Génesis
16 Mauɗe, Labán kaurã ome baraa ɓoosia: chi nabena chi trʉ̃ Lea basia, chi kaaɗebena, Raquel. 17 Lea chi dau mipitaa uniwãe basia. Mauɗe, Raquel wẽra kĩrawãrea ãrĩãdu nibaɗaa. 18 Jacobba kʉ̃riaɗa bẽrã Raquel, jaraɗa basia Labanmaa: “Mʉ bichi baita traja kʉ̃ria ɓua siete añoɗe bichi kau kaaɗe nii Raquel kakua”. 19 Labanba panausia: “Biʼia ɓuma bichimaaburu deayu barikiau mukĩramaa deawẽa. Mʉ baare nibaɗe wãse”. 20 Mauɗe Jacob siete año trajaɗa basia Raquel kakua, maka ɓumina, ichimaa chi diarã ɓiɗĩikaburu ɓoosia, ichia chi kʉ̃ria ãrĩã niiɗeeba. 21 Maaɗakare, Jacobba jarasia Labanmaa: “Jãbera chi jaraɗa baɗa cumplisia. Mʉ wẽra deas ichi baare kãino ɓeeyua”. 22 Maabea Labanba joma chibʉrʉbisii chi jʉ̃kaa nureerã maabea chiko wausia. 23 Kiuɗakare, chi kau Lea adaupeɗa Jacobmaa odoesii ichi baare kãibiyua. 24 Mauɗe, ichi kau Leamaa, Labanba deasii ichi baare trajabarii wẽra chi trʉ̃ Zilpá, ichi baita trajabiyua. 25 Mau norema, Jacobba unusii ichi baare ɓoosii Leadu basia. Makarã Labanmaa jarasii: “¿Nau mʉ kãare asesaa? ¿Jãkarã mʉ Raquel baitawẽe basee bichi baita trajaɗa baɗa? ¿Sakayua bichia mʉ engañasma?”. 26 Maabea Labanba panausia: “Cha nama chi kau kaaɗebena deaɗakaa, chi kau nabena deaɗai naeɗe. 27 Machi kimabaraapeɗaaɗa bẽrã nau semanaɗe jãu inibaba. Maaɗakare, adaui ɓuma chi aɓabena wẽra mauɗe maucha siete año trajayua jãu baita”. 28 Chi kau Raquelmaa deasii ichi trajabariiɗebena, chi trʉ̃ Bilhá, ichi baita trajabiyua.