Ãchia Jeowa beɗea ũriɗa kʉ̃riawẽe basii

Maaɗakare, chi israelitarã iujãa põesãa ɓuuɗe duanasiimisa, Coré, Datán, Abiram, mauɗe 250 junebenarã mukĩrarãba atua jarasiɗau Moisesɗebena. Naka jarasiɗaa: “¡Daiba machi ũri kʉ̃riaɗawẽma! ¿Sakayua bichiaburu dai ua koɓooiba? ¿Mauɗe sakayua Aarondu chi sacerdote aude nibaiba? Jeowa bʉ ome mauɗe Aarón omeburu koɓoowẽe, dai jomaurã ome biɗa kuɓuu”. Jeowaba bustawẽe basii ãchia jãka jarasiɗauɗeeba, ichia kʉ̃risiasii ara ichi ʉ̃rʉbenadu kachirua jarasiɗau.

Moisesba jaraɗa Coré mauɗe ichi baara nureerãmaa biɗa: “Nu urúbaɗa chi Jeowa deeɗaa, chi adaubariiɗe piumaa koɓee baataɗai baita aribia enébaɗa. Makaburu Jeowaba kawabiyua kai jʉrʉsii”.

Norema, Coré 250 mukĩrarã baara Moisés ochiaɗe wãsiɗau Jeowa deɗe. Jãma piumaa koɓee baasiɗau chi sacerdote kĩraka. Maabae Jeowaba jaraɗa Moises mauɗe Aaronmaa biɗa: “Ãyaa wã́baɗa Coré mauɗe chi ichi baara nureerã ɓuumarebena”.

Coré wãɗa baɗa Jeowa deeɗaa Moisés ɓuumare, maka ɓumina Datán, Abiram, chi deɗabenarã wãɗai kʉ̃riawẽe basia. Mauɗeeba Jeowaba naka jaraɗa israelitarãmaa: “Ãyaa wã́baɗa chi de Coreɗe, Datanɗe, mauɗe Abiramɗe”. Chi israelitarã ara mauɗe jãmabena wãpeɗaaɗaa. Datán, Abiram, mauɗe ichi deɗabenarã de awara nureaɗa basia. Kawawẽeɗe, chi ioro ewa diɗisii mauɗe chi ẽbẽrarã ũriɗakau nureerã mama eɗa ɓaesiɗau. Jeowa deɗe, bajãaɗebena aoko ɓaesia, mauba Coré mauɗe chi 250 mukĩrarã baara baa wãsiɗau.

Maaɗakare, Jeowaba Moisesmaa naka jaraɗa: “Chi líder tribuɗebenarã ãchi dumarã enébaɗa. Ɓʉ́baɗa dumaɗe chi trʉ̃ chi liderɗebena. Chi dumaɗe chi tribu Leviɗebena, ɓʉ́baɗa chi Aarón trʉ̃. Chi duma ɓuíbaɗa Jeowa deɗe. Chi mukĩra mʉa jʉrʉburuu ichi dumamaa nepono tonoyua”.

Norema, Moisesba unubiasii chi duma chi lidernamaa. Aarón dumamaa nepono tonoɗa basia, almendra waraaɗa koɓooɗa. Makaburu Jeowaba unubisii jʉrʉɗa baɗa Aarondu chi sacerdote aude nii nibai baita.