Mukĩrarã 12 niɗauba ochiaɗe wãpeɗaaɗa chi drua saka ɓuu kawaɗayua

Chi israelitarã mode Sinaiɗebena wãsiɗau maabea chi iujãa põesãa ɓuu Parán abadauɗeeba wãɗapeɗa neesiɗau Cadesɗaa. Jãma Jeowaba jaraɗa Moisesmaa: “12 mukĩrarã bʉese tribuɗebena aɓaaɓaa, ãchi wãɗapeɗa ochiaɗai baita chi iujãa Canaanɗebena, jãu iujãa mʉa deayu israelitarãmaa”. Moisesba jʉrʉɗa 12 mukĩrarã maabae naka asia: “Canaanɗaa wã́baɗa ochiaɗai baita chi iujãa biʼia ɓuu kawaɗayua ne uuɗai baita. Maabae ochiábaɗa ẽbẽra ãrĩã nureeɗebena chaarea nuree maebʉrã suredu nuree, paruba wauɗa deɗe nureebʉrã maebʉrã puururãɗe”. Chi 12 mukĩrarã wãurisiɗau Canaanɗaa. Ome maarãɗebena Josué Caleb baara.

Jãarã mukĩrarã neepeɗaaɗa 40 día baɗakare. Uva mauɗe junebenarã jõ siɗa eneepeɗaaɗa basia, maabae naka jarasiɗaa: “Canaanɗebena iujãa biʼia ãrĩã ɓua, maka ɓumina chi ẽbẽra ariabena chaarea ãrĩã nurea, mauɗe chi aɗu jʉ̃ka kuɓuu mechibena ãrĩã”. Mauɗe Caleba naka jaraɗa: “¡Dachirãba adauɗai ɓua jãu iujãa! Ara naka wã́duru”. ¿Sakãe jãka jaraɗaba Caleba? ¿Bichia saka kʉ̃risia ɓua? Ichi Josué omeeba Jeowaɗe ijãa nibasiɗauɗeeba. Maka ɓumina, junebena 10 mukĩrarãba naka jarapeɗaaɗa basia: “Araa wãɗaabayua. Ẽbẽra ariabena mechibena nurea, dachirã ãchiɗeebiɗa sisi kĩra nurea”.

Chi israelitarã ãrĩã nomaasiɗaa, maabae ãchi chiya kachirua naka asiɗau: “June mukĩra jʉrʉɗaika mauba dachi waya Egiptoɗaa odoeyua. ¿Kãasãaɗe wãi Canaanɗaa? Jãma dachi joma beaɗayua” apeɗaaɗa. Josué Caleb omeeba naka asiɗaa: “Bari Jeowadu ũriɗaika. Perarã́sturu. Jeowaba dachi karebayua”. Maamina, israelitarãba ũri kʉ̃riaɗaabasia. Bari, ãchia Josué Caleb baara bea kʉ̃ria panasia.

¿Kãare aseɗaba Jeowaba? Moisesmaa naka asii: “Mʉa mechibena ɓuu asebaria israelitarã baita, maamina ãchia mʉ ũri kʉ̃riaɗawẽa. Mauɗeeba mʉa nau iujãa põesãa ɓuuɗe 40 año bʉekayua, ara jãma biuɗayua. Bari ãchi warrarã mauɗe Josué Caleb baara, maarãdu nureaɗayua chi iujãa mʉa israelitarãmaa deai aɗamare”.