Naka aseɗaima apeɗaaɗa Jeowamaa

Mes ome baɗakare chi israelitarã Egiptoɗebena wãsiɗauɗe, ãchi chi mode Sinaí abadauɗe neeɗapeɗa maabea mama duaneesiɗau. Jeowaba jaraɗa Moisesmaa ʉtaa wãs jãu modeɗaa mauɗe naka jaraɗaa: “Mʉa israelitarã karebasia. Ãchia mʉ beɗea ũriiduubʉrã mauɗe mʉ Leyɗe jara ɓuu joma asebudaubʉrã, ãchirã mʉʉɗe baɗayua”. Moisés modeɗebena neeɗakare, chi Jeowaba jaraɗa baɗa israelitarãmaa joma jaraɗa. ¿Ãchia kãare jarasiɗaa? “Joma aseɗayua chi Jeowaba daimaa jaraaruu”, a jara panasii.

Maabae, Moisés chi modeɗaa waya wãsia. Mama Jeowaba naka jarasia: “Día õbeauɗe, mʉ ẽbẽrarã ome beɗeayu. Ãchimaa jaraba ãchi chi mode Sinaiɗaa wãɗaabayu”. Moisés modeɗebena neepeɗa jaraɗa chi israelitarãmaa ũri kopaneeɗayu chi Jeowaba jaraaruu.

Chi día õbea basiiɗe, israelitarãba chi mode ʉ̃rʉ unupeɗaaɗa bã ɓaeruu mauɗe jʉ̃rʉara pãriu koɓeeburuu. Mauɗe ũrisiɗau bã mechia toburuu mauɗe kachu chaaruu kĩra toburuu. Maaɗakare Jeowa mode ʉ̃rʉ aoko kuɓuuɗe eɗaa neesii. Chi israelitarã ãrĩã perasiɗauɗeeba chi kakua uri kopaneesii. Chi mode mechibena uri koɓeepeɗa mauɗe ãrĩã tawa koɓooɗa. Chi kachu chaaruu kĩra aude mechibena chaarea ũripeɗaaɗa. Maabea Dachi Akõreba naka jaraɗaa: “Mʉ Jeowabʉ. Machia junebena dios kʉ̃riaɗaabayua”.

Moisés chi modeɗaa waya wãsii, maabae mama Jeowaba deaɗa ichimaa chi Ley israelitarã kãare aseɗai ɓuu Jeowa kʉ̃riaɗai baita mauɗe saka nureaɗayu. Moisesba chi Ley ɓʉpeɗa leasii chi israelitarãmaa. Ãchirãba naka jarasiɗaa: “Daiba aseɗayua joma Jeowaba jaraburuu”. ¿Ãchia joma ase panasaaka chi Jeowaba jaraɗa baɗa?