BEƊEA 1
ARA DU AƁA KɄ̃RISIAYU KĨRA JIPA NIBAYU BAITABENA
¿MAU KÃAREBA?
Ẽbẽra ara du aɓa kʉ̃risia niibʉrã kĩra jipa nibayu baita nau aseyua:
espera kuitaa nibayua adauyua ichia kʉ̃ria niiɗebena
kĩru nibai baɗamaarã du aɓa kĩruwẽa kawayua
akawa aseyu bariara ichia bustawẽe siɗa
kʉ̃risia nibayu naa junebenarã́turu
¿SAKÃERA MAU IMPORTANTE ƁUA?
Warr cheke niiba du aɓa kʉ̃risia niibʉrã kĩra jipa nibayu baita ase nibaabayua chi kachirua ɓeeɗebena, bariara biʼia ɓuu unuuruu siɗa. Maka ɓumina, warrarã chekerãba du aɓa kʉ̃risiawẽebʉrã kĩra jipa nibai baita, ãchia naka biɗa aseɗai ɓua:
chi pelea ãrĩã nibayua
nomaa nibaɗe wãyu
cigarrillo, droga ɓee dopeɗa mauɗe itua siɗa ãrĩã do nibayu
biʼiwãe ko nibayu
Chi kuitaa ɓuurãba jara panuu, warrarã chekerã du aɓa kʉ̃risia nuree kĩra jipa nibayu baita, ãchi waripeɗaaɗakare, chi nejarra barikia ɓeeɗe gasta nibaabayua, chi gobierno ley ũri nibayu maebʉrã ãrĩã ẽpermaɗaabayu. Chi Profesora Angela Duckworth Universidad Pensilvaniaɗebenaba naka jaraɗaa: “Du aɓa kʉ̃risia nibai kĩra jipa nibayu, día aɓa ɓuudu baitawãe, jomaurã diaɗebenarã siɗa”.
¿SAKA CHI WARRMAA JARADEAIBA DU AƁA KɄ̃RISIABIPEƊA KĨRA JIPA NIBAYU BAITA?
Makawãema a jara kawayua
CHI BIBLIABA JARA KUƁUU: “Machiba ne wauɗai aaduubʉrã, wáusturu. Mauɗe wauɗaabai aaduubʉrã, waurã́sturu” (Mateo 5:37, Biblia Chamí, WPS.).
Chi naweba maebʉrã chi akõreba jãkarã́ba a jarabadau, ãchíturu aude ɓia jẽa kopaneebadau jomaurã ẽbẽra daaɗe. Mauɗe chi akõrerãba deawẽaɗe apeɗaaɗa baɗa deabudaubʉrã, warrarã ara maka ɓia jẽabadau deabiyua.
Chi akõrerãba deawẽa abudauɗe, chi warr mauchaburu chũpeaɗawẽa ɓia jẽa kopaneebadau, ichimaa deaɗawẽebʉrã, chi warraba importante ãrĩã ɓuu kawayua: ɓesɗe dachia kʉ̃riaburúturu unibaabayua. Chi doctor David Walshba naka ɓʉɗa baɗa: “Chi ẽbẽraba maka kawabudaubʉrã kĩrajʉʉ nibaɗayua”. Ichia biɗa jaraɗa nau dachia kawabiburuubʉrã “dachi warrmaa joma ãchia wiɗibudau dea nibayu, jãka kachirua ãrĩã ɓua”.a
Bichia bichi warrmaa ara makʉɗe makawãema aaruubʉrã, ichi wariburuuɗe ichia biɗa makawãema ayua ichimaa droga ɓee deabudauɗe, mauɗe wẽra biɗa kimabaraawẽa niiɗe ichi baara kãiɗaika abudauɗe, makawãema ayua, maebʉrã junebena kachirua ɓee deabudauɗe biɗa ijãabayua.
Kawabiba bichi warrarãmaa ichia aseburuuba chi kachirua ɓuu maebʉrã biʼia ɓuu eneeyua.
CHI BIBLIABA JARA KUƁUU: “Dachia uupeɗaaɗa baɗa ara madu junabaria” (Gálatas 6:7).
Bichi warrba biʼiaburu kawayua ichia aseburuuba chi kachirua ɓuu maebʉrã biʼia ɓuu eneeyua, ichi ara du aɓa biʼia kʉ̃risiawẽebʉrã kĩra jipa nibai baita kachirua wãyua. Bichi warr biʼiwãe ɓuuba kĩruburuubʉrã, maka niibʉrã, ichi amiko ãrĩã wãʼãe nibayua. Ichi kĩrui kãyabãra, ara ichi du aɓa calma niibʉrã, kauwa ũriiruubʉrã aɓaumaa aɓauba jaramaa ɓuuɗe, junebenarã siɗa ichi baara niiba kʉ̃riaɗayua. Kawabiba bichi warrmaa ichi du aɓa kʉ̃risiaruubʉrã kĩra jipa nibai baita makarã biʼia wã nibayua.
Aiɗaba kawayua kãaredu importante ãrĩã ɓuu
CHI BIBLIABA JARA KUƁUU: “kawa kʉ̃risiábaɗa biʼia kãaredu aude biʼia ãrĩã ɓuu” (Filipenses 1:10).
Du aɓa kʉ̃risia kawaɗayua kachirua aseemaaba ara jãdu aseɗaabai, chi biʼia ɓuu, asei kʉ̃riawẽmina jãu siɗa asebaraaɗai. Kãaredu ichi baita aude importante ãrĩã ɓuu kawa ochiaba, naa asebiyua chi importante ãrĩã ɓúturu. Chi tarea escuelaɗebenáturu naa aseyu jemeneɗe wãi naeɗe.
Ejemplo biʼia ɓúturu jaradeaba
CHI BIBLIABA JARA KUƁUU: “Mʉa jãka unubiasii, ara jari mʉ machi ome asesii kĩra, ara machi chiya jãka aseɗayua” (Juan 13:15).
Chi warra chekerãba ochiabadaa saka kʉ̃risiabadau chi akõrerã ãchimaa biʼiwãe unubudauɗe, jãuɗeeba unubíbaɗa machi warramaa ara du aɓa kĩra jipa nibai baita biʼia ãrĩã ɓua. Nauɗe kʉ̃risiaba ara bichi du: ¿Mʉ sãiba mʉ warr mʉʉmaa biʼiwãe aseburuu unuuruuɗe? ¿Mʉ kĩruyuẽ makawãebʉrã mʉ chi du aɓa ãwataibaa?
a Chi libro Saber decir no a los hijos, jãuba naka jara ɓuu: Sakayua warrarãba nesita panaa junebenaba “makawẽma” jarabadau mauɗe saka ãchi akõrerãba “makawẽma” aɗai ɓua.