Marcos
30 Chi apostolerã Jesus jʉ̃kaa duaneesia ãchia jarasiɗau joma aseɗapeɗa kawabiapeɗaaɗa baɗa. 31 Ichia jarasia: “Urústuru mʉ baare; wãuriɗaika du aɓa kuɓuuɗaa descansaɗayua”. Ẽbẽra ãrĩã wãuriɗapeɗa waya imibachiɗaa, mauɗe ãchirã tiempo deekabasia koɗai baita biɗa. 32 Mauɗéburu jãbaɗe wãuriɗa basia chi du aɓa kuɓuuɗaa ãchi dãstu duanaɗayua. 33 Maka ɓumina ẽbẽrarãba unupeɗaaɗa basia wãbudau, mauɗe ãrĩã biɗa ũripeɗaaɗa basia. Ara mauɗe joma puuruɗebena isa jʉ̃rʉɗe wãɗapeɗa aria imisiɗau ãchirã neeɗai naeɗe. 34 Jãbaɗebena eɗaa neesiiɗe, ichia ẽbẽrarã ãrĩã unukuasii maabea ichia ãrĩã chuburiakuasii, maarã oejarã pastorwẽa nuree kĩraka. Ãrĩã ɓeeɗebena kawabia koɓeesii. 35 Maabea kiu diɗiburuu bẽrã, ichi kaaɗe ãda nureabariirã jʉ̃kaa neeɗapeɗa jarasiɗaa: “Cha nama ãrĩã kaitawẽe ɓuu maabea kiu diɗiburuu. 36 Jaras chi ẽbẽrarãmaa ãchi druaɗaa wãuriɗayua puuru ara kaita koɓeeɗaa nedoɗayua koɗai baita”. 37 Ichia jarasia: “Machiaburu kobiásturu”. Maabea ãchirãba wiɗisiɗaa: “¿Kʉ̃ria ɓuka dai wãɗapeɗa 200 denariosɗeeba pan nedoɗapeɗa kobiaɗayua?”. 38 Ichia jarasia: “¿Chi pan sãabe ira panaa? Wãɗapeɗa ochiásturu”. Kawapeɗaaɗakare sãabe pan ira panuu, jarasiɗaa: “Cinco mauɗe ɓeda ome ira panua”. 39 Maabea jarasii jomaurã ẽbẽrarãmaa aka duaneeyua a’awaracha chi sirua pãwãrãa kuɓuu ʉ̃rʉ. 40 Maabea aka duaneesiɗau a’awaraa 100cha mauɗe 50cha ẽbẽrarã. 41 Maabea adausii chi cinco pan mauɗe chi ɓeda ome ɓuu, ʉtaa bajãaɗaa ochiapeɗa ʉtaa wiɗisii. Maabea chi panrã ɓuikuapeɗa deɗeka koɓeesii chi ichi kaaɗe ãda nureerãmaa ãchirãba deaɗayua waabenarã ẽbẽrarãmaa. Maabea deɗekasii jomaurãmaa chi ɓeda ome ɓooɗa. 42 Joma jãwaaɗakare kĩrajʉʉ duaneesii. 43 Maabea 12 ẽ waabirubisiɗau chi pan ɓeeɗaba mauɗe ɓeda siɗa. 44 Jomaurãba kosiɗa, chi panrã 5.000 mukĩrarãba.