Aseɗai jarapeɗaaɗa akawa aseɗaabasii

Jeowaba Moisesmaa naka jarasia: “Wãba mode mʉ ɓuuɗaa. Mʉa mʉ Ley ɓʉyua moomaa maabae bichimaa deayua”. Moisés modeɗaa wãsii, aria 40 día 40 ẽsabuɗe ɓooɗe wãsia. Aria ɓuuɗe, Jeowaba mo ome pepeɗea panuumaa ɓʉsii chi Diez mandamientos abadau maabae Moisesmaa deasia.

Ara ɓiɗĩika baaruuɗe, chi israelitarãba kʉ̃risiasiɗau Moisesba ãchi ɓuisii. Mauɗéburu Aaronmaa naka jarasiɗau: “¡Daiba kʉ̃ria panuu aɓa niiba dai ua nibayua! ¡Dai baita dios kĩra ɓuu wauba!”. Maabae Aaronba naka jarasia: “Enésturu joma chi nee ira duanuu”. Maabae ichia chi nee dorraadubi ɓoosii mauba paka warr kĩra wausia. Chi ẽbẽraba jarapeɗaaɗa: “¡Cha nau paka warr, dachi diosbʉ, dachi Egiptoɗebena odoeɗa baɗa!”. Maabae fiesta aseɗapeɗa mauɗe chi paka warr kʉ̃ria duaneesiɗau. ¿Ãchia ase panasii jãu kachirua ɓoosẽe? Maerã, chi israelitarãba Jeowadu kʉ̃riaɗayua jarasiɗauɗeeba. Ãchia aseɗaabasia Jeowamaa jarapeɗaaɗa.

Jeowaba mau unupeɗa, Moisesmaa naka jarasii: “Chi ẽbẽrarã duanuumaa eɗaa wãba, ãchi kachirua asemaa duanuma. Ãchia kʉ̃riamaa panuu chi dios ãchi juaba waupeɗaaɗatu”. Maabae Moisés wãsii chi ẽbẽrarã duanuumaa chi mokara ome pepeɗea panuu baara.

Chi Moisés neemaa ɓuuɗe, ũrisii karimaa duanuu. Neesiiɗe, unuɗa baɗa ãchi baera duanapeɗa chi paka warr kʉ̃riamaa duanaɗa. Moisés ãrĩã kĩruɗa basia, chi mokara ome pepeɗea panuu jeeɗa jiratasii, mau ãri diɗiɗaa. Maabae ara mauɗe chi paka warr ãritaɗe wãsia mauɗe Aaronmaa naka wiɗiɗa basia: “¿Sakãera kachirua asesaa ãchia jarapeɗaaɗa kĩra?”. Maabae Aaronba panausia: “Kĩrurã́se, bichia kuitaa nima ãchi saka nuree. Ãchia dios kʉ̃ria panasii, maabae mʉa chi nee aoko kuɓuuɗe eɗa jiratasii, mauɗebena jãu paka warr awara adausiɗau”. Chi Aaronba asesii biʼiwẽe ɓooɗa. Moisés maucha wãsii chi modeɗaa maabae wiɗisii Jeowamaa chi ẽbẽrarã perdonabiyua.

Jeowaba perdonasii chi israelitarã ũri kʉ̃ria nureerã. Chi israelitarãba Moisesba jaraaruu ũripeɗaaɗa basirã, biʼia ãrĩã ɓooi basii.