Chi bakuru ɓiɗĩika kiruu aoko kuɓua

Moisés chi iujãa Madianɗe 40 año nibaɗa. Aria kimabaraapeɗa warrarã ua nibasia. Día aɓa ɓuuɗe, ichia oejarã ochia ua nibaɗa chi mode Sinaí kaita mauɗe mechibena ɓuu unuɗa. Bakuru cheke ɓiɗĩika kiruu aoko koɓooɗa, ¡maka ɓumina, baa wãwẽa koɓooɗaa! Moisés ara kaita neesiiɗe kãare pasa kuɓuu kawayua, chi bakuru aoko kuɓuuɗebena beɗeaburuu ũrisii. “¡Moisés! Ãrĩã kaita neerã́ba. Chi jʉ̃rʉɗe jʉ̃ nii ẽetas, jari bichia tʉamaa ɓuu mʉ iujãa”. Jeowadu Moisés ome beɗeamaa ɓoosii angelɗeeba.

Moisés ãrĩã perapeɗa, mauɗeeba paruba ichi kĩadarr jʉ̃sii. Jeowaba naka asii: “Mʉa unubarii israelitarã ãrĩã́turu sufrimaa duanuu. Mʉa awara adauruu Egiptoɗebena maabae drua biʼia kiruuɗaa uaɗoyua. Mʉa kʉ̃ria ɓuu bichiaburu mʉ ẽbẽrarã Egiptoɗebena awara adauyua”. ¿Bʉʉmaa Moisés kawasweã ɓeesaaka?

Moisesba Dachi Akõremaa naka wiɗisii: “¿Mʉa saka jaraiba mʉʉmaa wiɗiiduuɗe kaiba bʉeɗaba abudauɗe?”. Dachi Akõreba jaraɗa: “Jaraika Jeowaburu, chi Dios Abrahanɗe, Jacobɗe, Isaacɗe mauburu mʉ bʉeɗaa”. Moisesba jarasii: “¿Mʉa sakaiba chi ẽbẽrarãba ũriɗa kʉ̃riaɗawẽebʉrã?”. Jeowaba naka asesii unubiyua ichia aiɗai ɓuu. Ichia Moisesmaa jaraɗa chi duma jeeɗa jiratas aɗa. Ichia jiratasiiɗe, ¡chi duma dama ba diɗiɗaa! Moisesba chi dama druuɗeeba jidausii, maabae chi dama waya duma ba diɗisii mauɗe Jeowaba naka jaraɗa: “Bichia maka aseeruuɗe, unubiyua mʉaburu bichi bʉeɗa”.

Maka ɓumina, Moisesba naka jaraɗa: “Mʉ biʼia beɗeakau ẽbẽra barau daaɗe”. Jeowaba naka jarasia: “Mʉa jaraima bichia jarai kuɓuu, maabae mʉa bʉeyua bichi ãba Aarón bichi aiɗabiyua”. Moisés chi wẽra, warrarã baara Egiptoɗaa waya wãsiɗau, kuitaasiiba Jeowaba ichi aiɗai ɓuu.