Gedeonba chi Madianɗebenarã choroaɗa

Maaɗakare, chi israelitarãba maucha Jeowa ida ɓupeɗaaɗa basia maabae chi junebena dios kʉ̃riasiɗau. Siete añoɗe, ẽbẽrarã Madianɗebenarãba chi ãnimara chekerã israelitarãɗe baɗa orroakuasiɗau mauɗe chi ãchia uupeɗaaɗa baɗa siɗa pãatukuasiɗau. Ãchi puʼuabiɗaamaaba, chi israelitarã iujãa choɓeaɗe eɗa mirukuaɗapeɗa mauɗe eaɗaa biɗa miru wãsiɗau. Maabae, Jeowamaa wiɗisiɗau ãchi karebabiyua. Mauɗeeba Jeowaba ángel bʉeɗa baɗa jarabiyua kũudrãa Gedeón abadaumaa: “Jeowaba bʉdu jʉrʉɗa baɗa chĩobarii choroma nibai baita”. Gedeonba ichimaa wiɗisia: “¿Saka mʉa israelitarã karebai ɓua mʉ mechibena niiwẽeɗe?”.

Gedeonba biʼia kuitaa kʉ̃ria koɓoosii Jeowaba ichi jʉrʉ adauɗa baɗa. ¿Kãare asesaa? Ichia oeja kara ɓiɗĩika ɓuu jeeɗa kuɓupeɗa maabae Jeowamaa naka jarasii: “Nu dapeɗeeɗa chi oeja kara ɓekea kuɓuubʉrã mauɗe chi jeeɗa põesãa kuɓuubʉrã, mauba kuitaayua bichia mʉ jʉrʉɗa baɗa chi israelitarã karebayua”. Norema, chi oeja kara ãrĩã ɓekea koɓoosii, maka ɓumina chi jeeɗa põesãa koɓooɗa basia. Maabae, Gedeonba Jeowamaa wiɗiɗa baɗa dapeɗeeɗa oeja kara põesãa koɓeebipeɗa mauɗe chi jeeɗa ɓekea koɓeebiyua. Chi Gedeonba wiɗiɗa baɗa maucha ara jãka koɓoosia. Makarã jãabaeburu ichia kawaɗa baɗa Jeowaba ichi jʉrʉsii. Mauɗeeba ichia chi soldaorã jʉrʉkuasii Madianɗebenarã ome chĩoɗe wãuriɗayua.

Jeowaba Gedeonmaa naka asia: “Mʉa chi israelitarã karebakuayua choroabii baita. Soldaorã ãrĩã bara panuu bẽrã, ãchia kʉ̃risiaɗai ɓuu ara ãchiɗéburu choroasiɗau. Pera duanuumaa jaraba deeɗaa wãɗai baita”. Maabae 22.000 mukĩrarã wãurisiɗau mauɗe 10.000 paneesiɗau. Maabae Jeowaba naka jaraɗa baɗa: “Abiɗa ãrĩã duaneesii. Do chekeɗaa uaɗoba jãabae jaraba bania doɗai baita. Chi bania domaa duanuumisa ochia kopanuu chi kĩramaa nuree neebudauɗe maarã baareburu ɓeeba”. 300 mukĩrarãburu ochia kopanasii bania do duanuumisa. Jeowaba jaraɗa jari chi mukĩrarã ɓiɗĩika nureerã baaraburu choroaɗayua 135.000 mukĩrarã Madianɗebenarã ome.

Ẽsebuɗaa, Jeowaba Gedeonmaa naka asia: “Jãabaeburu chĩoɗe wã́sturu Madianɗebenarã ome”. Gedeonba mukĩrarãmaa paka kachu deɗekasii mauɗe ʉ chi eɗa bakuru aoko kuɓuu ɓeasii, maabae naka jarasii: “Mʉ ochiaɗapeɗa maabae asébaɗa mʉa aseeruu”. Gedeonba ichi kachu chaapeɗa, chi ʉ ãritapeɗa, chi bakuru aoko kuɓuu ʉtaa ʉapeɗa maabae ɓiasii: “¡Chi neko Jeowaɗe mauɗe Gedeonɗe!”. Chi 300 mukĩrarã araɓau asesiɗaa. Chi Madianɗebenarã mechia peraɗapeɗa maabae barikia pira bara ɓeesii. Ãrĩã ororoa koɓoosii bẽrã, ara ãchi du aɓaburu beakuasiɗau. Jeowaba wayaburu chi israelitarã aiɗakuasii ãchi kĩramaa nuree choroaɗai baita.