De wausiɗau Jeowa kʉ̃riaɗayua

Moisés mode Sinaí abadauɗe ɓoosiiɗe, Jeowaba jaraɗa de karaaɗai baita, jãu de chi trʉ̃ tabernáculo basia. Jãma chi israelitarã wãɗai basia Jeowa kʉ̃riaɗe. Jãu ãchia jira odoeɗai ɓoosia wãbudauɗaa.

Jeowaba Moisesmaa naka asia: “Chi ẽbẽrarãmaa jaraba odoébaɗa chi ãchia odoeɗai ɓuu chi de karaaɗai baita”. Israelitarãba odoesiɗau nee, plata, cobre, mokara kĩraka bidoɗaa mipitaa ɓoobarii mauɗe alaja mipitaa ɓee. Paru mipitaa ɓee, mauɗe ãnimara e siɗa, maka ɓeerã odoesiɗau. Ãchirãba ãrĩã deasiɗauɗeeba Moisesba naka jaraɗa: “Jãabae ãrĩã basma. Maucha eneerã́baɗa” aɗa.

Mukĩrarã wẽrarã wau kuitaa nureerãba mau de aiɗa waupeɗaaɗa. Jeowaba aiɗa ɓoosii joma chi asebudau biʼia ɓeebii baita. Chi nureeba kaapiru duanaɗa, chi ɓeerãba ne ka duanaɗa. Junebenarãba neeba wau duanaɗa, chi nureeba chi mo boopetataɗapeɗa mauɗeeba karaa duanaɗa, junebenaba bakuruba wau duanaɗa.

Chi israelitarãba jãu de wausiɗau ara Jeowaba jaraɗa kĩra. Mauɗe chi paru mipitaa ãrĩã ɓuu wauɗapeɗa eaɓari kuɓusiɗau chi pieza ome koɓeeyua: aɓa Santo mauɗe aɓabena Santísimo abachiɗau. Chi Santisimoɗe koɓoosii baura chi trʉ̃ arca del pacto basii, mau baura chi bakuru acaciaɗeeba mauɗe neeɗeeba wauɗa baɗa. Chi Santoɗe neeba wauɗa baɗa noɓooɗa mau ʉ̃rʉ bera koabadau, mesa mauɗe altar kiɗuarã piumaa ɓee baa nuɓubadau. Jãu deemaa duɗu batea chi mechia koɓoosii cobreba wau ɓuu mauɗe maucha altar choroma noɓooɗa. Chi israelitarãba Jeowamaa jarapeɗaaɗa ãchia ichi ũriɗayua. Jãu arca del pactoba kʉ̃risiabibachii ãchia Jeowamaa jarapeɗaaɗa aseɗaiɗebena.

Jeowaba jʉrʉɗa baɗa Aarón mauɗe ichi warrarã Jeowa deɗe trajabiɗai baita mauɗe sacerdote babiɗai baita. Maarãba mau de biʼia ãrĩã ochia unibaɗai basii mauɗe Jeowamaa ãnimara beaɗapeɗa baa deaɗai basii. Chi Santisimoɗe, Aarondu neei basii, ichíturu sacerdoterãɗebena aude nibasii bẽrã. Añoɗe, ɓes aɓaburu jãma wãbachia, Jeowamaa ãnimara beapeɗa deaɗe wãbachii, ichia perdonayua chi kachirua aseɗa baɗa Aaronba, ichi deɗabenarãba mauɗe joma chi israelitarã biɗa.

Chi israelitarã Egiptoɗebena neepeɗaaɗa baɗa año basiiɗe, ãchia jãu de joma karaasiɗau. Jãabaera uru panasii chi de Jeowa kʉ̃riaɗai baita.

Jeowa jãu de karaapeɗaaɗa kakua kĩrajʉʉ ãrĩã ɓoosiiɗeeba, ichia jʉ̃rʉara jãu de ʉ̃rʉ kuɓuɗa baɗa, jãu ʉ̃ɗaadu koɓoosii. Chi jʉ̃rʉara jãu de ʉ̃rʉ apii kuɓuumisa, chi israelitarã siɗa apii duanasii ara chi duanuumare. Maamina, chi jʉ̃rʉara ʉtaa wãɗakare kuitaabachiɗau ãchi ãyaa wãɗai ɓuu. Chi de ẽekuataɗapeɗa maabae chi jʉ̃rʉara kaaɗe wãbachiɗau.