Jeowaba miadaa ɓuu kaaɗebena bʉeɗa

Moisesba faraonmaa jaraɗa waya ichi unuubai. Mauɗe wãi naeɗe, naka jaraɗaa: “Ẽsebuɗe ẽsaɗe, joma chi imina warrarã Egiptoɗebenarã biuɗayua, chi imina warr faraonɗe biɗa biuyua, mauɗe chi bari traja nureerã warr imina siɗa biuɗayua”.

Chi israelitarãmaa Jeowaba naka jaraɗaa: “Chiko biʼia ɓuu wáubaɗa. Cordero maebʉrã cordero cheke año aɓa kiɗiiɗebena beábaɗa, chi cordero cheke oaba poroa iikaabena purúbaɗa. Chi kiuru ʉɓʉ́baɗa maabae pan levaduraswãe ɓuu baara kóbaɗa. Machi paru jʉ̃ɗapeɗa, jʉ̃rʉɗe biɗa jʉ̃ kãri ɓoapeɗa kopanaɗapeɗa wãɗayuaburu. Nau ẽsabuɗe mʉa machi awara bʉekayua”. Jãuba chi israelitarã ãrĩã kĩrajʉʉsiɗaa.

Ẽsebuɗe ẽsaɗe, Jeowa ángel wãɗa baɗa de ɓeecha Egiptoɗebenaɗe. Chi de poroa iikaabena oaba puruwẽa koɓeeɗebena, chi warr imina biukuasiɗaa. Maka ɓumina, chi poroa iikaabena oaba puru koɓeeɗa, angelba warrarã beakuabasia. Jomaurã Egiptoɗebena chi nejarra bara nureerã mauɗe chi nejarra wãʼãe nureerã, ãchi warr aɓa nii biusiɗaa. Mau kãyabãra, israelitarã warrarã aɓa biɗa biuɗaabasia.

Chi faraón imina warr siɗa biusia. Ichi baita mau puʼua ãrĩã ɓoosia, mau kakua ichia Moisés mauɗe Aaronmaa naka jaraɗaa: “¡Machi namabena wã́sturu! ¡Wãɗapeɗa machi Dios kʉ̃riábaɗa! ¡Machi ãnimara siɗa uaɗóbaɗa!”, aɗa basia.

Jãu ẽsebuɗe jeɗeko ake ewarisii. Chi israelitarã Egiptoɗebena deɗabenarã kakawaa wãsiɗau. 600.000 mukĩrarã baraasia, mauɗe wẽrarã ãrĩã́turu baraasia warra chekerã baara. Chi nuree israelitarãwãe nii siɗa, ãchi baara wãuriɗa basia, maarã biɗa Jeowa kʉ̃riaɗai basiiɗeeba. ¡Jãabera chi israelitarã awara duaneesia!

Mau diaɗe Jeowaba bʉekaɗa baɗa, kʉ̃risiaɗebena adua ɓeeɗaamaaba, jãu chiko biʼia ɓuu añocha ara jãka wauɗai basia. Jãu Pascua apeɗaaɗa.