5 Biʼia ãrĩã beɗeaɗayua warrarã baare

¿MAKA ASERUUBɄRÃ SAKA NIBAIBA?

Chi akõrerã ãchi warrarã baare biʼia ãrĩã beɗeabudauɗe, ãchi chiya saka sentibadau mauɗe saka kʉ̃risiabadau jarabadaa.

¿SAKAYUA NAU IMPORTANTE ÃRĨÃ ƁUA?

Chi libro Tú no me escuchas, yo no te entiendo jãuba jaraɓua saka sentibadau chi akõrerã. “Warrarã ãchi chuburi kirureeɗe joma jara kʉ̃riabadaa ãchi akõrerãmaa, maamina ãchi kũudrãa bawapeɗaaɗakare jaraɗakaa kãare saka pasamaaɓuu ãchi ome, mauɗe chi akõrerã ome biɗa duanaɗa kʉ̃riaamaabadaa mauɗe kosa pasakoɓoosii siɗa jaraɗaamaa”. Maamina jãma ãchi du aɓa buekaɗaabayua chi kãare pasakuɓuu ome.

¿KÃARE ASEI ƁUA?

Bichi warr beɗea kʉ̃riaruuɗe beɗeaba ichi ome. Bariara bichi warr ewarimaa biɗa beɗea kʉ̃riaruuɗe beɗeaba ichi ome.

“Chi bichi warr naeɗe jaraabasiibʉrã, maamina ẽsebuɗaa a las 11 o 12ɗaa neepeɗa, mambea bichimaa ichi baraa kuɓuu jara kʉ̃riakuɓuubʉrã, bichia sakayua mʉmaa naeɗe jaraabaɗaba a kʉ̃risiarãaba. Makãrã bichia bichi warrba ichia jara kʉ̃riaɓuu, ichi korasonɗeeba jara kʉ̃riaɓuu ũriñua” (Lisa).

“Mʉ temprano kãiɓei bustabarii, maamina besesɗe ewarimaa mʉ warrarã imiɗapeɗa mambea beɗea kʉ̃riabadaa, makãrã mʉ ãchi jʉ̃kaa akuɓeepeɗa beɗeabarii kosarã bia ʉ̃rʉbena” (Herbert).

BIBLIABA NAKA JARAƁUA: “Ẽbẽraba mistu biʼia asei baitaburu jʉrʉrãabaɗa, bari junebenaɗe siɗa jʉrʉyua” (1 Corintios 10:24).

Chi kawayuwẽa akuɓoorãaba. Akõre niiba naka aɓua: “Besesɗe mʉ warrarã mʉ ome beɗeabudauɗe, mʉ chi kawayuwẽa akuɓoobaria, maamina ãchia kawabadaa mʉ maka akuɓuu”.

Bichi nau kĩra akuɓoobarii kawaɓuubʉrã, bichi warrarãba beɗeabudauɗe, makara bichi jʉ̃kaabena teleisor kĩitabena, komputador, selular ɓee añaa buekaba. Chi bichi warrba jarakuɓuuɗe, kawa kʉ̃risia akuɓeeba, bariara chi ichia jaramaaɓuu surena ãrĩã ɓuu kĩra. Makara bichia ichia jaraɓuu importante ãrĩã ɓuu unubiyua.

“Ariɗe ɓua chi dachi warrarãba kawaɗayua ãchi sentipanuu dachi baita importante ãrĩã ɓuu, o makawẽbʉrã ãchi chõpea paneeɗapeɗa junebenamaa jaraɗe wãɗayua” (Maranda).

“Machi perarãabaɗa, bariara machi warrarãba kosa kĩrawãreawẽ ɓuu jarabudauɗe” (Anthony).

BIBLIABA NAKA JARAƁUA: “Machia kawa ũríbaɗa” (Lucas 8:18).

Barikiau oraɗe beɗeábaɗa. Besesɗe kũudrãarãba kosa ɓee ʉ̃rʉbena dee ãi jaraɗai bustabadaa, chiko komaapanuuɗe mauɗe ãdakãriɗauɗe biɗa.

“Dai ãdaɗe wãsidauɗe bustabadau warrana baare ãda errunuɓuuɗe ãchi dai jʉ̃kaa duanaɗayua. Makaburu dachia ida beɗeabarii ãchi ome” (Nicole).

Chiko kobadau oraka biɗa beɗeai baita ara ɓua.

“Dai chiko kobudauɗe, jãma biɗa biʼia ɓoobaria beɗeaɗai baita. Dai koduanuuɗe jomaurã ambua duaneeɗapeɗa, kãare dai diaɗe asepeɗaaɗabaɗa jarabudauɗe. Bariara problema baraasiɗausiɗa, jãka du aɓa sentiɗakau” (Robin).

BIBLIABA NAKA JARAƁUA: “Dachia ũrii baitaburu nibayua, isa berreai baitara ɓoobai mauɗe isa kĩruɗayua duanarãabaɗa” (Santiago 1:19).