¿Jefteba kãare deai asaa Jeowamaa?

Chi israelitarãba maucha Jeowa ɓuipeɗaaɗa maabae junebena diosdu kʉ̃ria duaneesiɗau. Maka ɓumina, maarã diosnaba ãchi karebaɗaabasii Ammonɗebenarãba ãchi beakuayua neebachiɗauɗe. Chi israelitarã año ãrĩã́turu naka sufribachiɗau. Maaɗakare, Jeowamaa naka asiɗau: “Daiba miadaa waupeɗaaɗa. Muchuburia dai kĩramaa nuree juaɗebena karebase”. Chi israelitarãba imagen joma ãrikuaɗapeɗa maabáeburu Jeowadu kʉ̃ria duaneesiɗau. Ichia waaburu ida sufribi kʉ̃riawẽe baɗa.

Mauɗeeba israelitarãba chĩo nibabarii chi trʉ̃ Jefté jʉrʉ adausiɗau. Ichíturu chi líder basii Ammonɗebenarã ome chĩoɗe wãɗayua. Jefteba Jeowamaa naka asia: “Bichia dai aiɗaburuubʉrã chĩoɗe wãbudauɗe choroaɗai baita, mʉ waya neeburuuɗe, chi mʉ deɗabena awara mʉ naa irsibiɗe neeburuu, máturu mʉa bichimaa deayua”. Jeowaba ũrii ɓoosii chi Jefteba ichimaa ʉtaa wiɗiɗa baɗa, maabae aiɗasii chĩoburuuɗe choroai baita.

Jefté deeɗaa waya neesiiɗe, deɗabena awara ichi naa irsibiɗe neesii chi kau baɗa. Máturu aɓaburu kau nibasii. Ichi awara neepeɗa pandereta chaa kuɓuuba baera neeɗa baɗa. ¿Maabae kãare aseiba Jefté? Ichia acordasii Jeowamaa jaraɗa baɗa maabae naka asii: “¡Ɗuuya, mʉ kau cheke! Mʉ corazón puʼua kuɓuu bichi kakua. Mʉa deai aɗa baɗa Jeowamaa, jãuɗéburu tabernáculo Siloɗebenaɗaa bichi bʉeburua ichi baita trajayua”. Ichi kauba naka jarasii: “Akõre, bichia Jeowamaa maka jaraɗabʉrã, ara jãka aseyua. Naa modeɗaa mʉ bʉeɗauba mes ome mʉ amikarã baara. Mau kaaɗeburu, mʉ tabernaculoɗaa trajaɗe wãyua”. Chi Jefté kau kĩra jipa nibapeɗa tabernaculoɗe traja ɓeesii ichi biuruuɗaa. Añocha chi amikarãba Siloɗaa ichi ochiaɗe wãbachiɗau.