Mura beɗeaɗa

Chi israelitarã 40 año baidea iujãa põesãaɗe duanasii. Ãchia adaupeɗaaɗa puuru choromarã. Jãabae ãchia de waukapeɗaaɗa baɗa iujãa korii ɓuuɗe chi drua Moab abadauɗe, mau ara kaita ɓoosii chi do Jordán abadauɗe. Ara ɓiɗĩikaburu falta koɓoosii ãchi chi drua Jeowaba deai aɗa baɗaɗaa neeɗai baita. Chi rey Moabɗebena, Balac basia, ichi ãrĩã pera ɓoosii israelitarãba ichi iujãa ẽebariɗayu. Mauɗeeba jaraɗa chi mukĩra chi trʉ̃ Balaammaa Moabɗaa bʉepeɗa israelitarã ʉ̃rʉ miadaa ɓaeburuu abiyua.

Jeowaba Balaammaa jaraɗa: “Israelitarãmaa ãchi ʉ̃rʉ miadaa ɓaeburuu aabayua”. Mauɗeeba chi rey Balaam Moabɗaa wã kʉ̃riabasia. Chi rey Balacba waya Balaammaa Moabɗaa wã́baɗe apeɗa bichia kʉ̃riaburuu deai aɗa baɗa, maabae Balaamba waya wãwẽma aɗa maucha. Maabae Dachi Akõreba jarasii: “Mʉa ida wãbiima asii. Maka ɓumina mʉa jaraarúturu jarayua”.

Balaam ichi muraɗe Moabɗaa wãsii. Ichia kʉ̃risia ɓooɗa chi israelitarã ʉ̃rʉ miadaa ɓaeburuu ayua, bariara Jeowaba ichimaa maka aserã́baɗa aɗa baɗamina. Chi ángel Jeowaɗe ɓes õbea oɗe neeɗa baɗa. Balaamba chi ángel unuwẽe baɗa, maka ɓumina murabara unuɗaa. Maabae chi mura oɗebena ãyaa wãsii, drua kuɓuu iikaa wãɗa baɗa. Chi mura mo ka koɓee jʉ̃kaa koɓeepeɗa chi Balaam jʉ̃rʉ kaatu koɓeesii. Maabae chi mura oɗe jeeɗaburu koɓeeɗa. Maka kuɓuumisa, Balaamba chi mura bakuruba u koɓeeɗa.

Maabae, Jeowaba chi mura beɗeabisii. Chi muraba Balaammaa wiɗisii: “¿Sakayua bichia mʉ umaa ɓuma?”. Mauɗe Balaamba jarasii: “Bʉa waabenarãmaa kʉ̃risiabi ɓuu mʉ surena nii. Mʉa neko inibaɗa basirã, bichi beatai baɗa”. Chi muraba naka jarasia: “Bichi mʉ ʉ̃rʉ ãrĩã ataubariiɗe. ¿Unubarẽe mʉa biɗa bichi jãka ase kuɓuu?”.

Maabae Jeowaba Balaammaa chi ángel unubiɗa basia. Chi angelba naka jarasia: “Jeowaba jaraɗa bichimaa wãrã́ba aɗa baɗa israelitarãmaa ãchi ʉ̃rʉ miadaa ɓaeburuu aɗe wãyua”. Balaamba naka jaraɗa: “Makawẽe bai ɓosma. Mʉ bari deeɗaa wãi ɓuu” aɗa. Mauɗe angelba naka jaraɗa: “Bichi wãi ɓuma Moabɗaa, bari Dachi Akõreba jaraarúturu jaraɗe wãi ɓua”.

Makarã, ¿Balaamba Dachi Akõre beɗea ũrisaaka? Makawẽma, ichia ɓes õbea israelitarãmaa ãchi ʉ̃rʉ miadaa ɓaeburuu jarai baɗa. Maka ɓumina, chi ɓes õbeaɗe Jeowaba Balaammaa jarabisii chi biʼia ɓuudu ɓaeburuu israelitarã ʉ̃rʉ miadaa ɓai baɗa kãyabãra. Chi israelitarã chĩoɗe wãusiɗau Moab iujãa adauɗayua, mauɗe Balaam biuɗa basia. Biʼia ɓoosia Balaamba naeɗeeɗa ũriɗa basirã Jeowaba jaraɗa, ¿makaka?