Rut Noemí ome

Tiempo ãrĩã ba ɓoosii Israelɗe ãrĩã jarrbisia duanaɗa. Mauɗeeba, wẽra israelita chi trʉ̃ Noemí, chi kima mauɗe chi warr ome niɗau baare panaɗe wãsiɗau chi iujãa Moabɗaa. Maaɗakare, Noemí kima biuɗa basia. Chi warrarã wẽra ome niɗau wẽrarã Moabɗebena baara kimabaraapeɗaaɗa: aɓa chi trʉ̃ Rut mauɗe aɓa Orpá. Maaɗakare chi warrarã Noemiɗe biusiɗau. ¡Miichuburi!

Noemiba ũrisiiɗe Israelɗe maucha jarrbisia wãʼãe basii, waya ichi druaɗaa wãɗa basii. Rut Orpá ome ichi baara wãsiɗau, maka ɓumina oɗe niɗauɗe Noemiba naka jaraɗa: “Machirã wẽra bia ãrĩã niɗau mauɗe ãyu bia ãrĩã nibasiɗau. Mʉa kʉ̃ria ɓuu machi waya kimabaraaɗayua. Wã́sturu Moabɗaa machi deeɗaa”. Maka ɓumina chi wẽrarãba naka jarasiɗau: “Daiba bichi ãrĩã kʉ̃ria ua niɗau, du aɓa ɓui kʉ̃riaɗawẽma”. Noemiba waya jarasii, ãchi druaɗaa wã́sturu apeɗa. Orpá wãɗa baɗamina, Rut ɓeesii. Noemiba Rutmaa naka jarasii: “Orpá ichi druaɗaa wãsii waya ichi diosna kʉ̃riaɗe. Wãse ichi baara bichi dana deeɗaa”. Mauɗe Rutba jarasii: “Mʉa bichi ɓuiwẽa. Bichi puuru mʉ puuru bayua, mauɗe bichi Dios siɗa mʉ Dios bayua”. ¿Noemí saka senti ɓoosaama Rutba jãka jarasiiɗe?

Rut Noemí baara Israelɗaa neesiɗauɗe, jãma ʉ̃rãburu chi cebada waraa ɓoosii ɓʉetai baita. Día aɓa ɓuuɗe, chi Boazɗe uu nuɓuuɗebena ɓeaɗa baɗa Rutba adauɗe wãsii. Boaz Rahab warr basii. Boazba ũriɗa baɗa Rut Moabɗebena, ichi Noemí ɓuiwẽe basii, bari ãbua nibaɗe wãɗa. Boazba jaraɗa ichi baita traja nureemaa chi cebada aude ɓuiɗayua Rutba adauɗe neei baita.

Ẽsabuɗe, Noemiba Rutmaa wiɗisii: “¿Iɗi sãu druaɗe trajamaa ɓosma?”. Rutba jarasii: “Boaz druaɗe”. Noemiba jarasii: “Boaz mʉ kima deɗabena baɗa. Ara jãka trajaba ichi uu nuɓuumare waabena wẽrarã baara. Jãma biʼia nibayua”.

Rut apii traja nibaɗe wãsii Boaz druaɗe chi cebada waraa koɓooɗa acabasiiɗaa. Boazba unusii Rut wẽra biʼia nibapeɗa mauɗe biʼia ãrĩã trajabarii. Makaeɗe, mukĩra biuruuɗe warrarã wãʼãe nibasiibʉrã, ichi deɗabena chi pẽdrãa ome kimabaraai ɓoosia. Mauɗeeba Boaz kimabaraaɗa Rut ome. Warr aɓa adausiɗau mau chi trʉ̃ Obed trʉ̃apeɗaaɗa. Año ãrĩã baaruuɗe, Obed chi papito chi rey Davidɗe baɗa. Chi amikarã Noemiɗe kĩrajʉʉ ãrĩã nureasii. Maabae naka jarasiɗau: “Jeowaba bichimaa naa Rut deasii, ichi biʼia ãrĩã nii bichi ome. Jãabae bichi ãicheke baraasii. Ara kiruma aɗaima Jeowamaa mau kakua”.