Génesis
20 Mauɗeeba,chi õbea dia kaaɗe chi faraon cumpleaños basia. Mauɗeeba chi faraonba chiko ãrĩbiadu waubiasia ichi baita trajanuree baita, maabea chi chibari itua deɗekabarii iubisia mauɗe chi chibari chi pan asebariira chi ichi baita traja nuree naa. 21 Mau kaaɗe ichi trajo waya deasia. Chi chibari itua deɗekabarii niimaa ara mauba chi faraonmaa dea ɓooyu. 22 Maamina ichia chi chibari chi panɗebenarã boro totabisia, ara jãka Joseba jaraɗa kĩra ichia ãchi komakaraaɗa baɗa jarasiiɗe.