenyi, twatamba kusa tachi hanga tupwe ni “zango lia undumbu”—zango likolo linahiane lize tukwete hali asoko waze twasemuka no. Zango liacho, twatamba kulisolola hali mandumbu eswe; a mapwo ni a malunga. (1 Petu. 2:17) Petulu kasolwele ngwenyi, chili chilemu ‘kulizanga chinji umwe ni mukwo ni mbunge yeswe.’ (1 Petu. 1:22) Ha chisoneko chino, liji kuzanga “chinji” linalumbunuka kuzanga umwe mutu chipwe ngwe chili chikalu kumusolwela zango. Chakutalilaho, yika mutulinga nyi umwe ndumbu matwamba amwe maliji api hanji matulinga chuma chipi? Chuma chitangu mutulinga hanji chili kufunyisa upi ha upi shimbu tumusolwele zango. Alioze, Petulu kalilongesele kuli Yesu ngwenyi, yitanga ya mutapu au kuyishi kuvwisa Yehova kuwaha. (Yoa. 18:10, 11) Yasoneka ngwenyi: “Kanda nufwetesa upi ha upi, chipwe matuka ni matuka, alioze, shimbu nulinge chino, etelenu chiwape.” (1 Petu. 3:9) Nyi twazanga chinji mandumbu jetu, mutusolola umbovu kuli eswe ni kufupa kunyingika kanawa ndumbu. w23.09 28-29 ¶9-11

Twakukomoka chinji ha kumona ngwo ha mashimbu akehe wika, kanuke mapwa mukulwana. Chakusoloka ngwe ana kakukola chakuhona kusa tachi nijimwe. Alioze, kukola ku ufulielo chalisa. (1 Kori. 13:11; Hepre. 6:1) Mba mutu apwe ni usepa ukolo ni Yehova, katamba kusa tachi jinji. Chikwo nawa, mafupiwa ukwaso wa spiritu yisandu, mba apwe ni yitanga yipema, utotombo ni kulilulieka hanga akazuke yiteli kulutwe. (Yishi. 1:5) Muze Yehova atangile atu, iye kaatangile lunga ni pwo. (Uputu. 1:27) Tunanyingika ngwetu, malunga kakwete tachi jinji kuhiana mapwo. Alioze, kakwete kalisa mukwo nawa. Chakutalilaho, Yehova katangile malunga ni mapwo ni yiteli yalisa ni kuhana kuli hita umwe wa kuli ayo utotombo uze te muwaakwasa kulinga kanawa yiteli yacho.—Uputu. 2:18. w23.12 18 ¶1-2

Shina Yesu kazangile hanga atu akwo no avuluke jina lia Tato? Ewa, che azangile lume. Mangana amwe a mayingeleja kapwile ni kwamba ngwo, chili kuhona vumbi kutongola jina lia Zambi. Alioze, Yesu kakechele hanga mwanda uno, uze kuushi mu Yisoneko ukwike atu kuhalisa jina lia Tato. Ha chisuho chimwe, Yesu yauka lunga wapwile ni andemoniu yoze te watwama mu chihunda cha A-Ngandara. Atu yevwila Yesu woma unji, chocho yamwita hanga atuhuke mu chihunda chacho. (Marku 5:16, 17) Chipwe chocho, Yesu kazangile hanga atu mu chihunda chacho anyingike jina lia Zambi. Hachino, yalweza lunga yoze aukile hanga ahanjike ni atu akwo, hi ha yize ko iye amulingilile, alioze ha yize Yehova alingilile lunga wacho. (Marku 5:19) Ni haliapwila Yesu kanazange hanga jina lia Tato alinyingike hashi heswe. (Mateu 24:14; 28:20) Muze twakulinga chihanda chetu ha chikuma chino, twakuvwisa kuwaha Mwanangana wetu, Yesu. w24.02 10-11 ¶10

Chili chiwape chinene kulinga chihanda mu ululikiso wa Yehova ha mashimbu wano akalu a matangwa a kusula. Muze yuma hano hashi yinayi ni kupihia chinji, Yehova kanatwehe usoko wa ku ufulielo walinunga muze muli mandumbu a malunga ni a mapwo. (Samu 133:1) Yehova nawa kakutukwasa kupwa ni usoko ukolo uze wawahilila. (Efwe. 5:33–6:1) Iye kakutwaha mana waze tunafupiwa hanga tuhase kukumba kusakalala ni kupwa ni uwahililo. Twatamba kusa tachi mba tununge ni kulingila Yehova ni ushishiko. Mumu liaka? Mumu ha mashimbu amwe, yize akwetu akwamba hanji akulinga muyihasa kutulemeka ku mbunge. Chikwo nawa, mutuhasa kuhonga mumu lia uhenge uze twakulinga, chipi-chipi nyi uhenge wacho twakuufunyina ha yisuho yinji. Mutuhengwola yikuma yitatu tumone chize twatamba kunyongonona, (1) muze umwe ndumbu matwamba yuma yipi, (2) muze yoze twalimbata nenyi malinga yuma yize muyitulemeka ku mbunge, ni (3) muze mutuhonga mumu lia uhenge uze twakulinga. w24.03 14 ¶1-2

Hita shimbu, muwivwa ya kulitakananayo ya mandumbu a malunga ni a mapwo waze asele tachi hanga alihane chinji mu mulimo wa Yehova. Ayo hanji kayile ku Shikola ya Akwa-Kwambujola Wanangana hanji kwalukila ku chihela kuze te kunafupiwa ukwaso. Nyi muopwa ni uhashi, yino yili yuma yipema yize muhasa kutesa kulinga ku mwono we. Tuvumbi twa Yehova nihindu kakusa tachi hanga awane majila a kwambulwilamo chinji sango jipema. (Yili. 16:9) Mba yika mutwamba nyi haliapwila kuushi uhashi wa kuchilinga? Kanda ulitesa ni mandumbu waze akulingila chinji Yehova ha kunyonga ngwe kuushi ni ulemu. Chuma chilemu chili kununga ni kunyongonona. (Mateu 10:22) Kashika, kanda wiza kavulama ngwe Yehova kakuwahilila chinji ha yize muhasa kulinga kulita ni yize yinalingiwa ku mwono we ni uhashi uze uli nawo. Kulinga chino, che muchikukwasa mba ununge ni kukaula Yesu hanyima lia kukupapachisa.—Samu 26:1. w24.03 10 ¶11

Yehova kanalakenya ngwenyi, nyi twalikonyeka ku shili yetu, iye matukonekena. (Samu 86:5) Kashika, nyi mutulikonyeka ni mbunge yeswe ha shili yize twalinga, mutuhasa kupwa ni shindakenyo ngwetu ukonekeno wa Yehova uli wamwenemwene. Chuma muchitukwasa chili kwiuluka ngwetu, Yehova keshi kutwita tulinge yuma yize kutuchi kuhasa, nawa iye hi mukalu ko. Yehova kakulemesa chuma cheswacho mutuhasa kulinga, chahiana ulemu nyi twachilinga ni mbunge yimuwika. Chikwo nawa, muhasa kupukuna ha yilweza ya mu Mbimbiliya ya atu waze alingilile Yehova ni mbunge yimuwika. Tutalenu chilweza cha postolo Paulu. Iye kalingile mulimo wa Zambi ha miaka yinji, kalingile wenyi wa tununu a tununu twa kilometru ni kukwasa kwazulula yikungulwila yinji. Alioze muze yuma ku mwono wenyi yalumukine, ni kumukwika kwambujola chinji ngwe chize apwile ni kulinga kunyima, shina Yehova kechele kulemesa yize te akulinga? Ka. Paulu kanungine ni kulinga yize te mahasa, chocho Yehova yamuwahisa. (Yili. 28:30, 31) Chizechene nawa, yize mutulingila Yehova ku mwono wetu muyihasa kwalumuka ha kupalika cha mashimbu. Alioze chuma chilemu chili nyonga lize liakututwala mba tulinge mulimo wa Yehova. w24.03 27 ¶7, 9

Kupalikila mu yilemba yize alingile kuli Yehova, Yesu yatuhichikila chilweza chipema chize twatamba kukaula. Muze apwile ni kwambujola, Yesu te kakulemba chinji. Iye kapwile ni kusa mashimbu hanga alembe mumu kapwile ni milimo yinji nawa te kakupwa ni atu anji. (Marku 6:31, 45, 46) Iye te kakulianga kuhinduka ni kuya kwa ukawenyi hanga alembe. Ha shimbu limwe, iye kalembele ufuku wamuwundu muze te anambe kukwata chiyulo chilemu. (Luka 6:12, 13) Ha ufuku wenyi wa kasula muze anyingikine ngwenyi mapalika mu yuma yikalu mu mulimo wenyi, Yesu yalemba ha yisuho yinji . (Mateu 26:39, 42, 44) Chilweza cha Yesu chinatulongesa ngwo, chipwe ngwe mutupwa ni milimo yinji, nihindu tunafupiwa kusa mashimbu hanga tulembe. Chizechene ngwe Yesu, tunafupiwa kutesa mashimbu hanga tulembe. Mba tuchilinge, hanji mutufupiwa kuhinduka chimene-mene chipwe kupomba ndambu kasula. Nyi twachilinga, mutusolola kuli Yehova ngwetu, twakulemesa chawana cha kulemba. w23.05 3 ¶4-5

Achitalenu liji linambe ngwo, “alizukwile” ha chisoneko cha musono. Umwe mukanda uze wakuhanjika ya Mbimbiliya, unalumbununa liji lino ngwe “meya waze anapalika hali yetu.” Maliji wano kanalumbununa kanawa zango lize Yehova akwete hali Akwa-Kristu akuwayisa! Ayo kananyingika ngwo, “Zambi kakwazanga.” (Yunda. 1) Postolo Yoano kasolwele chize te akwivwa muze asonekene ngwenyi: “Talenu zango lipwahaha lize Tata hanatusolwela, ha kutuvuluka ngwenyi ana jami.” (1 Yoa. 3:1) Shina Yehova kakuzanga wika Akwa-Kristu akuwayisa? Ka. Yuma yize alingile yakusolola ngwo yetu eswe kakutuzanga. Chuma chika chize chinasolola ngwo, Yehova kakutuzanga chinji? Chuma chacho chili ukuule. Kupalikila mu ukuule, Yehova kakusolola ngwo kakuzanga atu eswe!—Yoa. 3:16; Roma 5:8 w24.01 28 ¶9-10

Chisoneko chino chinasolola jila yimwe ya chize Ndawichi akumbile woma. Chipwe muze mwono wenyi wapwile mu ponde, iye kapukwine ha yize Yehova mamulingila kulutwe. Ndawichi kanyingikine ngwenyi, Yehova te mamulamwina ha ola yalita. Mumu iye kambile ngwenyi, Ndawichi te mapwa Mwanangana mu Izalele mu chihela cha Saulu. (1 Samue. 16:1, 13) Kuli Ndawichi, yuma yeswe yize Yehova alakenyene yapwile ngwe hiyamanunuka. Yika Yehova analakenya kukulingila? Yetu kutushi kushimbwila hanga Yehova atufunge mu lamba lieswe lize mutupalika. Chipwe chocho, kapinda mweswawo mutupwa nenyi mu chifuchi chino, mutuhasa kupwa ni shindakenyo ngwetu, Yehova makamuchiza mu chifuchi chaha. (Iza. 25:7-9) Pundu lume, Sakatanga wetu kali ni ndundo ja kuhindwisa atu waze hanafu, kuuka misongo ni kunongesa akwa-kole jetu eswe.—1 Yoa. 4:4. w24.01 6 ¶12-13

Nyonga ha yize yakutwalile mba ulihane kuli Yehova ni kukupapachisa. Wachilingile mumu wazangile kupwa sali lia Yehova. Iwuluka yize yakukwashile kupwa ni shindakenyo ngwe, wawana umwenemwene. Wanyingikine kanawa Yehova, chocho yiuputuka kumuzanga ni kumuvumbika. Waputukile kupwa ni ufulielo, mba ufulielo wacho yiukutwala hanga ulikonyeke. Kuzanga Yehova chakukwashile kwehuka yuma yipi ni kuputuka kulinga yuma yize yakumuvwisa kuwaha. Wevwile sambukila ya ku mbunge muze wanyingikine ngwe Yehova kakukonekena shili ye. (Samu 32:2) Waputukile kukunguluka ni kulweza akwenu yuma yipema yize wapwile ni kulilongesa. Amu hiwalihana kuli Yehova ni kukupapachisa, haliapwila unende mu jila yize yakutwala ku mwono, nawa unazange kulinga yeswayo muhasa hanga ununge ni kwenda mu jila yacho. (Mateu 7:13, 14) Kashika, nunga ni kukolesa ufulielo we muli Yehova ni kwononokena shimbi jenyi. w23.07 17-18 ¶14; 19 ¶19

Kupukuna ha yilemba yize walingile kuli Yehova muze walihanyine kuli iye, muchikukwasa kupwa ni tachi ja kukumba cheseko cheswacho muchisoloka ku mwono we. Ngwe chilweza, shina muzanga kusolola zango lia ulo kuli mutu yoze hanambate? Ka, kuuchi kulinga chocho! Mumu walakenyene kuli Yehova ngwe, kuuchi kulinga yuma ya mutapu au. Nyi musa tachi hanga manyonga api ahone kunjila mu mbunge ye, chino muchikukwasa hanga kulutwe uhone kulipinjisa ha manyonga jacho. Nyi mulinga chino, ‘mwehuka jila ya yingulungulu.’ (Yishi. 4:14, 15) Kupukuna ha chilweza cha Yesu muchihasa kutukwasa ha chikuma chino. Iye kapwile ni kusa tachi hanga evwise Yehova kuwaha mashimbu eswe. Kashika chizechene ngwe Yesu, ni yetu nawa tunazange kuvwisa Yehova kuwaha mashimbu eswe. (Mateu 4:10; Yoa. 8:29) Kwamba umwenemwene, yeseko ni yihungumiona muyikwaha uhashi wa kusolola ngwe ‘unanungu ni kukaula’ Yesu. Kashika, muhasa kupwa ni shindakenyo ngwe Yehova makukwasa kuchilinga. w24.03 9-10 ¶8-10