Moisesba kʉ̃risiaɗa Jeowadu kʉ̃riayu

Egiptoɗe nibasiɗauɗe, chi ẽbẽrarã Jacob deɗabenarã jãarã israelitarã abachiɗau. Jacob José baara biupeɗaaɗakare, june faraón neeɗa baɗa gobernai baita. Cha nii faraón pera koɓeeɗa chi israelitarã aude meserãa duanasiiɗeeba ẽbẽrarã Egiptoɗebena kãyabãra. Mauɗeeba ichi baita israelitarã bari trajabiasii. Ichia ladrillo waukabiaɗa baɗa mauɗe chi druaɗe ãrĩã trajabibachii. Chi ẽbẽrarã Egiptoɗebenaba israelitarãmaa ne kachirua ãrĩã asebachiɗaumina, jãarã waaburu wari bara ɓeesia. Faraonba mau bustawẽe basii, mauɗéburu joma mukĩra warr chuburi keɗeerã beakuabiɗa, maka ɓumina wẽra kau chekerã beabiwẽe basia. Chi israelitarã ãrĩã́turu pera bara ɓeeɗa basii.

Chi wẽra israelita aɓa niiba chi trʉ̃ Jokébed, mukĩra warr cheke mipitaa ãrĩã kiruu adausii. Mau beabiimaaba, ẽɗe eɗa kuɓusii kiɗua chekerã tãeɗe, chi do Nilo abadauɗe. Chi nawekau jãu wãwa chekeɗe, Míriam abadauba, ara kaita ochia koɓeeɗa kãare pasaburuu kawayua.

Chi faraón kau, doiɗaa kuiɗe wãsiiɗe, chi ẽ cheke unuɗa baɗa. Jãuɗe wãwa cheke jẽa kiruu unupeɗa mauɗe ichia ãrĩã chuburiasii. Miriamba jarasii: “Bichia kʉ̃riabʉrã, mʉ jʉrʉɗe wãyua wẽra ju dobii baita chi wãwamaa bichiɗeeba”. Ichia maerã aɗa, maabea Míriam wãpeɗa eneeɗa ara ichi nawe. Chi faraón kauba jarasii Jokebedmaa: “Cha nau wãwa cheke odoese, ochiayua mʉ kakua maabae mʉa paai ɓuu” aɗa.

Chi warr cheke warisiiɗe, Jokebedba odoeɗaa chi faraón kaumaa. Ichia Moisés trʉ̃aɗa baɗa maabae waribisii ichi warr kĩraka. Moisés chi faraón warr kĩraka wariɗa baɗa mauɗe ichimaa deabachiɗau joma ichia kʉ̃riaburuu. Moisesba Jeowa ãrĩã kʉ̃riaɗa. Ichia kuitaa nibasii ichi israelita nii mauɗe ẽbẽra Egiptoɗebenawãe, mauɗéburu Jeowa baita traja kʉ̃ria nibaɗa.

Moisés 40 año nibasiiɗe, ichia chi ẽbẽrarã ichi puuruɗebena aiɗa kʉ̃ria nibasii. Día aɓa ɓuuɗe, ichia unuɗa mukĩra Egiptoɗebenaba esclavo Israelɗebena sĩmaa ɓoosii. Moisesba mau unusiiɗe, chi mukĩra Egiptoɗebena ãrĩã puʼua sĩpeɗa beataɗa baɗa, maabae mera kuɓuɗa baɗa ibuɗe. Faraonba mau ũrisiiɗe, Moisés beata kʉ̃riasii, maabae Moisés miru wãsii drua Madián abadauɗaa. Mama Jeowaba ãrĩã ochia ua nibasia.