Atu Kanatunga Umwe Kaposhi Munene

TE HIKWAPALIKA miaka yinji. Ana ja Noa te hasema ana anji. Ana jacho nawa ni noo yasema ana akwo. Chocho hashi yihazala too ni atu.

Umwe wa kuli ayo te kakwata-mbuli wa Noa, jina lienyi te Nimorote. Iye te lunga mupi, te kakushaha tushitu ni atu. Nimorote yalipwisa iye mwene mwanangana hanga ayule akwo. Zambi te keshi kuzanga Nimorote.

Ha mashimbu jacho atu eswe te kakuhanjika limi limuwika. Nimorote te kakuzanga ngwo atu eswe atunge hamuwika hanga ahase kwaayula. Yena unanyingika yize iye anakalinga? Iye yatuma atu hanga atunge yimwe mbonge ni umwe kaposhi munene. Muhasa kwaamona ha chizulie chino, kanakumu ndopi.

Yehova Zambi kakawahilile ni utungilo wacho. Zambi te kanazange ngwo atu alimwangashane hashi heswe. Alioze ayo yamba ngwo: ‘Tuyenu! Tutungenu yimwe mbonge ni umwe kaposhi musuku songo lienyi likahete ndo mwilu. Hanga tupwe akwa lufuma!’ Atu jacho te kanazange kulilemesa ayo ene, hi Zambi ko.

Kashika, Zambi anakakanjisa atu jacho kutunga kaposhi. Yena unanyingika chize Zambi anakalinga? Susumuku Zambi yalumbanganyisa malimi jo, hohene ayo yaputuka kuhanjika malimi eka ni eka. Hi akwa kutunga te keshi kulivwa umwe ni mukwo. Kashika, jina lia mbonge yacho yilipwa ngwo, Mbapele, hanji Babilonia, linalumbunuka ngwo “Lumbanganyiso.”

Atu jacho yaputuka kuhichika Mbapele. Yizavu ya atu yize te yakuhanjika limi limuwika yiyiya ni kutunga hamuwika sali likwo lia hashi.