Malongeso a Mukanda Wakuzachisa ha Kukunguluka cha Mwono ni Mulimo Wetu
© 2025 Watch Tower Bible and Tract Society of Pennsylvania
1-7 SETEMBRO
YIKUMA YILEMU YA MU LIJI LIA ZAMBI YISHIMA 29
Litune Mianda Yize Yakulimika ni Mbimbiliya
(Yishima 29:18) Kuze usolwelo wakuhi atu kakulumbuka; alioze kawaha yoze mafunga shimbi.
wp16.6 6, mushete
Usolwelo wa Yitangiwa ya mu Malilu
Chizechene ngwe funge akukasa lenge, atu anji musono kali akukasa ni yuma ya yipupu nawa kakwivwila andemoniu woma. Ayo kakulinga yuma ya munanyi, wanga, mahamba ni tufutafuta hanga alifunge. Kashika yena kuwafupiwile kulinga yuma yacho. Mbimbiliya yakutwaha utakamiso uno ngwo: “Meso ja Yehova kakumona ndusu hashi heswe akalisolole mukwa tachi kukwasa yoze uli ni mbunge yingunu kuli iye.” (2 Sango ja Mianangana 16:9) Zambi wamwenemwene, Yehova yoze ukwete ndundo jinji kuhiana Satana, makufunga nyi mujikijila muli Iye.
Mba Yehova akufunge, yena watamba kunyingika yuma yize yakumuvwisa kuwaha ni kuyikaula ku mwono we. Ngwe chilweza, ku sekulu yitangu, Akwa-Kristu mu mbonge ya Efwesu kakungile mikanda yo yeswe ya tufutafuta, chocho yayocha. (Yilinga 19:19, 20) Chizechene nawa, nyi unazange kupwa ni ukwaso wa Zambi, watamba kumbila mikanda ya munanyi, wanga, mahamba, yuma ya tufutafuta, ni yuma yikwo yize yinatale hali andemoniu.
(Yishima 29:3) Mweswe mazanga mana mawahisa tato; alioze yoze maliendela ni yikoi kanamwange upite wenyi.
Kalila Umwenemwene wa mu Mbimbiliya Hakutwala Kuli Afu
13 Nyi kuushi ni shindakenyo ha chize Yehova akumona mianda yimwe, lemba kuli iye hanga akwehe mana. (Tanga Tiangu 1:5.) Kusulaho, hengwola mu mikanda yetu hanga unyingike chize analumbununa chikuma chacho. Nyi muchilita, hanjika ni makulwana a mu chikungulwila chenu. Ayo kechi kukukwachila chiyulo, alioze mahasa kukukwasa kuwana shimbi ja mu Mbimbiliya jinatale ha chikuma chino. Nyi wachilinga, muhasa kulifumba, chino nawa muchikukwasa kusa “chinyingi hakachi ka chipema ni chipi.”—Hepre. 5:14.
(Yishima 29:25) Kuvwila woma atu muchineha kambwila; alioze mweswe mafuliela Yehova matwama kanawa.
“Mungwenda mu Umwenemwene We”
12 Mianda ni yitanga yize Zambi keshi kuzanga. Asoko, akwa-milimo-ni-akwetu ni alongi-ni-akwetu mahasa kutwita hanga tuye no ku yimwe yiwanyino. Yika muyihasa kutukwasa mba tukumbe nyi akwetu matushinjila hanga tulinge yimwe mianda hanji kupwa ha matangwa akunanga waze Yehova keshi kuzanga? Twatamba kunyingika kanawa mumu liaka Yehova keshi kuzanga matangwa wano akunanga. Mutuhasa kuhengwola mu mikanda yetu hanga tunyingike chize matangwa amwe akunanga aputukile. Muze mutupukuna ha Yisoneko yize yakutukinda kulinga yiwanyino ya matangwa akunanga, mutupwa ni shindakenyo ngwetu tunende mu jila yize ‘yinapemena kuli Mwene.’ (Efwe. 5:10) Nyi mutufuliela muli Yehova ni mu Liji lienyi, kutuchi kwivwa woma ha yize akwetu manyonga.—Yishi. 29:25.
Kuhengwola Yikuma Yilemu ya mu Mbimbiliya
(Yishima 29:5) Yoze mapiepieka mukwo kakulitela wanda wa muheto ha molu jenyi.
w17.10 9 ¶11
“Zango Lietu Liatamba Kupwa Liamwenemwene”
Tuchichimiekenu akwetu ni mbunge yeswe. Tupwenu ni kutala ha yuma yize mutupwa ni kuchichimiekena akwetu. Tunanyingika ngwetu kuchichimieka ‘chakukolesa akwetu.’ (A-Efwesu 4:29) Alioze ndo tupwe ni kuchichimieka akwetu ni mbunge yeswe hi kwapiepieka ko. Kutwatambile kwamba yize te kuyishi ku mbunge yetu, hanji kwivwa woma wa kuhana fumbo. (Yishima 29:5) Mutupwa yilembekese nyi mutuchichimieka akwetu, alioze muze makatukaho mutwamba yuma yipi hakutwala kuli ayo. Postolo Paulu kapwile ni zango liamwenemwene. Muze asonekenene akwa-Kristu mu Korindu, iye yaachichimieka ha yize te akulinga kanawa. (1 A-Korindu 11:2) Alioze muze afupiwile fumbo, yaakwasa ni kwalumbunwina kanawa ni zango.—1 A-Korindu 11:20-22.
(Yishima 29:1-18) Yoze makwata pami ha kumukanjisa kanjikanji, mamwonwona susumuku ni ulamwino wakuhi. 2 Muze akwa ululi moka atu mawahilila, alioze muze chingulungulu mayula atu matwa mikuma. 3 Mweswe mazanga mana mawahisa tato; alioze yoze maliendela ni yikoi kanamwange upite wenyi. 4 Mwanangana kakukolesa chifuchi ni upatwilo; alioze mukwa kufwetesa chindo kakuchilumbula. 5 Yoze mapiepieka mukwo kakulitela wanda wa muheto ha molu jenyi. 6 Mu uvulumunyi wa mutu mupi mwatwama kambwila, alioze mukwa ululi kakwimba ni kuwahilila. 7 Mukwa ululi kakunyingikisa chikuma cha chiswale; alioze chingulungulu keshi malinjekela a kuchinyingika. 8 Akwa kulenya kakumwanga kahia mu limbo; alioze akwa mana kakuchinda ufwatulo. 9 Nyi mukwa mana malitachika ni chihepuke; chipwe matenuka chipwe maseha, hindu kuhwima chakuhi. 10 Akwa kumwanga manyinga kakuvwila kole yoze wapwa mungunu; alioze mukwa ululi kakuzanga kumuwahisa. 11 Chihepuke kakulusula utenu wenyi weswe; alioze mukwa mana maukokolola nikuuholesa. 12 Nyi mukwa kuyula mapanjika ku mahuza, mamona ngwe akwa kumulingila eswe kapwa yingulungulu. 13 Chiswale ni mukwa kupinjisa malitakana; Yehova kakupangulwisa meso ja eswe ni aali. 14 Mwanangana yoze mapatwila yiswale ni ululi, ngunja yenyi muyikakola ya mutolo. 15 Mbwechi ni kukanjisa kuyakuhana mana; alioze nyi muwecha mwana chizechene makolesa sonyi naye. 16 Muze yingulungulu moka uvulumunyi muwoka; alioze akwa ululi mamona kulimbuka cho. 17 Fumba mwane mba makuhwimisa, ewa mawahisa mbunge ye. 18 Kuze usolwelo wakuhi atu kakulumbuka; alioze kawaha yoze mafunga shimbi.
8-14 SETEMBRO
YIKUMA YILEMU YA MU LIJI LIA ZAMBI YISHIMA 30
“Kanda Ungwaha Chipwe Uswale Chipwe Upite”
(Yishima 30:8, 9) ngwami, Twala kusuku ni yami kulifuza ni mahuza; kanda ungwaha chipwe uswale chipwe upite; ungwehe kulia chize chinangute, 9 kuchina hanji mungukuta mba mungulikala yena ngwami, Yehova iya? Hanji kuchina ngupwe chiswale mba ngukeye ni kujilula jina lia Zambi yami.
Zango lia Mutapu Uka Lize Liakuneha Uwahililo Wamwenemwene?
10 Kwamba pundu, tulieswe twakufupa mbongo. Mumu jakutufunga ku yuma yimwe. (Chilu. 7:12) Shina mutuhasa kuwahilila nyi tuli wika ni yuma yize twakufupiwa ku mwono? Ewa. (Tanga Chilumbununyi 5:12.) Agure mwana wa Jake yasoneka ngwenyi: “Kanda ungwaha chipwe uswale chipwe upite.” Chili chashi kunyingika mumu liaka lunga wacho echile hanga ahone kupwa chiswale. Iye te kazangile kupwa mu cheseko cha kwiya, mumu kwiya chakusaula Zambi. Mba mumu liaka echile ahone kupwa pichi? Mwene yasoneka ngwenyi: “Hanji mungukuta mba mungulikala yena ngwami, Yehova iya?” (Yishi. 30:8, 9) Ewa, hanji tunanyingika atu waze akusa chinji mbunge ku upite kuhiana ku yuma ya Zambi.
11 Mutu yoze wakuzanga chinji mbongo keshi kuhasa kuvwisa Zambi kuwaha. Yesu kambile ngwenyi: “Niumwe mahasa kupwa ndungo wa miata aali wakuhi; mumu hanji mahasa kuvwila kole umwe ni kuzanga mukwo, hanji mahasa kulelesa umwe ni kulalaminya mukwo. Yenu kunuchi kuhasa kupwa ndungo ja Zambi ni ja Upite.” Yamba nawa ngwenyi: “Kanda nutulikila upite hano hashi, haze yiswa ni ngengeya mahasa kuupihisa, haze eji mahasa kupupa zuwo ni kuwiya. Alioze tulikilenu upite wenu mwilu, muze yiswa ni ngengeya kechi kuhasa kuupihisa, muze eji kechi kuhasa kupupa ni kuwiya.”—Mateu 6:19, 20, 24.
12 Tuvumbi twa Yehova anji kakusa tachi hanga ashiwise mwono wo. Kulinga chino chakwakwasa kupwa ni mashimbu akulingila Yehova ni kuwahilila. Jack, wa ku Estados Unidos, kalanjishile zuwo lienyi linene ni kwecha mingoso yenyi hanga alinge upionelu ni mukwo-pwo. Iye yalumbununa ngwenyi: “Chapwile chikalu kuhichika zuwo lietu lipema ni chihela chetu chize chapwile mu mbonge.” Alioze ha miaka yinji te kakuhonga ha kufuna ku zuwo mumu lia yipikalo ya ku milimo yenyi. Mba yamba ngwenyi: “Mukwetu-pwo, yoze uli pionelu wa shimbu lieswe, kakuwahilila mashimbu eswe. Kapwile ni kwamba ngwenyi, ‘Mwata wa milimo yami mupema chinji!’ Haliapwila ni yami nguli pionelu, eswe tunalingila Zambi umuwika, Yehova.”
(Yishima 30:15, 16) Zambo kali ni ana aali akwamba ngwo, Hana, hana! Ewa kuyili yuma yitatu kuyishi kuyuka; hanji yiwana kuyishi kwamba ngwo, Kwahwa! 16 Ngwami, muma mwa afu; ni jimo lia mumba; ni mavu aze keshi kuyuka ni meya, ni kahia kaze kukeshi kwamba ngwo, Kwahwa!
Shina “Unanguzange Kuhiana Wano Nyi?”
Atu anji musono kakunyonga ngwo katamba kupwa ni mazalo, telefone, computador ya ndando yinji. Ayo kakwete zango lia kupwa ni upite unji, chino chinalumbunuka kuzanga yikumba ni mbongo kuhiana chuma cheswacho. Amu tuli Akwa-Kristu, yuma yika yikwete ulemu ku mwono wetu? Lihule ngwe: ‘Shina nakupalikisa maola anji ha kunyonga mashinyi aha waze ngunazange kulanda hanji mazalo a ndando yinji chakuhona kululieka kukunguluka? Kutala nakukalakala chinji hita shimbu chakuhona kulemba ni kutanga Mbimbiliya?’ Nyi kutwakeyele, zango lia kupwa ni upite unji mulihasa kupwa ni ulemu ku mwono wetu, kuhiana zango lietu kuli Kristu. Kashika, twatamba kupukuna ha maliji a Yesu akwamba ngwo: “Lifungenu ku kuzo yeswe.” (Luka 12:15) Mumu liaka Yesu ambile chocho?
Yesu kambile ngwenyi: “Niumwe mahasa kupwa ndungo wa miata aali wakuhi.” Yawezela nawa ngwenyi: “Kunuchi kuhasa kupwa ndungo ja Zambi ni ja Upite.” Chili chikalu kulingila Yehova ni mbunge yeswe aku nawa tunalihulikila ku yuma ya musunya. Yesu yalumbununa ngwenyi, ndo ‘mutuvwila kole umwe ni kuzanga mukwo’ chipwe ‘kulalaminya kuli umwe ni kulelesa mukwo.’ (Mateu 6:24) Amu tuli yihenge, twatamba kusa tachi hanga twehuke “usolo wa musunya,” kuchingako zango lia kupwa ni yuma hanji upite unji.—A-Efwesu 2:3.
(Yishima 30:24, 25) Yuma yiwana yikepekepe hano hashi; alioze mana anji yikwete; 25 ngwami, Tungenyengenye o tushitu keshi tachi alioze kakulikungila kulia cho ha mwaka wacho.
w11 1/6 10 ¶4
Chize Muhasa Kuwahilila ni Yize Ulinayo
Funga jimwe mbongo shimbu kanda ulanda yize unazange. Chipwe ngwe amwe kakunyonga ngwe, nyonga lino kulishi kukwata ha mashimbu wano tuli, atu anji kakwamba ngwo kulinga chino chaakwashile kuhona kutambula mikuli chamutambwila ni kuhona kupinda hamukunda wa mbongo. Mbimbiliya yakusolola ngwo kangenyengenye katwama ni mana mumu “kakulikungila kulia ha mwaka wa kucha.”—Yishima 6:6-8; 30:24, 25.
Nunga mu Mbalaka ya Yehova ku Miaka Yeswe!
18 Muchilita yetu eswe kunyonga kanawa ha chize twakumona mbongo. Lihule ngwe: ‘Shina nakunyonga wika ha mbongo ni ha yize munguhasa kulanda nyi napwa ni mbongo jinji? Nyi natambula mbongo ja umwe, shina nakushimbula kumufwetajo ni kunyonga ngwami mwene kechi kujifupa? Shina nakulimona ngwe nguli mulemu chinji kuhiana akwetu mumu lia kupwa ni mbongo jinji? Kutala chakupwa chikalu kulianyina ni akwetu yize nguli nayo? Shina nakunyonga ngwami, mutu nganji kakuzanga yikumba mumu kali ni mbongo? Kutala nakulikata chinji ni atu waze ali ni mbongo ni kulengulula yiswale?’ Yetu eswe tuli ni chiwape cha kupwa mu mbalaka ya Yehova. Alioze, nyi mutuzanga kununga ni kutwamamo, twatamba kusa tachi hanga tuhone kuzanga mbongo. Nyi mutuzanga chinji Yehova kuhiana mbongo, Yehova kechi keza katwehuka nilimwe tangwa.—Tanga A-Hepreu 13:5.
Kuhengwola Yikuma Yilemu ya mu Mbimbiliya
(Yishima 30:26) Sele o tushitu keshi tachi alioze kakusa mazuwo jo mu mawe.
w09 15/4 17 ¶11-13
Nyingika Mana a Yehova ha Kutala Yitangiwa
11 Yetu mutuhasa kulilongesa yuma yinji hali kashitu yoze akuvuluka ngwo, sele hanji seji. (Tanga Yishima 30:26.) Kashitu yono kanji-kanji kakutwama ku yihela kuze kuli mawe anji. Mumu ku yihela yacho iye mahasa kuchina kanawa tushitu akwo waze mahasa kumulia. Kashitu yono kamutangile hanga atwame ni sele ni akwo, mumu chino chakumukwasa kulifunga kanawa ni kuhona kwivwa chishika.
12 Yika mutuhasa kulilongesa hali kashitu yono? Chitangu, twiwulukenu ngwetu, kashitu yono kakulifunga kanawa hanga achine kumulia kuli tushitu akwo. Kakutala-tala kanawa kuze ali ni kutwama hakamwihi ni mena kuze akuchinyina. Ni yetu nawa twatamba kupwa ni meso apema a ku ufulielo hanga tumone kanawa yuma yize muyihasa kupihisa ufulielo wetu. Postolo Petulu kalwezele Akwa-Kristu ngwenyi: “Kanyamenu, laulenu! Mukwa-kole wenu, Ndiapu, kananufupu ngwe ndumba yoze unahuza ni kufupa yoze malia.” (1 Petu. 5:8) Muze apwile hano hashi, Yesu kapwile ni kukanyama chinji hanga achine kuholokela mu muheto wa Satana. (Mateu 4:1-11) Yesu kahichikile chilweza chipema kuli tumbaji twenyi.
13 Jila yimwe yize mutuhasa kulifungilamo ku ufulielo yili: Kulilongesa Liji lia Zambi ni kukunguluka. (Luka 4:4; Hepre. 10:24, 25) Chikwo nawa sele hanji seji kakulifunga ha kupwa hamuwika ni seji-ni-akwo, kashika ni yetu Akwa-Kristu twatamba kupwa hamuwika ni mandumbu jetu hanga tuwahilile ni ‘kulitakamisa umwe ni mukwo.’ (Roma 1:12) Muze twakulifunga ku ufulielo ngwe chize Yehova anazange, twakukaula ku mwono wetu yize mukwa-kwimba masamu ambile ngwenyi: “Yehova iye liwe liami, ni mbonge yami, ni mukwa kungupulula; Zambi yami ni liwe liami lia tachi, muli iye munguswama.”—Samu 18:2.
(Yishima 30:1-14) Maliji a Agure mwana wa Jake: uprofeto. Mwe mutu wambile kuli Itiele, mwe Itiele ni Ukale ngwenyi, 2 Chamwenemwene kunapwa chizuzali kuhiana atu eswe; chishi ni malinjekela a mutu. 3 Chalilongesele mana; chipwe yinyingi ya mwe Musandu chishi nayo. 4 Iya hanazezuka mwilu akahulumuke nawa? Iya hanakungika fuji mu moko jenyi? Iya hanakashila e meya mu mazalo jenyi? Iya hanakolesa masongo eswe a hashi? Jina lienyi iya? Jina lia mwanenyi iya, nyi unamunyingika? 5 Liji lieswe lia Zambi lipema. Iye kapwa lukepwe kuli waze anamufuliela. 6 Kanda uweza ku maliji jenyi kuchina makukanjisa mba makumona uli mukwa mahuza. 7 Yuma yiali hinakwita; ungweheyo shimbu kanda ngufwa; 8 ngwami, Twala kusuku ni yami kulifuza ni mahuza; kanda ungwaha chipwe uswale chipwe upite; ungwehe kulia chize chinangute, 9 kuchina hanji mungukuta mba mungulikala yena ngwami, Yehova iya? Hanji kuchina ngupwe chiswale mba ngukeye ni kujilula jina lia Zambi yami. 10 Kanda ulamikiza ngamba kuli kako, kuchina makutuka mba muopwa ni mulonga. 11 Kuchili chisemuko chakutuka atato; keshi kuwahisa anaye. 12 Kuchili chisemuko chakwamba ngwo, Tunapeme. Hindu kaasanyishine luchisa wo. 13 Kuchili chisemuko — Cho kulizata kumeso! Meso jo a kuhetula chichize! 14 Kuchili chisemuko mazo jo kapwa ngwe tutana; yiwunji yo ngwe poko hanga akawumbule yiswale hashi, akasutule akwa kuhona hakachi ka atu.
15-21 SETEMBRO
YIKUMA YILEMU YA MU LIJI LIA ZAMBI YISHIMA 31
Yize Mutuhasa Kulilongesa ha Yiyulo ya Zango ya Umwe Mama
(Yishima 31:3, 10) Kanda uhana tachi je kuli mapwo; kanda utwala majila je ku chize chakwonwona mianangana. 10 Pwo wamwenemwene iya mahasa kumuwana? Ndando yenyi yahiana chikolo ndando ya rubi.
w11 1/2 19 ¶7-8
Longesa Ana Je
Hanjika umwenemwene hakutwala ku kulisumbakenya. Chili chilemu kukanyamisa ana jetu. (1 A-Korindu 6:18; Tiangu 1:14, 15) Chipwe chocho, Mbimbiliya yakusolola ngwe, kulisumbakenya chili chawana cha Yehova, hi ko miheto ya Satana. (Yishima 5:18, 19; Mwaso wa Solomone 1:2) Nyi yisemi malweza wika ana jo hakutwala ku kapinda yoze wakwiza kuli waze akulinga utanji, ana jo mahasa kunyonga ngwo kulisumbakenya chili chipi. Umwe ndumbu avuluka ngwe Corrina kambile ngwenyi: “Yisemi jami kapwile ni kuhanjika chinji hakutwala ku upi wakulinga utanji, kashika ami te nakumona ngwe kulisumbakenya chili chuma chize mutu niumwe katambile kulinga.”
Sako tachi hanga ulongese ana je sango jeswe hakutwala ku kulisumbakenya. Nadia umwe chisemi wa ku Mexico kambile ngwenyi: “Nakusa tachi hanga ngulongese ana jami ngwami, kulisumbakenya chili chawana chipema chize Yehova hanahane kuli atu hanga alivwise kuwaha. Alioze chawana chino chili cha waze wika alimbata. Kulisumbakenya muchihasa kutwaha uwahililo nyi twachilinga kulita ni chize Zambi anazange hanji kutunehena chinyengo nyi twachilinga mu jila yipi.”
(Yishima 31:4-6) Ena Lemuele kuchapwile chuma cha mianangana kunwa vinyu; kuchapemenene alemu kwamba ngwo, Kunwa chisasu chilihicho? 5 Kuchina manwa mba mavulama shimbi akahengese upatwilo wa umwe mukwa kuyindama. 6 Hana kunwa chisasu kuli waze anambe kufwa; hana vinyu kuli waze anasasaminya mu mbunge.
ijwhf chikuma 4 ¶11-13
Hanjika ni Ana Je Hakutwala ku Walwa
Sako tachi hanga uhanjike ni ana je hakutwala ku walwa. Mark umwe chisemi watwama ku Britania kambile ngwenyi: “Chikuma cha walwa muchihasa kupwa chikalu kuli akweze kukwata chiyulo. Nahulile mwanami yoze uli ni miaka 8 nyi chili chipi kunwa walwa. Amu nahanjikile kanawa nenyi ni kumusolwela zango, nahashile kwivwa kanawa nyonga lienyi.”
Nyi watesa kanawa mashimbu akuhanjika hakutwala ku walwa, muhasa kukwasa chinji ana je. Kulita ni miaka yize ana je alinayo, muhasa kuhanjika nawa hakutwala ku walwa ni chikuma cha kulisumbakenya ni kwalweza yize muyihasa kulingiwako nyi ana je mehuka shimbi ja Yehova ni yize mahasa kuzuka nyi majikaula.
Pwako chilweza chipema. Kulita ni akwa-mana, ana kakwimbulula yize akumona kuli yisemi jo. Kashika, nyi wakunwa walwa hanga ulivwe kanawa, ana je manyonga ngwe walwa wakukwasa atu alivwe kanawa. Kashika, pwako chilweza chipema kuli ana je.
(Yishima 31:8, 9) Pakula kanwa lie ni kuhanjikila waze kahashile kuhanjika; ha chikuma cha waze eswe hasala keshi usoko. 9 Pakula kanwa lie ukapatule ni ululi; ukapatwile yiswale ni akwa kuhona.
g17.6 9 ¶5
Longesa Ana Je Ulemu wa Kupwa Akwa-Kulikehesa
Kwasa ana je apwe yihanyi. Kwasa ana je anyingike ngwe: “Kuhana chakuneha uwahililo unji kuhiana kutambula.” (Yilinga 20:35) Kuchi muhasa kuchilinga? Muhasa kusoneka ha umwe mukanda majina ja atu waze anafupu ukwaso. Muze muya ni kukwasa atu jacho, yako hamuwika ni ana je. Sako tachi hanga ana je amone uwahililo uze unevu ha kukwasa atu. Yino yili jila yipema yize yisemi mahasa kulongeselamo ana jo ulemu wa kupwa akwa-kulikehesa.—Shimbi ya mu Mbimbiliya: Luka 6:38.
Kuhengwola Yikuma Yilemu ya mu Mbimbiliya
(Yishima 31:30) Vumbi kuliakulionga, ni upeme wa kumeso wapwa wamokomoko, alioze pwo yoze wavwila woma Yehova, mamuhalisa.
Nungenu ni Kufunga ‘Mulengi wa Kahia’ ka Yehova
6 Maria kapwile ni usepa upema ni Yehova; ufulielo wenyi kuwakapwile ni kutala hali mukwo-lunga; iye te kanyingika kanawa yisoneko. (Tala nota ha Mbimbiliya ya estudo ha Luka 1:46.) Iye nawa te kakusa mashimbu hanga apukune ha yize analilongesa. (Luka 2:19, 51) Chochene, mumu lia kujama ku ufulielo, Maria kapwile pwo mupema. Musono, mapwo anji kakusa tachi hanga apwe ngwe Maria. Ngwe chilweza, ndumbu wa pwo avuluka ngwo Emiko, yamba ngwenyi: “Muze napwile twamishi te ngukwete katalilo wami wa yuma ya ku ufulielo, alioze muze hangumbata, mukwetu-lunga mwe te wakutulembela ni kusongwela uwayilo wetu wa mu usoko. Hachino, yingumona ngwami te nakushimbwila hanga angulingile yuma yeswe. Mba yingumona ngwami, yami mwene mwe te natamba kufunga usepa wami ni Yehova. Haliapwila, nakusa mashimbu hanga ngukundame kuli Yehova ha kulemba, kutanga Mbimbiliya ni kupukuna ha yize ngunatange.” (Ngala. 6:5) Mapwo, nungenu ni kukolesa usepa wenu ni Yehova. Nyi nwachilinga, malunga jenu mapwa ni uhashi wa kunuchichimieka ni kunuzanga.—Yishi. 31:30.
(Yishima 31:10-31) Pwo wamwenemwene iya mahasa kumuwana? Ndando yenyi yahiana chikolo ndando ya rubi. 10 Mbunge ya mukwo-lunga muyimufuliela, keshi kuhona kufumbuka. 12 Malingila lunga lienyi chipema wika, hi chipi ko, matangwa eswe a mwono wenyi. 13 Kakufupa wona wa mapanga ni linyu; kakusa mbunge yenyi ku kuhondangana ni moko jenyi. 14 Kanapu ngwe mato ja akwa kusepa; kakunehia kulia chenyi kusuku. 15 Kakulimeneka shimbu kuchili ufuku; kakuhana kulia kuli akwa zuwo lienyi; kakutetiela ana-mapwo jenyi milimo yo. 16 Matala munda, mba maulanda. Malima munda wa uva ni tachi ja moko jenyi. 17 Kakulijichika mu zalilo ni tachi; kakutakamisa ni moko jenyi. 18 Kakutala kanawa yikumba yenyi yalumbunuka ha ndando; ndeya yenyi kuyishi kujima ha ufuku. 19 Makwata ku uhoselo; masa moko jenyi ku wanda. 20 Kakuzoza moko jenyi kuli yiswale, ewa, kakuzoza moko jenyi kuli akwa kuhona. 21 Keshi kuvwila woma neve hali akwa zuwo lienyi, mumu akwa zuwo lienyi eswe kakuzala mazalo aali. 22 Kakulilingila tunyime a kuseleka; mazalo jenyi kapwa a linyu ni hina lia ufungo. 23 Lunga lienyi kakumusa chinyingi mu chota muze matwama hakachi ka makulwana a chifuchi. 24 Kakulinga mazalo a linyu nikualanjisa. Kakutwala miya kuli akwa kulanda. 25 Kakulijika ni tachi ni ulemu; kakuseha ha kutwala ku miaka muyizaho. 26 Kakupakula kanwa lienyi ni mana; shimbi ja utu jili ha limi lienyi. 27 Kakutala kanawa ku ndako ja akwa zuwo lienyi; keshi kulia kulia cha uleya. 28 Ana jenyi makatuka nikumuvuluka ngwo, Kawaha! Lunga lienyi kakumuhalisa ngwenyi, 29 Mapwo anji halinga kanawa alioze yena waahiana eswe. 30 Vumbi kuliakulionga, ni upeme wa kumeso wapwa wamokomoko, alioze pwo yoze wavwila woma Yehova, mamuhalisa. 31 Hana kuli iye mihuko ya moko jenyi; yitanga yenyi mwene yikamuhalise mu yikolo ya limbo.
22-28 SETEMBRO
YIKUMA YILEMU YA MU LIJI LIA ZAMBI CHILUMBUNUNYI 1-2
Nungenu ni Kufumba Chisemuko Chize Muchiza
(Chilumbununyi 1:4) Chisemuko chakuya, chisemuko chikwo chakwiza, alioze hashi hakusala chizechene ha miaka.
“Yuma Yino, Yikunjike Kuli Malunga Ashishika”
3 Twakuzanga chinji kulingila Yehova ni kulemesa yiteli yetu. Anji akuli yetu twakuwahilila chinji ni mulimo wetu, kashika twakusa tachi hanga tununge ni kulinga mulimo wacho. Alioze chaluyinda, muze atu akushinakajiwa, ayo keshi kuhasa kulinga yuma yeswe ngwe muze apwile akweze. (Chilu. 1:4) Chino chakuneha yikatalo yinji kuli tuvumbi twa Yehova. Musono, mulimo wakwambujola unayi ni kwoka chinji, chikwo nawa, ululikiso wa Yehova unazachisa tecnologia yaha hanga utwale sango jipema hashi heswe. Alioze ha mashimbu amwe, muchihasa kukaliwa chinji kuli mandumbu waze hashinakajiwa kunyingika mitapu yino yaha ya kulingilamo yuma. (Luka 5:39) Chikwo nawa, atu nyi hashinakajiwa kakuhonga chinji ni kuhona tachi. (Yishi. 20:29) Kashika, chili kusolola zango nawa chipema muze mandumbu waze hashinakajiwa malongesa akweze hanga apwe ni yiteli yinji mu ululikiso wa Yehova.—Tanga Samu 71:18.
4 Kanji-kanji hi chashi ko kuli waze akwete yiteli kuhana yiteli kuli akweze. Amwe kakunyonga ngwo mahasa kutokesa yiteli yize ayo akuzanga nyi mahana yiteli kuli akweze. Chino muchihasa nawa kwanehena yikola ku mbunge mumu lia kwecha milimo yilemu yize akuwahilila nayo chinji. Hanji mahasa kulipikala mumu ngwo nyi ayo kasongwele milimo yacho, milimo kuyishi kwenda kanawa. Chikwo nawa, kota kakumona ngwo ayo keshi ni mashimbu akulongesa akwo. Sali likwo nawa, akweze no katamba kuhwima mbunge chipwe ngwe kasokwaha yiteli yinji.
(Chilumbununyi 2:24) Nyi mutu malia, manwa, mawahisa mbunge yenyi ni upeme wa milimo yenyi, nichimwe chikwo cha kuwaha chakuhi. Chino nawa nachimwene cha ku kwoko lia Zambi.
Kuhengwola Yikuma Yilemu ya mu Mbimbiliya
(Chilumbununyi 2:11) Mba natalile ha milimo yami yeswe yize moko jami halinga, ni ha kuhondangana chami cheswe, kumanyi cheswe chapwile chamokomoko ngwe kuhanga ye fuji. Nichimwe chuma chakufumbuka kuchishiko kushi lia tangwa.
w18.12 18 pp.14
Akweze, Tangi Yenu Kanazange Hanga Nuwahilile
Solomone yoze wapwile pichi nawa lunga wa ndundo kuhiana, yamba ngwenyi: “Tuye tweseke chiseke. Wahilila ni chiseke.” (Chilumbununyi 2:1-10) Kashika Solomone atungile mazuwo angunda, akujingilika ni mitondo ni yitemo yipema hamwe ni yihela ya yiheho, chocho yalinga yeswayo azangile. Shina chino chamunehenene uwahililo? Muze Solomone atalile kunyima ha yuma yeswe yize alingile, yamba ngwenyi: “Kumanyi cheswe chapwile chamokomoko ngwe kuhanga ye fuji.” Yawezela nawa ngwenyi: “Nichimwe chuma chakufumbuka kuchishiko kushi lia tangwa.” (Chilumbununyi 2:11) Shina muhasa kuwana longeso ha yuma yize Solomone apalikile ku mwono?
(Chilumbununyi 1:1-18) E maliji a Chilumbununyi mwana Ndawichi mwanangana mu Yerusaleme. 2 Chamokomoko pundu pundu! Chilumbununyi ngwenyi, Chamokomoko pundu pundu, yeswe yapwa yamokomoko! 3 Mutu yika akufumbula ku milimo yeswe yize akuhondangana nayo mushi lia tangwa? 4 Chisemuko chakuya, chisemuko chikwo chakwiza, alioze hashi hakusala chizechene ha miaka. 5 Tangwa liakuvumbuka, tangwa liakutoka; liakuhilukila kuze liakuvumbuka nawa. 6 Fuji yakutalikisa ku Sule, yakujinga ndo ku Norte; yakulijinga jingie-e, mba hakujinga chayo yakuhiluka. 7 Yitwetwe yeswe kuyakunjila mu kalunga-lwiji hindu kalunga-lwiji kazalile; kuze yitwetwe yakuya kwenako yakuya cheka nawa. 8 Yuma yeswe yapwa ya yikatalo wika; mutu kechi kuhasa kuchilumbununa. liso kulichi kuyuka ha kutala; twitwi kulichikukuta ha kwivwa. 9 Chize chapwile, muchiza kupwa nawa; chize hichalingiwa, meza kuchilinga nawa; chuma chaha kuchishiko kushi lia tangwa. 10 Chimwe chuma chiliko atu mahasa kuchitongola ngwo, Tala chuma chaha? Chapwile kulu ku miakulwila ya kushi. 11 Atu keshi kwiwuluka yuma yize hiyapalika ni yuma yize muyiza kechi kuyiwuluka kuli waze meza kwiza. 12 Ami Chilumbununyi napwile mwanangana wa A-Izalele mu Yerusaleme, 13 mba nasele mbunge yami kufupa ni kupolongoza ni mana yuma yeswe akulinga mushi lia malilu. Chize Zambi hakunjika kuli ana ja atu kuhondangana nacho, kumanyi chapwa chuma cha chinyengo wika. 14 Hinamona milimo yeswe yize akulinga mushi lia tangwa; yeswe yamokomoko. Yapwa ngwe ya kuhanga ye fuji. 15 Chize chahenga kechi kuhasa kuchilulamisa; chize chahona kechi kuhasa kuchalula. 16 Nalishimwinyine ni mbunge ya yami mwene ngwami, Hinalilongesa mana anji kuhiana waze eswe angutetekelele mu Yerusaleme; mbunge yami hiyalijilila ni mana ni yinyingi. 17 Kashika nasele mbunge yami kunyingika mana ni kunyingika uzaluke ni uhepuke nawa. Alioze namwene pundu chino nawa chapwa ngwe kuhanga ye fuji. 18 Mumu mana anji kakufwichisa mutu; ni yoze mokesa yinyingi mokesa yinyengo.
29 SETEMBRO–5 OUTUBRO
YIKUMA YILEMU YA MU LIJI LIA ZAMBI CHILUMBUNUNYI 3-4
Nunga ni Kukolesa Zango Hali Yehova ni Hali Yoze Walimbata Nenyi
(Chilumbununyi 3:1) Chuma cheswe chili ni kangonde kacho, ni chikuma cheswe kushi lia malilu chili ni tangwa liacho.
ijwhf mutwe 10 ¶2-8
Chize Munuhasa Kusa Tecnologia mu Chihela Chayo
● Kuzachisa kanawa tecnologia muchihasa kunukwasa mu usoko. Ngwe chilweza, atu amwe waze alimbata kakuzachisa tecnologia hanga alihanjikise umwe ni mukwo muze keshi hamuwika.
“Kutumina yoze walimbata nenyi mensage ngwo: ‘nakukuzanga chinji’ hanji ‘ngunanyongo hali yena’ muchihasa kumukwata ku mbunge.”—Jonathan.
● Alioze nyi kunwapwile ni nyonga lialita hakutwala ku tecnologia chino muchihasa kupinjisa ulo wenu. Ngwe chilweza, atu amwe kakuzanga kupola-pola chinji ha telefone, kashika keshi kupwa ni mashimbu akuhanjika chinji ni yoze alimbata nenyi.
“Namwene ngwami lunga liami kakuzanga chinji kuhanjika ni yami mashimbu waze chisho kupola ha telefone.”—Julissa.
● Atu amwe kakwamba ngwo mahasa kuhanjika kanawa ni waze alimbata no ha shimbu lizeliene anapola-pola ha telefone. Alioze umwe mukanda wakwamba ngwo “chino chili kulinga yuma yinji ha shimbu limuwika.” Kwamba umwenemwene, chino kuchichi kukwasa lunga ni pwo kulihanjikisa kanawa.
“Muze nakuhanjika ni mukwetu-lunga nakuwahilila chinji, alioze muze iye anahanjika ni yami aku kanasunga-sunga telefone chishi kuwahilila. Mutu yoze wakupola-pola chinji telefone kakusolola ngwe iye kakuwahilila wika ha kupwa ni telefone yenyi mukamwihi.”—Sarah.
Chikuma chilemu: Nyonga lize ulinalio hakutwala ku tecnologia mulihasa kuneha kapinda hanji uwahililo mu usoko we.
(Chilumbununyi 4:9) Shinaho aali, hi umuwika ko mumu kakutambula kwononona chipema ha kuhondangana cho.
Nungenu ni Kufunga ‘Mulengi wa Kahia’ ka Yehova
12 Kuchi waze alimbata mahasa kwimbulula chilweza cha Akwila ni Prisila? Nyongenu ha milimo yinji yize nunazange kulinga. Shina hali milimo yimwe yize yenu munuhasa kukalakala hamuwika? Shina nwakulinga katalilo hanga nuye mu munda mashimbu eswe? Akwila ni Prisila te kakulinga mulimo umuwika wa ku musunya. Muchihasa kupwa ngwe yenu kunushi kulinga mulimo umuwika wa ku musunya. Alioze, shina munuhasa kutesa hanga nulinge milimo yimwe hamuwika, ngwe kukomba mu zuwo hanji kululiekamo? (Chilu. 4:9) Nyi munulikwasa ha umwe mulimo, acho munulivwa ngwe nunakalakala mu chizavu chimuwika ni kupwa ni uhashi wa kushimutwina. Robert ni Linda chize haze alimbachile, hikwapalika miaka kuhiana 50. Robert yamba ngwenyi: “Yetu kutushi ni mashimbu anji a kupwa hamuwika hanga tuhehe. Alioze muze nakukosa malonga, mukwetu-pwo maakusumuna hanji ngunalulieka kashinde, mba iye meza ni kungukwasa, nakuwahilila chinji. Kulinga yuma hamuwika, chakutununga ni kutukwasa kulizanga chinji umwe ni mukwo.”
13 Alioze iwulukenu ngwenu, kupwa hamuwika kanji-kanji kuchalumbunukine ngwo nwakulivwashana. Umwe pwo watwama ku Brazil, yamba ngwenyi: “Musono, kuli yuma yinji yakutulalwisa yize muyihasa kututwala kunyonga ngwe tunapalikisa mashimbu hamuwika mumu twatwama mu zuwo limuwika. Nalilongesa ngwami, kupwa hamuwika ni mukwetu-lunga chili chuma chitangu chize natamba kulinga. Chamuchiali, nakufupa kuhanjika ni mukwetu-lunga hanga ngunyingike yize anazange.” Talenu yize Bruno ni mukwo-pwo Tays akulinga hanga alihanjikise umwe ni mukwo. Bruno yamba ngwenyi: “Muze twakusa mashimbu tupwe hamuwika, twakusa ma telefone ku mbango hanga tuzachise kanawa mashimbu jacho.”
14 Mba yika munulinga nyi kunushi kuzanga kupalikisa mashimbu hamuwika? Hanji mutu ni mutu kakwete yuma yize akuzanga, hanji muze nuli hamuwika nwakulivwila uli. Mba yika nwatamba kulinga nyi yino ye yakulingiwa mu ulo wenu? Nyongenu nawa ha chilweza cha jiko lia kahia. Kahia keshi kwoka ha jiko ha shimbu limuwika; chakufupiwa kusoswelaho mba kahia kacho koke chinji. Kulita ni chilweza chino, muchilita hita tangwa nupwe ni kupalikisa mashimbu akehe hamuwika. Fupenu kulinga yuma yize yenu eswe aali nwakuzanga, ehukenu kulinga yuma yize yakunutwala mba nuzwele. (Tia. 3:18) Nyi nwaputuka kulinga yuma yino, hakehe-hakehe munuhasa kwokesa nawa zango lienu.
(Chilumbununyi 4:12) Mutu wa ukawenyi chashi kumukumba, hindu nyi aali ali hamwe mahasa kulikwasa. Muhipu wa mbanda mutatu kuuchi kupatuka ni kawashi.
Nungenu ni Kufunga ‘Mulengi wa Kahia’ ka Yehova
3 Mba afunge ‘mulengi wa kahia ka Yehova,’ lunga ni pwo katamba kupwa ni usepa upema ni Yehova. Mumu liaka kulinga chino muchaakwasa? Muze lunga ni pwo akulemesa usepa wo ni Yehova, ayo kakukaula yiyulo yenyi, chino chakwakwasa kwehuka yuma yize muyihasa kukeketesa zango lio. (Tanga Chilumbununyi 4:12.) Mutu yoze wajama ku ufulielo, kakusa tachi hanga embulule yitanga ya Yehova ngwe, upeme, uhomboloji ni kukonekena. (Efwe. 4:32–5:1) Nyi lunga ni pwo malisolwela yitanga yino, zango lize lili hakachi ko mulikola. Ndumbu wa pwo avuluka ngwo Lena, yoze halinga miaka mu ulo kuhiana 25, yamba ngwenyi: “Chapwa chashi kuzanga ni kuvumbika mutu yoze wajama ku ufulielo.”
Kuhengwola Yikuma Yilemu ya mu Mbimbiliya
(Chilumbununyi 3:11) Aye hanalingi chuma cheswe chipema ha tangwa liacho; chikwo nawa hanase ye miaka yeswe mu mbunge jo chocho mutu kahashile kusa chinyingi milimo yize Zambi hanalingi chize ku uputukilo ndo ku songo.
Mutuhasa Kutwama ku Miaka Yeswe
Yehova katutangile ni nyonga lia kutwama ku miaka yeswe. Mbimbiliya yinasolola ngwo, Zambi hanase mu mbunge ya atu nyonga liakutwama ku miaka yeswe. (Chilu. 3:11) Kashika twakumona kufwa ngwe mukwa-kole yetu. (1 Kori. 15:26) Ngwe chilweza, nyi twanyingika ngwetu mutu umwe kanayiji, shina twakumwecha chizechene? Ka. Kanji-kanji twakufupa mbuki hanga amuuke. Kwamba umwenemwene, yetu eswe twakulifunga hanga tuchine kufwa. Muze twakufwisa mutu yoze twazanga, chipwe ngwe kali kanuke hanji mukulwana, nihindu twakunenganyana ni kwivwa yikola ku mbunge. (Yoa. 11:32, 33) Kwamba pundu, nyi Yehova kazangile hanga tutwame ha miaka yikehe, kachi kakatutangile ni nyonga lia kutwama ku miaka yeswe. Kuli nawa yikuma yikwo yize yakutwaha shindakenyo ngwetu mutuhasa kutwama ku miaka yeswe. Tutalenu yuma yimwe yize Yehova alingile kunyima ni yize analingi musono yize yinasolola ngwo, nyonga lienyi lia atu kutwama ku miaka ya mutolo kulialumukine.
(Chilumbununyi 4:1-16) Mba yinguhiluka ngumone yuma yeswe ya kupinjisa kakuyilinga kushi lia tangwa. Masoji ja waze anaapinjisa hindu keshi ni akwa kualembejeka. Akwa kupinjisa kali ni tachi hamwe no, hindu kukushi akwa kulembejeka. 2 Kashika nalemesene afu waze hanafu kulu, chalemesene waze achili ni mwono. 3 Ewa nalemesene yoze kanda apwa kuhiana wano eswe ni aali mumu kanda achimona yitanga yipi yize akulinga kushi lia tangwa. 4 Namwene kuhondangana cheswe ni utotombo weswe ni ha chino mutu kakumuvwila ukwa kuli akwo. Chino nawa chapwa chamokomoko ngwe kuhanga ye fuji. 5 Chihepuke masepekenya moko jenyi, malia musunya wenyi mwene. 6 Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima. 7 Henaho yinguhiluka yingumona mushi lia tangwa yeswe yamokomoko. 8 Kwali umwe ukawenyi keshi ni mukwo. Keshi mwana, keshi yayo hindu kuhondangana chenyi cheswe kuchishi kuhwa, ni meso jenyi keshi kuyuka ni upite. Ngwenyi, Iya ngunahondanganyina ni kuhonesa mbunge yami yuma yipema? Chino nawa chamokomoko; kukilikita cha yikatalo. 9 Shinaho aali, hi umuwika ko mumu kakutambula kwononona chipema ha kuhondangana cho. 10 Mumu nyi umwe malimbuka, mukwo mamuzundula. Alioze welo hali yoze mapwa ukawenyi muze malimbuka, keshi ni mukwo yoze mamuzundula. 11 Chikwo nawa nyi aali mapomba hamuwika, mawana chivukuminya; alioze mutu kulihi mawana chivukuminya ukawenyi? 12 Mutu wa ukawenyi chashi kumukumba, hindu nyi aali ali hamwe mahasa kulikwasa. Muhipu wa mbanda mutatu kuuchi kupatuka nikawashi. 13 Mukweze chiswale ni mana shinaho, mwanangana mukulwana kunyima nyi mapwa chihepuke keshi kutaa kumulongesa nawa. 14 Mumu watuhukile mu zuwo lia ususu akapwe mwanangana; chipwe mu wanangana wasemukine chiswale. 15 Namwene akwa mwono eswe waze anende kushi lia tangwa hamuwika ni mukweze wamuchiali yoze te mamana kuma kwenyi. 16 Atu aze maayula anji, kechi kahwa ha kuaalula; hindu waze mamukaula kechi kuwahilila muli iye. Achi cheswe chamokomoko wate, ngwe kuhanga ye fuji.
6-12 OUTUBRO
YIKUMA YILEMU YA MU LIJI LIA ZAMBI CHILUMBUNUNYI 5-6
Kuchi Mutuhasa Kusolola Ngwetu Twakuvumbika Zambi?
(Chilumbununyi 5:1) Enda ni mana muze muoya ku zuwo lia Zambi; mumu kukundama ukevwe acho shinaho; kuhana yitapo ya yihepuke acho kunyima, mumu o kanyingikine chipi chize analingi.
w08 15/8 15-16 ¶17-18
Solola Ngwe Wakulemesa Yehova ha Kumuvumbika
17 Chili chilemu kusolwela Yehova vumbi muze tunamuwayila. Mukanda wa Chilumbununyi 5:1 unambe ngwo: “Enda ni mana muze muoya ku zuwo lia Zambi.” Yehova kalwezele Mose ni Yoshua ngwenyi, muze ayo te manjila muma musandu te katamba kuzula haku. (Kutuhu. 3:5; Yoshu. 5:15) Ayo te katamba kuchilinga hanga asolole vumbi kuli Yehova. Yehova kahanyine nawa shimbi kuli A-Izalele hanga asasendote apwe ni kuzala “mahina a muchima” hanga “afuke uselesele wo.” (Kutuhu. 28:42, 43) Chino te muchaakwasa kuchina kusolola uselesele wo muze te malinga mulimo ku chilumbilo. Eswe waze apwile a mu usoko wa asasendote te katamba kukaula shimbi jeswe ja Yehova.
18 Kulemesa Yehova muze tunamuwayila, chinachingi nawa kumwaha uhenya ni kumuvumbika. Mba tuhane uhenya ni vumbi kuli Zambi, twatamba kumulemesa. Vumbi lize twatamba kusolwela Yehova ndo likatuke ku mbunge yetu. (1 Samue. 16:7; Yishi. 21:2) Nyi tunazange kuhana uhenya kuli Yehova, twatamba kutala kanawa chize twakutwama ni akwetu ni nyonga lize tuli nalio hakutwala kuli yetwene. Yuma yeswe mutwamba hanji kulinga yatamba kusolola ngwe tunazange kuhana uhenya kuli Yehova. Hakutwala ku yitanga yetu ni yuma yize twakulinga ni chize twakuzala, twatamba kukaula maliji a postolo Paulu ambile ngwenyi: “Yetu kutushi kulinga chuma nichimwe chakutalingisa, hanga achine kusaula mulimo wetu; alioze twakulisolola mu majila eka ni eka ngwe tuvumbi twa Zambi.” (2 Kori. 6:3, 4) Yetu twakupemesa “longeso lia Zambi” mu yuma yeswe yize twakulinga.—Titu 2:10.
(Chilumbununyi 5:2) Kanda ulipupula kuhanjika. Mbunge ye kanda yilipupula kwamba nichimwe kumeso ja Zambi. Mumu Zambi aye mwilu ali, ni yena uli hashi, kashika maliji je kanda apwa anji.
w09 15/11 11 ¶21
Kulilongesa Mbimbiliya Chakutukwasa Kulemba Kanawa
21 Yesu kapwile ni kulemba ni vumbi ni ufulielo weswe. Ngwe chilweza, muze te anazange kuhindwisa Lazaru iye “yatala mwilu, yamba ngwenyi: “Tata, ngunakusakwilila mumu wakungwivwa. Kwamba pundu, ngunanyingika ngwami wakungwivwa mashimbu eswe.” (Yoa. 11:41, 42) Shina yilemba ye yakusolola vumbi ni ufulielo? Nyi walilongesa hakutwala ku chize Yesu apwile ni kulemba, mumona ngwe iye kapwile ni kulemesa chinji yikuma ngwe, jina lia Yehova lipwe lisandu, Wanangana wenyi wize ni kumanunuka cha upale wa Yehova. (Mateu 6:9, 10) Haliapwila nyonga hakutwala ku yilemba ye. Shina mutapu uze twakulemba wakusolola ngwe twakulemesa Wanangana wa Yehova, tunazange hanga upale wenyi ulingiwe hashi, nawa ngwe jina lienyi lipwe lisandu? Nyi ka, twatamba kwalumuna yimwe.
(Chilumbununyi 5:4-6) Nyi mulilakenya chilakenyo kuli Zambi, kanda ukokoloka ha kuchifweta mumu keshi kuwahilila ni yihepuke. Fweta chize hiwalakenya. 5 Kulakenya ni kufweta ka, acho chipi; shinaho kanda ulakenya nichimwe. 6 Kanda utayiza kanwa lie kukuvulumwisa. Kanda uamba kumeso ja mungelo ngwe, Napiasukile. Ha chikuma chika Zambi matenukina ni maliji je ni kwonwona milimo ya moko je.
Shina Hiwalilulieka Hanga Uhane Mwono We Kuli Yehova?
5 Kuchi muhasa kulihana kuli Yehova? Muhasa kuchilinga ha kulemba kuli iye. Mu kulemba chacho, yena mulakenya kuwayila wika iye; chikwo nawa kulinga upale wenyi muchipwa chuma chilemu ku mwono we. Kwamba umwenemwene, mulakenya Yehova ngwe, mumuzanga “ni mbunge ye yeswe, ni mwono we weswe, ni kunyonga che cheswe ni tachi je jeswe.” (Marku 12:30) Kulemba chacho muchilinga ku tenga ha kuhanjika wika ni Yehova. Chikwo nawa, makupapachishila ha mbunga hanga usolole kuli atu akwo ngwe, hiwalihana kuli Yehova. Kulihana che kuli Yehova chili chilakenyo chilemu. Kashika, muchilita kusa tachi hanga uchimanunune ha kulinga yize iye mashimbwila hali yena.—Chilu. 5:4, 5.
Kuhengwola Yikuma Yilemu ya mu Mbimbiliya
(Chilumbununyi 5:8) Nyi mumona kupinjisa yiswale, ni mu chifuchi chimwe kanalingi upupilo wa kuhonesa upatwilo ni ululi, kanda chikushima. Mumu mukwa kuyula kali ni yoze wamuyula iye. Mba o eswe kali ni umwe helu lio.
Yihula ya Waze Akutanga Mikanda Yetu
Mukanda wa Chilumbununyi 5:8, unahanjika hakutwala kuli umwe mukwa-kuyula yoze wakumwesa yiswale lamba ni kuhona kwapatwila ni ululi. Mukwa-kuyula katamba kwiwuluka ngwenyi, kakumumona kuli yoze wakuyula helu lienyi, hanji yoze ukwete chiyulo chinene kuhiana chize iye akwete. Kwamba pundu, mukuhasa kupwa waze akwete yiyulo yinene kuhiana. Chipwe chocho, manguvulu eswe a hashi mahasa kupwa akwa-kalimbalimba ni kuhona ululi, chino chakumwesa atu lamba linji.
Alioze, chipwe muze mutumona ngwe yuma yacho kuyishi musulo, mutuhasa kuwana utakamiso ha kunyingika ngwetu, Yehova kakumona akwa-kuyula eswe a hashi chipwe yoze munene kuhiana. Mutuhasa kulemba kuli Zambi ni kumwita ukwaso. (Samu 55:22; Fwili. 4:6, 7) Tunanyingika ngwetu, Mbimbiliya yinambe ngwo “meso ja Yehova kakumona ndusu hashi heswe akalisolole mukwa tachi kukwasa yoze uli ni mbunge yingunu kuli iye.”—2 Sango 16:9.
Chikwo nawa, mukanda wa Chilumbununyi 5:8, wakutukwasa kupwa ni nyonga lialita ngwo, hano hashi hali manguvulu waze akwete chiyulo chinene kuhiana. Alioze chahiana ulemu, versu yino yinatukwase kwiwuluka ngwetu, Yehova kali helu lia akwa-kuyula eswe, iye mwe Chitunda wahiana eswe. Musono, Iye kanayulu kupalikila muli Mwanenyi Yesu Kristu, Mwanangana mu Wanangana wenyi. Yehova kali Mukwa-Ndundo-Jeswe yoze wakumona yuma yeswe kali nawa mukwa-ululi, ngwe chize apwa Mwanenyi.
(Chilumbununyi 5:1-17) Enda ni mana muze muoya ku zuwo lia Zambi; mumu kukundama ukevwe acho shinaho; kuhana yitapo ya yihepuke acho kunyima, mumu o kanyingikine chipi chize analingi. 2 Kanda ulipupula kuhanjika. Mbunge ye kanda yilipupula kwamba nichimwe kumeso ja Zambi. Mumu Zambi aye mwilu ali, ni yena uli hashi, kashika maliji je kanda apwa anji. 3 Mumu kukilikita chinji chakoka chilota, ni chikuma cha chihepuke chakwiza ni maliji anji. 4 Nyi mulilakenya chilakenyo kuli Zambi, kanda ukokoloka ha kuchifweta mumu keshi kuwahilila ni yihepuke. Fweta chize hiwalakenya. 5 Kulakenya ni kufweta ka, acho chipi; shinaho kanda ulakenya nichimwe. 6 Kanda utayiza kanwa lie kukuvulumwisa. Kanda uamba kumeso ja mungelo ngwe, Napiasukile. Ha chikuma chika Zambi matenukina ni maliji je ni kwonwona milimo ya moko je. 7 Chino cheswe chineza mumu ha kwokesa yilota, ni yuma yamokomoko, ni maliji anji. Ena vwila woma Zambi. 8 Nyi mumona kupinjisa yiswale, ni mu chifuchi chimwe kanalingi upupilo wa kuhonesa upatwilo ni ululi, kanda chikushima. Mumu mukwa kuyula kali ni yoze wamuyula iye. Mba o eswe kali ni umwe helu lio. 9 Chikwo nawa kufumbuka cha mavu cha mbala cha eswe; chipwe mwanangana kakufuliela minda. 10 Yoze unase mbunge ku mbongo kechi kuyuka ni mbongo; yoze unase mbunge ku kwoka cha upite kechi kuyuka ni kulumbama cha upite. Chino nawa chapwa chamokomoko. 11 Muze upite hiwoka, ni akwa kuulia moka nawa. Kuwaha chika muchipwa kuli mwenyawo shina kuumona wika ni meso jenyi? 12 Tulo twa mukwa kuhondangana kuwaha-o chipwe malia yikepe chipwe yinji, alioze pichi kahashile kuya tulo mumu ha kukuta. 13 Chuma chipi chikolo namona kushi lia tangwa ngwami, Yoze mokesa upite wakumulumbula. 14 Upite uno muujimuka hamwe homa ha kufulwa. Nyi hasema mwana upite wakuhi wa kusa mu kwoko lienyi. 15 Chize atuhukile mu jimo lia naye uselesele chocho nawa maya; kechi kumbata nichimwe cha ku milimo yenyi, chize mambata mu kwoko lienyi. 16 Chino nawa chipi chikolo; mu yuma yeswe maya chizechene ejile mba kufumbuka chika ali nacho ha kuhondanganyina ye fuji yamokomoko? 17 Matangwa jenyi eswe kanali mu milima nawa ni kulifwita ni kuyiza ni ufwatulo.
13-19 OUTUBRO
YIKUMA YILEMU YA MU LIJI LIA ZAMBI CHILUMBUNUNYI 7-8
‘Yako ku Zuwo lia Masoji’
(Chilumbununyi 7:2) Hapwa kuya ku zuwo lia masoji, hi zuwo lia muzumbu ko. Mumu kufwa, songo lia atu eswe, ni akwa mwono machisa ku mbunge.
it “Kulila”¶7
“Kulila”
Tangwa lia Kulila. Mukanda wa Chilumbununyi 3:1, 4 wakwamba ngwo, kwatwama “tangwa lia kulila, ni tangwa lia kuseha; tangwa lia kulinyenga, ni tangwa lia kuhangana.” Mbimbiliya yakwamba ngwo, mukwa-mana kakuya “ku zuwo lia masoji” shimbu aye ku zuwo kuze kuli yiwanyino ya kulivwisa kuwaha. (Chi 7:2, 4; tesa ni Yis 14:13.) Ha mashimbu jacho a lamba, mutu yoze ukwete mana, kakufupa uhashi wa kukwasa ni kutakamisa yoze wafwisa shimbu aye kuze analinga yiwanyino ya kulivwisa kuwaha. Kulinga chino, muchimukwasa kupwa ni nyonga lialita hakutwala ku kufwa ni hali Sakatanga wenyi.
(Chilumbununyi 7:1) Jina lipema liahiana yitumbo ya maji ya ndando yilemu. Tangwa lia kufwa liahiana tangwa lia kusemuka.
Kwasa Akwenu Hanga Akumbe Yipikalo Yo
15 William, yoze hanafwisa mukwo-pwo, yamba ngwenyi: “Nakwivwa kuwaha muze akwetu akuhanjika hakutwala ku yitanga yipema ya mukwetu-pwo; mumu chino chakungwaha shindakenyo ngwami, kuma ayo te kakumuzanga ni kumuvumbika. Ukwaso uno wapwa chinji ulemu kuli yami. Maliji jo kakungutakamisa chinji, mumu mukwetu-pwo kapwile ni ulemu unji kuli yami, nawa te hanapu chihanda cha mwono wami.” Bianca umwe tuliwa yamba ngwenyi: “Nakuwana utakamiso muze akwetu akulemba hamwe ni yami ni kulianyina yimwe yisoneko. Nakuwana nawa ukwaso muze ayo akuhanjika hali mukwetu-lunga ni kungupanjika muze nakuhanjika hakutwala kuli iye.”
w17.07 16 ¶16
“Lilenu Hamwe ni Waze Analila”
16 Kulemba chetu muchihasa kukwasa mandumbu waze ananenganyana. Mutuhasa kwavuluka mu yilemba yetu hanji kulemba hamwe no. Chipwe chocho, muchihasa kupwa chikalu kulinga chino mumu muchihasa kukulilisa. Alioze kulemba che cha ku mbunge muchihasa kutakamisa chinji yoze wafwisa. Dalene yamba ngwenyi: “Ha mashimbu amwe muze mandumbu a mapwo akwiza ni kungutakamisa, nakwita kuli ayo nyi muchilita hanga alembe hamuwika ni yami. Ayo muze akuputuka kulemba, ku uputukilo chakupwa ngwe maliji kanaatoko ha kuhanjika, alioze muze akununga ni kulemba, kakupwa ni tachi ja kulemba ni mbunge yeswe. Ufulielo wo ukolo, zango lio ni chize akulihulumba hali yami chakukolesa ufulielo wami.”
w17.07 16 ¶17-19
“Lilenu Hamwe ni Waze Analila”
17 Chinyengo chize mutu ni mutu akwivwa muze akufwisa chalisa. Muze mutu akufwisa yoze azanga, anji akuli masepa ni asoko jenyi kakuya hanga amutakamise. Hakupalika cha mashimbu, ayo kakuhiluka ku mazuwo jo, chipwe chocho mutu yoze wafwisa kakununga kufupa utakamiso. Kashika, twatamba kupwaho hanga tumukwase. Mbimbiliya yinambe ngwo: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.” (Yishi. 17:17) Tunafupiwa kutakamisa waze ananenganyana ndo haze malivwila kanawa.—Tanga 1 A-Tesalonika 3:7.
18 Twiwulukenu ngwetu mutu yoze wafwisa mahasa kunenganyana susumuku ha shimbu lieswalio, mumu lia yikola yize anevu ku mbunge. Chino muchihasa kulingiwa ha mashimbu waze iye akwiwuluka yuma yize ayo apwile ni kulinga hamuwika ngwe kwivwa yimwe miaso, kukwata foto, kulinga yimwe milimo hanji kwivwa vumba lia chimwe chuma chize muchimwiwulwisa mutu yoze wafwa, umwe ngimba, hanji muze maheta ha umwe kangonde wa mwaka. Muze tuliwa hanji lunga yoze wafwisa mukwo-pwo maputuka kulinga yuma yimwe ukawenyi yize apwile ni kulinga ni mutu yoze wafwa ngwe kuya ku kukunguluka cha mambonge hanji ha Chiwanyino cha Kwiwuluka Kufwa cha Yesu, iye mahasa kunenganyana chinji. Umwe ndumbu yamba ngwenyi: “Nanyongene ngwami tangwa litangu lia kwiwuluka umbachiso wetu mulikakala chinji, yino ye yalingiwile lume. Alioze amwe mandumbu yalulieka chimwe chiwanyino hamwe ni masepa jami hanga nguhone kulivwa ukawami.”
19 Iwuluka ngwe atu waze ananenganyana kanafupiwa utakamiso hi wika ko muze mutwasanyika ha yiwanyino. Junia yamba ngwenyi: “Kanji-kanji ukwaso twakutambula ni usepa uze twakuzuka muze kutushi ha yiwanyino muuhasa kutukwasa chinji. Mashimbu jacho kakutakamisa chinji.” Chochene, kutuchi kuhasa kuhwisa yinyengo yo yeswe, alioze mutuhasa kutakamisa waze ananenganyana ha kwalingila yimwe yuma. (1 Yoano 3:18) Gaby yamba ngwenyi: “Nakusakwilila chinji Yehova mumu lia makulwana a mu chikungulwila a zango waze angukwashile kukumba yipikalo yami. Ayo kangukwashile kumona zango lia Yehova ku mwono wami.”
Kuhengwola Yikuma Yilemu ya mu Mbimbiliya
(Chilumbununyi 7:20-22) Pundu kuheshi mutu niumwe hano hashi yoze wakulinga chipema ni kuvulumuna ka. 21 Chikwo nawa, kanda upanjika maliji eswe akwamba kuchina muwivwa ngamba ye kanakutuku, 22 mumu kanji chipwe mbunge ya yena mwene yinanyingika yena mwene nawa hiwatuka akwenu.
‘Ku Chino Eswe Makanyingika Ngwo Yenu Nuli Tumbaji Twami’
18 Ha mashimbu amwe, muchilita kuhanjika ni ndumbu yoze watulinga chuma chipi hanga tuhwise kapinda wacho mukachi ketu. Alioze chitangu, twatamba kulihula ngwetu: ‘Shina ngunanyingika lume yuma yeswe yize yalingiwangako?’ (Yishi. 18:13) Shina iye kalinga yuma yacho ku tachi? (Chilu. 7:20) Kutala yami hingunahengesa ngwe chize iye ahengesa? (Chilu. 7:21, 22) Nyi munguya ni kuhanjika nenyi, shina kapinda yoze ngunazange kuhwisa moka chinji? (Tanga Yishima 26:20.) Nyi mutusa mashimbu hanga tupukune ha yihula yino, mutumona ngwetu chuma chilemu chili kusolola zango ni kuvulama yize ndumbwetu atulinga.
(Chilumbununyi 8:1-13) Iya malifwa ni mukwa mana? Iya manyingika ulumbunwiso wa chikuma? Mana ja mutu kakutemwisa meso jenyi, ni kukala cha meso jenyi kuchakwalumuka. 2 Ngunakulongesa; funga shimbi ya mwanangana, mumu ha mukunda wa shingo lia Zambi. 3 Kanda utuhuka kumeso jenyi fuji; kanda unyongonona mu chuma chipi mumu kakulinga cheswacho chamuwahila. 4 Mumu liji lia mwanangana tachi likwete. Iya mamuhula ngwenyi, Yika unalingi? 5 Mweswe mafunga shimbi kechi kumona chipi, mba mbunge ya mukwa mana kuyakunyingika ngwe chatamba kulinga ni ye ola ya kulinga. 6 Mumu chuma cheswe mapala chili ni ola ni chili ni chize chatamba kuchilinga chipwe lamba lia mutu liakumushata chikolo, 7 mumu kanyingikine chize muchiza kupwa mba iya mahasa kumulweza ndako yacho? 8 Niumwe mutu uli ni tachi ja kuyula mwiku wa mwono. Niumwe uli ni tachi ja kuyula tangwa lia kufwa, mba mu jita yize niumwe matukotola; chipwe mukwa kulinga ungulungulu kechi kuhasa kulipulula ni ungulungulu wenyi. 9 Yuma yino yeswe hinamona; hinasa mbunge yami kunyingika yitanga yeswe yize akulinga kushi lia tangwa. Mwaka kuuli muze umwe mutu mapwa ni chiyulo helu lia mukwo ni kumupinjisa. 10 Chikwo nawa namwene chize mafunda kanawa yingulungulu waze apwile nikuya ku zuwo lisandu; alioze akwa kulinga yipema, yaavulama; chino nawa cheswe chamokomoko. 11 Mumu kafwetesele nikawashi upatwilo wa chitanga chipi, kashika mbunge ja ana ja atu hanajise liakulu muchima lio kulinga chipi. 12 Chipwe chivulumunyi malinga chipi kulakaji lia yisuho ni kusuhisa matangwa jenyi, hindu ngunanyingika pundu waze mavwila woma Zambi kumakawaha, ngwami waze akwivwa woma kumeso jenyi. 13 Alioze chingulungulu kechi kawaha; aye kechi kusuhisa matangwa jenyi; kumapwa ngwe chizulie mumu kevwile woma kumeso ja Zambi.
20-26 OUTUBRO
YIKUMA YILEMU YA MU LIJI LIA ZAMBI CHILUMBUNUNYI 9-10
Pwako ni Nyonga Lialita Hakutwala ku Yipikalo Yize Wakupalika
(Chilumbununyi 9:11) Chikwo nawa, namwene kushi lia tangwa, mukwa tambu keshi kukumba mu yizombwoka; mukwa tachi keshi kukumba mu jita; mukwa mana keshi kuzuka kulia; mukwa yinyingi keshi kuzuka upite; mukwa utotombo keshi kumulemesa, alioze chakuawana nikulita ni tangwa liacho; chakupwa chipwila.
w13 15/8 14 ¶20-21
Kanda Ulimika ni Yehova
20 Pwako ni nyonga lialita. Mumu liaka chili chilemu kupwa ni nyonga lialita? Nyi tuli ni nyonga lialita, mutunyingika ngwetu yuma yipi yimwe yize twakupalika yakulingiwa mumu lia yiyulo yipi yize twakukwata. (Ngala. 6:7) Kutwatambile kulamikiza Yehova ha yipikalo yize twakupalika. Mumu liaka tunambe chocho? Nyonga ha chilweza chino: Umwe mutu maputuka kwendesa mashinyi ni kushota chinji mba malimbuka ni mashinyi jacho, shina mutuhasa kwamba ngwetu yoze walingile mashinyi jacho mwe wakokela mukwa-kwendesa mashinyi lamba? Ka! Chizechene nawa, Yehova katutangile ni ulite wakukwata yiyulo. Kakutwaha nawa usongwelo uze wakutukwasa kukwata yiyulo yipema tangwa ha tangwa. Kashika, shina muchilita lume kulamikiza Sakatanga wetu ha yiyulo yize twakukwata?
21 Kwamba umwemwene, hi yipikalo yeswe ko yize twakupalika yakulingiwa hamukunda wa yiyulo yetu yipi. Yipikalo yimwe yakulingiwa mumu: “Luyinda kakwiza kuli mutu mweswe susumuku.” (Chilu. 9:11, Chokwe Bible) Chahiana ulemu, kanda tukeza kavulama ngwetu, Satana Ndiapu mwe chishina cha yuma yeswe yipi. (1 Yoa. 5:19; Uso. 12:9) Iye mwe mukwa-kole wetu hi Yehova ko!—1 Petu. 5:8.
(Chilumbununyi 10:7) Hinamona tupinji mendela hali tuvwalu shimbu mianangana menda hashi ngwe tupinji.
Yehova Kakulemesa Tuvumbi Twenyi Waze Akulikehesa
10 Kulikehesa chakutukwasa kukumba yipikalo ku mwono wetu. Ha mashimbu amwe, mutuhasa kumona yuma yize tunanyongo ngwetu kuyalitele. Mwanangana Solomone yamba ngwenyi: ‘Hinamona tupinji mendela ha tuvwalu shimbu mianangana menda hashi ngwe tupinji.’ (Chilu. 10:7) Atu waze akwete utotombo unji nihindu keshi kutambula ulemu uze atela. Alioze ha mashimbu amwe, atu waze akwete utotombo ukehe e akulemesa chinji. Chipwe chocho, Solomone yamba ngwenyi, twatamba kutayiza mwono chize uli, kutwatambile kwivwa kupihia mumu lia yuma yipi yize yinalingiwa ku mwono wetu. (Chilu. 6:9) Nyi mutupwa akwa-kulikehesa, acho mututayiza yize yinalingiwa ku mwono wetu, hi yize ko twakunyonga.
(Chilumbununyi 9:7, 10) Yako ukalie mbolo ye ni uwahililo; nwako vinyu ye ni mbunge ya chiseke, mumu Zambi hanatayiza kulu chize unalingi. 10 Cheswacho moko je mawana kulinga, hilinga ni ngolo je jeswe, muma mwa afu kuze unayi kukushi milimo, hanji manyonga, hanji chinyingi, hanji mana.
w11 15/10 8 ¶1-2
Shina Yiheho Ye Yakukuyukisa?
MU MBIMBILIYA mwatwama sango jize jakusolola ngwe Zambi kazangile hanga tutwame chizechene wika, iye kanazange hanga tuwahilile. Ngwe chilweza, mukanda wa Samu 104:14, 15 wakwamba ngwo Yehova ‘kakuchiza kulia ku mavu, ni vinyu yize ya kuwahisa mbunge ya atu, ni maji a kulejimisa meso jenyi, ni kulia cha kutakamisa mbunge yenyi.’ Kwamba umwenemwene, Yehova kakusokesa mwambu, mitondo ya olevwe ni mitondo ya uva hanga yitukwase. Chikwo nawa, vinyu ‘kuyakuwahisa mbunge.’ Iye keshi kutwaha wika yuma hanga tutwame ni mwono, kakutwaha yuma yinji yikwo hanga tuwahilile. (Chilu. 9:7; 10:19) Ewa, Yehova kanazange hanga ‘mbunge jetu jiwahilile.’—Yili. 14:16, 17.
2 Kashika, kutwatambile kunyonga ngwo chili chipi kusa amwe mashimbu hanga ‘tutale kanawa tujila a mwilu’ ni ‘yitemo ya mu yambu’ hanji kulinga yuma yikwo hanga tulivwise kuwaha ni kuwahilila ku mwono. (Mateu 6:26, 28; Samu 8:3, 4) Uwahililo uli ‘chawana cha kuli Zambi.’ (Chilu. 3:12, 13) Nyi twamona mashimbu a kuheha hanji kuhwima ngwe chawana cha Zambi, muchitukwasa kuheha hanji kuhwima mu jila yize muyivwisa kuwaha yoze watuhele chawana chacho.
Kuhengwola Yikuma Yilemu ya mu Mbimbiliya
(Chilumbununyi 9:5) Mumu amwono kananyingika ngwo, Mutukafwa, alioze afu kanyingikine nichimwe. Keshi nawa ni kwononona; keshi kwewuluka.
Yika Yakulingiwa Kuli Mutu Nyi Hafwa?
Yesu katesele kufwa ni tulo. Nyi mutu kali mu tulo keshi kunyingika yuma yize yinalingiwa haze. Kuchi kufwa chalifwa ni tulo? Mutu nyi hafwa, keshi kwivwa yikola, keshi kulivwa ukawenyi, chipwe ngwe te kakuzanga chinji masepa ni asoko jenyi. Mbimbiliya yinambe ngwo: “Afu kanyingikine nichimwe.”—Tanga Chilumbununyi 9:5.
(Chilumbununyi 10:1-20) Jiji a ufwe kakunukisa ni vumba lipi yitumbo ya lupembo mupema; chocho uhepuke ukepe kuwakukumba mana ni ulemu. 2 Mbunge ya mukwa mana yakumukokela ku chindume, alioze mbunge ya chihepuke yakumukokela ku chimeso. 3 Chipwe ha kwenda mu jila, chihepuke kanahono mana; kakulweza eswe ngwenyi, Nguli chihepuke. 4 Chipwe utenu wa mukwa kuyula muukukasumukina, kanda ukatuka ha chitwamo che; mumu ulemeso kuwakukukila milonga yinene. 5 Kuchili chuma chipi chize hinamona kushi lia tangwa. Chapwa ngwe chinakatuka kuli mukwa kuyula: 6 kanji uhepuke wakutwama mu yitwamo ya ulemu shimbu pichi matwama mushi. 7 Hinamona tupinji mendela hali tuvwalu shimbu mianangana menda hashi ngwe tupinji. 8 Mukwa kufula wumbu hanji mwene malimbukilamo; hanji kapela masuma mukwa kulokola zuwo. 9 Mukwa kupula mawe malemewa no; mukwa kupula mungowa mawanako utoji. 10 Nyi njimbu kuyambukile ni kazangile kuyihela chatamba kuweza tachi alioze mana makwasa mutu kukumba. 11 Chamokomoko kuhombwesa kapela nyi halianga kusumana shimbu kanda. 12 Maliji a mu kanwa lia mukwa mana kakumukokela vumbi, alioze mivumbo ya chihepuke kuyakumwonwona. 13 Uputukilo wa maliji a mu kanwa lienyi uhepuke; songo lia pande jenyi uzaluke wa ungulungulu. 14 Chihepuke kakwokesa maliji alioze niumwe kanyingikine yize yineza. Mba iya manyingika yize muyimukaula? 15 Kuhondangana cha chihepuke chakumuhongesa, chocho kanyingikine jila ya kuya ku chihunda. 16 Lamba mulipwa mu chifuchi muze mwanangana wacho mapwa kanuke, ni muze alemu jacho akulinga chiteleka ha chimenemene. 17 Alioze chifuchi muchiwaha nyi mwanangana wacho mapwa mwana wa enya chifuchi, ni alemu jacho malinga chiteleka ha ola yacho hanga atakame, hi ha kuzengewa ko. 18 Fulumba liakuzembama mumu ha uleya; zuwo liakuhita mumu ha kuhonga. 19 Mbolo kakuyitenga ha kuseha, ni vinyu kuyakuwahisa mwono, alioze mbongo kujakukumbulula yeswe. 20 Chipwe mu manyonga je kanda utuka mwanangana; chipwe mu chipatulo cha kupomba kanda utuka pichi; mumu kajila wa mu tetela mambata liji lie, hanji umwe mukwa mapulwa mambulula je pande.
27 OUTUBRO–2 NOVEMBRO
YIKUMA YILEMU YA MU LIJI LIA ZAMBI CHILUMBUNUNYI 11-12
Lifunge ku Mujimba Hanga Uwahilile ku Mwono
(Chilumbununyi 11:7, 8) Pangu linapeme, mba chawahila meso muze mamona tangwa. 8 Mumu nyi mutu matwama ni mwono miaka yinji awahilile mu yeswe; alioze ewuluke nawa, matangwa a milima anji. Yize yeswe yineza yamokomoko.
Longesa Ana je Hakutwala Kuli Yehova Kupalikila mu Yitangiwa
Nyi asoko masa mashimbu hanga ahengwole yitangiwa, chino muchaakwasa kulivwa kanawa ni kuheha-hehako ndambu. Yino yakukwasa asoko apwe ni usepa upema. Ngwe chize Mbimbiliya yinambe, kuli ‘shimbu lia kuseha’ ni ‘shimbu lia kuhangana.’ (Chilu. 3:1, 4) Yehova katangile yihela yipema hano hashi hanga tuhase kuzomboka, kuheha ni kulinga yuma yize twakuzanga. Asoko anji kakuzanga kupalikisa mashimbu hamuwika ku minda, ku milundu hanji ku kalunga-lwiji. Twanuke amwe kakuzanga kuheha ni kuzomboka mu parque, kutala tushitu, kusana ku lwiji hanji mu kalunga-lwiji. Tuli ni uhashi unji wa kuhengwola yitangiwa yeswe yize Yehova atangile!
(Chilumbununyi 11:10) Chiza kulifwita ku manyonga je; huma yikola ku mujimba we; mu ukweze ni kuvumbuka cha mwono yeswe yapwa yamokomoko.
Tulemesenu Mwono Uze Zambi Atuhele
6 Chipwe ngwe Mbimbiliya hi mukanda ko wa uwukiso hanji uze wa kulongesa yize mutu atamba kulia, nihindu yikwete nyonga lia Zambi hakutwala ku yuma yacho. Ngwe chilweza, iye kanatulweza hanga ‘tuhume yikola’ yize muyihasa kupihisa mujimba wetu. (Chilu. 11:10) Mbimbiliya yinambe ngwo, kutwatambile kulia ni upulutu chipwe kunwa walwa unji. Yuma yino muyihasa kupihisa mwono wetu hanji kutushiha. (Yishi. 23:20) Yehova kanashimbwila hanga tupwe ni kulihumikiza hakutwala ku yize mutulia ni yize mutunwa.—1 Kori. 6:12; 9:25.
7 Mutuhasa kukwata yiyulo yize muyisolola ngwo, twakulemesa mwono ha kuzachisa kanawa uhashi wa kunyonga chetu. (Samu 119:99, 100; tanga Yishima 2:11.) Ngwe chilweza, mutuhasa kusakula kanawa yize mutulia. Nyi twakuzanga chimwe kulia, alioze kulia chacho chakutuyijisa, muchilita kwecha kuchilia. Twakusolola mana muze twakusa mashimbu hanga tupombe kanawa, tunane-nane mujimba, tulinange ku mujimba ni kululieka zuwo lietu.
(Chilumbununyi 12:13) Songo lia chikuma cheswe, twalivwa. Vwila woma Zambi, ni kufunga shimbi jenyi, mumu henaho hasulila milimo ya mutu.
“Pwenu Akwa-Kulinga Yize Liji lia Zambi Linambe”
2 Yetu twakuwahilila chinji, mumu lia kupwa tuvumbi twa Yehova! Mumu liaka? Mumu tuli ni yikuma yinji yipema, alioze chikuma chilemu chili kutanga Mbimbiliya matangwa eswe ni kusa tachi hanga tukaule yize twakulilongesa.—Tanga Tiangu 1:22-25.
3 Muze twakulinga yize Liji lia Zambi liakwamba, twakupwa ni yiwape yinji. Tunanyingika ngwetu, yino ye twatamba kulinga mba tuvwise Yehova kuwaha. Kunyingika chikuma chino chakutuvwisa kuwaha. (Chilu. 12:13) Muze twakukaula yize twakulilongesa mu Liji lia Zambi, mwono wetu mu usoko wa kupema chinji, usepa wetu ni mandumbu newo wakukola. Kota yino hiyinalingiwa kama ku mwono we. Chikwo nawa, twakwehuka milonga yinji, yize akupwa nayo atu waze keshi kuwayila Yehova. Yetu tunatayiza maliji waze Ndawichi ambile. Hanyima lia kwimba hakutwala ku shimbi, yiyulo ni upatwilo wa Yehova, iye yahwisa ni maliji wano: “Ha kuyilinga kuchili kwononona chinene.”—Samu 19:7-11.
Kuhengwola Yikuma Yilemu ya mu Mbimbiliya
(Chilumbununyi 12:10) Chilumbununyi wafupile maliji apema; wasonekene ni ululi maliji amwenemwene.
Shina Wakufuliela mu Umwenemwene wa mu Mbimbiliya?
Mbimbiliya yene yinambe ngwo, muli “maliji amwenemwene.” (Chilumbununyi 12:10) Yakusolola ngwo, yuma yize asonekamo hi yuma ya kutaka ko, ni atu waze alingile yuma yacho kapwile amwenemwene. (Tanga Luka 1:3; 3:1, 2.) Atu anji akuhengwola sango ja shakulu ni akwa-kuvumbula yuma yikulu, kakutayiza ngwo, yuma yize Mbimbiliya yakwamba hakutwala ku miaka, atu, yihela, ni sango jikwo nawa yili yamwenemwene.
(Chilumbununyi 12:1-14) Iwuluka Tangi ye ha matangwa ja ukweze we, shimbu matangwa api kandeza, hanji miaka yize muyiza muze muwamba ngwe, Chawahililile nayo. 2 Shimbu tangwa ni pangu, ni kakweji ni matongonoshi kanda yila ni malelwa kanda ahiluka kulutwe lia vula. 3 Ha tangwa lize muze akwa kufunga zuwo machikima, ni akwa tachi mahetama, ni akwa kutwa malitwamina mumu hatepuluka, ni akwa kutala ku kapenda mamona chitalawili, 4 ni mapito kutapalo hanaajila, muze zungo lia kutwa kulishi tachi, ni mutu makatuka ha liji lia kajila, ni ana-mapwo a miaso hanakehuluka, 5 mevwa woma nawa wa haze hasuku, yuma ya mwongo yili mu jila; mutondo wa amendoa unatemuna yitemo, ni pasu mapwa mulemu, chipwe zala kayivwile, mumu mutu kanayi kuma kwenyi kwa mutolo ni akwa kulila kanende mu matapalo. 6 Shimbu kanda apatula mujipa wa prata, shimbu musenge wa oru kanda ufwa, shimbu mulondo kanda ufwa ku fuji lia meya, hanji roda kanda yifwa ku chitende, 7 mba fufuta muyihiluka ku mavu chizechene yapwile, ni mwiku wa mwono muuhiluka kuli Zambi yoze wauhanyine. 8 Chamokomoko pundu pundu! Chilumbununyi kanambe ngwenyi, Yeswe yapwa yamokomoko! 9 Chilumbununyi wapwile mukwa mana, alioze chikwo nawa walongesele mana kuli e atu, nikupukuna mu mbunge, ni kulilongesa, ni kululika yishima ni malinjekela anji. 10 Chilumbununyi wafupile maliji apema; wasonekene ni ululi maliji amwenemwene. 11 Yambo ya akwa mana kuyapwa ngwe misongolwela mba yishima ya kukungulula yapwa ngwe mbambo ja kukolesa. Yeswe yinakatuka kuli Kafunga umuwika. 12 Mwanami kanyama ni yuma yeswe yahiana yino. Kulinga mikanda kuchishi kuhwa; kulilongesa chinji kuchakukatalisa mujimba. 13 Songo lia chikuma cheswe, twalivwa. Vwila woma Zambi, ni kufunga shimbi jenyi, mumu henaho hasulila milimo ya mutu. 14 Mumu Zambi makakokela chitanga cheswe ku usopelo, ni chuma cheswe cha kuhengama, chipwe chipema, chipwe chipi.