¿Job kai basaa?

Chi puuru Uz abadauɗe, mukĩra aɓa niiba Jeowa beɗea ũri nibasia. Ichi Job basii, chi nejarra ãrĩã baraapeɗa mauɗe warrarã siɗa ãrĩã ira ɓoosia. Ichi ẽbẽra biʼia nibasii mauɗe chi poore keɗee, pẽdrãarã mauɗe jẽramararã siɗa ãrĩã aiɗakuabachia. Job chi biʼia ɓuudu ase nibasia. ¿Bichia kãare jarai ɓua? ¿Job noremaacha kĩrajʉʉ ɓoosaaka?

Chi Diabloba Jobmaa ochia koɓoosia, maamina Joba adua basia. Jeowaba jarasia Satanasmaa: “¿Job unu kuɓuka ichi mʉ baita trajabarii? Iujãaɗe jãu kĩraka wãʼãe nii. Ichi ũri merãa nii mauɗe chi jipa ɓuudu ase nia”. Satanasba naka asia Jeowamaa: “Ichia bichi ũribarii, bichia ichi aiɗabariiɗeeba, bichiaburu aiɗa ua nia ne miadaa ida pasabiimaaba mauɗe ãnimararã, druarã siɗa ãrĩã deabariiɗeeba... Bichia joma Jobɗebena ẽebariibʉrã, ichia bichi ɓuiyua”. Jeowaba naka jara ɓoosia: “Bichia Jobmaa chi kachirua neebii kʉ̃ria ɓuubʉrã, neebis, makasmina bearã́ba”. ¿Kuitaa ɓuẽ sakayua Jeowaba Satanasmaa ida jãkabisaa? Jeowaba kuitaa ɓoosia chi Joba ichi ɓuẽbai ɓuu, ichi ẽbẽra ũri merãa nibasiiɗeeba.

Satanasba Jobmaa chi kachirua ãrĩã wau ɓoosii. Satanasba ẽbẽrarã sabeos abadaumaa ida orroabisii chi paka ɓee, paka mukĩra ɓee mauɗe mura ɓee Jobɗe. Iujãa mechibena aoko kuɓuuba oejarã joma baa wãpeɗaaɗa. June ẽbẽrarã, chi caldeos abadauba, orroasiɗau chi camello ɓee Jobɗe. Maabae joma chi ẽbẽrarã ãnimararã Jobɗe ochiabadaurã biusiɗau. Maabae aude kachirua ɓuu neesii: chi Job warrarãba chiko komaa panasiimisa, chi de ãchi ʉ̃rʉ ɓaesiiba joma biusiɗau. Job ãrĩã nomaa ɓesmina, Jeowa ɓuẽbasii.

Satanasba Job audeburu sufribi kʉ̃ria ɓoosia, mauɗeeba Job kakuaɗe ãrĩã chaubisii. Mauba Job ãrĩã puʼuasii. Job adua ɓumina sakayua ne miadaa ɓaesii, ichia Jeowa akawa ɓuẽbasii. Dachi Akõreba mau unupeɗa kĩrajʉʉ ãrĩã koɓeesii Joba aseɗa baɗaɗeeba.

Maaɗakare, Satanasba õbea ẽbẽrarã bʉekasia Jobmaa kachiruaɗe ɓaebii baita. Ãchia naka jarasiɗaa Jobmaa: “Bichi kachirua asepeɗa chũpea koɓeesiiɗeeba, Dachi Akõreba kastikamaa ɓuu”. Mauɗe Joba naka a ɓoosii: “Mʉa chi miadaa ɓuu asewẽe”. Maaɗakare Joba kʉ̃risia ɓoosii Jeowaburu chi kachirua ɓuu neebisii ichimaa mauɗe ichi ome Dachi Akõre jipa niiwẽe a kʉ̃risia ɓoosii.

Kũudrãa Elihú abadauba joma chũpea ũri koɓeesii. Makarã ichia naka jara ɓoosii: “Machia chi ariɗe jaraɗawẽe. Jeowa aude biʼia nii, dachia kʉ̃risiabadau aude, ichiara chi kachirua asekama. Jeowaba joma unubarii mauɗe ẽbẽrarã chi kachirua neeruuɗe ichia aiɗabarii”.

Jeowa siɗa Job ome beɗeaɗa baɗa. Ichia naka aɗa basii Jobmaa: “¿Bichi sama ɓosma mʉa iujãa bajãa baara wauka ɓoosiiɗe? ¿Sakayua bichia jara ɓua mʉ jipa niiwẽe apeɗa? Bichia jara ɓuu adua niiɗeeba”. Joba naka aɗa basia: “Mʉa chi ariɗe jarawẽe basii. Perdona keraaba mʉa atua jara ɓoosiiɗeeba. Mʉa yataɗeeɗa bichi ʉ̃rʉbena ũri ɓoosii, maamina iɗi mʉa aude kawaaruu bichi saka nii maabae bichia joma asei ɓuu”.

Joma chi kachirua koɓooɗa acabasiiɗe, Jeowaba Job ẽpermaswẽa koɓeebisia mauɗe ichi unibaɗaɗeeba Jeowaba aude deasii. Job año ãrĩã chokae nibaɗa mauɗe kĩrajʉʉ nibasii. Jeowaba biʼia ɓuu deaɗa baɗa ichi ũri merãa nibasiiɗeeba, ichi baita facilwẽe ɓosmina. ¿Bichi Job kĩraka nibai ɓubaaka chi kachirua neeruuɗe biɗa?