ROMANOS

Nau kartaɗe Pabloba naa ɓʉɗa

1 Mʉ Pablobʉ, Jesucristo baita bari trajabariibʉ. Dachi Akõreba mʉ jʉrʉ adausii Jesucristoba bʉiɗa ɓuamera mauɗe ɓusii chi beɗea bia Dachi Akõre ʉ̃rʉbena jaradeaɗe wãmera.

2 Mau beɗea bia Dachi Akõreba nabẽraeɗe deai jara ɓuasii. Ichi baita berreabadaurãba mau ʉ̃rʉbena Ichi Beɗea arakʉɗe ɓʉsiɗau. 3 Mau beɗea bia ichi Warr ʉ̃rʉbena jara ɓuu. Ichi Warr Dachi Mechiu Jesucristo nau kakuaɗe Israelɗebena rey Davidɗebena neeɗabʉ.* Mauɗe ichi biu ɓuaɗa chokae jiradusiiɗe Dachi Akõre Jauriba unubisii mau Dachi Akõre Warr joma poyaa nii.* 4 —.

5 Jesucristoɗeeba Dachi Akõreba mʉ ɓusii ichiba bʉiɗa ɓuamera. Ichiɗeeba maka ɓusii joma druachabenarãba Jesucristoɗe ijãaɗamera, ichi beɗea wauɗamera mauɗe ichimaa biꞌia berreaɗamera. 6 Machi siɗa Dachi Akõreba iusii Jesucristoɗe nureaɗamera.

7 Mʉʉba nau karta ɓʉʉruu joma Romaɗebena ãbarã baita. Dachi Akõreba machi kʉ̃ria ɓuu mauɗe iusii ichi ẽbẽrarã nureaɗamera. Mʉʉba kʉ̃ria ɓuu Dachi Bajãaɗebena Akõreba Dachi Mechiu Jesucristo ome ãchi sõbiaɗeeba machi aiɗa panaɗai mauɗe jirukaraayuwãe panabiaɗai.

Pablo Romaɗaa wã kʉ̃ria ɓuaɗa

8 Naa mʉʉba jaraaruu: Jesucristoɗeeba mʉʉba joma machi baita Dachi Akõremaa ichíturu kiɗibai abarii machiba Jesucristoɗe ijãa panuu ʉ̃rʉbena druachabenarãba berrea panuuɗeeba. 9 Dachi Akõreba kʉ̃ria ɓuu joma mʉ sõɗeeba wau ɓuu chi beɗea bia ichi Warr ʉ̃rʉbena jaradea ɓuuɗeeba. Ichiba kuitaa ɓuu mʉʉba ʉtaa iɗiiruucha machi baita ʉtaa iɗibarii. 10 Mʉʉba ʉtaa iɗibarii ichiba kʉ̃ria ɓuubʉrã mʉ ida machi ichiaɗe wãbimera. 11 Biawãra mʉʉba machi ichia kʉ̃ria ɓuu Dachi Akõre Jauriɗeeba aiɗai baita. Maka machi karr chaarea nureaɗai. 12 Mʉʉba kʉ̃ria ɓuu dachiba araɓau Cristoɗe ijãa panuuɗeeba chiya aiɗa panaɗai karr chaarea panaɗai baita.

13 Ãbarã, mʉʉba kʉ̃ria ɓuu machiba kuitaaɗai biawãra ɓes ãrea machimaa wãi kʉ̃risia ɓuabarii. Maamina wabiɗa poyaa wãwẽa ɓuu. Machimaa wã kʉ̃ria ɓuu mʉʉba jaradea ɓuuɗeeba arabenarãba Jesucristoɗe ijãaɗamera waabenarã druaɗebenarãba ijãapeɗaaɗa kĩra.* 14 Mʉʉba chi beɗea bia Jesús ʉ̃rʉbena jomaurãmaa jaradeai ɓuu. Ne kuitaa nureerãmaa, ne adua nureerãmaa, karta kuitaa nureerãmaa mauɗe karta adua nureerãmaa jaradeai ɓuu.* Mauɗeeba machi Romaɗebenarãmaa biɗa jaradeaɗe wã kʉ̃ria ɓuu. 15 —.

16 Mʉ kĩra nejasiakau chi beɗea bia Jesús ʉ̃rʉbena jaradeai baita, chi mau beɗea ijãaduu Dachi Akõreba ichi poyaaɗeeba joma karibabariiɗeeba; naa judiorã karibai mauɗe judiowãerã siɗa. 17 Mau beɗea biaɗeeba Dachi Akõreba kuitaabia ɓuu dachi karibai, ichiba jara ɓuu kĩra.* Jesucristoɗe ijãaruubʉrã maka ɓuai. Dachi Akõre beɗeaɗe naka ɓʉ kuɓuu:

«Chi jipa nii, Dachi Akõreɗe ijãa niiɗeeba chokae nibai».*

Ẽbẽrarã Dachi Akõre daaɗe nebʉra bara nuree ʉ̃rʉbena

18 Dachi Akõreba bajãaɗebena kuitaabi ɓuu kachirua wau nuree mauɗe jipawãe nuree ichi kĩrubiɗeeba mau joma kastikai. Ãchiba kachirua wau panuuɗeeba chi biawãra beɗea ida kuitaabiɗakau. 19 Dachi Akõre ʉ̃rʉbena poyaa kuitaaɗai ɓuu ãchiba mau ãrea kuitaa panuu, ichiba mau kuitaabia ɓuuɗeeba. 20 Nau iujãa wausiiɗeeɗebena, maarãba chi ichiba wauɗa unu panuuɗeeba kuitaa panuu ichi ewaricha ne joma poyaa waubarii mauɗe ichi Dachi Akõre. Mau joma wauɗa unu panuuɗeeba ẽbẽrarã chi Dachi Akõre ʉ̃rʉbena unuɗakau mau biꞌia unubadau. Mauɗeeba kachirua waubadaurãba adua panuu poyaa jaraɗaabai panuu. 21 Maarãba Dachi Akõre kuitaa panasiɗamina ichimaa biꞌia berreaɗaabai mauɗe ichíturu kiɗibai aɗaabasii. Maumaarã kʉ̃risiaswãe nuree kĩra paneesiɗau. Maka paneeɗapeɗa pãriuɗe paneesiɗau. 22 Kʉ̃risia kuitaa nuree asiɗamina kʉ̃risiaswãe paneesiɗau. 23 Chi Dachi Akõre biukaraa nii mauɗe biꞌia nii ida ɓusiɗau. Maabae chi ẽbẽra biuɗa kĩra juaba ne kapeɗaaɗamaa ʉtaa iɗi kopaneesiɗau. Ibanarã, ãnimara jʉ̃rʉ kimare nuree mauɗe ãnimara ioroɗe ursu nuree kĩra juaba kapeɗaaɗamaa ʉtaa iɗi kopaneesiɗau.

24 Mauɗeeba Dachi Akõreba ida ɓusii ãchi sõɗe kachirua wau kʉ̃ria ɓuu wauɗamera. Mauɗeeba maarãba mia pera wau paneesiɗau. 25 Dachi Akõre biawãra ida ɓuɗapeɗa chi seta wau paneesiɗau. Dachi Akõreba joma wauɗamina ichi audeara ichiba wauɗaɗe ijãa paneesiɗau mauɗe maumaa biꞌia berrea paneesiɗau. Maamina dachiba Dachi Akõremáburu ewaricha biꞌia berreaɗai panuu. Biꞌia ɓuu maka ɓuai.*

26 Mauɗeeba Dachi Akõreba ida ɓusii mia pera wauɗamera. Wẽra mukĩra ome ɓuai ɓuu ida ɓuɗapeɗa araɓau wẽra ome paneesiɗau. 27 Ara mau kĩra mukĩra wẽra ome ɓuai ɓuu ida ɓuɗapeɗa araɓau mukĩra ome chiya kʉ̃riaɗapeɗa mia pera wau paneesiɗau. Mau kachirua wau panuu kakua Dachi Akõreba ãchi nebʉra kastikai, ichiba kastikai ɓuu kĩra.

28 Maarãba Dachi Akõre ida ɓupeɗaaɗaɗeeba ichiba maarã ida ɓusii kachirua kʉ̃risiaɗapeɗa maka wau panaɗamera. 29 Ne joma kachirua waubadau. Mia pera ɓuu waubadau, ne joma uru panaɗai kʉ̃riabadau, waabenamaa kachirua waubadau, waabenarãba uru panuu kakua kachirua kʉ̃risiabadau, mia beabadau, berreayaa panabadau, waabenarã setaa kũruabadau mauɗe waabenarã ʉ̃rʉbena kachirua kʉ̃risiabadau. 30 Waabenarã ʉ̃rʉbena kachirua berreabadau, Dachi Akõre kĩramaabadau mauɗe waabenarã daaɗe kachirua berreabadau. Waabenarã audeara chi bibuara nuree a kʉ̃risiabadau mauɗe maka jarabadau. Waabenarã kachirua wauɗai baita jʉrʉbadau. Ãchi akõrerã beɗea ũriɗakau. 31 Kʉ̃risiaswãe nuree. Ãchiba beɗea deapeɗaaɗa wauɗakau. Kʉ̃risiaswãe nuree mauɗe waabenarã kĩra chuburiaɗakau.* 32 Maarãba biꞌia kuitaa panuu Dachi Akõreba chi maka wau nuree ãrea kastikai.* Maamina ara maka wau nibabadau mauɗe waabenarãba ara mau kĩra kachirua wauduuɗe mau biꞌia ɓuu a kʉ̃risiabadau.

Dachi Akõreba jomaurã kastikai ʉ̃rʉbena

2 Maka ɓuuɗe aɓauba kʉ̃risiabai ɓuu Dachi Akõre daaɗe nebʉraswãe nii. Chi aude jipa wau ɓuu a ɓuuba maka kʉ̃risiabai ɓuu. Aɓauba kachirua wau ɓuu a jaraaruuɗe ara ichi ʉ̃rʉbena jara ɓuu, ichia biɗa ara mau kĩra waubariiɗeeba. 2 Dachiba kuitaa panuu Dachi Akõreba chi kachirua waubadaurã kastikabarii, chi beɗea biawãraba. 3 Maka bichiba waabenarãba kachirua wau panuu aaruubʉrã, maamina ara mau wau ɓuubʉrã, kʉ̃risiabai ɓuu Dachi Akõreba mau nebʉra kastikaabai. 4 Bichiba ida ɓu ɓuu Dachi Akõre dachi ome ãrea sõbia ɓuu, joma dauchia jãadua ɓuu mauɗe kachirua wauɗa isa kastikakau. ¿Bichiba adua ɓuka Dachi Akõre bichi ome sõbia ɓuabariiɗeeba mauɗe chi ichiba kʉ̃ria ɓuuɗeeba bichi kachirua waubarii ida ɓubarii ichimaa neemera?

5 Maamina sõ chaarea niiɗeeba bichiba kachirua ida ɓukau Dachi Akõremaa neebai baita. Mauɗeeba Dachi Akõreba kastikai ewariɗe ichi kĩrubiɗeeba aude kastikai. Mau ewariɗe Dachi Akõreba unubii saka jomaurã jipa kastikai. 6 Ichiba jomaurãmaa deai ãchiba waupeɗaaɗa kĩra. 7 Chi nureerãba biꞌia wau panuu Dachi Akõreba maarã biꞌia unumera, biꞌia jaramera mauɗe ewaricha ãchi ome chokae ɓuamera. Maarã biawãra chokae panabiai. 8 Maamina chi nureerãba waabenarã audeara biꞌia panaɗai baita jʉrʉbadau. Mauɗeeba chi biawãra beɗea ijãaɗai kʉ̃riaɗakau kachiruaɗe panaɗayua. Mau ẽbẽrarã Dachi Akõreba ichi kĩru kuɓuuba ãrea kastikai. 9 Ichiba ichiaruuɗe joma kachirua wau nuree ãrea biꞌiwãe nureaɗai mauɗe jirukaraa nureaɗai. Naa judiorã mauɗe judiowãerã siɗa maka nureaɗai. 10 Maamina joma biꞌia wau nuree Dachi Akõreba biꞌia unui, biꞌia jarai mauɗe jirukaraayuwãe ɓuabiai. Naa judiorã mauɗe judiowãerã siɗa maka waui. 11 Dachi Akõreba ẽbẽrarã joma ara mau kĩra nebʉra ichiai.

12 Chi Moisesba ɓʉɗa adua nureerãba kachirua waubadauɗeeba mau adua panumina Dachi Akõreba kastikai. Mauɗe mau Moisesba ɓʉɗa kuitaa nureerãba kachirua waubadauɗeeba Dachi Akõreba ara mau Moisesba ɓʉɗaba maarã kastikai. 13 Moisesba ɓʉɗa ũri panuuɗeeba ẽbẽrarã Dachi Akõre daaɗe jipa nureaɗaabai, maumaarã mau joma wau panuuɗeeba Dachi Akõreba maarã nebʉraswãe nuree ai. 14 Judiowãerãba mau Moisesba ɓʉɗa adua panumina ãchi kʉ̃risiaɗeeba mau Moisesba ɓʉɗaɗe jara ɓuu kĩra ɓeseɗe waubadau. Maka wauduuɗe, unubiabadau ãchiba kuitaa panuu kãare biꞌia ɓuu mauɗe kãare kachirua ɓuu. 15 Ara ãchiba wau panuuɗeeba unubia panuu mau Moisesba ɓʉɗaɗe jara ɓuu sõɗeeba kuitaa panuu. Ãchi kʉ̃risiaɗe kuitaa panuu biꞌia wauduuɗe jirukaraayuwãe panabadau. Maumaarã kachirua wauduuɗe, kĩra nomaa panabadau. 16 Jomaurãba chi ãchi sõɗe mera uru panuu Dachi Akõreba nebʉra ichiai ewariɗe Jesucristoɗeeba mau ichiai. Mʉʉba chi beɗea bia jaradea ɓuu kĩra ara maka ɓuai.

Judiorãba Moisesba ɓʉɗaɗe jara ɓuu kĩra wauɗakau

17 Machíturu judiorã abadau. Dachi Akõre biꞌia kuitaa panuu abadau. Kʉ̃risia panuu ichiba machi aiɗakuai Moisesba ɓʉɗa uru panuuɗeeba. 18 Mau uru panuuɗeeba kuitaa panuu Dachi Akõreba kãare kʉ̃ria ɓuu mauɗe kãare jipa ɓuu. 19 Machiba kʉ̃risia panuu Dachi Akõreɗe ijãaɗakaurãmaa poyaa biꞌia jaradea panaɗai dau pãriu nuree jipa adoeduu kĩra, pãriuɗe nuree ʉ̃ɗaaɗaa adoeduu kĩra. 20 Moisesba ɓʉɗa uru panuuɗeeba kʉ̃risia panuu joma kʉ̃risia kuitaa uru panuu mauɗe biawãra beɗea siɗa kuitaa panuu. Mauɗeeba kʉ̃risia panuu chi kʉ̃risiaswãe nureerãmaa mauɗe chi wabiɗa ãrea adua nureerãmaa biɗa poyaa jaradea panaɗai. 21 Machiba waabenarãmaa maka jaradea panuubʉrã, ¿sakãe ara machi du aɓa jaradeaɗawẽma? Machiba jaradeabadau nechiruabai ɓuu. Maamina machi nechiruabadau. 22 Machiba jaradeabadau junebena miakãiɗa ome kãi ɓeebai ɓuu. Maamina machi junebena miakãiɗa ome kãi ɓeebadau. Machiba kʉ̃riaɗakau Dachi Akõre kuenda juaba ne kapeɗaaɗamaa ʉtaa iɗiɗai. Maamina mau juaba kapeɗaaɗa de mechiuɗe mau nechiruabadau. 23 Moisesba ɓʉɗa machiba ãrea kuitaa panuu abadau. Maamina mau Moisesba ɓʉɗaɗe jara ɓuu ijãaɗawẽa panuuɗeeba, machi kakua waabenarãba Dachi Akõre ʉ̃rʉbena kachirua berreabadau. 24 Mauɗeeba Dachi Akõre beɗeaɗe naka ɓʉ kuɓuu: «Judiowãerãba Dachi Akõre ʉ̃rʉbena kachirua jarabadau machi judiorãba kachirua waubadau kakua».*

25 Moisesba ɓʉɗa machiba wauduubʉrã, machi mukĩra chi kakua tõoɗa biꞌia ɓuu, ẽbẽrarã Dachi Akõreɗerã. Maamina mau Moisesba ɓʉɗa wauɗawẽebʉrã, machi Dachi Akõre daaɗe mukĩra chi kakua tõoɗawẽa nuree kĩra nuree.* 26 Mauɗe judiowãeba mau Moisesba ɓʉɗa wau ɓuubʉrã, mukĩra chi kakua tõowẽa ɓumina Dachi Akõre daaɗe mukĩra chi kakua tõo nii kĩra nii. 27 Machi judiorã mukĩra chi kakua tõobadau unubiaɗai baita ẽbẽrarã Dachi Akõreɗerã. Mauɗe Moisesba ɓʉɗa kuitaa panuu. Maamina mau Moisesba ɓʉɗa wauɗawẽa panuu. Mauɗeeba chi mukĩra chi kakua tõowẽa ɓuuba mau Moisesba ɓʉɗa wauruubʉrã, kuitaabiai machi judiorãmina nebʉra bara nuree. 28 Aɓa biɗa judiowãema, chi judiorãba waubadau wau ɓuuɗeeba. Mauɗe mukĩra chi kakua tõoɗa ara nau kakuaɗebenawãema. 29 Maumaarã Dachi Akõremaarã, chi sõ jipa nii, mau biawãra judiobʉ. Chi Moisesba ɓʉɗaɗe ɓu kuɓuu kĩra mukĩra chi kakua tõoɗa abarii biawãra judiowãema, maumaarã chi Dachi Akõre Jauriba maka sõɗe jipa nibabibariibʉ.* Ẽbẽrarãba chi sõ jipa nii ʉ̃rʉbena biꞌia jaraɗakamina Dachi Akõreba mau ʉ̃rʉbena biꞌia jarabarii.

3 Mʉʉba maka jara ɓuuɗeeba aɓauba naka kʉ̃risiai: «¿Sakãe judio ẽbẽra mukĩra chi kakua tõoima? ¿Bibuara ɓuuwãeka judiowãe bai mau judio bai baɗamaarã?» 2 Makawãema. Ãreaɗe judiorã bai ãrea biꞌia ɓuu. Naa mʉʉba jaraaruu maka panuu Dachi Akõreba ichi beɗea maarãmaa deasiiɗeeba. 3 Maamina ãchiɗebena chi nureerãba chi wauɗai panuu kĩra wauɗaabasii. ¿Mauɗeeba chi Dachi Akõreba waui jaraɗa wauwẽka? 4 Makawãema. Dachi Akõreba waui jaraɗa biawãra joma waui. Ẽbẽrarã setaa jarabadamina Dachi Akõreba waubarii ichiba jara ɓuu kĩra. Ichi Beɗeaɗe naka ɓʉ kuɓuu:

5 Mʉ berrearuu ẽbẽrarã berreabadau kĩra. Chi nureerãba jarabadau kachirua wau panuuɗeeba Dachi Akõre jipa nii arakʉɗe unubiabadau abadau. Mauɗe Dachi Akõreba kastikaaruubʉrã, ichi jipa niiwãe abadau. ¿Chi maka jara panuurãmaa kãare jaraɗaima? ¿Jãarãba jaraɗaika Dachi Akõre jipa niiwãe dai* kastikaiɗeeba? 6 ¡Biawãra makawãema! Dachi Akõre maka jipa niiwãe basirã, ¿saka nau iujãaɗebenarã nebʉra jipa ichiai basma? 7 Chi nureerãba jarabadau setaa jara panuuɗeeba chi Dachi Akõre setaa jarakau arakʉɗe unubiabadau. Kʉ̃risiabadau ãchiba setaa jara panuu kakua ẽbẽrarãba Dachi Akõremaa aude biꞌia berreaɗai. Mauɗeeba ãchimaarã, Dachi Akõreba nebʉra ichiabai ɓuu. 8 Makarã ¿dachiba kachirua wauɗai panuka ẽbẽrarãba Dachi Akõremaa biꞌia berreaɗamera? Chi nureerãba ãchi kʉ̃risia kachiruaɗeeba jarabadau daiba maka jaradea panuu. Chi maka jara nuree Dachi Akõreba biawãra nebʉra barau ai.

Ẽbẽra jipa nii wãꞌãe

9 Mauɗeeba ¿kãare jaraɗaima? ¿Jaraɗaika dai chi judiorã waabenarã audeara biꞌia nuree? ¡Makawãema! Mʉʉba nau kartaɗe kuitaabiasii judiorãba mauɗe judiowãerã biɗa kachirua waubadau. 10 Mauɗeeba Dachi Akõre beɗeaɗe naka ɓʉ kuɓuu:

19 Mau beɗea Dachi Akõre beɗeaɗe ɓuu chi mau ɓʉɗa ũri nureerãmaa jara ɓuu. Maka aɓau biɗa poyaa kachiruaswãe ɓuu a jaraɗaabai. Mau Moisesba ɓʉsiiɗeeba kuitaa panuu joma nau iujãaɗebenarã Dachi Akõre daaɗe nebʉra bara panuu. 20 Biawãra Moisesba ɓʉɗa wau ɓuuɗeeba ẽbẽra aɓa biɗa Dachi Akõreba chi ichiɗirã jipa nuree baara duanuubai. Mau Moisesba ɓʉɗaɗeeba kuitaabia ɓuu dachiba kachirua waubadau.

Dachi Akõreba Jesucristoɗeeba ẽbẽrarã chi ichiɗirã jipa nuree baara duanubarii

21 Maamina iɗibae Dachi Akõreba kuitaabiasii mau Moisesba ɓʉɗa awara saka ẽbẽrarã chi ichiɗirã jipa nuree baara duanubarii* ara ichiba jara ɓuaɗa kĩra. Moisesba ɓʉɗaɗe mauɗe Dachi Akõre baita berreabadaurãba ɓʉpeɗaaɗa kartaɗe biɗa mau ʉ̃rʉbena ɓʉ kuɓuu. 22 Maka Dachi Akõreba waubarii ara ichiba jara ɓuu kĩra, Jesucristo dachi kakua biusiiɗe, ichi ũribaba nibaɗa unubiasiiɗeeba. Maka ichiba joma chi Jesusɗe ijãaduurã chi ichiɗirã jipa nuree baara duanubarii. Aɓa biɗa kĩra awara unukau. 23 Biawãra jomaurãba kachirua waubadauɗeeba, Dachi Akõre biꞌia niiɗebena awara nuree. 24 Maamina Dachi Akõreba ichi sõbiaɗeeba ẽbẽra aɓa chi ichiɗirã jipa nuree baara duanubarii, ne kaebea bari dearuu kĩra. Maka unubarii Jesucristoba kachiruaɗebena karibasiiɗeeba. 25 Dachi Akõreba Jesucristo ɓusii ichi oa chemera, dachi kachirua kakua. Mau ijãaduuɗe Dachi Akõreba dachi kachirua perdonabarii. Maka unubia ɓuu Dachi Akõre jipa nii, dachi karibai baita. Cristo neei naeɗe kachirua waupeɗaaɗa Dachi Akõreba joma dauchia jãadua ɓuuɗeeba kastikawẽa ɓuasii. 26 Iɗibae ichiba Jesucristoɗeeba dachi kariba ɓuu, ichi jipa niiɗeeba. Ichiba jaraaruu maka waubariiɗeeba, chi Jesusɗe ijãaduu joma chi ichiɗirã jipa nuree baara duanubarii.

27 Mauɗeeba ¿kãare ara dachi ʉ̃rʉbena biꞌia berreaɗaima? Poyaa biꞌia berreaɗaabai. ¿Sakãe? Poyaa biꞌia berreaɗaabai, Moisesba ɓʉɗa wau panuuɗeeba chi ichiɗirã jipa nuree baara duanuubaiɗeeba, maumaarã Jesusɗe ijãa panuuɗeeba maka duanui. 28 Dachiba jaradea panuu Jesusɗe ijãa panuuɗéburu, Dachi Akõreba dachi chi ichiɗirã jipa nuree baara duanui. Maka jarakau Moisesba ɓʉɗaɗe ijãa panuuɗeeba.

29 Maebʉrã ¿Dachi Akõre judiorãɗéturu ɓuka? ¿Ichi judiowãerãɗewãeka? Biawãra judiowãerãɗebʉ, 30 Dachi Akõre aɓaburu niiɗeeba. Ichiba joma Jesusɗe ijãaduu chi ichiɗirã jipa nuree baara duanubarii. Mukĩra chi kakua tõo nureerãba mauɗe mukĩra chi kakua tõowẽa nuree biɗa Jesusɗe ijãaduubʉrã chi ichiɗirã jipa nuree baara duanubarii. 31 Jesusɗe ijãa panuuɗeeba ¿Moisesba ɓʉɗa ida ɓu panuka? Makawãema, maumaarã mau Moisesba ɓʉɗa biꞌia ɓuu unubadau.

Abrahamba Dachi Akõreɗe ijãaɗa

4 ¿Kãare jaraɗaima dai judiorã nabẽraeɗebena Abraham ʉ̃rʉbena?* 2 Abrahamba ne wau ɓuuɗeeba Dachi Akõreba chi ichiɗirã jipa nuree baara ɓuɗa basirã, ara ichi ʉ̃rʉbena poyaa biꞌia berreai basii. Maamina Dachi Akõre daaɗe poyaa biꞌia berreabai basii. 3 Dachi Akõre beɗeaɗe naka jara ɓuu: «Abrahamba Dachi Akõreɗe ijãasii. Mauɗeeba Dachi Akõreba ichi nebʉraswãe nii asii».* 4 Aɓauba traju wauruubʉrã, chi nejarra bari deakau, maumaarã ichi traju bare chi chibariba deai. 5 Maamina Dachi Akõreba chi ichiɗirã jipa nuree baara ɓumera chi ne wauwẽa ɓuuba ichiɗe ijãaruubʉrã, mau ẽbẽra chi ichiɗirã jipa nuree baara ɓui. Chi kachirua wau nureerãba ichiɗe ijãaduubʉrã ichiba chi ichiɗirã jipa nuree baara duanubarii. 6 Ara mau kĩra Davidba jarasii: Dachi Akõreba chi ne wauwẽa ɓuu chi ichiɗirã jipa nuree baara ɓuuruubʉrã, ãrea biꞌia ɓuai. 7 Naka jarasii:

9 Maka ¿aɓaburu mukĩra chi kakua tõopeɗaaɗa nuree ãrea biꞌia panaɗaika? ¿Mukĩra kakua tõopeɗaaɗawẽa nuree siɗa ãrea biꞌia panaɗaiwãeka? Daiba jarasiɗau Abrahamba Dachi Akõreɗe ijãasiiɗeeba Dachi Akõreba ichi nebʉraswãe nii asii. 10 Maamina ¿Dachi Akõreba sãa ichi nebʉraswãe nii asma? ¿Nebʉraswãe nii a jaraska mukĩra chi kakua tõosiiɗe maebʉrã mukĩra chi kakua tõoi naeɗe? Biawãra ichi mukĩra chi kakua tõoi naeɗe Dachi Akõreba ichi nebʉraswãe nii asii. 11 Abrahamba Dachi Akõreɗe ijãasiiɗeeba, mukĩra chi kakua tõowẽa ɓuasmina Dachi Akõreba ichi nebʉraswãe nii asii.* Mau kuitaabiai baita Abrahamba mawãare mukĩra chi kakua tõosii.* Mukĩra chi kakua tõowẽa nureerãba Dachi Akõreɗe ijãaduubʉrã, Abraham ãchi akõrebʉ, Dachi Akõreba nebʉraswãe nuree a jara ɓuuɗeeba, ichi kĩra ijãasiɗauɗeeba. 12 Mauɗe Abrahamba mukĩra chi kakua tõoi naeɗe ijãa ɓuaɗa kĩra mukĩra chi kakua tõo nureerãba ijãaduubʉrã Abraham ãchi akõrebʉ.

13 Dachi Akõreba Abrahammaa mauɗe ichiɗebena imiɗai baɗa ẽbẽrarãmaa nau iujãa deai asii. Maamina maka jaraabasii Abrahamba Moisesba ɓʉɗa uru ɓuasiiɗeeba. Maumaarã maka jarasii Abraham nebʉraswãe nii asiiɗeeba. Maka nebʉraswãe nuree asii Abrahamba ichiɗe ijãasiiɗeeba. 14 Moisesba ɓʉɗa uru panuurãba Dachi Akõreba deai jaraɗa adau panasirã, Cristoɗe bari ijãa panaɗai basii mauɗe Dachi Akõreba deai jaraɗa adauɗaabai basii. 15 Mau Moisesba ɓʉɗa jara ɓuu kĩra wauwẽa panuuɗeeba, Dachi Akõreba dachi kastikai. Biawãra Moisesba ɓʉɗa wãꞌãe baɗa basirã, nebʉra baraa panaɗaabai basii.

16 Dachi Akõreba deai jaraɗa dachiba adauɗai ichiɗe ijãa panuuɗeeba. Dachi Akõreba ichi sõbiaɗeeba mau bari dea ɓuu. Mauɗeeba joma Abraham ẽbẽrarã, chi Moisesba ɓʉɗaɗeeba panuurãba mau biawãra adauɗai. Maamina ãchiaburu adauɗaabai, maumaarã judiowãerã biɗa Abraham kĩra Dachi Akõreɗe ijãaduubʉrã adauɗai. Maka Abraham joma dachi, chi Dachi Akõreɗe ijãabadaurã akõrebʉ. 17 Dachi Akõre beɗeaɗe naka ɓʉ kuɓuu: «Mʉʉba bichi ɓusii puuru ãrea akõre bamera».* Biawãra Dachi Akõre daaɗe Abraham joma dachi, chi Dachi Akõreɗe ijãabadaurã akõrebʉ. Abrahamba ijãa ɓuasii chi biupeɗaaɗa chokae jiradubiabarii mauɗe Dachi Akõreɗe chi ne wãꞌãeɗebena ne waubarii.

18 Dachi Akõreba naka jarasii: «Bichiɗebena imiiduurã ãrea baɗai».* Abrahamba poyaa warr deakau kuitaa ɓumina ijãasii Dachi Akõreba warr deabii ichiba jaraɗa kĩra. Maka ijãa ɓuuɗeeba puuru ãrea akõre ɓeesii Dachi Akõreba jaraɗa kĩra. 19 Warr deai baita ãrea chõra ɓuasmina Abrahamba mau wabiɗa ãrea ijãa ɓuasii. Ichi 100 año baidia ɓuasii. Ichi wẽra Sara siɗa warr adaukau kuitaa ɓuasmina ichiba wabiɗa ãrea ijãa ɓuasii. 20 Ne aɓa biɗa kʉ̃risiabasii Dachi Akõreba deai jaraɗa deabai. Maumaarã sõɗeeba biawãra ãrea ijãa ɓuasii mauɗe Dachi Akõremaa biꞌia berreabachii. 21 Kuitaa ɓuasii Dachi Akõreba waui jaraɗa biawãra joma poyaa waui. 22 Maka ijãasiiɗeeba Dachi Akõreba mau nebʉraswãe nii asii.* 23 Chi Dachi Akõre beɗeaɗe maka ɓʉ kuɓuu ichi ʉ̃rʉbenáturu ɓʉʉbasii. 24 Maumaarã dachi ʉ̃rʉbena siɗa berrea ɓuu, dachiba ijãa panuuɗeeba Dachi Akõreba nebʉraswãe nuree a jara ɓuuɗeeba. Dachi Akõreba Dachi Mechiu Jesús biu ɓuaɗa chokae jiradubisii. Dachiba ara mauɗe ijãa panuu. 25 Ichiba Jesús ɓusii dachi kachirua kakua biumera. Maabae biuɗaɗebena chokae jiradubisii dachi chi ichiɗirã jipa nuree baara duanui baita.

Jesusɗeeba Dachi Akõre ome sõbia panuu

5 Dachi Mechiu Jesucristoɗe ijãa panuuɗeeba Dachi Akõreba dachi chi ichiɗirã jipa nuree baara duanubarii. Mauɗeeba Cristoɗeeba Dachi Akõre ome sõbia panuu. 2 Mau awara Jesucristoɗe ijãa panuuɗeeba Dachi Akõreba ichi sõbiaɗeeba dachi ewaricha aiɗabarii. Mauɗe kĩrajʉʉ panuu kuitaa panuuɗeeba Dachi Akõre biaɗebena adauɗai. 3 Mau awara dachi ãrea biꞌiwãe panuuɗe kĩrajʉʉ panabadau, kuitaa panuuɗeeba mauba dauchia jãaduaɗai kuitaaɗai. 4 Mau dauchia jãadua panuuɗeeba kuitaa panuu Dachi Akõreba dachi biꞌia unu ɓuu. Mauɗeeba kuitaa panuu Dachi Akõre biaɗebena adauɗai. 5 Mau setawãema, maumaarã biawãra adauɗai. Maka kuitaa panuu Dachi Akõreba ichi Jauri dachimaa deasiiɗeeba. Ichi Jauriɗeeba dachi sõɗe kuitaabia ɓuu dachi biawãra ãrea kʉ̃ria ɓuu.

6 Dachiba ara dachi kachiruaɗebena poyaa karibaɗawẽa panasiɗauɗe ewari araa baaruuɗe Cristo dachi chi kachiruarã kakua biusii. 7 Ẽbẽra ɓaꞌãra biɗa wãꞌãe aɓa jipa nii kakua ara ichi beabii. Maamina ẽbẽra biꞌia nii kakua ¿aɓauba ara ichi beabii ɓubaaka? 8 Maamina Dachi Akõreba dachi ãrea kʉ̃ria ɓuu unubiasii wabiɗa kachiruaɗe panuuɗe Cristo dachi kakua biusiiɗeeba. 9 Cristo oa chesiiɗeeba Dachi Akõreba dachi chi ichiɗirã jipa nuree baara duanusii. Mauɗeeba Cristoɗeeba Dachi Akõreba dachi kastikai baɗa biawãra karibai. 10 Dachi wabiɗa Dachi Akõre ome chi kĩramaa nureasiiɗe ichi Warr biusiiɗeeba dachi ichi ome biꞌia ɓusii. Cristo chokae ɓuuɗeeba, maka dachi biawãra karibai. 11 Mau awara Dachi Mechiu Jesucristoɗeeba Dachi Akõre ome biꞌia nureeɗeeba ichiɗeeba Dachi Akõre ome sõbia panuu.

Adán mauɗe Cristo

12 Ẽbẽra aɓaɗeeba kachirua nau iujãaɗe neesii. Mauɗe mau kachiruaɗeeba dachi biuɗai neesii. Jomaurãba kachirua waubadauɗeeba biubadau. 13 Dachi Akõreba ichi beɗea Moisesmaa ɓʉbii naeɗe, ẽbẽrarãba nau iujãaɗe kachirua waubachiɗau. Maamina mau Moisesba ɓʉɗa wãꞌãe basiiɗeeba, mauba jarawẽa ɓuu ẽbẽrarãba kachirua wau panuu kakua, nebʉra bara nuree aabasii. 14 Maka ɓumina Adán ewariɗeeɗebena aɓa Moisés ewariɗaa ẽbẽrarã biubachiɗau kachirua waubachiɗauɗeeba. Adanba Dachi Akõreba ichimaa jaraɗa ijãabasii, maamina ãchiba Adán kĩra maka kachirua wauɗaabasii.

Adán kakua, joma kachirua paneeɗa kĩra, chi neei ɓuu a panaɗa kakua joma poyaa biꞌia paneesiɗau.* 15 Biawãra ẽbẽra ara aɓaba kachirua wauɗa kakua joma biusiɗau. Maamina ẽbẽra june aɓaɗeeba Dachi Akõreba ichi sõbiaɗeeba chokae ɓuai bari deasii joma chokae nureaɗamera.* Jesucristoba ichi sõbiaɗeeba dachi baita wauɗa, chi Adanba kachirua wauɗa audeara bibuara ɓuu. Mauɗeeba chi Dachi Akõreba bari dea ɓuu, Adanba kachirua wauɗa kakua neeɗa kĩra ɓuwãema. 16 Mau awara Adanba kachirua wauɗa kakua, Dachi Akõreba ẽbẽrarã ichiapeɗa joma nebʉra bara nuree asii. Maamina ẽbẽrarãba kachirua ãrea waubachiɗamina Dachi Akõreba ichi sõbiaɗeeba maarã chi ichiɗirã jipa nuree baara duanubarii. 17 Biawãra ẽbẽra aɓaba kachirua wauɗa kakua joma biubadau. Maamina june ẽbẽraɗeeba, mau kãyabãra ewaricha ichi ome chi reyrã kĩra panaɗai. Mau Jesucristoɗeeba Dachi Akõreba ne aɓa biɗa deábaɗe awẽa, ichi sõbiaɗeeba ãrea karibapeɗa, ẽbẽrarã nebʉraswãe nuree a jarabarii.

18 Maka ẽbẽra aɓaba kachirua wauɗa kakua Dachi Akõreba ichiapeɗa joma nebʉra bara panuu asii. Mauɗe ẽbẽra aɓaba jipa wauɗa kakua Dachi Akõreba joma poyaa chi ichiɗirã jipa nuree baara ɓui ewaricha ichi ome chokae panaɗamera. 19 Biawãra ẽbẽra aɓaba Dachi Akõreba jaraɗa waubasiiɗeeba ẽbẽrarã ãrea kachirua waubadaurã paneesiɗau. Mauɗe ẽbẽra aɓaba ichiba jaraɗa joma wausiiɗeeba ẽbẽrarã ãrea Dachi Akõreba jipa nuree a jarai.

20 Dachi Akõreba Moisesmaa ɓʉbisii, ẽbẽrarãba kuitaaɗamera ãchiba kachirua ãrea waubadau. Maamina ẽbẽrarãba kachirua ãrea wausiɗauɗe Dachi Akõreba ichi sõbiaɗeeba ãrea kĩra chuburiasii. 21 Biawãra ẽbẽrarãba kachirua waubadauɗeeba biubadau. Maamina Dachi Akõreba ichi sõbiaɗeeba ẽbẽrarã chi ichiɗirã jipa nuree baara duanubarii Dachi Mechiu Jesucristoɗeeba ewaricha ichi ome chokae panaɗamera.

Kachiruaɗebena ãyaa wãpeɗaaɗa

6 ¿Mau ʉ̃rʉbena saka kʉ̃risia panuma? ¿Dachi wabiɗa kachiruaɗe nibaɗai panuka Dachi Akõreba ichi sõbiaɗeeba aude kĩra chuburiamera? 2 ¡Biawãra maka wauɗaabai panuu! Dachi kachiruaɗeeba biusiɗau.* Mauɗeeba ¿saka kachiruaɗe nibaɗaima? 3 Machiba kuitaa panuu boro easiɗauɗe unubiasiɗau Cristo baara ãbua panuu. Maka unubiasiɗau ichi ome biupeɗaaɗa mauɗe jau ɓupeɗaaɗa. Maabae Dachi Bajãaɗebena Akõreba ichi ãrea poyaa niiɗeeba Cristo chokae jiradubiɗa kĩra dachi siɗa chokae jiradubiasii chokae ɓuai chiwiɗiɗe nibaɗamera. 4 —.

5 Dachi Cristo baara biusiɗauɗeeba ichi chokae jiraduɗa kĩra, chokae ɓuai chiwiɗiɗe nibaɗai. 6 Dachiba kuitaa panuu dachi kʉ̃risia chõra biusii Cristo baara cruzɗe jiraɓupeɗaaɗa kĩra. Maka dachi kʉ̃risia chõraba nau kakuaba kachirua wau kʉ̃ria ɓuu waa poyaa waubiibai. Dachi waa kachirua baita bari trajabadaurãwãema. 7 Biawãra aɓa Cristo ome biuɗabʉrã, kachiruaɗebena ena ɓeesii.*

8 Dachi Cristo ome biupeɗaaɗaɗeeba ijãa panuu ichi ome chokae panaɗai. 9 Dachiba kuitaa panuu Cristo biu ɓuaɗa chokae jiradusiiɗeeba waya biubai. Biumiaba ichi ome waya poyaabai. 10 Cristo ɓes aɓa biuɗaba kachirua joma poyaasii. Ichi waya biubai maumaarã Dachi Akõre baita chokae ɓuu. 11 Ara mau kĩra kuitaaɗai panuu machi kachiruaɗeeba biusiɗau mauɗe Dachi Mechiu Jesucristoɗeeba Dachi Akõre baita chokae panuu.*

12 Mauɗeeba chi kachiruamaa ida machi chibari babirã́sturu. Maka machi chi kakua biui ɓuuba kachirua wau kʉ̃ria ɓuu wauɗaabai. 13 Machi kakuamaa ida kachirua waubirã́sturu. Maumaarã ara machi Dachi Akõremaa deásturu. Machi kachiruaɗe biu panaɗa Dachi Akõre baita chokae paneesiɗau. Mauɗeeba machi chi kakua Dachi Akõremaa deásturu jipa wauɗai baita. 14 Dachi Akõreba ichi sõbiaɗeeba machi karibasiiɗeeba mauɗe Moisesba ɓʉɗaɗe duanuuwãeɗeeba, chi kachirua waa machi chibari ɓuabai.

Jipa wauɗai ʉ̃rʉbena

15 ¿Mau ʉ̃rʉbena saka kʉ̃risia panuma? Dachi Akõreba ichi sõbiaɗeeba dachi karibasiiɗeeba mauɗe Moisesba ɓʉɗaɗe dachi duanuuwãeɗeeba ¿kachirua wauɗai panuka? ¡Makawãema! 16 Machiba kuitaa panuu ara machi du aɓa aɓaumaa bari trajabadaurã nureaɗai baita deaduubʉrã, chi chibariba jaraaruu joma wauɗai panuu. Ara mau kĩra machiba chi kachirua machi chibari kĩra ɓuuduubʉrã, kachirua wauɗapeɗa biuɗai. Maamina Dachi Akõre machi chibari ɓuuduubʉrã, ichi beɗea wauduuɗe jipa nibaɗai. 17 Naeɗe machi kachirua baita bari trajabadaurã basii. Maamina joma Dachi Akõre ʉ̃rʉbena jaradeapeɗaaɗa sõɗeeba wau panuuɗeeba mʉʉba Dachi Akõremaa ichíturu kiɗibai abarii. 18 Machi kachiruaɗebena ena paneeɗapeɗa Dachi Akõre baita bari trajabadaurã paneesiɗau jipa wauɗai baita. 19 Mʉʉba maka berrea ɓuu nau kʉ̃risia jaradeai baita. Maka jaradea ɓuu machiba ãi kʉ̃risiarãaɗamera. Biawãra naeɗe ara machi du aɓa deasiɗau kachirua baita bari trajabadaurã nureaɗai baita. Maka machiba mia pera wausiɗauɗe joma kachirua ewaricha aude wau panabachiɗau. Maamina jãabae Dachi Akõre baita bari trajabadaurãɗeeba, ara machi du aɓa deásturu jipa wauɗai baita. Maka Dachi Akõre baita biꞌia nureaɗai.

20 Machi kachirua baita bari trajabadaurã basiiɗe jipa wauɗai kʉ̃risiaɗaka basii. 21 Maamina kachirua wau panuuɗeeba ¿kãare biꞌia adausiɗama? ¿Maka wau panaɗa kakua, kĩra nejasia panuuwãeka? Kachirua wau panuu kakua ẽbẽrarã biuɗai. 22 Jãabae machi kachiruaɗebena ena wãsiɗauɗeeba Dachi Akõre baita bari trajabadaurã paneesiɗau. Maka Dachi Akõre baita biꞌia paneesiɗau. Mauɗeeba ichi baara ewaricha chokae panaɗai. 23 Biawãra kachirua wau panuu kakua ẽbẽrarã biuɗai. Maamina Dachi Mechiu Jesucristoɗeeba Dachi Akõreba ewaricha chokae ɓuabiai, ne kaebea bari dea ɓuu kĩra.

Moisesba ɓʉɗa ʉ̃rʉbena Pabloba jaradeaɗa

7 Ãbarã, Moisesba ɓʉɗa kuitaa panuuɗeeba mau ʉ̃rʉbena mʉʉba machimaa berrearuu. ¿Kuitaa panuuwãeka dachi chokae panuumisa Moisesba ɓʉɗa ũriɗai panuu? 2 Nau kĩra ɓuu. Mau Moisesba ɓʉɗaɗe jara ɓuu wẽra mukĩra iu ɓuu ichi mukĩra chokae ɓuuɗe ichi ome ɓuai ɓuu. Ichi mukĩra wabiɗa chokae ɓuuɗe mau wẽraba junebena mukĩra adauruubʉrã, Moisesba ɓʉɗaɗe jara ɓuu mau wẽra nebʉra bara ɓuu. Maamina ichi mukĩra biuruubʉrã Moisesba ɓʉɗaɗebena ena ɓeei. Mauɗe ichiba junebena mukĩra adauruubʉrã, nebʉraswãe ɓuai. 3 —.

4 Ãbarã, ara mau kĩra machi Cristo baara panuuɗeeba ichi biuɗakare, Moisesba ɓʉɗaɗeeba biusiɗau. Jãabae machi Cristoɗerãɗeeba, Dachi Akõre baita poyaa biꞌia wauɗai. 5 Dachi nau kakuaba wau kʉ̃ria ɓuuɗeeba nibasiɗauɗe Moisesba ɓʉɗaɗe jara ɓuu kakua kachirua aude wau kʉ̃riasiɗau. Mauɗe kachirua wauɗai panuu kakua biuɗai panasiɗau.* 6 Maamina Moisesba ɓʉɗaɗeeba panaɗa dachi ena paneesiɗau. Mauɗebena biusiiɗeeba jãabae Dachi Akõre baita biꞌia wauɗai ichi Jauriɗeeba. Waya kʉ̃risiaɗaabai Moisesba ɓʉɗaɗeeba maka wauɗai.*

Kachirua wau kʉ̃ria ɓuu ʉ̃rʉbena ɓʉɗa

7 ¿Mau ʉ̃rʉbena saka kʉ̃risia panuma? ¿Moisesba ɓʉɗa kachirua ɓuka? ¡Makawãema! Mau Moisesba ɓʉɗa wãꞌãe basirã mʉʉba adua ɓuai basii kãare kachirua ɓuu. Moisesba ɓʉɗaba «aɓauba uru ɓuu kʉ̃riarã́baɗe» aɗawãe basirã, mʉʉba ãibenaba uru ɓuu kʉ̃riai kachirua ɓuu adua ɓuai basii.* 8 Maamina «kʉ̃riarã́baɗe» asiiɗeeba kachirua wau kʉ̃ria ɓuuɗeeba mʉʉba ne joma aude kʉ̃riasii. Biawãra Moisesba ɓʉɗa wãꞌãe basirã aude kachirua wau kʉ̃riabai basii.* 9 Naeɗe mau Moisesba ɓʉɗa adua ɓuasiiɗe mʉ jirukaraayuwãe ɓuabachii. Maamina kuitaasiiɗe mʉʉba kachirua wau kʉ̃riasii. Maabae kachirua kakua biui ɓuasii. 10 Mau Moisesba ɓʉɗa wau ɓuuɗeeba mʉ Dachi Akõre ome chokae ɓuai ɓuasii. Maamina waukauɗeeba Moisesba ɓʉɗaba kuitaabisii mʉ biui ɓuu. 11 Moisesba ɓʉɗaɗe jara ɓuu kakua mʉʉba kachirua aude wau kʉ̃riasii. Maabae kachiruaba mʉ setaa kũruasii kʉ̃risiamera Moisesba ɓʉɗaba jipa ɓuai. Maamina ũrikauɗeeba biui ɓuasii.

12 Biawãra Moisesba ɓʉɗa Dachi Akõreɗebʉ, mauɗe chi waubi ɓuu beɗea Ichiɗibʉ, jipa ɓuu mauɗe ãrea biꞌia ɓuu. 13 Makarã ¿Moisesba ɓʉɗa biꞌia ɓuuba mʉ biubiska? ¡Makawãema! Maumaarã kachirua wau ɓuu kakua mʉ maka biui ɓuasii. Mʉʉba kachirua wau ɓuu kakua mau Moisesba ɓʉɗa biꞌia ɓuuba jara ɓuu mʉ biui ɓuu. Maka arakʉɗe unubi ɓuu chi kachirua saka ɓuu. Mʉʉba kachirua wau ɓuu biawãra ãrea kachirua ɓuu.

14 Dachiba kuitaa panuu Moisesba ɓʉɗa Dachi Akõre Jauriɗeeba neesii. Maamina mʉ nau kakuaɗe ɓuu. Mʉ nedobʉiɗa kĩra ɓuu kachirua baita bari trajabarii ɓuamera. 15 Mʉʉba adua ɓuu sakãe jãka waubarii. Mʉʉba ne biꞌia wau kʉ̃ria ɓuu mau waukau, maumaarã mʉʉba kachirua wau kʉ̃riawẽa ɓuu mau waubarii. 16 Maamina mʉʉba kachirua wau ɓuu wau kʉ̃riawẽa ɓuuɗeeba mauba unubi ɓuu Moisesba ɓʉɗa mʉʉba biꞌia unu ɓuu. 17 Mauɗeeba ara mʉʉba kʉ̃ria ɓuuɗeeba kachirua wau ɓuwãema, maumaarã kachirua mʉ sõɗe ɓuuba maka waubibarii. 18 Mʉʉba kuitaa ɓuu mʉ sõɗe ne bia wãꞌãema. Biꞌia jaraaruubʉrã, mʉ nau kakuaɗe ɓuuɗeeba ara mʉʉba kʉ̃ria ɓuuɗeeba biꞌia poyaa waukau. Mʉʉba biꞌia wau kʉ̃ria ɓumina poyaa waukau. 19 Biawãra mʉʉba biꞌia wau kʉ̃ria ɓuu mau waukau, maumaarã kachirua wau kʉ̃riawẽa ɓuu mau waubarii. 20 Mʉʉba kachirua wau kʉ̃riawẽa ɓuu wau ɓumina, ara mʉʉba kʉ̃ria ɓuuɗeeba maka wau ɓuwãema. Maumaarã kachirua mʉ sõɗe ɓuuba maka waubi ɓuu.

21 Mauɗeeba nau kuitaa ɓuu: mʉʉba biꞌia wau kʉ̃ria ɓumina kachirua mʉ sõɗe ɓuuba kachirua waubibarii. 22 Biawãra mʉʉba sõɗeeba Dachi Akõreba Moisesmaa ɓʉbiɗa ãrea biꞌia unu ɓuu. 23 Maamina june kʉ̃risia siɗa mʉ sõɗe ɓuu. Mauba mʉ jʉ̃a uru ɓuu kĩra mʉʉmaa kachirua waubibarii. Chi mʉʉba biꞌia wau kʉ̃ria ɓuu mau kʉ̃risiaba ida waubi kʉ̃riakau, ne bia waui kʉ̃risia ome chĩo ɓuu kĩra.

24 ¡Mʉ miichuburi! ¿Kaiba mʉ enaima nau chi kakua biui ɓuuba kachirua wau kʉ̃ria ɓuuɗebena? 25 Mau Dachi Akõréburu Dachi Mechiu Jesucristoɗeeba mʉ karibai. Mauɗeeba mʉʉba ichíturu kiɗibai aaruu. Biawãra mʉ kʉ̃risiaɗe Moisesba ɓʉɗa wau kʉ̃ria ɓuu, maamina nau kakuaɗe ɓuuɗeeba kachirua mʉ sõɗe ɓuuba kachirua waubibarii.

Dachi Akõre Jauriɗe nibaɗai ʉ̃rʉbena

8 Jãabae Dachi Akõreba ne aɓa biɗa nebʉra barau awẽma, dachi Cristo Jesús ome panuuɗeeba.* 2 Cristoɗeeba Dachi Akõre Jauriba dachimaa chi chokae ɓuai chiwiɗi deasiiɗeeba, dachi kachiruaɗebena mauɗe biuɗai baɗaɗebena enakuasii. 3 Moisesba ɓʉɗaba dachi kachiruaɗebena poyaa enabiaibasii. Chi nau kakuaba wau kʉ̃ria ɓuuɗeeba nibabadaurãba mau Moisesba ɓʉɗa wauɗai baɗamaarã kachirua waubadau. Maamina Dachi Akõreba ichi Warr bʉisii dachi chi kachiruarã kĩra ɓuamera. Mauɗe dachiba kachirua waupeɗaaɗa kakua biusii. Maka chi dachi kakua kachirua waupeɗaaɗa Dachi Akõreba kastikasii. 4 Ichiba maka wausii dachiba poyaa jipa wauɗamera Moisesba ɓʉɗaɗe jara ɓuu kĩra. Jãabae dachi poyaa jipa nibaɗai nau kakuaba wau kʉ̃ria ɓuuɗe nibaɗakauɗeeba, maumaarã Dachi Akõre Jauriɗeeba nibabadauɗeeba.

5 Chi nau kakuaba wau kʉ̃ria ɓuuɗeeba nibabadaurãba ara mau kĩra kʉ̃risiabadau. Maamina chi Dachi Akõre Jauriɗeeba nibabadaurãba Dachi Akõre Jauriba kʉ̃ria ɓuu kʉ̃risiabadau. 6 Aɓauba chi nau kakuaba wau kʉ̃ria ɓuu kʉ̃risia ɓuaruubʉrã biui. Maamina chi Dachi Akõre Jauriba kʉ̃ria ɓuu kʉ̃risia ɓuaruubʉrã jirukaraayuwãe ɓuai mauɗe Dachi Akõre ome chokae ɓuai. 7 Aɓauba chi nau kakuaba wau kʉ̃ria ɓuu kʉ̃risia ɓuaruubʉrã, Dachi Akõre kĩramaabʉ. Moisesba ɓʉɗa wau kʉ̃riakau; ne aɓa biɗa poyaa waukau. 8 Chi nau kakuaba wau kʉ̃ria ɓuuɗeeba nibabadaurã Dachi Akõreba biꞌia unukau.

9 Maamina Dachi Akõre Jauri biawãra machi sõɗe ɓuubʉrã, ichiɗeeba nibabadau. Nau kakuaba wau kʉ̃ria ɓuuɗeeba nibaɗaabai. Biawãra chi Cristo Jauri wãꞌãe nii, Cristoɗewãema. 10 Maamina Cristo machi sõɗe ɓuubʉrã, machi jauri chokae ɓuu Dachi Akõreba machi nebʉraswãe nuree a ɓuuɗeeba. Machiba kachirua wau panaɗa kakua nau kakuaɗe biuɗai. 11 Maamina ichi Jauri machi sõɗe ɓuuɗeeba, ichiɗeeba machi chi kakua biui ɓuu chokae jiradubii, Cristo Jesús chokae jiradubiɗa kĩra.

12 Mauɗeeba ãbarã, dachi biawãra Dachi Akõre Jauriɗeeba nibaɗai panuu. Nau kakuaba wau kʉ̃ria ɓuuɗeeba nibaɗaabai panuu. 13 Machi nau kakuaba wau kʉ̃ria ɓuuɗeeba nibaaduubʉrã biuɗai. Maamina chi nau kakuaba kachirua wau kʉ̃ria ɓuu Dachi Akõre Jauriɗeeba ida ɓuuduubʉrã, Dachi Akõre ome chokae panaɗai. 14 Joma Dachi Akõre Jauriɗeeba nibabadaurã Dachi Akõre warrarãbʉ. 15 Machiba Dachi Akõre Jauri adausiɗauɗe machi wapeabiabasii, chi chibari baita bari trajabarii makabarii kĩra. Maumaarã machi duanusii Dachi Akõre warrarã baɗamera mauɗe «Chacha» aɗamera. 16 Dachi sõɗe Dachi Akõre Jauriba kuitaabia ɓuu biawãra Dachi Akõre warrarã. 17 Ichi warrarãɗeeba dachirã mauɗe Cristo baarauba ichiba uru ɓuuɗebena adauɗai. Biawãra Cristo biꞌiwãe uru panaɗa kĩra dachi ãrea biꞌiwãe panuubʉrã, Dachi Akõreba Cristo baara ãbua ãrea biꞌia duanui.

Dachi Akõreba chiwiɗi waukuai ɓuu eseɗau panuu

18 Mʉʉmaarã, chi nau iɗibaebena dachi ãrea biꞌiwãe panuu ɓaꞌãra ɓuu, chi kaaɗebena ewariɗe Dachi Akõreba dachi biꞌia duanui audeara. 19 Joma Dachi Akõreba waukuaɗaba eseɗau ɓuu ichi warrarã biꞌia paneeduu isa unubimera, 20 naeɗe biꞌiwãe ɓuasiiɗeeba. Du aɓa maka biꞌiwãe ɓeebasii, maumaarã Dachi Akõreba maka ɓeebisii. Maamina joma biꞌiwãe ɓeeɗaba eseɗau ɓuu 21 Dachi Akõreba mau biꞌia ɓumera ichi warrarã biꞌia ɓui kĩra. Chi chibari baita bari trajabarii ena ɓuu kĩra, chi Dachi Akõreba wauɗa makaa ɓeraabai.

22 Dachiba kuitaa panuu wẽraba warr adauruuɗe isa adaubai kʉ̃riabarii kĩra, joma Dachi Akõreba waukuaɗaba puꞌuaba isa biꞌia ɓuai kʉ̃ria ɓuu. 23 Mauɗe dachia biɗa puꞌuaba isa neebii eseɗau panuu, Dachi Akõreba dachi chi kakua biꞌia ɓumera. Ichi warrarã adauruuɗe maka waui. Ichi Jauri dachimaa naeɗe deasii biawãra dachi ichi warrarã kuitaaɗamera. 24 Dachi Akõreba dachi karibasiiɗeeba mau eseɗau panuu. Chi dachiba eseɗau panuu wabiɗa wãꞌãe panuu. Uru panaɗa basirã ¿sakãe eseɗau panaɗai basma? ¿Kaiba ichiba chi uru ɓuu, adaui baita eseɗau ɓuaima? 25 Maamina chi dachiba eseɗau panuu wabiɗa wãꞌãe panuuɗeeba joma dauchia jãadua panuuɗeeba kuitaa panuu biawãra adauɗai.

26 Mau awara ara dachi du aɓa poyaara panuuɗeeba Dachi Akõre Jauriba aiɗa ɓuu. Biawãra adua panuu saka Dachi Akõremaa arakʉɗe ʉtaa iɗiɗai. Maamina Dachi Akõre Jauriba chi beɗea dachiba poyaa berreaɗakauɗeeba dachi kakua Dachi Akõremaa ʉtaa iɗibarii. 27 Mauɗe Dachi Akõre dachi sõ ichiabariiba ichi Jauriba ʉtaa iɗi ɓuu kuitaa ɓuu, ichiba kʉ̃ria ɓuu kĩra ichiɗirã baita ʉtaa iɗibariiɗeeba.

Dachi Akõreba ne jomaɗe aiɗabarii

28 Mau awara Dachi Akõreba kʉ̃risia ɓuaɗa kĩra chi ichi kʉ̃riabadau ichiba iukuasii. Dachiba kuitaa panuu maarã baita Dachi Akõreba ne jomaɗe biꞌia waubarii. 29 Mau maka ɓuu ichiba naeɗe kuitaa ɓuasiiɗeeba kairã ichiɗirã bai. Ãchi ɓusii ichi Warr Jesús kĩra nureaɗamera. Maka ichi Warr ãbarã ãrea panuuɗebena, mau chi nabenabʉ. 30 Dachi Akõreba chi ichiba naeɗe duanuɗarã iukuasii, ichi Warr Jesús kĩra nureaɗamera. Chi ichiba iukuaɗa chi ichiɗirã jipa nuree baara ɓusii. Chi ichiba chi ichiɗirã jipa nuree baara duanuɗarãmaa ichi biꞌia niiɗebena deai.

31 ¿Mau ʉ̃rʉbena saka kʉ̃risiaɗai panuma? Dachi Akõre dachi baara ɓuuɗeeba ¿kaiba dachi poyaaima? 32 Biawãra Dachi Akõreba ichi Warr wãakaabasii maumaarã joma dachi kakua ida beabisii. Mauɗeeba ¿ichiba dachimaa joma biꞌia Cristo ome ãbua deabaika? 33 ¿Kaiba Dachi Akõremaa ichiba jʉrʉ adauɗarã ʉ̃rʉbena poyaa kachirua jaraima? Ara Dachi Akõreba dachi chi ichiɗirã jipa nuree baara duanubarii. 34 ¿Kaiba dachi nebʉra bara panuu aɗaima? Aɓau biɗa maka jaraabai Jesucristo dachi kakua biusiiɗeeba. Ichi biu ɓuaɗa chokae jiradusii. Jãabae Dachi Akõre jua biare ɓuu. Aria dachi baita Dachi Akõremaa chi chuburia iɗi ɓuu. 35 ¿Kaiba dachi Cristoba kʉ̃ria ɓuuɗebena poyaa ãyaa ɓuima? Ewari chaarea neeruuɗe, ãrea biꞌiwãe panuuɗe, ẽbẽrarãba dachi kachirua wauduuɗe, jarrbisia ewariɗe, paruswãe panuuɗe, kachiruaɗe panuuɗe, ẽbẽrarãba bea kʉ̃ria panuuɗe aɓau biɗa dachi Cristoba kʉ̃riaɗebena poyaa ãyaa duanuɗaabai. 36 Dachi Akõre beɗeaɗe naka ɓʉ kuɓuu:

«Ewaricha bichi kakua dai bea kʉ̃ria panuu. Oeja beabadau kĩra beaɗai kʉ̃risia panuu».*

37 Maamina Cristoba dachi kʉ̃ria ɓuu. Ichiɗeeba joma mau dachiba poyaabadau. 38 Mauɗeeba mʉʉba kuitaa ɓuu dachi biuduubʉrã maebʉrã chokae panuubʉrã, Dachi Akõreba dachi kʉ̃riaɗebena awara panaɗaabai. Nau ewariɗe mauɗe kaaɗebena ewariɗe awara panaɗaabai. Mauɗe angelerãba, jai kachiruarãba, chi jai kachirua mechiurãba, chi ʉtʉbenarãba, chi ekarebenarãba, maebʉrã aɓa biɗa Dachi Akõreba wauɗaɗebena biɗa dachi ichiba kʉ̃riaɗebena poyaa ãyaa duanuɗaabai.* Ara mau kʉ̃ria, Dachi Mechiu Jesucristoɗeeba unubiasii. 39 —.

Joma Israelɗebena imipeɗaaɗa biawãra israelɗebenarãwãe

9 Mʉ Cristoɗeɗeeba biawãra jaraaruu. Setawãema. Dachi Akõre Jauriba mʉ sõɗe nau beɗea biawãra arakʉɗe kuitaabi ɓuu. 2 Nau jaraaruu: mʉ ẽbẽrarã judiorã kakua ewaricha ãrea kĩra nomaa ɓuabarii, ãchi Dachi Akõre ome biꞌiwãe panuuɗeeba. Mʉ Cristoɗebena awara ɓeei kʉ̃riai, mʉ ãbarã aiɗai baita, 3 —. 4 chi israelɗebenarã. Dachi Akõreba naeɗe ãchi jʉrʉ adausii ichi warrarã nureaɗamera.* Ichi kĩrawãrea teɗechoa maarãmaa unubiasii.* Ãchi nabẽraeɗebenarã ome beɗea deasii.* Moisesba ɓʉɗa maarãmaa deasii. Ãchimaa kuitaabiasii ichi de mechiuɗe kãare wauɗai panuu mauɗe joma ichiba deai jaraɗa ãchi baita ɓuasii. 5 Ãchi nabẽraeɗebenarã chi mechiurã nureasii. Ãchiɗebena Cristo ẽbẽra kakuaɗe chi naweba adausii. Mau jomaurã Akõrebʉ. Ichimáburu dachiba ewaricha biꞌia berreaɗai panuu. Biꞌia ɓuu maka ɓuai.

6 Mʉʉba jarawẽa ɓuu Dachi Akõreba chi Israelɗebenarã baita waui aɗa wauwẽa ɓuu. Maumaarã mʉʉba jara ɓuu joma Israelɗebena imipeɗaaɗa Dachi Akõre daaɗe biawãra israelɗebenarãwãe. 7 Mauɗe joma Abrahamɗebena imipeɗaaɗa Dachi Akõre daaɗe Abraham warrarãwãe. Dachi Akõreba Abrahammaa naka jarasii: «Bichi warr Isaacɗeeba bichi ãichekerã ãrea imiɗai».* 8 Mau beɗeaba dachimaa kuitaabiasii ɓuu joma Abrahamɗebena chi naweba adaupeɗaaɗa Dachi Akõre warrarãwãe. Maumaarã chi warrarã Dachi Akõreba deai jaraɗa, biawãra Abraham warrarãbʉ. 9 Dachi Akõreba Abrahammaa deai jaraɗa beɗea nau: «Año aɓauɗe mʉ waya neei. Mauɗe Saraba warr uru ɓuai».*

10 Mau awara Dachi Akõreba kuitaabiasii chi ichiba jʉrʉ adaui kʉ̃ria ɓuu jʉrʉ adaubarii. Mauɗe kuitaabiasii aɓa biɗa jʉrʉ adaukau ãchiba wau panuu biꞌia unu ɓuuɗeeba maumaarã jʉrʉ adaubarii ichiba iusiiɗeeba. Naka kuitaabiasii: Rebecaba mikisu adausii. Chi akõre dachi nabẽraeɗebena Isaac basii. Maamina mau warrarã chi naweba adaui naeɗe mauɗe ne aɓa biɗa biꞌia maebʉrã kachirua wauɗai naeɗe Dachi Akõreba Rebecamaa jarasii: «Chi nabena chi kaaɗebena juaɗe ɓuai».* 11 —. 12 —. 13 Mauɗeeba Dachi Akõre beɗeaɗe naka ɓʉ kuɓuu: «Mʉʉba Jacob kʉ̃riasii, maamina Esaú kĩramaasii».*

14 ¿Mau ʉ̃rʉbena saka kʉ̃risia panuma? ¿Dachi Akõreba jipa waukau kʉ̃risia panuka? ¡Makawãema! 15 Dachi Akõreba Moisesmaa naka jarasii:

«Mʉʉba chi kĩra chuburia kʉ̃ria ɓuu ẽbẽra kĩra chuburiai mauɗe chi mʉʉba kʉ̃riaɗeeba kariba kʉ̃ria ɓuu ẽbẽra kʉ̃riaɗeeba karibai».*

16 Biawãra chi ẽbẽra Dachi Akõreba jʉrʉ adau ɓuu jʉrʉ adaukau, mau ẽbẽraba wau ɓuu biꞌia unu ɓuuɗeeba, maebʉrã chi ẽbẽraba maka kʉ̃ria ɓuuɗeeba. Maumaarã chi ichiba kĩra chuburiai kʉ̃ria ɓuu ẽbẽra, mau jʉrʉ adaubarii. 17 Ichi beɗeaɗe, ichiba faraonmaa jaraɗa naka ɓʉ kuɓuu:

«Mʉʉba bichi chi rey mechiu ɓusii mʉ poyaa unubiai baita. Maka mʉ joma nau iujãaɗe trʉ̃ poa ɓuai».*

18 Mauba kuitaabia ɓuu Dachi Akõreba aɓa biɗa kĩra chuburiai kʉ̃ria ɓuubʉrã maka waubarii mauɗe aɓa biɗa sõ chaarea ɓeebii kʉ̃ria ɓuubʉrã makabibarii.

19 Mau beɗea ʉ̃rʉbena aɓauba naka jarai: «Dachi Akõreba maka waubariiɗeeba ¿sakãe dachi nebʉra bara panuu a ɓuma? ¿Ichiba dachi ɓuɗa kĩra panuuwãeka?» 20 Maamina ¿chi maka berrea ɓuuba Dachi Akõremaa maka berreai ɓuka? ¿Chokoba chi kabariimaa naka jarai ɓuka: «Bichiba sakãe mʉ jãka kasma?» 21 ¿Chi choko kabariiba wau kʉ̃ria ɓuu kĩra wauiwãe ɓuka? ¿Choko kĩrajʉʉ bara ɓuabarii ewari baitabena mauɗe barikia ewari baitabena siɗa araɓau ioroba kai ɓuwẽka?

22 Ara mau kĩra Dachi Akõreba wau kʉ̃riaɗa naka wausii. Ẽbẽrarãba kachirua wau panuu baita Dachi Akõreba ichi kĩrubarii unubia ɓuuɗeeba mauɗe ichi poyaaɗeeba kastikapeɗa tʉbʉ aokoɗe jiratai basii. Maamina chi ãchiba kachirua wau panuu joma dauchia jãadua ɓuasii. 23 Maka dauchia jãadua ɓuasii ichi biꞌia ɓuu mechiuɗebena ichiba kĩra chuburia ɓuu ẽbẽrarãmaa kuitaabiai baita. Ãchi ichiba naeɗe jʉrʉ adausii ichi biꞌia ɓuuɗebena uru panaɗamera. 24 Dachi mau ẽbẽrarãɗebenabʉ. Dachi Akõreba dachi joma iusii. Chi nuree judiorãbʉ maamina chi nuree judiowãerãbʉ, 25 Dachi Akõreba jaraɗa Oseas kartaɗe naka ɓʉ kuɓuu kĩra:

«Chi mʉ puuruɗebenarãwãe baɗa mʉ puuruɗebenarã ai. Chi mʉʉba kʉ̃riawẽa ɓuaɗa puuru, mʉʉba kʉ̃ria ɓuu puuru ai».*

26 Mauɗe naka ɓʉ kuɓuu:

27 Mauɗe Isaiasba israelɗebenarã ʉ̃rʉbena naka jarasii:

«Israelɗebenarã ãrea panuu mar ibu kĩra. Maamina ãchi ãreawãe karibaɗai Dachi Mechiuba nau iujãaɗe nuree isa joma kastikakuaiɗeeba».* 28 —.

29 Mauɗe mau naeɗe Isaiasba naka jarasii:

«Dachi Mechiu joma poyaa ɓuuba dachi israelɗebenarã chi nuree imipeɗaaɗarã ida chokae panabiɗawãe basirã, Sodomaɗebenarã mauɗe Gomorraɗebenarã kĩra panaɗai basii».*

Judiorãba Cristoɗe ijãaɗawẽa panuu ʉ̃rʉbena

30 ¿Mauba kãare jara ɓuma? Judiowãerãba jʉrʉɗaka basii chi Dachi Akõre puuruɗebena jipa nureerã baara panaɗai baita. Maamina maka paneesiɗau, Cristoɗe ijãasiɗauɗeeba. 31 Maumaarã israelɗebenarãba Dachi Akõre puuru jipa ɓuu baɗai jʉrʉ panasii, chi ley waubachiɗauɗeeba. Maamina poyaa maka wauɗaabasii. 32 ¿Sakãe makaabasma? Makaabasii Cristoɗe ijãaɗai audeara ãchiba wau panuuɗeeba ichi daaɗe jipa nureaɗai baita jʉrʉ panasiiɗeeba.* Biawãra ãchiba Cristoɗe ijãaɗaabasii moomaa drʉʉduu kĩra. 33 Dachi Akõre beɗeaɗe mau ʉ̃rʉbena naka ɓʉ kuɓuu:

10 Ãbarã, mʉʉba sõɗeeba kʉ̃ria ɓuu Dachi Akõreba israelɗebenarã karibai. Mauɗeeba mʉʉba ichimaa ʉtaa iɗi ɓuabarii. 2 Mʉʉba jaraaruu ãchiba Dachi Akõre biawãra kuitaa kʉ̃ria panuu. Maamina Dachi Akõreba kʉ̃ria ɓuu ʉ̃rʉbena biꞌiwãe kʉ̃risia panuu. 3 Ãchiba unuɗakau saka Dachi Akõreba ẽbẽrarã ichi jipa nuree baara duanui, ichiba beɗea deaɗa kĩra. Maumaarã mau ida ɓuɗapeɗa ara ãchiba wau panuuba jʉrʉ panuu Dachi Akõre puuru jipa ɓuu baɗai baita. 4 Maamina maka nureaɗai baita, ãchi ley waubachiɗau audeara, Cristoba joma wausii. Chi Cristoɗe ijãaduu Dachi Akõreba jipa nuree unubarii.

5 Moisesba ɓʉsii saka ẽbẽrarã poyaa jipa nureaɗai, chi Dachi Akõreba ichimaa ɓʉbisiiɗeeba. Naka ɓʉsii: «Chi Moisesba ɓʉɗa wau ɓuu, mauba nibai».* 6 Maamina chi Cristoɗe ijãa ɓuu Dachi Akõre daaɗe jipa nuree baarabena bai baita naka jara ɓuu: «Bichi sõɗeeba jararã́se: “¿Kai bajãaɗaa wãi ɓuma?”* (Cristo nau iujãaɗaa neebii baita). 7 Mauɗe kʉ̃risiarã́se: “¿Kai biuɗarã panabadaumaa wãi ɓuma?” (Cristo chokae jiradubii baita)». 8 Maamina Dachi Akõre beɗeaɗe naka ɓʉ kuɓuu: «Bichiba Dachi Akõre beɗea kuitaai aude chaareawẽa ɓuu.* Bichi iiba ichi beɗea jarai ɓuu mauɗe bichi sõɗeeba ijãai ɓuu».* Ichi beɗea daiba naka jaradea panuu jomaurãba ijãaɗamera: 9 Bichi iiba Jesús jomaurã Mechiu aaruubʉrã, mauɗe Dachi Akõreba ichi chokae jiradubiɗa bichi sõɗeeba ijãaruubʉrã, ichiba karibai. 10 Biawãra chi mauba sõɗeeba ijãaruubʉrã, chi Dachi Akõre daaɗe jipa nuree baara ɓuai. Iiba Jesús jomaurã Mechiu aaruubʉrã Dachi Akõreba karibai.

11 Dachi Akõre beɗeaɗe naka ɓʉ kuɓuu: «Chi ichiɗe ijãa ɓuuba bari ijãa ɓuabai».* 12 Dachi Akõre jomaurã Mechiuɗeeba judiorã mauɗe judiowãerã siɗa araɓauɗe waubarii. Ichimaa chi chuburia iɗiiduu joma karibabarii. 13 Dachi Akõre beɗeaɗe naka ɓʉ kuɓuu: «Chi Dachi Mechiumaa chi chuburia iɗiiduu joma karibai».*

14 Maamina ẽbẽrarãba wabiɗa Dachi Mechiu Jesucristoɗe ijãaɗawẽa panuuɗe ¿saka ichimaa chi chuburia ʉtaa iɗiɗaima? Ichi ʉ̃rʉbena wabiɗa ũriɗawẽa panuuɗe ¿saka ijãaɗaima? Mauɗe aɓau biɗa ãchimaa jaradeaɗe wãwẽebʉrã ¿saka ichi ʉ̃rʉbena ũriɗaima? 15 Dachi Akõreba aɓa biɗa bʉiwẽebʉrã, ¿saka jaradeaɗe wãɗaima? Dachi Akõre beɗeaɗe naka ɓʉ kuɓuu: «Chi beɗea bia jaraɗe needuu ãrea biꞌia nuree».*

16 Maamina joma judiorãba chi beɗea bia Cristo ʉ̃rʉbena ijãaɗaabasii. Isaías kartaɗe naka ɓʉ kuɓuu: «Dai Mechiu, daiba jarapeɗaaɗa ¿kaiba ijãasma?»* 17 Biawãra ẽbẽrarãba Cristo ʉ̃rʉbena naa ũriɗai panuu, poyaa ijãaɗai baita.* 18 Maamina mʉʉba iɗiiruu: ¿Judiorãba mau beɗea ũriɗaabaska? Biawãra ũrisiɗau. Dachi Akõre beɗeaɗe naka ɓʉ kuɓuu:

«Ichi ʉ̃rʉbena joma nau iujãaɗe jarasiɗau. Mau beɗea kaitawẽ jaraɗe wãsiɗau».*

19 Mʉʉba waya iɗiiruu: ¿Judiorãba mau beɗea kuitaaɗaka baska? Maerã, kuitaasiɗau judiowãerãba kuitaapeɗaaɗa kĩra. Mauɗeeba Moisesba Dachi Akõreɗeeba judiorãmaa naa jarasii:

20 Mauɗe Isaiasba Dachi Akõreɗeeba wapeawẽa naka jarasii:

«Chi mʉ jʉrʉɗawẽa panaɗaba mʉ unusiɗau. Chi mʉ ʉ̃rʉbena iɗiɗawẽa panaɗarãmaa mʉ ʉ̃rʉbena kuitaabiasii».*

21 Maamina israelɗebenarã ʉ̃rʉbena Isaiasba naka jarasii:

«Ewaricha mʉ jua deabachii ẽbẽrarã sõ chaarea nuree mauɗe mʉʉɗe ijãaɗakaurã mʉʉmaa neeɗamera».*

Chi nuree judiorãba Cristoɗe ijãapeɗaaɗa

11 Mauɗeeba mʉʉba nau iɗiiruu: «¿Dachi Akõreba israelɗebenarã ichiɗirã ida ɓuska?» ¡Makawãema! Mʉ israelɗebenabʉ, Abrahamɗebena neeɗabʉ, Benjaminɗebena neeɗabʉ. 2 Dachi Akõreba naeɗe israelɗebenarã jʉrʉ adausii ichi puuru ɓuamera. Mauɗeeba ãchi ida ɓuwẽa ɓuu. Machiba Dachi Akõre beɗeaɗe Elías ʉ̃rʉbena ɓʉɗa kuitaa panuu. Eliasba Dachi Akõremaa israelɗebenarã ʉ̃rʉbena naka biꞌiwãe jarasii. 3 «Mʉ Mechiu, bichi baita berreabadaurã joma kenasiɗau mauɗe bichimaa ãnimara baa deabadau joma ãrisiɗau. Aɓaburu mʉ́turu ɓeesii, maamina mʉ siɗa beaɗai baita jʉrʉ panuu».* 4 Mauɗe Dachi Akõreba naka panausii: «Mʉʉba 7.000 ẽbẽrarã mʉ baita nu uru ɓuu. Maarã Baal* daaɗe õdarrɗeeba koɓeeɗakau».* 5 Ara mau kĩra nau ewariɗe biɗa Dachi Akõreba ichi sõbiaɗeeba dai judiorã ãreawãe panuu nu uru ɓuu. 6 Maka Dachi Akõreba ichi sõbiaɗeeba adausiibʉrã, daiba wau panuu kakua jʉrʉ adaubai basii. Daiba wau panuu kakua jʉrʉ adau ɓuasirã, makarã ichi sõbiaɗeeba jʉrʉ adaubai basii.

7 ¿Mau ʉ̃rʉbena saka kʉ̃risia panuma? Israelɗebenarãba Dachi Akõre puuru baɗai jʉrʉ panasmina makaɗaabasii. Maamina israelɗebenarã ãreawãe panuuba ijãasiɗau, Dachi Akõreba jʉrʉ adausiiɗeeba. Waabenarãba ijãaɗai kʉ̃riaɗaabasii. 8 Dachi Akõre beɗeaɗe naka ɓʉ kuɓuu:

9 Mauɗe judiorã rey Davidba mau ʉ̃rʉbena Dachi Akõremaa jarasii:

Dachi Akõreba judiowãerã karibaɗa

11 Nau mʉʉba iɗiiruu: ¿judiorãba Cristo ida ɓusiɗauɗeeba waa Dachi Akõre ome poyaa biꞌia nureaɗaabai panuka?* ¡Makawãema! Maumaarã maka wausiɗauɗeeba Dachi Akõreba judiowãerã karibabarii. Maka judiorãba jiwaaɗapeɗa ichi kʉ̃riaɗai. 12 Judiorãba Cristo ida ɓusiɗauɗeeba ãchi audeara Dachi Akõreba joma nau iujãaɗebena judiowãerã ãrea kariba ɓuu. Mauɗeeba chi judiorã waya Dachi Akõre ome biꞌia paneeduu ewariɗe ¿Dachi Akõreba jomaurã biꞌia karibaabaika?

13 Mʉʉba judiowãerãmaa nau jaraaruu. Mʉ Dachi Akõreba bʉiɗa ɓusii, machimaa jaradeamera. Mau mʉʉba joma biꞌia wau kʉ̃ria ɓuu. 14 Mʉʉba judiowãerãmaa jaradea ɓuuɗeeba kʉ̃ria ɓuu mʉ ẽbẽrarã judiorã biɗa mau beɗea ũriɗai jiwaa panuu kĩra. Maka Dachi Akõreba ãchiɗebena chi nuree karibai. 15 Dachi Akõreba judiorã ida ɓusiiɗeeba waabenarã nau iujãaɗebenarã ichi ome biꞌia ɓusii. Mauɗeeba Dachi Akõreba judiorã waya kʉ̃ria adauruuɗe ¿jãarã ome kãare sakaima? Ãchi siɗa biuɗarã kĩra panaɗa Dachi Akõre ome chokae nureaɗai.

16 Trigo naa ea junaaduuɗe pan wauɗapeɗa mau panɗebena Dachi Akõremaa aɓa deaduubʉrã, waabena pan siɗa Dachi Akõreɗebʉ. Mauɗe bakuru karr biꞌia ɓuubʉrã, chi bakuru jua siɗa biꞌia nuree.*

17 Waabenarã judiorã Dachi Akõreɗebena awara paneesiɗau olivo bakuru jua tʉʉɗa kĩra. Machi judiowãerã Dachi Akõreswãe panasiɗau olivo bakuru ichi du aɓa modeɗe wariɗa kĩra. Maamina machi ẽbẽrarã Dachi Akõreɗerã paneesiɗau chi bakuru jua chi ɓʉatuɗamaa kara nuɓuɗa kĩra. Maka jãabae Dachi Akõreba machi siɗa kariba ɓuu judiorã kariba ɓuaɗa kĩra.* 18 Maamina kʉ̃risiarã́sturu machi judiowãerã judiorã audeara Dachi Akõre daaɗe biꞌia nuree. Kĩrabásturu machi chi karrɗeeba chokae panuu. Chi karr machiɗeeba chokae ɓuuwãe.

19 Aɓa machiɗebenaba jarai ɓuu: «Dachi Akõreba judiorã ida ɓusii bakuru jua ɓʉatuɗa kĩra, mʉ mau bakuruɗe kara nuɓui baita». 20 Biawãra maka ɓuu. Maamina Dachi Akõreba ãchi ida ɓusii Cristoɗe ijãaɗaabasiiɗeeba. Maabae machi jʉrʉ adausii Cristoɗe ijãasiɗauɗeeba. Mauɗeeba machi judiorã audeara biꞌia nuree kʉ̃risiarã́sturu, maumaarã Dachi Akõre wapeadee panásturu. 21 Judiorãba ijãaɗawẽa panuu kakua Dachi Akõreba ãchi ida ɓusii bakuru jua ɓʉatuuruu kĩra. Ara mau kĩra machi judiowãerãba ijãaɗawẽebʉrã, Dachi Akõreba machi siɗa ida ɓui.

22 Ãrea kʉ̃risiásturu saka Dachi Akõreba ichi sõbiaɗeeba karibabarii mauɗe saka kastikabarii. Judiorãba ijãaɗaabasiiɗeeba Dachi Akõreba kastikapeɗa ãchi ida ɓusii. Mauɗe machi judiowãerã ichi sõbiaɗeeba kariba ɓuu mauɗe kariba ɓuai. Maamina mauɗeeba panaɗai panuu. Machiba ijãa panaɗawẽebʉrã, Dachi Akõreba machi siɗa kastikapeɗa ida ɓui bakuru jua ɓʉatuuruu kĩra. 23 Mauɗe chi judiorã Cristoɗe ijãaɗawẽa panuurãba ijãaduubʉrã, Dachi Akõreba ãchi waya kʉ̃ria adaui ichi poyaaɗeeba chi bakuru jua tʉʉɗamaa waya kara nuɓuuruu kĩra. 24 Biawãra machi judiowãerã olivo bakuru ichi du aɓa modeɗe wariɗa kĩra panasiɗau. Dachi Akõreba mau bakuruɗebena tʉʉpeɗa olivo bakuru uuɗamaa kara nuɓusii. Maka ɓuabai ɓumina Dachi Akõreba wausii. Mauɗeeba ¿judiorã waya poyaa kʉ̃ria adauwẽka chi uuɗa bakuru jua waya kara nuɓuuruu kĩra?

Dachi Akõreba joma israelɗebenarã karibai

25 Ãbarã, mʉʉba kʉ̃ria ɓuu Dachi Akõreba ne naeɗe kuitaabiawẽa ɓuaɗa machiba kuitaaɗai. Maka judiorã audeara biꞌia nuree kʉ̃risiaɗaabai. Dachi Akõreba naeɗe kuitaabiawẽa ɓuaɗa naubʉ: ãrea judiorã sõ chaarea paneesiɗau mauɗe maka paneeɗai aɓa joma chi Cristoɗe ijãaɗai panuu judiowãerãba ijãaduuɗaa. 26 Maka Israel puuru Dachi Akõreba joma karibai. Dachi Akõre beɗeaɗe naka ɓʉ kuɓuu:

28 Judiorãba chi beɗea bia Jesús ʉ̃rʉbena ida ɓu panuuɗeeba Dachi Akõre ome chi kĩramaabʉ. Mauɗeeba machi judiowãerã ẽbẽrarã Dachi Akõreɗerã poyaa nureaɗai. Maamina Dachi Akõreba ãchi nabẽraeɗebenarã jʉrʉ adausiiɗeeba wabiɗa kʉ̃ria ɓuu. 29 Biawãra Dachi Akõreba deaɗa juakaa adaukau. Ichiba iuɗa ida ɓukau. 30 Machi judiowãerãba naeɗe Dachi Akõreɗe ijãaɗakau basii. Maamina judiorãba ijãaɗawẽa panuuɗeeba jãabae Dachi Akõreba machi kĩra chuburia ɓuu. 31 Maarãba jãabae ijãaɗakau, Dachi Akõreba kĩra chuburiamera machi judiowãerã kĩra chuburia ɓuu kĩra.* 32 Biawãra Dachi Akõreba joma jʉ̃akuasii ũribabaswãe nureeɗeeba. Maka wausii joma kĩra chuburiai baita.

Dachi Akõre baita panásturu

12 Mauba ãbarã, Dachi Akõreba machi kĩra chuburiasiiɗeeba, mʉʉba machimaa chi chuburia iɗiiruu ara machi Dachi Akõremaa deaɗamera, ãnimara baa deabadau kĩra. Mau ãnimara biuɗa audeara, ichi baita biꞌia panásturu machi biꞌia unumera. 2 Nau iujãaɗebenarãba waubadau kĩra nibarã́sturu, maumaarã kʉ̃risia wiɗi Dachi Akõreba dea ɓuu kakua jipa nibásturu. Maka machiba kuitaaɗai chi Dachi Akõreba kʉ̃ria ɓuu. Joma ichiba kʉ̃ria ɓuu biꞌia ɓuu, jipa ɓuu mauɗe ichiba biꞌia unu ɓuu.

3 Dachi Akõreba ichi sõbiaɗeeba mʉ ɓusii ichi baita ne wau ɓuamera. Mauɗeeba mʉʉba machimaa nau jaraaruu: aɓau biɗa kʉ̃risiabai ɓuu ara ichi chi mechiu nii. Machiba Cristoɗe ijãapeɗaaɗaɗeeba Dachi Akõreba machicha aꞌawaraa deasii ne wauɗamera. Mauɗeeba ichiba deaɗa kĩra machiba wau panuu biꞌia kʉ̃risiásturu. 4 Dachi kakua aɓa ɓumina dachi kakuaɗe ãrea panuu: jua, jʉ̃rʉ, boro, maucha ne joma. Maamina dachi kakuaɗe nureerãba araɓauɗe wauɗakau. 5 Ara mau kĩra dachi ãrea panumina, Cristo ome panuuɗeeba kakua aɓaburu nii kĩra panuu. Maka dachi joma kakua aɓaɗe ãbua panuu.

6 Dachi Akõreba ichi sõbiaɗeeba dachicha ne wauɗamera aꞌawaraa deasii. Ichiba chi nureerãmaa deasii ichi baita berreaɗamera. Maka deaɗakasiibʉrã, ãchiba biawãra ijãa panuuɗeeba maka berreaɗai panuu. 7 Chi nureerãmaa deasii waabenarã aiɗaɗamera. Maka deaɗakasiibʉrã, waabenarã aiɗaɗai panuu. Chi nureerãmaa deasii ichi beɗea jaradeaɗamera. Maka deaɗakasiibʉrã, ichi beɗea jaradeaɗai panuu. 8 Chi nureerãmaa deasii ãbarã aiɗa panuuɗeeba biꞌia ijãaɗamera. Maka deaɗakasiibʉrã, ãbarã aiɗaɗai panuu biꞌia ijãaɗamera. Chi nureerãmaa deasii ne kaebea dea panuuɗeeba waabenarã aiɗaɗamera. Maka deaɗakasiibʉrã, sõbiaɗeeba deaɗai panuu. Chi nureerãmaa deasii chi ijãabadaurã jaradea ua ɓuabarii nureaɗamera. Maka deaɗakasiibʉrã, jipa wau nureaɗai panuu. Mauɗe chi nureerãmaa deasii waabenarã kĩra chuburiaɗamera. Maka deaɗakasiibʉrã, kĩrajʉʉɗeeba kĩra chuburiaɗai panuu.

9 Sõɗeeba chiya kʉ̃ria panásturu. Joma kachirua ida ɓústuru. Chi bia ãrea wau panásturu. 10 Biawãra kʉ̃riaɗeeba chiya kʉ̃ria panásturu. Kʉ̃risia sõbiaɗeeba chiya wapeadee panásturu mauɗe waabenarã ʉ̃rʉbena biꞌia kʉ̃risiásturu. 11 Koꞌoa panarã́sturu, maumaarã chokekea panásturu. Chi Dachi Mechiu Jesusba kʉ̃ria ɓuu sõɗeeba joma wáusturu. 12 Dachi Akõreɗebena ne adoeɗai kuitaa panuuɗeeba kĩrajʉʉ panásturu. Biꞌiwãe panuuɗe dauchia jãadua panásturu. Ewaricha Dachi Akõremaa ʉtaa iɗísturu. 13 Ẽbẽrarã Dachi Akõreɗerã chi nejarr barauwãe nuree aiɗásturu. Chi machi deɗe needuu biꞌia irsibísturu.

14 Chi machi kachirua wauɗai baita wãraabadaurãmaa biꞌia berreásturu. Dachi Akõremaa ʉtaa iɗísturu, ichiba waabenarã biꞌia panabiamera; ʉtaa iɗirã́sturu ichiba ãchi kachirua panabiamera. 15 Chi kĩrajʉʉ nuree ome kĩrajʉʉ panásturu. Chi kĩra nomaa nuree ome kĩra nomaa panásturu. 16 Jomaurã ome biꞌia panásturu. Waabenarã audeara biꞌia nuree kʉ̃risiarã́sturu, maumaarã chi miichuburi nuree ome biꞌia panásturu. Kʉ̃risiarã́sturu machiba waabenarã audeara biꞌia kuitaa panuu.

17 Aɓauba machi kachirua wauruubʉrã, ara mau kĩra waurã́sturu. Jomaurã daaɗe biꞌia wáusturu. 18 Machiba jʉrʉ́sturu jomaurã ome jirukaraayuwãe panaɗai baita. 19 Ãbarã, aɓauba machi kachirua wausiibʉrã ara mau kachirua waurã́sturu. Maumaarã ida ɓústuru Dachi Akõreba kastikamera. Dachi Akõre beɗeaɗe naka ɓʉ kuɓuu: «Mʉaburu chi nebʉra kastikai. Jomaurãmaa deai ãchiba waupeɗaaɗa kĩra», a jara ɓuu Dachi Mechiuba.* 20 Mauɗe Dachi Akõre beɗeaɗe naka ɓʉ kuɓuu: «Bichi kĩramaabarii jarrbisia ɓuubʉrã kobise. Obisia ɓuubʉrã bania dease. Maka wauruubʉrã, ichi ãrea kĩra nejasia ɓuabii».* 21 Aɓauba machi kachirua wauruubʉrã ara mau kĩra waurã́sturu. Maumaarã biꞌia wáusturu ichi kĩra nejasiapeɗa ichiba kachirua wau ɓuu ida ɓuamera.*

Chi jaradea ua ɓuabadaurã juaɗe panásturu

13 Dachi jomaurã chi nau iujãaɗebena jaradea ua ɓuabadaurã juaɗe panaɗai panuu Dachi Akõreba maarã ɓusiiɗeeba. Aɓa biɗa wãꞌãe Dachi Akõreba ɓuɗawãe. 2 Mauɗeeba chi nau iujãaɗebena jaradea ua ɓuabadaurã kʉ̃riawẽa ɓuuba Dachi Akõreba ɓuɗa kʉ̃riawẽa ɓuu. Chi maka kʉ̃riawẽa nuree ãchi jaradea ua ɓuabariiba nebʉra kastikakuai. 3 Biawãra chi jipa wau nureerãba ãchi karrba kastikai wapeaɗakau, maumaarã chi kachirua waubadaurãba maarã wapeabadau. Mauɗeeba machi karrarã wapeawẽa panaɗai kʉ̃ria panuubʉrã, biꞌia wáusturu ãchiba biꞌia unuɗamera. 4 Biawãra machi jaradea ua ɓuabadaurã Dachi Akõreba ichi baita bari trajabadaurã kĩra ɓusii machi aiɗaɗamera. Maamina machiba kachirua wauduubʉrã, maarã wapeásturu biawãra ãrea kastikaɗai panuuɗeeba.* Ãchi Dachi Akõre baita bari trajabadaurã kĩra nuree kachirua wau nuree kastikaɗai baita. 5 Mauɗeeba machi nau iujãaɗebena jaradea ua ɓuabadaurã juaɗe nureaɗai panuu kastikabiarãaɗamera. Mau awara ãchi juaɗe nureaɗai panuu, kuitaa panuuɗeeba maka wauɗai jipa ɓuu. 6 Mauɗeeba machiba chi karrarãmaa deabadau nejarra deaɗai panuu, ãchi Dachi Akõre baita bari trajabadaurã kĩra panuuɗeeba, mauɗe maka waubadauɗeeba.

7 Jomaurãmaa deásturu machiba ãchicha deaɗai panuu kĩra. Machi jaradea ua ɓuabadaurãmaa chi nejarra deaɗai panuu deásturu. Machiba wapeadee panaɗai panuu wapeadee panásturu. Machiba chi biꞌia jaraɗai panuurãmaa biꞌia jarásturu.

8 Machiba chi deaɗai panuu uru panuubʉrã, waya deaɗawẽa panarã́sturu. Aɓaburu chiya kʉ̃ria panásturu. Chi waabenarã kʉ̃ria ɓuuba joma Moisesba ɓʉɗa wau ɓuu. 9 Mau Moisesba ɓʉɗaɗe jara ɓuu: «Junebena miakãiɗa ome kãi ɓeerã́se, mia bearã́se, nechiruarã́se, aɓauba uru ɓuu kʉ̃riarã́se».* Mau beɗea mauɗe joma mau Moisesba ɓʉɗaɗe jara ɓuu siɗa nau kʉ̃risia aɓaɗe joma jara ɓuu: «Waabenarã kʉ̃riáse ara bichi kʉ̃ria ɓuu kĩra».* 10 Chi kʉ̃ria uru ɓuuba waabenarã kachirua waukau. Waabenarã kʉ̃ria ɓuuɗe joma Moisesba ɓʉɗa wau ɓuu.

11 Joma mau wau panásturu kuitaa panuuɗeeba nau ewari saka ɓuu. Ʉ̃rʉmásturu. Waa kãi duanarã́sturu. Dachi nau iujãa kachiruaɗebena karibai aude ara kaita ɓuu dachiba naeɗe ijãapeɗaaɗa audeara. 12 Nau ewari kachirua wãꞌãemaa ɓuu ẽsabuɗebena ewarimaa ɓuu kĩra. Mauɗeeba dachiba kachirua ida ɓuɗapeɗa biꞌia wauɗai panuu. Maka kachiruaɗebena joma nu panaɗai kokoroaba ichi ʉ̃rʉ chaarea ɓuu jʉ̃barii ãyadaa jʉ̃ ɓuu kĩra. 13 Dachi kĩra jipa nibaɗai panuu ãyadaa nibabadau kĩra. Kĩrajʉʉ waubadau ewariɗe biu nibaɗaabai panuu, kĩra nejasia wau nibaɗaabai panuu, oa kachirua berrea panaɗaabai panuu, mauɗe aɓauba uru ɓuu ʉ̃rʉbena kachirua kʉ̃risiaɗaabai panuu. 14 Maumaarã Dachi Mechiu Jesucristo nibaɗa kĩra nibásturu. Nau kakuaba kachirua wau kʉ̃ria ɓuu wauɗai kʉ̃risiarã́sturu.

Ãbarã ʉ̃rʉbena kachirua jaraɗaabai panuu

14 Aɓa ãbaba dachiba Jesucristoɗe ijãa panuu ʉ̃rʉbena wabiɗa ãrea kuitaawẽa ɓuubʉrã, ichi biꞌia irsibísturu. Maamina ichiba adua ɓuu ʉ̃rʉbena ichi ome oa kachirua berrearã́sturu. 2 Mʉʉba nau jara ɓuu: chi nuree ãbarãba kuitaa panuu ne joma koɗai panuu. Maamina chi nuree ãbarãba dachiba Jesucristoɗe ijãa panuu ʉ̃rʉbena wabiɗa ãrea kuitaawẽa panuuɗeeba kʉ̃risia panuu aɓaburu ne uu nuɓuuɗebena koɗai panuu. 3 Maamina chi ne joma kobariiba chi ne joma kokau ida ɓuubai ɓuu. Mauɗe chi ne joma kokauba ne joma kobariimaa kachirua jaraabai ɓuu, Dachi Akõreba omea biꞌia irsibisiiɗeeba. 4 ¿Bichi kaima maka aɓau baita bari trajabariimaa kachirua jarai baita? Ichi chibaríburu jarai biꞌia wau ɓuu maebʉrã kachirua wau ɓuu. Maamina Dachi Mechiuba jarai joma ichi baita bari trajabadaurãba biꞌia wau panuu, ichi poyaaɗeeba aiɗa ɓuuɗeeba biꞌia wau panaɗamera.

5 Mauɗe chi nuree ãbarãba kʉ̃risia panuu bari panabadau ewari aude bibuara ɓuu waabenarã ewari audeara. Waabenarã ãbarãba kʉ̃risia panuu ewari joma araɓauɗe panuu. Maamina ãchicha sõɗeeba kʉ̃risia panuu kĩra, maka wauɗai panuu. 6 Chi bari panabadau nubariiba Dachi Mechiu baita maka wau ɓuu.* Chi ne joma kobariiba maka kobarii Dachi Mechiu wapeadee ɓuuɗeeba. Mauɗeeba kooruuɗe ichiba Dachi Akõremaa ichíturu kiɗibai abarii. Mauɗe chi ne joma kokauba maka kokau Dachi Mechiu wapeadee ɓuuɗeeba. Mauɗeeba kooruuɗe ichia biɗa Dachi Akõremaa ichíturu kiɗibai abarii.

7 Aɓa biɗa ara ichiɗeeba chokae ɓuabai. Mauɗe aɓa biɗa ara ichiɗeeba biubai. 8 Chokae panuuɗe Dachi Mechiu baita chokae panuu. Mauɗe biuduuɗe Dachi Mechiu baita biuɗai. Maka chokae panuubʉrã maebʉrã biupeɗaaɗabʉrã Dachi Mechiuɗebʉ.

9 Cristo biusii, biuɗarã Mechiu bai baita. Mauɗe chokae jiradusii, chi chokae nuree Mechiu bai baita. 10 Mau kakua ¿sakãe bichi ãba jidea ɓuma? ¿Sakãe jãu kĩramaa ɓuma? Joma Dachi Akõre daaɗe panaɗai dachicha waupeɗaaɗa ichiamera.* 11 Dachi Akõre beɗeaɗe naka ɓʉ kuɓuu:

12 Maka dachicha waupeɗaaɗa Dachi Akõremaa joma jaraɗai. 13 Mauɗeeba aɓauba wau ɓuu ʉ̃rʉbena waa kachirua berreaɗaabai panuu. Maumaarã sõɗeeba naka kʉ̃risiaɗai panuu: dachiba wau panuuɗeeba ãba aɓa biɗa kachiruaɗe ɓaebiɗaabai panuu. 14 Mʉ Dachi Mechiu Jesucristo ome ɓuuɗeeba biawãra kuitaa ɓuu aɓa biɗa chiko kachirua ɓuuwãe. Maamina aɓauba barikia chiko koi kachirua kʉ̃risiaruubʉrã, ichiba mau koobai ɓuu. 15 Mauɗeeba chi bichiba kobarii kakua bichi ãba ichi sõɗe kachirua ɓeeruubʉrã, bichi kʉ̃riaɗeeba niiwãe. Chi bichiba kobarii kakua bichi ãba kĩra nomaabirã́se Cristo mau kakua biusiiɗeeba. 16 Machiba wau panuu biꞌia kuitaa panuu. Maamina waabenarãba mau ʉ̃rʉbena kachirua jaraaduubʉrã, waurã́sturu kachirua berrearãaɗamera. 17 Dachi Akõreba ichi juaɗe panuurãmaa jarakau kãare koɗai panuu mauɗe kãare doɗai panuu. Maumaarã kʉ̃ria ɓuu ãchiba ichi Jauriɗeeba jipa wau panaɗai, jirukaraayuwãe panaɗai mauɗe kĩrajʉʉ panaɗai. 18 Chi maka Cristo baita ne waubadaurã Dachi Akõreba biꞌia unu ɓuu. Ẽbẽrarã biɗa mau biꞌia unubadau.

19 Mauɗeeba jʉrʉɗai panuu ãbarã ome jirukaraayuwãe nureaɗai baita. Maka chiya aiɗa panaɗai biꞌia ijãaɗai baita. 20 Machiba chiko ko panuuɗeeba Dachi Akõreba aɓau sõɗe wauɗa ida ɓurã́sturu. Biawãra Dachi Akõre daaɗe chiko joma biꞌia ɓuu. Maamina chi chiko kakua aɓau kachiruaɗe ɓaebiɗai biꞌia ɓuuwãe. 21 Biꞌia ɓuu kiuru koobai, uva ɓaa doobai, maebʉrã ne aɓa biɗa waubai bichi ãba kachiruaɗe ɓaebirãamera.

22 Bichiba ne joma koi ɓuu kʉ̃risia ɓuubʉrã, maebʉrã ne joma kokau kʉ̃risia ɓuubʉrã, aɓa bichiaburu Dachi Akõre omeeba mau kuitaaɗai panuu. Biawãra dachiba wau panuu kakua dachi sõɗe kachirua kʉ̃risiaɗawẽebʉrã, ãrea kĩrajʉʉ panaɗai. 23 Maamina chi «Nau koobai ɓuu» a kʉ̃risia ɓuuba mau kooruubʉrã, ichi sõɗe kachirua ɓeei, mau kachirua waui ɓuu kʉ̃risia ɓuuɗeeba. Biawãra chi dachiba wau panuu jipa ɓuuwãe a kʉ̃risia panuubʉrã, maka wauduuɗe, kachirua wau panuu.

Waabenarã aiɗásturu biꞌia panaɗamera

15 Dachiba ijãa panuu ʉ̃rʉbena ãrea kuitaa nureerãba dachiba kʉ̃ria panuu wauɗai audeara, chi adua nuree aiɗaɗai panuu. 2 Maumaarã waabenarãba kʉ̃ria panuu wauɗai panuu maarã biꞌia nureaɗamera mauɗe biꞌia ijãaɗamera. 3 Biawãra Cristo biɗa ara ichiba kʉ̃ria ɓuu waubasii, maumaarã Dachi Akõre beɗeaɗe ɓʉ kuɓuu kĩra makasii. Naka ɓʉ kuɓuu: «Dachi Akõre, ãchiba bichi ʉ̃rʉbena kachirua jarasiɗauɗe mʉ ʉ̃rʉbena siɗa kachirua jarasiɗau».* 4 Joma Dachi Akõre beɗeaɗe ɓʉɗa dachimaa jaradeai baita ɓuu. Dachi sõbiabiabarii mauɗe aiɗabarii joma dauchia jãadua panaɗamera. Maka dachiba biawãra kuitaa panuu Dachi Akõre ome ewaricha biꞌia panaɗai. 5 Mʉʉba kʉ̃ria ɓuu ara mau dachi sõbia nureabiabarii mauɗe joma dauchia jãadua panabiabarii Dachi Akõreba machi aiɗa ɓuai, araɓauɗe kʉ̃risiaɗamera Jesucristoba kʉ̃ria ɓuu kĩra. 6 Maka machiba Dachi Bajãaɗebena Mechiu Jesucristo Akõremaa ãbua biꞌia berrea panaɗai.

Beɗea bia Cristo ʉ̃rʉbena judiowãerã baita biɗa ɓuu

7 Cristoba machi biꞌia irsibiɗa kĩra, chiya biꞌia irsibísturu. Mau unuuduuɗe ẽbẽrarãba Dachi Akõremaa biꞌia berreaɗai. 8 Mʉʉba jaraaruu: Cristo neesii dai judiorã karibai baita. Dachi Akõreba judiorã nabẽraeɗebena chi mechiurã ome beɗea deaɗa Cristoba wausii. Mauba unubisii ichiba jara ɓuu kĩra wau ɓuabarii. 9 Mauɗe Cristo neesii judiowãerãba Dachi Akõremaa biꞌia berreaɗamera ãchi kĩra chuburiasiiɗeeba. Mau ʉ̃rʉbena Dachi Akõre beɗeaɗe naka ɓʉ kuɓuu:

12 Mauɗe Isaiasba ichi kartaɗe naka ɓʉsii:

13 Joma chi bia dachiba eseɗau panuu Dachi Akõreba deai. Machiba ichiɗe ijãa panuuɗeeba mʉʉba kʉ̃ria ɓuu ichiba machi ãrea kĩrajʉʉbiai mauɗe jirukaraayuwãe duanubiai. Maka Dachi Akõre Jauri poyaaɗeeba machiba biꞌia kuitaaɗai joma chi bia dachiba eseɗau panuu biawãra adauɗai.

Pabloba judiowãerã jaradeabarii

14 Ãbarã, mʉʉba kuitaa ɓuu machiba biꞌia biawãra wau panuu mauɗe ãrea kuitaa panuuɗeeba poyaa chiya jaradeaɗai. 15 Maamina nau kartaɗe mʉʉba chi ɓee kʉ̃risia ɓʉsii machiba kĩrabaɗamera. Maka ɓʉsii Dachi Akõreba ichi sõbiaɗeeba mʉ ɓusiiɗeeba, 16 judiowãerã tãeɗe Jesucristo baita bari trajabarii ɓuamera. Mauɗeeba chi beɗea bia Dachi Akõre ʉ̃rʉbena maarãmaa jaradea ɓuu. Ijãaduubʉrã paare judioba ãnimara baa dearuu kĩra mʉʉba ãchi Dachi Akõremaa dea ɓuu biꞌia unumera. Mauɗe Dachi Akõre Jauriba ãchi Dachi Akõre baita biꞌia ɓui.

17 Jesucristo ome ɓuuɗeeba mʉʉba Dachi Akõre baita wau ɓuu kakua ãrea kĩrajʉʉ ɓuu. 18 Maamina ara mʉ ʉ̃rʉbena ne aɓa biɗa biꞌia berreabai. Biꞌia berrearuu Cristoba mʉʉɗeeba wauɗa ʉ̃rʉbenáturu. Biawãra mʉʉɗeeba Cristoba aiɗasii judiowãerãba Dachi Akõreɗe ijãaɗamera. Mʉʉba jaradea ɓuuɗeeba, wau ɓuuɗeeba, 19 mauɗe ẽbẽrarãba ne poyaa wauɗakau wau ɓuuɗeeba maka aiɗasii. Mʉʉba Dachi Akõre Jauri poyaaɗeeba joma mau wausii. Jerusalenɗebena Ilírico druaɗaa beɗea bia Cristo ʉ̃rʉbena mʉʉba joma jaradeai ɓuaɗamaa jaradeasii. 20 Biawãra chi beɗea bia Cristo ʉ̃rʉbena mʉʉba jaradea kʉ̃ria ɓuu chi wabiɗa ũriɗakaurãmaa. Aɓauba jaradea ɓuumaa mʉ traja kʉ̃riawẽma. 21 Maka mʉʉba Dachi Akõre beɗeaɗe ɓʉ kuɓuu kĩra wau ɓuu. Naka ɓʉ kuɓuu:

«Ichi ʉ̃rʉbena jaraɗawẽa panuurãmaa, ãchiba ũriɗai. Ichi ʉ̃rʉbena ũriɗawẽa panuurãba kuitaaɗai».*

Pablo Romaɗaa wãi kʉ̃risiaɗa

22 Mauɗeeba ɓes ãrea mʉ machimaa wã kʉ̃ria ɓumina poyaa wãwẽa ɓuu. 23 Maamina namaria joma jaradeasiiɗeeba ara nama kaita wãꞌãema sama Cristo ʉ̃rʉbena jaradeai. Ãrea ba ɓuasii mʉ machi ichiaɗe wãi kʉ̃ria ɓuasiiɗeeba, 24 España druaɗaa wãaruuɗe machimaa wãi kʉ̃ria ɓuu. Machi baara kĩrajʉʉ ɓuaɗaupeɗa kʉ̃ria ɓuu machiba poyaa aiɗaɗai mʉ biꞌia wãmera. 25 Jãabae mʉ Jerusalenɗaa wãi chi nejarra ẽbẽrarã Dachi Akõreɗerãmaa deai baita. 26 Mau chi nejarra ãbarã Macedonia druaɗebenarãba mauɗe Acaya druaɗebenarãba kĩrajʉʉ araa pesiɗau ẽbẽrarã Dachi Akõreɗerã Jerusalenɗebena chi nejarr barauwãe nuree aiɗaɗai baita. 27 Mau ãbarã judiowãerãba kĩrajʉʉ mau chi nejarra ãbarã judiorã baita araa pesiɗau. Biawãra maka wauɗai panasiɗau judiorãmaa deaɗai baraa panasiɗauɗeeba. Judiowãerãba ne joma biꞌia Dachi Akõre ʉ̃rʉbena judiorãɗebena adausiɗauɗeeba, ãbarã judiorãmaa ne bia nau iujãaɗebena deaɗai panuu. 28 Mau chi nejarra ãbarã Jerusalenɗebenarãmaa dearuuɗe mʉ España druaɗaa wãi. Wãaruuɗe machimaa wãi. 29 Mʉʉba kuitaa ɓuu machimaa neeruuɗe Cristoba dachi ãrea aiɗai.*

30 Ãbarã, Dachi Akõre Jauriɗeeba dachi chiya kʉ̃ria panuu. Mauɗeeba Dachi Mechiu Jesucristoɗeeba mʉʉba machimaa chi chuburia iɗiiruu mʉ aiɗaɗai Dachi Akõremaa ʉtaa iɗiɗamera. 31 Ichimaa ʉtaa iɗísturu Judea druaɗebena Jesusɗe ijãaɗakaurãba mʉ kachirua waurãaɗamera. Mauɗe ʉtaa iɗísturu mʉʉba chi nejarra ẽbẽrarã Dachi Akõreɗerã Jerusalenɗebenarã baita adoeruu biꞌia adauɗamera. 32 Maka Dachi Akõreba kʉ̃riaruubʉrã, mʉ machimaa kĩrajʉʉ wãi mauɗe machi tãeɗe biꞌia kʉrrjĩru ɓuai. 33 Mʉʉba kʉ̃ria ɓuu chi Dachi Akõre dachi jirukaraayuwãe duanabiabarii joma machi baara ɓuai. Biꞌia ɓuu maka ɓuai.

Pabloba nau kartaɗe aanama ɓʉɗa

16 Mʉʉba machimaa dachi neekau Febe ʉ̃rʉbena biꞌia jaraaruu. Ichi Cencrea puuruɗe ijãabadaurã aiɗabariibʉ.* 2 Dachi Mechiu trʉ̃ɗeeba biꞌia irsibísturu ẽbẽrarã Dachi Akõreɗerãba wauɗai panuu kĩra. Ichiba ẽbẽrarã ãrea aiɗasii. Mʉ siɗa ãrea aiɗasii. Mauɗeeba ne jomaɗe ichi aiɗásturu.

3 Neekau Priscilamaa mauɗe ãba Aquilamaa jarásturu mʉʉba kʉ̃ria ɓuu maarã biꞌia panaɗai. Ãchiba mʉ ome araɓau traju Jesucristoɗe wau panuu. 4 Beraa biukausiɗau mʉ aiɗaɗai baita. Mʉʉba mauɗe joma ãbarã judiowãerãba ãchimaa ãchíturu kiɗibai abadau. 5 Mauɗe ãbarã ãchi deɗe araa ãbua imibadaurãmaa jarásturu mʉʉba kʉ̃ria ɓuu ãchi biꞌia duanaɗai. Mʉ ãba ãrea kʉ̃ria ɓuu Epenetomaa ara mau kĩra jarásturu. Acaya druaɗe ichiba naa Jesucristoɗe ijãasii. 6 Neekau Mariamaa jarásturu mʉʉba kʉ̃ria ɓuu ichi biꞌia ɓuai. Ichiba machi ãrea aiɗa ɓuu. 7 Mʉ ãbarã judiorã Andronicomaa mauɗe Juniamaa ara mau kĩra jarásturu. Waabenarã biꞌia kuitaa panuu maarã Cristoba bʉiɗarã. Mʉʉba Cristoɗe ijãai naeɗe maarãba ijãasiɗau.

8 Mʉ ãba Ampliasmaa jarásturu mʉʉba kʉ̃ria ɓuu ichi biꞌia ɓuai. Dachi Mechiu Jesucristoɗe, mʉʉba ichi ãrea kʉ̃ria ɓuu. 9 Ãba Urbanomaa jarásturu mʉʉba kʉ̃ria ɓuu ichi biꞌia ɓuai. Ichiba dai ome ãbua Jesucristo ʉ̃rʉbena jaradea ɓuu. Ãba Estaquismaa biɗa ara mau jarásturu. Ichi siɗa mʉʉba kʉ̃ria ɓuu. 10 Ãba Apelesmaa jarásturu mʉʉba kʉ̃ria ɓuu ichi biꞌia ɓuai. Ichiba unubisii Cristo biawãra ijãa ɓuu. Joma Aristóbulo deɗebenarãmaa biɗa ara mau kĩra jarásturu. 11 Mʉ ãba judio Herodionmaa jarásturu mʉʉba kʉ̃ria ɓuu ichi biꞌia ɓuai. Narciso deɗebenarã Dachi Mechiuɗe ijãa nureerãmaa jarásturu mʉʉba kʉ̃ria ɓuu ãchi biꞌia duanaɗai. 12 Neekau Trifenamaa mauɗe Trifosamaa jarásturu mʉʉba kʉ̃ria ɓuu maarã biꞌia panaɗai. Ãchiba Dachi Mechiu baita biꞌia wau panuu. Mauɗe neekau Persidamaa ara mau jarásturu. Mauba Dachi Mechiu baita biꞌia wau ɓuu. 13 Ãba Rufo Dachi Mechiuba jʉrʉ adauɗamaa mauɗe ichi nawemaa jarásturu mʉʉba kʉ̃ria ɓuu maarã biꞌia panaɗai. Ichi nawe mʉ nawe kĩra nii. 14 Ãba Asincritomaa, Flegontemaa, Hermesmaa, Patrobasmaa, Hermasmaa mauɗe ãbarã ãchi ome duanuumaa jarásturu mʉʉba kʉ̃ria ɓuu ãchi biꞌia duanaɗai. 15 Mauɗe ãba Filologomaa, Juliamaa, Olimpasmaa, Nereomaa, ichi neekaumaa mauɗe joma ẽbẽrarã Dachi Akõreɗerã ãchi ome duanuumaa jarásturu mʉʉba kʉ̃ria ɓuu ãchi biꞌia duanaɗai. 16 Biawãra kʉ̃riaɗeeba chiya biꞌia berreásturu.* Joma Cristo ẽbẽrarãba kʉ̃ria panuu machi biꞌia duanaɗai.

17 Ãbarã, mʉʉba machimaa chi chuburia iɗiiruu kauwa nureaɗamera. Waabenarãba ãbarãmaa aꞌawaraa kʉ̃risiabiabadau. Chi machiba biawãra beɗea kuitaapeɗaaɗa ãchiba ãyaa jaradeabadau. Mau ẽbẽrarã ome ãbua panarã́sturu. 18 Maarãba Dachi Mechiu Jesucristoba kʉ̃ria ɓuu wau panuuwãe, maumaarã ãchiba kʉ̃ria panuu wau panuu. Ãchi mipitaa berrea panuuɗeeba, chi biꞌia kʉ̃risiaɗawẽa nuree setaa kũruabadau.

19 Jomaurãba kuitaa panuu machiba Dachi Akõre beɗea biawãra wau panuu. Mauɗeeba mʉ kĩrajʉʉ ɓuu. Biawãra mʉʉba kʉ̃ria ɓuu machiba biꞌia wauɗai kuitaaɗai mauɗe kachirua wauɗaabai. 20 Chi dachi jirukaraayuwãe ɓuabiabarii Dachi Akõreba kãꞌãabariwãeɗe Satanás poyaapeɗa machi juaɗe ɓui.* Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai.

21 Ãba Timoteo mʉ ome ãbua jaradea ɓuuba kʉ̃ria ɓuu machi biꞌia duanaɗai. Mauɗe mʉ ãbarã judiorã Lucioba, Jasonba mauɗe Sosipateroba kʉ̃ria panuu machi biꞌia duanaɗai.

22 Mʉ Terciobʉ. Pabloba berrea ɓuu mʉʉba nau kartaɗe ɓʉmaa ɓuu. Dachi Mechiu Jesucristoɗeeba mʉʉba kʉ̃ria ɓuu machi biꞌia duanaɗai.

23 Ãba Gayo biɗa kʉ̃ria ɓuu machi biꞌia duanaɗai. Mʉ ichi deɗe ɓuu. Ãbarã jomaurã ichi deɗe araa ãbua imi panuu. Nau puuruɗebena chi nejarra nubarii Erastoba mauɗe ãba Cuarto kʉ̃ria panuu machi biꞌia duanaɗai.

24 Mʉʉba kʉ̃ria ɓuu Dachi Mechiu Jesucristoba ichi sõbiaɗeeba machi aiɗa ɓuai.

Pabloba Dachi Akõremaa biꞌia jaraɗa

25 Mʉʉba chi beɗea bia Jesús ʉ̃rʉbena jaradea ɓuabarii. Ara mau beɗeaɗeeba Dachi Akõreba machi poyaa aiɗai chaarea nureaɗamera. Mau beɗea Dachi Akõreba naeɗe kuitaabiawẽa ɓuasii maamina iɗibae kuitaabiasii. Ichi baita berreabadaurãba mau kartaɗe ɓʉsiɗau. Dachi Akõre biukauba maka ɓʉbiasii druachaɗebenarãba ũriɗapeɗa Jesucristoɗe ijãaɗamera. Dachi Akõremaa biꞌia berreaɗai panuu. 26 —. 27 Ichi aɓaburu nii. Ne joma kuitaa nii. Jesucristoɗeeba dachiba ewaricha ichimaa biꞌia berreaɗai panuu. Biꞌia ɓuu maka ɓuai.