Mandumbu Jetu a Hashi Heswe Waze Alinunga

A-IZALELE kapwile vungu lia Yehova lize te liambata jina lienyi ha miaka 1,500. Kulutwe, Yehova yatala ‘kuli akwa-mavungu ni kuchiza hakachi ko umwe munyachi ha jina lienyi.’ (Yili. 15:14) Atu waze mambata jina lia Yehova te mapwa yela jenyi, waze malinunga mu manyonga ni mu yitanga chipwe ngwe katwama ku yihela yeka-ni-yeka. Kulinunga chacho, te muchilingiwa mumu lia mulimo uze Yesu ahanyine kuli tumbaji twenyi, hakwamba ngwenyi: ‘Yeenu nukatayise tumbaji a ku mavungu eswe, nikuapapachisa mu jina lia Tata, ni lia Mwana, ni lia spiritu yisandu: nikualongesa kufunga yuma yize yeswe nanuhele shimbi.’—Mateu 28:19, 20.

² Kulihana kuli Yehova ni kukupachisa, chakukupwisa kambaji ka Yesu Kristu. Haliapwila uli umwe wa kuli mandumbu alinunga mu ululikiso wetu hashi heswe, waze keshi kwecha hanga yuma ngwe yifuchi yo, minyachi yo hanji kulisa cha mwono wo yahandunune. (Samu 133:1) Hachino, wakuzanga ni kuvumbika mandumbu je a mu chikungulwila. Amwe kachi te kushi kuhasa kulikata no mumu lia kalisa watwama hakachi kenu ngwe, vungu, chikowa, chifuchi hanji kupwa ni mwono walisa. Haliapwila unaasolwela zango lia undumbu lize liapwa muya ungunu kuhiana usepa weswawo te muhasa kupwa nawo, mumu lia mbongo, yingeleja hanji usoko.—Marku 10:29, 30; Kolo. 3:14; 1 Petu. 1:22.

ALUMUNA MUTAPU WA KUNYONGA CHE

³ Nyi amwe chakwakalila kukumba katonde mumu lia chikowa, yuma ya mafwefwe, upite hanji yuma yikwo nawa, atu jacho mahasa kupukuna ha chilweza cha akwa-Kristu atangu A-Yunda, waze ehukile katonde yoze apwile nenyi hali atu a ku mavungu akwo mumu lia yingeleja yo. Muze Petulu amutumine hanga aye kuli Koneliu, umwe swalale ka-Roma, Yehova yalulieka kanawa manyonga ja Petulu ha chiteli chacho.—Yilinga, kapitulu 10.

⁴ Mu umwe usolwelo, Petulu yatambula usongwelo wa kushiha ni kulia amwe tushitu waze te A-Yunda akumona ngwo a luchisa. Muze alitunyine kulinga chocho, liji yilikatuka mwilu ni kwamba ngwo: “Chize Zambi hanachipemesa, kanda uchivuluka ngwe Chipi.” (Yili. 10:15) Usongwelo uno wa Zambi, wakwashile Petulu alulieke manyonga jenyi hakutwala ku chiteli chize te matambula, chakuya ni kumeneka umwe lunga mukwa-mavungu. Ha kwononokena usongwelo wa Yehova, Petulu yalweza waze alikungulwile ngwenyi: “Yenu nunanyingika ngwe kuchalitele hali Ka-Yunda kulifutula, hanji kuliendela ni umwe wa ku vungu lieka, alioze Zambi hanangulweze ngwenyi, Kanda umona niumwe ngwe mupi hanji wa luchisa. Kashika yingwiza, chahamikine nichimwe, muze unakangusaka.” (Yili. 10:28, 29) Hanyima lia chino, Petulu yapwa ni shindakenyo ngwenyi Yehova katayiza Koneliu ni asoko jenyi.

⁵ Saulu wa Tarsu, umwe Ka-Fariseu yoze walongolokele chinji, kalikehesele ni kulikata ni atu waze kunyima te keshi kulikata no. Iye nawa kakawile usongwelo wo. (Yili. 4:13; Ngala. 1:13-20; Fwili. 3:4-11) Kwamba pundu, atu ngwe Sejiu Paulu, Ndioniseu, Ndamari, Fwilimu, Onesimu ni akwo nawa kasele tachi jinji mba alumune manyonga jo muze atayijile sango lipema ni kupwa tumbaji twa Yesu Kristu.—Yili. 13:6-12; 17:22, 33, 34; Fwilim. 8-20.

CHIZE TWAKUFUNGA KULINUNGA CHETU HASHI HESWE

⁶ Kwamba pundu, zango lia mandumbu mu chikungulwila lie liakukwashile hanga ukundame kuli Yehova ni ululikiso wenyi. Wamwene chilayi cha zango lize liakusolola tumbaji amwenemwene a Yesu Kristu, ngwe chize mwene ambile ngwenyi: ‘Shimbi yaha ngunanwehe ngwami, Nukalizange umwe ni mukwo; chizechene ngwe yami hingunanuzange, ni yenu nawa nukalizange umwe ni mukwo. Ku chino eswe makanyingika yenu nuli tumbaji twami, nyi munupwa ni zango umwe kuli mukwo.’ (Yoa. 13:34, 35) Chikwo nawa, waputukile kuzanga chinji Yehova ni ululikiso wenyi muze wamwene ngwe zango lize liatwama mu chikungulwila lie mandumbu a hashi heswe akusolola. Unamono kumanunuka cha uprofeto wa Mbimbiliya hakutwala ku kukunga atu ha matangwa wano akusula hanga awayile Yehova ni sambukila ni kupwa alinunga.—Mika 4:1-5.

⁷ Nyi twamona yuma yize yinahandununa atu musono, iya mahasa kunyonga ngwenyi te muchipwa chashi atu “a ku mavungu eswe, ni ku minyachi yeswe, ni kuli atu eswe, ni ku malimi eswe” malinunga hamuwika? (Uso. 7:9) Achinyonga kalisa yoze watwama hakachi ka atu a mu yifuchi yize atu akulilongesa chinji ni waze akulikwachilila ku mianda yikulu ya minyachi yo. Tala chize atu a chikowa ni chifuchi chimuwika akuhona kulivwashana mumu lia kuhona kupwa mu yingeleja yimuwika. Yuma ya mafwefwe yakuhandununa chinji atu mumu o kanazange chinji yifuchi yo. Chikwo nawa, nyi twatala ha kalisa wa upite ni yuma yeka yize yinahandununa atu, mutumona ngwetu kununga atu a ku yifuchi, malimi, ni mavungu, ni minyachi yeswe mu zango ni sambukila, chili chikomokeso chize Zambi Mukwa-Ndundo-Jeswe mahasa kulinga wika.—Zeka. 4:6.

⁸ Kulinunga chacho chili chamwenemwene, mumu hakupwa Chela cha Yehova yoze hapapachisa ni yena hiwapwa umwe wa mu ululikiso wacho. Amu unayuku ha kulinunga chacho, kashika watamba kukwasa kulinunga chacho hanga chinunge. Muhasa kulinga chino hakukaula maliji a Paulu ali ha mukanda wa A-Ngalashia 6:10, waze anambe ngwo: “Shimbu tuchili ni mwaka, tulingenu yipema kuli atu eswe, alioze kuhiana chikolo kuli akwa zuwo lia ufulielo.” Twakukaula nawa chiyulo chakwamba ngwo: “Kanda nulinga nichimwe mu spiritu ya kulitachika, hanji ya ulemu wamokomoko, alioze ni mbunge ya kulikehesa, mweswe anyonge ngwenyi, Mukwetu wanguhiana. Kanda nutala mweswe wa kuli yenu ku yuma yenyi mwene, alioze mweswe wa kuli yenu akatale ku yuma ya akwo nawa.” (Fwili. 2:3, 4) Nyi mutusa tachi hanga tumone mandumbu jetu ngwe chize Yehova akwamona, chakuhona kutala ha chize akusoloka, mutununga ni kutwama no ni sambukila ni uwahililo.—Efwe. 4:23, 24.

CHIZE TWAKULIHULUMBA HALI UMWE NI MUKWO

⁹ Yize postolo Paulu ambile yinasolola ngwo, mu chikungulwila kumushi katonde, alioze waze eswe alimo kakulihulumba hali umwe ni mukwo. (1 Kori. 12:14-26) Chipwe ngwe twatwama kusuku ni mandumbu jetu a hashi eswe, nihindu chino kuchishi kutukinda tuhone kulihulumba hali ayo. Nyi amwe a kuli mandumbu jetu maahungumiona, tulieswe twakunenganyana. Nyi amwe mahona yimwe hanji mapalika mu luyinda chipwe mu jita, tulieswe twakufupa kawashi-washi uhashi wa kwakwasa ku ufulielo ni ku musunya.—2 Kori. 1:8-11.

¹⁰ Tulieswe twatamba kulembelako mandumbu jetu hita tangwa. Amwe, kakwapiangula hanga alinge yuma yipi. Akwo, kanapalika mu lamba lize atu anji ananyingika. Eka, kakwahungumiona kuli atu waze akalakala no, asoko jo waze hi Yela ja Yehova ko, chakuhona atu anji kuchinyingika. (Mateu 10:35, 36; 1 Tesa. 2:14) Twakulihulumba ha yikuma yacho mumu tuli mu ululikiso umuwika wa mandumbu waze alinunga hashi heswe. (1 Petu. 5:9) Hakachi ketu hali waze akukalakala chinji mu mulimo wa Yehova ni kusongwela mulimo wa kwambujola ni mu chikungulwila. Chikwo nawa kuli waze akusongwela mulimo wa kwambujola hashi heswe. Wano eswe twatamba kwalembelako, mumu chino muchisolola kulihulumba chetu hali ayo chipwe ngwe kutushi ni yize mutuhasa kulinga hanga twakwase.—Efwe. 1:16; 1 Tesa. 1:2, 3; 5:25.

¹¹ Hamukunda wa yuma yize yinalingiwa hano hashi ha matangwa wano akusula, tuvumbi twa Yehova katamba kulilulieka hanga alikwase umwe ni mukwo. Ha mashimbu amwe muze kwakulingiwa luyinda ngwe minyiko ni masanga a meya, kwakupwa umwe ululikiso wa kukwasa mandumbu ha yize anafupiwa. Akwa-Kristu ku sekulu yitangu, kahanyine chilweza chipema ha chikuma chacho. Ha kwiwuluka chiyulo cha Yesu, tumbaji a mu Andiakia yatumina mandumbu jo mu Yundeya ukwaso uze te anafupiwa. (Yili. 11:27-30; 20:35) Kulutwe, Paulu yakolweza A-Korindu hanga akwase ku mulimo wa kuhana ukwaso uze aluliekele. (2 Kori. 9:1-15) Ni musono nawa, nyi mandumbu jetu mapalika mu lamba ni kufupiwa ukwaso, ululikiso wetu ni mandumbu akwo kawashi-washi kakuhana ukwaso uze ayo anafupiwa.

HANATUSAKULA TULINGE UPALE WA YEHOVA

¹² Mandumbu jetu a hashi heswe waze alinunga, kali akululieka kanawa hanga alinge upale wa Yehova. Musono, upale wenyi uli ngwo sango lipema lia Wanangana wa Zambi akaliambujole hashi heswe ni kuhana uchela ku mavungu eswe. (Mateu 24:14) Yehova kanazange hanga tutwame kulita ni shimbi jenyi, muze tunalingi mulimo wacho. (1 Petu. 1:14-16) Twatamba kuzeyela kuli umwe ni mukwo ni kusa tachi hanga twambujole sango lipema. (Efwe. 5:21) Wano hi mashimbu ko akufupa wika yize twakuzanga, alioze kali akusa Wanangana wa Zambi kulutwe ku mwono wetu. (Mateu 6:33) Kukalakala hamuwika hanga twambujole sango lipema, chakutuvwisa kuwaha musono ni kutukwasa hanga tukazuke yiwape ya mutolo.

¹³ Etu Yela ja Yehova twalisa ni atu akwo. Hanatusakula hakachi ka atu mumu twalinanga nawa tukwete zango lia kulinga mulimo wa Zambi yetu. (Titu 2:14) Uwayilo wetu kuli Yehova wakutupwisa atu alisa. Twakukalakala ni mandumbu jetu hashi heswe ni kuhanjika limi limuwika lia umwenemwene ni kulinga nawa yuma kulita ni umwenemwene uze twakulongesa. Yino kayiprofetezele muze Yehova ambile kupalikila muli profeta Zefania ngwenyi: “Mungwalumuna kuhanjika cha mavungu chikapwe kuhanjika chipema hanga eswe akatongole jina lia Yehova nikumulingila ni mbunge yimuwika.”—Zefa. 3:9.

¹⁴ Yehova katumine nawa Zefania kusoneka hakutwala ku mandumbu a hashi heswe waze tunamono musono ngwenyi: “Waze malisalaho mu Izalele kechi kalinga chipi nichimwe. Kechi kahanjika mahuza; chipwe kuwana mu makanwa jo limi lia kwonga. Mumu makawana kelo; makapomba; niumwe makaakolesa woma wakuhi.” (Zefa. 3:13) Twalinunga hakukalakala hamuwika, mumu tukwete chinyingi cha Liji lia Yehova, twakwalumuna kunyonga chetu ni kutesa mwono wetu kulita ni shimbi jenyi. Twakulinga yuma yize kumeso ja atu yakusoloka ngwe yikalu chinji kuyilinga. Chochene, twalisa chinji ni atu eka, mumu tuli tuvumbi twa Zambi waze akumuhalisa hashi heswe.—Mika 2:12.