Agosto

Samu yino yinasolola yikuma yaali yilemu: (1) Akwa-ululi kakupalika mu yipikalo. (2) Yehova kakutukwasa mu yipikalo yize twakupalika. Mba kuchi akuchilinga? Mutapu umwe uli, kutukwasa kupwa ni nyonga lialita ku mwono wetu mu chifuchi chino tuli. Yehova kanalakenya ngwenyi, mutupwa ni uwahililo muze mutumulingila, alioze kambile ngwenyi kutuchi kupalika mu yipikalo. (Iza. 66:14) Iye kanatukolweza hanga tulihulikile ha yuma ya kulutwe lia matangwa muze mutukapwa ni mwono wa mutolo uze anatulakenya. (2 Kori. 4:16-18) Shimbu yuma yacho kanda yilingiwa, Yehova manunga ni kutukwasa hanga tumulingile hita tangwa chipwe ngwe mutupalika mu yipikalo. (Lun 3:22-24) Tutalenu yize mutuhasa kulilongesa hali tuvumbi twa Yehova ashishika a ku mashimbu a kunyima ni a ha mashimbu jetu. Ngwe chize mutumona, yetu eswe mutuhasa kupalika mu yipikalo yize te kutushi ni kushimbwila. Alioze nyi mutufuliela muli Yehova, iye manunga ni kutukwasa.—Sam 55:22. w23.04 14-15 ¶3-4

Mutuhasa kulilongesa ku chilweza cha Yosefwe ni Maria, waze ononokenene nguvulu chipwe ngwe chapwile chikalu kuchilinga. (Luka 2:1-6) Talenu chize kwononoka cho chapwile mu cheseko muze Maria te ali kafumba. Agustu, umwe nguvulu Ka-Roma, yasa shimbi yize yatwalile atu eswe kufuna ku yihunda kuze asemukinyine hanga alisonekese. Yosefwe ni Maria yalinga wenyi wa kilometro kuhiana 150 ha kuya ku Mbeteleme mu jila yize mwapwile mikinda yinji. Wenyi wacho kuwakapwile washi, chipi-chipi kuli Maria yoze te uli ni ufumba wa tukweji livwa. Mumu liaka? Mumu te mahasa kwivwa musongo ha shimbu lieswalio. Ayo kota kalihulumbile chinji ha mwono wa Maria ni wa mwana yoze te masemuka, mumu mwana wacho te mapwa Mesaya. Nyi kazangile, kachi ufumba uno wapwile ngwe kaliongelo hanga ahone kwononokena shimbi ya nguvulu. Yosefwe ni Maria kakalihulikilile wika ha yipikalo yo; ayo kononokenene nguvulu. Chocho, Yehova yawahisa kwononoka cho. Maria yaheta kanawa ku Mbeteleme, kuzekwene yasema mwana ni mujimba upema ni kukwasa kumanunuka cha umwe uprofeto!—Mika 5:2. w23.10 9 ¶11-12

Mba yika mutwamba nyi wakwivwa woma wakuhana makumbululo? Muhasa kulilulieka kanawa. (Yishi. 21:5) Nyi wanyingika kanawa yuma yize mutulilongesa ha kukunguluka, muchipwa chashi kuhana makumbululo. Chikuma chikwo chili, kuhana makumbululo ehi. (Yishi. 15:23; 17:27) Kuhana kumbululo lihi, muchikukwasa uhone kwivwa woma. Nyi wahana kumbululo lihi ha kuzachisa maliji je, musolola ngwo walilulieka kanawa, nawa wevwa yuma yize tunalilongesa. Mba yika mutwamba nyi hiuneseka yimwe ya ku yikuma yino, chipwe chocho wakwivwa woma wakuhana kumbululo? Nyi chenacho, muhasa kupwa ni shindakenyo ngwe, Yehova kakulemesa chinji tachi jize wakusa hanga ulinge yize muhasa. (Luka 21:1-4) Yehova keshi kutwita hanga tulinge yuma yize kutuchi kuhasa. (Fwili. 4:5) Kashika, tesa yize muhasa kulinga ni kulemba kuli Yehova hanga akukwase upwe ni kuhwima mbunge. Hanji ku uputukilo, yuma yize muhasa kutesa yili kuhana makumbululo ehi. w23.04 21 ¶6-8

Postolo Paulu kanatutese ni maswalale waze halilulieka hanga aye ni kwasa jita. Atu kakushimbwila ngwo, swalale katamba kulilulieka hanga ase jita ha shimbu lieswalio. Yino ye yakulingiwa ni kuli yetu. Mba tulilulieke hakutwala ku tangwa lia Yehova, tunafupiwa kuzala chipwiko cha ufulielo ni cha zango ni tepa lia kutalatala. Chipwiko te chakufunga mbunge ya swalale. Ufulielo ni zango; yakufunga mbunge yetu. Yitanga yino, muyitukwasa kununga ni kulingila Yehova ni kukaula Yesu. Ufulielo wakutukwasa kupwa ni shindakenyo ngwetu, Yehova makawahisa waze eswe akumulingila ni mbunge yeswe. (Hepre. 11:6) Wakutukolweza nawa kununga ni kushishika kuli Kasongo ketu, Yesu, chipwe ngwe mutupalika mu yipikalo. Mba tukolese ufulielo wetu ni kunyongonona, mutuhasa kulilongesa ha yilweza ya mandumbu jetu waze akununga ni kushishika chipwe ngwe kakupalika mu yihungumiona ni mu yipikalo. Chikwo nawa, mutuhasa kwehuka muheto wa kuzanga yikumba ha kwimbulula mandumbu jetu waze anakashiwisa mwono hanga ase Wanangana wa Zambi ha chihela chitangu. w23.06 10-11 ¶8-9

Uhumikizo uli uhashi uze wakutukwasa kuhombola manyonga ni yitanga yetu. Tunafupiwa kulihumikiza hanga tuhase kumanununa yize twatesele, chipi-chipi yuma yize yili yikalu hanji yize kutushi kupwa ni zango lia kuyimanununa. Iwuluka ngwe uhumikizo unalingi chihanda cha muhuko wa spiritu, kashika lemba kuli Yehova akwehe spiritu yisandu hanga upwe ni chitanga chino chilemu. (Luka 11:13; Ngala. 5:22, 23) Kanda tushimbwila kulinga yuma yingunu. Hano hashi twatwama, kutwatambile kushimbwila ngwetu yuma yeswe mutulinga muyipema. Nyi mutupwa ni nyonga liacho, hanji kutuchi kuhasa kumanununa yize twatesele ku ufulielo. Putuka ni yuma yikehe-yikehe. Muchihasa kupwa ngwe kuushi ni zango lia kulinga yize watesele ku ufulielo, mumu yuma yacho yili yikalu chinji kuyimanununa. Nyi chenacho, muchilita kumanununa chuma chacho, ha kuputuka ni kulinga yuma yikehe-yikehe. Nyi unazange kupwa ni chimwe chitanga chipema, muhasa kuchisolola ha yuma yikehe-yikehe yize mulinga ha hita tangwa. Chikwo nawa, nyi mutesa kutanga Mbimbiliya yeswe, muchilita kuyitanga ha mashimbu akehe ha hita tangwa. w23.05 29-30 ¶11-13

Ni ukwaso wa Yehova ni wa ululikiso wenyi, kutushi kuhona kulia cha ku spiritu ha matangwa wano a kusula. Kulia chino, chakutukwasa tulieswe hanga tununge ni kwenda mu “Tapalo Lisandu.” (Iza. 35:8; 48:17; 60:17) Mutuhasa kwamba ngwetu, nyi umwe mutu matayiza longeso lia Mbimbiliya, acho kapwa ni uhashi wa kwendela mu “Tapalo Lisandu.” Amwe kakuchilinga ha mashimbu akehe, chocho mahichika tapalo liacho. Akwo, kananungu ni kwenda mu tapalo lino ndo haze mahetela kuze anayi. Kuli kwenako? Waze ali ni kutalatala cha kuya mu malilu, “Tapalo [lino] Lisandu” muliatwala “mu paraisu ya Zambi” hanji ngwetu mu malilu. (Uso. 2:7) Kuli waze ali ni kutalatala cha kutwama hano hashi, tapalo lino lisandu muliatwala ndo kusongo lia kanunu ka miaka ya kuyula cha Yesu. Ha shimbu lize yetu eswe mutukapwa angunu. Nyi waputuka wenyi mu tapalo lino lisandu haliapwila kanda utuhukamo; nunga mu jila yacho ndo mu chifuchi chaha! w23.05 17 ¶15; 19 ¶16-18

Muze munyonga ha yuma yeswe yize Yehova hanakulingila, mba mulivwa ngwe watamba kuhana mwono we kuli iye. (Samu 116:12-14) Mbimbiliya yakwamba ngwo, Yehova mwe wakutwaha “chawana cheswe chipema ni chawana cheswe chingunu.” (Tia. 1:17) Chawana chinene chize Yehova hanahane kuli atu, chili chitapo cha Mwanenyi, Yesu Kristu. Achinyonga ha chino: chitapo cha Yesu chakukwasa hanga upwe ni usepa upema ni Yehova. Chikwo nawa, Yehova kanakwehe uhashi wa kutwama ku miaka yeswe. (1 Yoa. 4:9, 10) Kulihana kuli Yehova yili jila yize musolwelamo ngwe unamusakwilila hi wika ko ha ukuule, alioze ni ha yiwape yeswe yize hanakwehe.—Shimbi 16:17; 2 Kori. 5:15. w24.03 5 ¶8

Muze tunamono chize yitanga ya atu yinayi ni kupiha, twakulivwa ngwe chize alivwile Lote. Iye te kakupinda chinji “ha kwenda cha waze yingulungulu.” Mumu kanyingikine ngwenyi, Yehova keshi kuzanga yitanga yacho. (2 Petu. 2:7, 8) Kuvwila Yehova woma ni kumuzanga, yakwashile Lote kwehuka yitanga yipi yize atu apwile ni kusolola kuze apwile. Ni yetu nawa, twatunga hamwe ni atu waze keshi kulemesa yitanga yipema. Chipwe chocho, nyi mutununga ni kuzanga Zambi ni kumuvwila woma mu jila yalita, mutulifunga ku yitanga yacho yipi. Mba tuhase kuchilinga, yetu tuli ni ukwaso wa Yehova, chikwo nawa, iye kakuzachisa mukanda wa Yishima hanga atukolweze. Akwa-Kristu eswe malunga ni mapwo, makulwana ni akweze, mahasa kulilongesa yuma yinji ha kuhengwola mukanda uno. Muze twakuvwila Yehova woma, twakusa tachi hanga tuhone kufupa kaliongelo wa kulinga yuma yize kuyalitele. w23.06 20 ¶1-2; 21 ¶5

Muchihasa kupwa ngwe unapalika mu yihungumiona mu usoko, hanji wecha yuma yize muyikuyukisa ku musunya hanga use Wanangana wa Zambi ha chihela chitangu. (Mateu 6:33) Ha chikuma chino, muhasa kupwa ni shindakenyo ngwe Yehova kananyingika yuma yeswe yize hiwamulingila. (Hepre. 6:10) Kota hiwanyingika ngwe maliji wano a Yesu kali amwenemwene, anambe ngwo: ‘Nyi umwe mahichika zuwo, mandumbu jenyi a malunga ni a mapwo, naye, tato, ana hanji minda mumu hali yami ni ha sango jipema, kumakatambula 100 lia yisuho haliapwila ha mwaka uno, mazuwo, mandumbu a malunga ni a mapwo, anaye, ana, ni minda hamwe ni yihungumiona ni ha mwaka uze muwizaho mwono wa mutolo.’ (Marku 10:29, 30) Pundu lume, yiwape yize wazuka yili yinji kuhiana yuma yeswe yize wechele hanga ulihane mu mulimo wa Zambi.—Samu 37:4. w24.03 9 ¶5

Muze mandumbu a mu chikungulwila cha Andiakia ya ku Seria evwile lusango hakutwala ku kapunga, “Yatesa mutu ni mutu kulita ni uhashi wenyi, kutuma ukwaso kuli mandumbu waze te atwama mu Yundeya.” (Yili. 11:27-30) Chipwe ngwe, mandumbu waze apwile mu kapunga kapwile kusuku chinji, Akwa-Kristu mu Andiakia katesele kukwasa mandumbu jo. (1 Yoa. 3:17, 18) Ni yetu musono mutuhasa kusolola keke muze mutunyingika ngwetu, mandumbu jetu amwe kanapalika mu luyinda. Amu twakuzanga kukwasa kawashi-washi, muchilita kuhanjika ni makulwana hanga atulweze ha yize mutuhasa kukwasa. Mutuhasa kuhana milambu hanga tukwase mulimo wa hashi heswe ni kulembela mandumbu jetu waze anapalika mu luyinda. Mandumbu jetu mahasa kufupiwa ukwaso chipwe wa yuma yikehe-yikehe ya ku mwono. Muze Mwanangana wetu, Yesu Kristu makeza ni kupatwila atu, tunazange iye akamone ngwo, twakusolola keke ni kutusanyika hanga ‘tuhinge Wanangana.’—Mateu 25:34-40. w23.07 4 ¶9-10; 6 ¶12

Yesu kapwile mutu mwashi kutwama nenyi, mumu kembulwile chilweza cha Yehova. Iye kamutumine hano hashi hanga ambujole wika kuli “mapanga a ku zuwo lia Izalele waze hanatoko.” Chipwe chocho, kakalikwachilile wika ha nyonga liacho; kambulwile kuli atu akwo. Chakutalilaho, tangwa limwe, umwe pwo yoze hi Ka-Yunda ko, yaliumba kuli iye hanga auke mwanyi wa pwo wapwile ni ‘ndemoniu yoze te wakumupinjisa chinji.’ Mumu lia keke, Yesu yalinga yize pwo wacho amwichile; yauka mwanenyi. (Mateu 15:21-28) Talenu chilweza chikwo. Ku uputukilo wa mulimo wenyi hano hashi, Yesu yamba ngwenyi: “Mweswawo malikala yami . . . , ni yami mungukalikalaye.” (Mateu 10:33.) Alioze Yesu kakalikalile Petulu, chipwe ngwe Petulu kalikalileye ha yisuho yitatu. Iye kanyingikine ngwenyi, Petulu kalikonyeka nawa kali lunga washishika. Hanyima lia kumuhindwisa, Yesu yasoloka kuli Petulu ni kumulweza ngwenyi kamukonekena nawa kananungu ni kumuzanga. (Luka 24:33, 34) Yehova ni Yesu keshi kulikwachilila wika ha manyonga jo. Mba yika mutwamba hali yetu? Yehova kanashimbwila hanga ni yetu tulinge chocho. w23.07 21-22 ¶6-7

Yika mutulweza atu waze akuhamika ngwo, yino kuyichi keza kalingiwa? Chitangu, Yehova mwene mwe walingile chilakenyo chino. Mukanda wa Usolwelo unambe ngwo: “Yoze te unatwama ha ngunja yamba ngwenyi: ‘Tala! Ngunalingi yuma yeswe yaha.’” Yehova kali ni mana, ndundo ni zango lia kumanununa yize alakenyene. Chamuchiali, kuli Yehova, yuma yize alakenyene yili ngwe yinalingiwa, kashika ambile ngwenyi: “Maliji wano kali a ujikijilo ni a umwenemwene. . . . hamanunuka!” Chamuchitatu, kukushi nichimwe chize muchikwika Yehova kumanununa yize aputukile, kashika ambile ngwenyi: “Yami nguli Alfa ni Omega.” (Uso. 21:6) Kusongo lia yuma yeswe mutukanyingika ngwetu, Satana kali mukwa-mahuza yoze kechi kuhasa kukwika Yehova kumanununa yize akulakenya. Muze mutu yoze unatangila mamba ngwenyi, “Yuma yino kuyichi kuhasa kulingiwa,” tanga ni kulumbununa Usolwelo 21:5, 6, ni kumusolwela ngwo, maliji wano kali ngwe Yehova mwene kasa chijikilo chize chinasolola ngwo, makamanununa yilakenyo yenyi yeswe.—Iza. 65:16. w23.11 7 ¶18-19

Yehova kalingile chilakenyo chino kuli Apalahama muze apwile ni miaka 75 ni muze te kanda achipwa ni ana, Yehova yamulakenya maliji waze ali ha chisoneko cha tangwa lia musono. Shina Apalahama kamwene umanunuko wa uprofeto uno? Kamwene chihanda chimwe. Hanyima lia kuzauka lwiji Ufrateze ni kushimbwila miaka 25, Apalahama yamona kusemuka cha mwanenyi Izake. Chino chapwile chikomokeso! Mba ha kupalika cha miaka 60, iye yamona kusemuka cha ajikulu jenyi aali, Esau ni Yakomba. (Hepre. 6:15) Alioze, Apalahama kakamwene chize munyachi wenyi watohele ni kuhinga chifuchi cha chilakenyo. Chipwe chocho, lunga yono washishika, kapwile ni usepa ukolo ni Yehova. (Tia. 2:23) Muze Apalahama makamuhindwisa, iye makanyingika ngwenyi mavungu eswe a hashi kaawahishile mumu lia ufulielo ni uhumikizo wenyi! (Uputu. 22:18) Yika twalilongesa hano? Twalilongesa ngwetu, hanji kutuchi kuhasa kumona umanunuko wa yilakenyo yeswe ya Yehova musono. Alioze, nyi twalihumikiza ngwe Apalahama, mutuhasa kupwa ni shindakenyo ngwetu, Yehova matuwahisa musono ni mu chifuchi chaha.—Marku 10:29, 30. w23.08 24 ¶14

Muze Mwanangana Uzia apwile mukweze, iye kapwile mukwa-kulikehesa. Kalilongesele ‘kuvwila woma Zambi wamwenemwene.’ Uzia kafwile muze te ali ni miaka 68, mba ha mashimbu anji mu mwono wenyi, Yehova yamuwayisa. (2 Sango 26:1-4) Uzia kakumbile mavungu anji akwa-kole, chocho Yerusaleme yiyipwa ya kufunga kanawa. (2 Sango 26:6-15) Chochene, Uzia kanakawahilila chinji ha yuma yeswe yize ahashile kulinga ni ukwaso wa Yehova. (Chilu. 3:12, 13) Mwanangana Uzia te kakwete chako cha kulweza akwo yize malinga. Shina chino chamutwalile kunyonga ngwenyi, iye mahasa kulinga chuma cheswacho? Tangwa limwe, Uzia yanjila mu tembele ya Yehova; ni kulizata cheswe yafupa kwocha insensu ha chilumbilo, chuma chize te keshi ni ulite wa kuchilinga. (2 Sango 26:16-18) Sasendote wa lutwe Azaria, yeseka kumukwasa, alioze Uzia yevwa uli unji. Chaluyinda, Uzia kakanungine ni kushishika kuli Yehova; chocho yamwaha fumbo ha kumwasa musongo wa mbumba. (2 Sango 26:19-21) Nyi kanungine ni kulikehesa, kachi yuma kuyakapwile chocho ku mwono wenyi! w23.09 10 ¶9-10

Chipwe muze te hapwa mukwa-Kristu wa kuwayisa, nihindu Petulu te kakupinda ni ulelu wenyi. Ha mwaka 36 M.J., Zambi yatuma Petulu kuli Koneliu yoze te hi Ka-Yunda ko; chocho Koneliu yamuwayisa ni spiritu yisandu. Yino yiyisolola pundu ngwo, “Zambi keshi katonde;” nawa akwa-mavungu hanji ngwetu, atu waze te hi A-Yunda ko no te mahasa kunjila mu chikungulwila cha Akwa-Kristu. (Yili. 10:34, 44, 45) Hanyima lia yino, Petulu yaputuka kulia hamwe ni akwa-mavungu; chuma chize te kanda achilinga kama ku mwono wenyi. Alioze, Akwa-Kristu amwe A-Yunda nihindu te machinyonga ngwo, A-Yunda ni akwa-mavungu katambile kulia hamuwika. Muze Akwa-Kristu amwe waze te akunyonga chocho ayile ku Andiakia, Petulu yalitwamina kulia hamwe ni mandumbu akwa-mavungu. Kota kapwile ni kwivwa woma wa kulemeka ku mbunge Akwa-Kristu waze te A-Yunda. Paulu yamona ngwenyi, Petulu te kanasolola ulembekese, chocho yamukwasa hakachi ka atu. (Ngala. 2:13, 14) Chipwe ngwe kalingile upi uno, nihindu Petulu kakechele kusa tachi hanga anunge ni kululieka yitanga yenyi. w23.09 22 ¶8

Muze mulihengwola hanji munyingika ngwe unafupiwa kwalumuna yimwe, chipwe chocho kanda uhonga. “Mwene kali mupema” iye makukwasa kwalumuna yeswayo mufupa. (1 Petu. 2:3) Postolo Petulu kanatwehe shindakenyo yino ngwenyi: ‘Zambi mwene . . . mahwisa kunulongesa, manujamisa, manwaha tachi ni kunukwasa hanga numane nguu.’ Ku uputukilo, Petulu kamwene ngwe te kechi kuhasa kupwa hamwe ni Yesu. (Luka 5:8) Alioze ni ukwasa wa zango wa Yehova ni Yesu, Petulu yanyongonona; yanunga ni kupwa kambaji ka Yesu. Kulinga chino, chakwashile Petulu kunjila mu “Wanangana wa mutolo wa Mwene wetu kanda chilamwina chetu Yesu Kristu.” (2 Petu. 1:11) Chino chapwile kuyuka chinene! Nyi munyongonona ngwe chize alingile Petulu, ni kwecha Yehova hanga akulongese ni yena mukatambula chiwape cha mwono wa mutolo. Nyi wachilinga, muzuka ‘fweto ya ufulielo we, we ulamwino we.’—1 Petu. 1:9. w23.09 31 ¶16-17

Tabernakulu yapwile ni yiize—chimwe chihela chawashi chize asasendote apwile ni kulingila milimo yo. Chilumbilo cha unengu haze te akuhanyina milambu ya kwocha, chapwile mu yiize yacho, hamwe ni lumbashila lwa unengu lwa meya waze asasendote apwile ni kusana shimbu kanda achilinga mulimo wo usandu. (Kutuhu. 30:17-20; 40:6-8) Akwa-Kristu akuwayisa kakuwayila Zambi ni ushishiko weswe hano hashi hanji ngwetu, mu yiize ya muchima mu tembele ya ku spiritu. Lumbashila lwa meya luze luli mu tembele yacho, lwakwiwulula Akwa-Kristu akuwayisa ngwo, chizechene ngwe Akwa-Kristu eswe, no katamba kununga kupwa alinanga ku manyonga ni ku spiritu. Mba kulihi “mbunga yinene” anawayila Yehova? Postolo Yoano, kamwene mbunga yinene “kulutwe lia ngunja.” Kulita ni tembele yize atungile kunyima, chihela chacho chapwile yiize ya haze, haze ayo “akulingila Zambi mwalwa ni ufuku mu tembele yenyi.” (Uso. 7:9, 13-15) Kashika, twakulemesa chinji chiwape chize Yehova hanatwehe, cha kumuwayila mu mutapu walinanga mu tembele yenyi yinene ya ku spiritu! w23.10 28-29 ¶15-16

Jila yimwe yize Yehova akutuhelamo tachi, yili kupalikila muli makulwana a mu chikungulwila. (Iza. 32:1, 2) Kashika, muze unasakalala, lweza makulwana yipikalo ye. Kanda wecha kukaula ukwaso uze ayo makwaha. Yehova mahasa kukutakamisa kupalikila muli makulwana a mu chikungulwila. Kutalatala chetu chize chinakatuka mu Mbimbiliya chakutwama hano hashi hanji mu malilu, chakututakamisa. (Roma 4:3, 18, 19) Chikwo nawa, chakutukwasa tunyongonone mu yipikalo, twambujole sango jipema ni kulinga mulimo weswawo matwaha mu chikungulwila. (1 Tesa. 1:3) Kutalatala chino che chatakamishine postolo Paulu. Iye kapalikile mu “kapinda mweka ni mweka,” ‘kayambashanyine,’ ‘kamuhungumionene’ ni ‘kulivwa ngwe kamulamba’ hashi. Chikwo nawa, ha yisuho yinji iye kambile kufwa. (2 Kori. 4:8-10) Paulu yapwa ni tachi ja kunyongonona mu yipikalo yenyi ha kulihulikila ha kutalatala chetu Paulu kapwile ni tachi jize te anafupiwa mumu kalihulikilile ha kutalatala chenyi. (2 Kori. 4:16-18) Paulu te kakupukuna ha kutalatala chacho, kashika apwile ni kulivwa ngwe, kanapu “mwaha tangwa ha tangwa.” w23.10 15-16 ¶14-17

Muze mulemba, lihule ngwe, ‘Shina wano kali mashimbu alita waze Yehova atamba kungwaha chuma chize ngunamwite?’ Hanji muzanga Yehova akukumbulule lume ha shimbu lizeliene. Alioze kwamba umwenemwene, Yehova kananyingika shimbu lialita lize makukwasa. (Hepre. 4:16) Nyi yilemba yetu kayikumbulwile kawashi, mutuhasa kunyonga ngwetu, Yehova kazangile ‘kuyikumbulula.’ Alioze, kulumbululo lienyi mulihasa kupwa ‘liakushimbwilako ndambu.’ Chakutalilaho, mukweze umwe kalembele hanga Yehova amuuke musongo uze ali nawo. Alioze, musongo wenyi wanungine. Nyi Yehova mamuuka kupalikila mu chikomokeso, Satana mahasa kwamba ngwenyi, ndumbu wacho kananungu ni kuwayila Yehova mumu kamuuka. (Yombi 1:9-11; 2:4) Alioze, yetu tunanyingika ngwetu, Yehova kanatulakenya kuhwisa misongo yeswe kulutwe lia matangwa. (Iza. 33:24; Uso. 21:3, 4) Muze kanda tuchiheta ha mashimbu jacho, kanda tushimbwila uukiso wa chikomokeso. Kashika, ndumbu wacho te mahasa kwita kuli Yehova amwehe tachi ni sambukila ya ku mbunge hanga anunge ni kunyongonona ha musongo uze ali nawo ni kununga kulingila Yehova ni ushishiko. w23.11 23-24 ¶13

Samasone kalingile uhenge unene, chipwe chocho kakalitwaminyine kulingila Yehova. Iye yafupa uhashi hanga alinge yize Yehova azangile, hanji ngwetu ase jita ni A-Filistea. (Kuyu. 16:28-30) Samasone yeta kuli Yehova ngwenyi: Ngweche hanga “ngufwetese ha A-Filistea ha meso jami aali.” Yehova yakumbulula yilemba ya Samasone. Mba ha chisuho chino nawa, kupalikila mu chikomokeso; Yehova yamwaha tachi jinji. Hachino, Samasone yashiha A-Filistea anji kuhiana waze ashihile muze te ali ni mwono. Tunanyingika ngwetu, Samasone katambile kumona lamba mumu lia uhenge uze alingile, chipwe chocho iye kakechele kulinga upale wa Zambi. Yino muyihasa kulingiwa ni kuli yetu. Nyi mutulinga umwe upi, mba matufumba hanji mututokesa chimwe chiteli; kutwatambile kwecha kulingila Yehova. Twiwulukenu ngwetu, Yehova keshi kutwehuka chamwehukila. (Samu 103:8, 9) Chipwe ngwe mutuhengesa, nihindu mutuhasa kupwa ni ulemu kumeso ja Yehova ngwe chize apwile Samasone. w23.09 6 ¶15-16

Nyi mutununga ni kunyongonona, mutupwa ni utayizo wa Yehova. Yino kuyalumbunukine ngwo, nyi tunapalika mu yipikalo hanji mu yihungumiona, acho Yehova kanawahilila, ka. Yehova kakuwahilila wika hali yetu, mumu kunyongonona chetu chakututwala hanga tupwe ni utayizo wenyi. Chino chili chiwape chinene! (Samu 5:12) Tunanyingika ngwetu, Apalahama kanyongonwene chipwe ngwe kapalikile mu yipikalo yeka ni yeka, hachino Yehova yawahilila chinji. Yehova kapwile ni kumona Apalahama ngwe sepa lienyi ni kumwalwila ngwe mukwa-ululi. (Uputu. 15:6; Roma 4:13, 22) Yino muyihasa kulingiwa ni kuli yetu. Utayizo wetu kuli Yehova, kuwatalile ha yuma yize mutulinga mu mulimo wenyi, chipwe ha yiteli yize tukwete. Yehova kakututayiza mumu twakunyongonona mu ufulielo. Kashika, chipwe ngwe tuli ni miaka yeswayo, tuli ni mwono weka ni weka hanji utotombo, yetu eswe mutuhasa kunyongonona. Shina ha mashimbu wano, unanyongonona mu limwe lamba? Nyi chenacho, nyingika ngwe Yehova kanawahilila chinji. Nyi twanyingika ngwetu tuli ni utayizo wa Yehova, kutalatala chize tukwete ha kumanunuka cha yilakenyo yenyi, muchikola chinji. w23.12 11 ¶13-14

Mukwa-Kristu mweswe katamba kulilongesa kuhanjika kanawa ni akwo. Lunga yoze unanyingika kuhanjika, kakupanjika akwo ni kunyingika yize ananyongo ni chize anevu. (Yishi. 20:5) Iye nawa kakuhasa kunyingika liji lia mutu, chize anasoloka ku meso ni yize analingi ku mujimba. Yena kuuchi kuhasa kunyingika yuma yeswayi nyi kuwapalikishile mashimbu hamwe ni atu jacho. Nyi wakuhanjika wika ni atu kupalikila mu mesage, kwasonekena mikanda ni majila akwo nawa, chino muchitepulula uhashi we wa kuhanjika ni atu meso ni meso. Kashika, fupa majila akutwama hamuwika ni akwenu ni kuhanjika no. (2 Yoa. 12) Mukwa-Kristu yoze wajama, katamba kunyingika chize malifunga mwene ni kufunga asoko jenyi. (1 Timo. 5:8) Chili chilemu kulilongesa yuma yize muyikukwasa kuwana mulimo. (Yili. 18:2, 3; 20:34; Efwe. 4:28) Sako tachi hanga atu akunyingike ngwo wakukalakala chinji, nawa wakuhwisa milimo yize wakuputuka. Nyi wachilinga, muchipwa chashi kuwana mulimo ni kuufunga. w23.12 27 ¶12-13

Maliji tangwa lia Yehova mu Mbimbiliya, kanatale ha mashimbu waze Yehova akupatwila akwa-kole jenyi, ni kuneha yiwape hali tuvumbi twenyi. Yino yalingiwile ku mashimbu a kunyima. (Iza. 13:1, 6; Eze. 13:5; Zefa. 1:8) Ha mashimbu jetu, tangwa lia Yehova mulikaputuka muze manguvulu makalukukila Babilonia Yinene; mulikahwa ku songo lia jita ya Armagedone. Mba tukalilamwine ha tangwa liacho, tunafupiwa kulilulieka haliapwila. Yesu kalongesele ngwenyi, twatamba kulilulieka hakutwala ku “luyinda munene.” Maliji wano kanasolola ngwo, twatamba ‘kununga ni kulilulieka.’ (Mateu 24:21; Luka 12:40) Ha mukanda utangu uze asonekenene A-Tesalonika, Paulu kazachishile yilweza yeka ni yeka, ha kukwasa Akwa-Kristu hanga alilulieke hakutwala ku tangwa linene lia Yehova. Paulu kanyingikine ngwenyi, tangwa lia Yehova te kulichi kwiza ha mashimbu jacho. (2 Tesa. 2:1-3) Chipwe chocho, yakwasa mandumbu jenyi hanga alilulieke hakutwala ku tangwa liacho, ngwe lize te hiliakundama. Ni yetu mutuhasa kukaula chiyulo chino. w23.06 8 ¶1-2

Ku kuhwa cha miaka 1970, limwe zuwo lia yipatulo ya kwilu 60, yaputuka kulitunga mu Tóquio, Japão. Atu waze te akumona zuwo liacho ni kulikomoka, kapwile ni kulihula nyi kulichi kulimbuka ku minyiko yize yakulingiwa chinji mu chifuchi chacho. Yika akwa-kutunga alingile mba zuwo liacho lihone kulimbuka ku minyiko? Ayo katungile zuwo liacho hanga likole, aku nawa yalisa uhashi wa kukumba minyiko ya mavu. Akwa-Kristu kali ngwe zuwo lino lisuku. Mu mutapu uka? Mukwa-Kristu katamba kupwa ni yitanga yino yaali, kujikiza ni kupwa mutu mwashi. Katamba kujikiza ni kusa tachi ha kukalila shimbi ja Yehova. Iye ‘kakwononoka ni kawashi,’ nawa keshi kwecha chuma nichimwe hanga chalumune manyonga jenyi. Kapwa mutu mwashi yoze keshi maka akolo. (Tia. 3:17) Mukwa-Kristu yoze ukwete yitanga ya mutapu au, keshi kulikwachilila ha manyonga jenyi, chikwo nawa keshi kwecha atu alinge yuma chamulingila. w23.07 14-15 ¶1-2

Yesu te katamba kwehuka yeseko ya Satana, yoze wazangile hanga iye ahone kwononokena Yehova. (Mateu 4:1-11) Satana kazangile chinji Yesu alinge shili hanga ahone kuhana ukuule uze wamunehene hano hashi. Mu mulimo wenyi wa kwambujola hano hashi, Yesu kapalikile mu yuma yinji yipi. Akwa-kole jenyi kapwile ni kumukaujola ni kufupa kumushiha. (Luka 4:28, 29; 13:31) Chikwo nawa, iye katambile kukumba uhenge wa tumbaji twenyi. (Marku 9:33, 34) Muze te anamusopesa, yamumwesa lamba ni kumuvwisa sonyi, mba hi ku songo yamushiha chipi. (Hepre. 12:1-3) Iye kapalikishile mashimbu jenyi a kasula hano hashi ni ukawenyi chakuhona ukwaso wa Yehova. (Mateu 27:46) Pundu lume, Yesu mba ahane mwono wenyi hali yetu, kamwene lamba linji. Muze twakunyonga ha yuma yeswe yize Yesu atulingilile, chakututwala tumuzange chinji. w24.01 10-11 ¶7-9

Uhumikizo wakutukwasa kupwa ni usepa upema ni akwetu. Wakutukwasa kupanjika kanawa akwetu muze anahanjika. (Tia. 1:19) Uhumikizo wakutukwasa kupwa ni sambukila ni akwetu. Nyi mutulihumikiza chipwe ngwe tunahongo, kutuchi kuhanjika chakuhona kunyonga. Hanji kulinga yuma yize muyilemeka akwetu ku mbunge. Chikwo nawa, kutuchi kulinga yuma ni uli muze umwe matulemeka ku mbunge. Shimbu tufunyise upi ha upi, ‘mutununga ni kulihumikiza umwe ni mukwo, ni kulikonekena umwe ni mukwo ni mbunge yeswe.’ (Kolo. 3:12, 13) Uhumikizo nawa muhasa kutukwasa muze tunafupu kukwata yiyulo. Shimbu tulinge yuma kafuji-fuji, hanji chakuhona kunyonga, tunafupiwa kusa mashimbu hanga tunyonge mu majila anji waze tuli no, mba tuhase kukwata yiyulo yipema. Chakutalilaho, nyi kutwalihumikijile muze tunafupu mulimo, mutuhasa kutayiza weswawo musoloka. Alioze nyi mutulihumikiza, mutuhwima mbunge ha kunyonga chize mulimo wacho muukwata hali asoko jetu ni ha usepa wetu ni Yehova. Nyi twapwa akwa-kulihumikiza, mutuhasa kukwata yiyulo yipema. w23.08 22 ¶8-9

Nyi ngwe unahonga ku mbunge mumu lia uhenge uze wakulinga, kwiwuluka chilakenyo chize walingile kuli Yehova muze walihanyine kuli iye, muchikukwasa kupwa ni tachi ja kukumba cheseko cheswacho muchisoloka ku mwono we. Kuchi chino muchihasa kulingiwa? Muze walihanyine kuli Yehova, walitunyine yena mwene. Maliji wano kanalumbunuka ngwo, yena muopwa ni kulituna kulinga yuma yize muyivwisa Yehova chinyengo. (Mateu 16:24) Kashika muze mupalika mu umwe kapinda, kuuchi kukisa mashimbu ha kunyonga chinji yize mulinga. Yena munyingika lume yize watamba kulinga—kununga ni kushishika kuli Yehova. Mununga ni kusa tachi hanga uvwise Yehova kuwaha. Kulinga chino, muchikupwisa ngwe Yombi, yoze chipwe ngwe kapalikile mu yuma yikalu ku mwono wenyi, yamba ngwenyi: “Ndo kufwa chami chichi kwecha ungunu wami.”—Yombi 27:5. w24.03 9 ¶6-7

Yehova “Zambi ya zango” kali hamwe ni yetu! (2 Kori. 13:11) Iye kakulihulumba hali hita umwe wa kuli yetu. Mutuhasa kupwa ni shindakenyo ngwetu, ‘utu wa zango lienyi unatujingilika.’ (Samu 32:10) Nyi mutupukuna ha chize Yehova akutusolwela zango, mutukundama chinji kuli iye ni kumumona ngwe mutu wamwenemwene ku mwono wetu. Mutuhasa kulemba kuli Yehova ha ola yeswayo ni kumulweza chize tunafupiwa zango lienyi. Chikwo nawa, mutuhasa kulweza Yehova yuma yeswe yize yinatupikala ni shindakenyo ngwetu matwivwa ni kutukwasa. (Samu 145:19) Ngwe chizechene twakuzanga kwota kahia muze kuli chishika, tunazange nawa kukundama ku zango lia Yehova. Chipwe ngwe zango lia Yehova likwete ndundo jinji, nihindu liakutuhwimisa mbunge. Kashika, azulula mbunge ye hanga wivwe zango lia Yehova ku mwono we. Muze mutwivwa zango liacho, yetu eswe mutuhasa kwamba ngwetu: ‘Twazanga Yehova!’—Samu 116:1. w24.01 31 ¶19-20

Yesu kalingile yuma yinji hi wika ko kulweza atu ngwenyi, jina lia Zambi, Yehova. A-Yunda waze Yesu apwile ni kuhanjika no, te kanyingika jina lia Zambi. Alioze Yesu yalihana mwene ‘hanga amusolole.’ (Yoa. 1:17, 18) Chakutalilaho, Yisoneko ya Hepreu yinambe ngwo: ‘Yehova, [kali] Zambi mukwa-keke, mukwa-kukonekena.’ (Kutuhu. 34:5-7) Yesu kasolwele chikuma chino zwalala ha chishima cha mwana chimwangi. Muze twakutanga ha chize chisemi wacho azombokele ni kupatwiza mwanenyi muze amumwene kusuku, ni kumukangayika ni kumukonekena ni mbunge yeswe, chakutukwasa kumona keke ni ukonekeno wa Yehova. (Luka 15:11-32) Yesu kakwashile akwo kunyingika kanawa utu wa Yehova. w24.02 10 ¶8-9

Yehova kakututakamisa ni kuhuzulula tachi jetu, muze tunapalika mu yipikalo. Kuchi mutuhasa kwimbulula Yehova ni kwivwila akwetu keke ni kwakolweza? Chuma muchitukwasa kuchilinga, chili kupwa ni yitanga yimwe mu mbunge yize muyitukwasa hanga tutakamise akwetu.Yitanga yika yenayo? Yika muyitukwasa tangwa ha tangwa, “kununga ni kuzanga akwetu ni kwatakamisa”? (1 Tesa. 4:18) Tunafupiwa kusolola yitanga yimwe ngwe, kulisa mu chihela cha akwetu, kusolola zango lia undumbu ni utu. (Kolo. 3:12; 1 Petu. 3:8) Kuchi yitanga yino muyitukwasa? Nyi mutuvwila mandumbu jetu keke, ni kulihulumba hali ayo mutuzanga chinji kwakolweza muze anapalika mu lamba. Ngwe chizechene Yesu ambile, “kanwa liakuhanjika yize yinalumbama mu mbunge. Mutu mupema, kakutuhwisa yuma yipema ku upite wenyi.” (Mateu 12:34, 35) Kukolweza mandumbu jetu a malunga ni a mapwo waze anapalika mu yipikalo, pundu yili jila yilemu yakusolwelamo ngwo, twakwazanga. w23.11 10 ¶10-11

Nyi tunazange kunyingika kanawa uprofeto wa mu Mbimbiliya, muchilita kufupa umwe hanga atukwase. Tutalenu chikuma chino. Tunyongenu ngwetu, unayi ni kumeneka chimwe chihela; kuze kanda uchiyako kama. Alioze uli hamwe ni sepa yoze unanyingika kanawa chihela chacho. Iye kananyingika nawa haze nuli ni kuze hita tapalo linayi. Chochene, kupwa hamuwika ni sepa wacho muchikukwasa chinji mu wenyi uze unalingi! Chizechene nawa, Yehova mwe sepa yoze twatongola hano. Iye kananyingika kanawa haze tuli ni yuma yize muyilingiwa kulutwe. Kashika, nyi tunazange kunyingika kanawa uprofeto wa mu Mbimbiliya, muchilita kulikehesa ni kwita ukwaso wa Yehova. (Danie. 2:28; 2 Petu. 1:19, 20) Chizechene ngwe yisemi akuzanga hanga ana jo apwe ni mwono upema, ni Yehova neye kanazange hanga ana jenyi apwe ni mwono upema kulutwe lia matangwa. (Jere. 29:11) Alioze kulisa ni atu, Yehova kananyingika yize muyilingiwa kulutwe; nawa yize akwamba yili yamwenemwene. Kashika atumine kusoneka uprofeto mu Mbimbiliya. Uprofeto uno, mutukwasa kulianga kunyingika yuma yize muyilingiwa kulutwe.—Iza. 46:10. w23.08 8-9 ¶3-4